Vasjari: Anomalitë kushtetuese krijojnë situata absurde, Manja: Nuk ka bllokime

Kreu i Komisionit të Ligjeve, Ulsi Manja tha se çelësi i reformës në drejtësi është garancia e ofruar nga SHBA dhe BE dhe se mazhoranca nuk do lejojë bllokim të sistemit Kushtetues, pavarësisht veprimeve që mund të ndërmarrë presidenti dhe kushdo tjetër.

“Në një republikë Parlamentare dihen zgjidhjet. Çelësi i suksesit të reformës në drejtësi janë SHBA dhe BE. Edhe në këtë fazë vijojmë të jemi bashkudhëtarë me ta. Nuk do ta lejojmë që sistemi ynë kushtetues të bllokohet”-tha Manja.

Ndërsa për analistin Arian Vasjari situata është shqetësuese pasi ka një anomali në Kushtetutë dhe se kjo mund të bëhet precedent në të ardhmen për ta shfrytëzuar. Vasjari shtoi se Parlamentit i duhet me patjetër të ndërtojë një urë të qartë komunikimi me presidentin.

“Mandati i gjyqtarit fillon pas betimit tek Presidentit. Betimi është ceremonial dhe simbolik, sepse ai që shkon atje pranon një sistem vlerash të përbashkëta të kësaj shoqërie. Ne jemi në vakum dhe unë nuk e konceptoj dot që Arta Vorpsi të shkojë në zyrë pa u betuar para presidentit. Kur themi se është një situatë absurde, ne po krijojmë një precedent dhe ata që vijnë pas Metës ata gjejnë një zgavër dhe mund ta përdorin. Kjo më shqetëson. Ky është një detyrim i këtij parlamentit dhe maxhorancës, të kërkojë ura bashkëpunimi me presidentin. Problemi është se a do të ngremë Gjykata Kushtetuese brenda këtij absurditeti”-tha Vasjari.

Betimi i anëtarëve, Manja zbulon “skenarët” që anashkalojnë Metën

A e merr dot detyrën Arta Vorpsi pa u betuar te Meta? Kjo pyetje shkaktoi diskutime e debate të forta mes të ftuarve në emisionin “Real Story”. Kreu i Komisionit të Ligjeve, Ulsi Manja tha se betimi te Presidenti është një moment ceremonial i rëndësishëm, por nuk lidhet me fillimin e