Tritani shfaqet sërish misogjinist. Sulmon “gratë” e Ramës

Tritan Shehu, ish deputeti demokrat, ka sulmuar Kryeministrin Rama për urdhrin e dhënë, për zëvendësimin e gjithë drejtorëve burra në Shkodër, me gra. Urdhrin e Ramës për shkarkimin e të gjithë drejtorëve meshkuj në drejtoritë rajonale në Shkodër , Shehu e ka cilësuar si tentativë për rikthim “ të virgjërisë” në Rilindje duke përdorur edhe figurat mitologjike të Afërditës, perëndeshës së dashurisë, në ishullin e Lemnos, duke sulmuar gjininë femërore për marrjen e këtyre posteve. Megjithatë Shehu tha se kjo gjë nuk do të zgjasë shumë, pasi për bëmat e Rilindjes nuk ia kanë fajin as burrat dhe as gratë, por mënyra e funksionimit të partisë.

“Rama kërkon ta kthejë Rilindjen në ishullin e Lemnos! Shumë interesante, për t‘i kthyer Rilindjes “virgjërinë” Kryeministri qenka frymëzuar nga Ishulli i Lemnos se mitologjisë greke, duke tentuar të marrë për vete rolin e Afroditës.

Një ishull ky vetëm me gra, ku burrat u asgjësuan nga ajo Perëndi.Por dua t’i kujtoj se kjo nuk zgjati shumë e burrat u shfaqën përsëri aty.Për bëmat e Rilindjes nuk e kanë fajin as burrat e as gratë, por mënyrat e ndërtimit, të marrëdhënieve, funksionimit, objektivave të saj. Këto duhen ndryshuar, por kjo nuk bëhet duke imituar Ishullin e Lemnos.”- shkruan Shehu në Facebook.

Kryeministri Rama, gjithmonë është shprehur pro femrave në administratë, duke i vlerësuar për përkushtimin e tyre në punë. Gjatë fushatës zgjedhore të 30 qershorit, Rama tha se nuk do të preket asnjë femër nga shkarkim në administratë, ndërsa vetëm 2 ditë më parë urdhëroi që të gjithë drejtorët meshkuj në Shkodrës të jepnin dorëheqjen dhe zëvendësimi i tyre të bëhej me femra.

Shehu e quan “eveniment” fitoren, por Mitsotakis: Veto integrimit të Shqipërisë

Tritan Shehu ka nxituar për të bërë urimin e tij si ish-lider i PD-së, për fitoren e pritshme të së djathtës në zgjedhjet e parlamentare të parakohshme në Greqi. Partia konservatore Demokracia e Re, e Kyriakos Mitsotakis, pritet të shpallet fituese në këto zgjedhje, pasi sipas sondazheve ka marrë rreth 38% të votave. Për këtë arsye, Tritan Shehu, reagon i pari nga e djathta shqiptare, dhe i shpreh urimet Mitsotakis për fitoren. “Urimet më të mira për ND e Kyriakos Mitsotakis, Kryeministër i ri i Greqisë, tashmë përsëri pilastër e europianizmit”, shkruan ndër të tjera Shehu.

Me tej, në urimin e tij shpërndarë në rrjetet sociale, Tritan Shehu e cilëson lajm pozitiv zgjedhjen e Mitostakisit në krye të qeverisë greke, jo vetëm për Europën, por edhe për integrimin e Shqipërisë në union. “Një mesazh ky shumë i rëndësishëm nga populli grek, në mbrojtje të vlerave të mëdha, bashkjetesës, paqes e forcave zhvilluese të BE. Kjo është një ngjarje e rëndësishme për Rajonin tonë, që aspiron veçse rrugën e integrimit, ku padyshim roli pozitiv i Greqisë tashmë do të forcohet. Fitorja e ND ësht ënjë eveniment pozitiv edhe për Shqipërinë, qoftë në planin bilateral, qoftë dhe në mbështetjen ndaj procesit tonë të integrimit në tërësi”, shkruan ndër të tjera ish-deputeti i PD-së.

Por a është gjithç kaq mirë sa thotë Tritan Shehu? A do të jetë Mitsotakis mbështetës i integrimit të Shqipërisë në BE? Këtë nuk e dim ta themi akoma, pasi është ende herët. Por në një deklaratë të kreut të Demokracisë së Re, bërë gjatë fushatës për zgjedhjet në Parlamentin Europian, Kyriako Mitsotakis u shpreh se do të vendoste “veton” për Shqipërinë dhe Maqedoninë e Veriut. “Do i qëndroj të drejtës për të vënë veton ndaj Maqedonisë së Veriut dhe integrimit të Shqipërisë për në BE. Unë do të mbroj të drejtat e pakicës kombëtare greke. Dhe nëse nuk respektohen, Shqipëria të harrojë kursin e saj evropian” deklaroi ai gjatë një fjalimi në Selanik gjatë muajit maj, Kyriakos Mitsotakis.

Tritani dhe i vetëm trim në “luftë”: Të shkrihet parlamenti

Në një kohë kur Edi Rama, Ilir Meta dhe Lulzim Basha japin shenja për dialog, nga brenda PD-së ka ende zëra që nxisin radikalizmin. Ai është ish-deputeti Tritan Shehu, i cili duket se është zëri i vetëm luftarak në kampin e të djathtës. Me një status në rrjetet sociale Tritan Shehu kërkon shpërndarjen e parlamentit, pas dekretit të Ilir Metës për anulimin e zgjedhjeve të 30 qershorit.

“Ky parlament është jo vetëm antikushtetues, por dhe i rrezikshëm. Meta i ka të gjitha arsyet dhe kompetencat ta shpërndajë. Që prej nxjerrjes së Dekretit legjitim dhe të domosdoshëm të tijpër anullimin e datës së zgjedhjeve lokale të 30 qershorit, po imponohet hapi i shpërndarjes së Kuvendit”, shkruan Shehu. Por, duket e habitshme, që Tritani, si i vetëm zë luftarak, artikulon “shpërndarjen e parlamentit”, ku deri më tani këtë gjë nuk e ka thënë as Lulzim Basha apo drejtues të tjerë të opozitës.

Në fakt, duket sikur Tritan Shehu po artikulon një mendim, që ndoshta nuk është i tij. Ai është një prej bashkëpunëtorëve më të vjetër dhe besnik i Berishës. Ku i fundit sot nuk foli, por foli Tritani. Njësoj është, po prapë ishte zë i vetmuar.

Imagjinata e Tritanit, Kuvendi i shkatërruar

Tani që nuk është më pjesë e parlamentit për shkak se ka djegur mandatin, ish deputeti Tritan Shehu e cilëson atë një landfill, një vend ku mblidhen plehrat.

Bashkë me foton ish deputeti Shehu kërkon shpërndarjen sa më parë të parlamentit pasi, sipas tij, ata që ndodhen aktualisht aty i kanë shkaktuar shumë dëme demokracisë.

““Landfilli” antikushtetues i ri i Shqiperise. Eshte momenti i fundit per te gjithe ata qe jane, si dhe per grupin e 42 ”pupaceve”, qe i kane futur si “ceten” e “40 Hajduteve te Ali Babait”, te braktisin kete ngrehine sa me shpejt. Boll deme i kane krijuar deri me tashti demokracise shqiptare qofte dhe duke ndejtur aty, pavaresisht disa retorikave apo votimeve te pilotuara.

Neser do te jete teper vone per te rivendosur dinjitetin e tyre tashme te komprometuar, si per dhe per nje mundesi tjeter kontributive ne zhvillimet e ardheshme.

Eshte koha e fundit per reflektim e veprim!”, shkruan Shehu, i cili duket më shumë sikur këtë mesazh e ka për presidentin Meta të cilit i kërkon të shpërndajë parlamentin.

Në fakt presidenti Meta dha sinjalin e parë, të premten, për shpërndarjen e parlamentit pasi iu drejtua KQZ me një kërkesë zyrtare përmes të cilës kërkonte informacion në lidhje me deputetët e pranishëm në Kuvend, për shkak se Kuvendi duhet të ketë 140 deputetë dhe aktualisht ka vetëm 122. Por deri tani ka zhvillime të reja në këtë drejtim.

PD: Rama kërcënon BE me “Shqipërinë e Madhe”, por po dëmton gjithë rajonin

Ish deputeti i PD-së, Tritan Shehu e ka cilësuar si një kërcënim ndaj Bashkimit Europian tezën e Kryeministrit Rama për krijimin e “Shqipërisë së madhe”, por realisht nga kjo po dëmtohet vetëm Shqipëria, Kosova dhe vetë stabiliteti i rajonit të Ballkanit.

Kërcënimin me tezën e “Shqipërisë së madhe” e bën vetëm për pushtetin e tij, thotë Shehu, ndërsa shton se po ta donte vërtet Kosovën nuk do ndihmonte në përçarjen e territorit të saj dhe të bëhej pengesë më shumë për liberalizimin e vizave.

“Edi Rama po i bën një dem të madh Kosovës, dialogut të saj me Serbinë dhe njohjeve ndërkombëtare me kërcënimet për Bashkimin me Shqipërinë, ose siç e quajnë jo miqtë tanë për “Shqipërinë e Madhe”. Pasi përdori krimin për pushtet tani Edi Rama po përdor Kosovën për të kërcënuar Europen vetëm e vetëm për të mbrojtur pushtetin e tij. Nëse do të donte vërtet Kosovën Edi Rama nuk do të mbështeste ndarjen e saj, nuk do tu vendoste traun kosovarëve e shqiptarëve, Shqipëria nuk do të ishte vendi i dyte pas Serbisë me tarifat më të larta për Kosovën, dhe nuk do bëhej një shkak më shumë për pengimin e liberalizimit të vizave ndaj Prishtinës, Përdorimi i Kosovës për interesa personale është kriminale. Teza e loja “nacionaliste” e gjoja bashkimit të Shqipërisë me Kosovën është në dëm të perspektivës europiane të Shqipërisë, Kosovës, të Rajonit e të stabilitetit te tij. Kjo demagogji shkon ndesh me interesat tona kombëtare të bashkimit real të të gjithë shqiptarëve nesër, si vende pa kufij në BE.” – shkruan Shehu në Facebook.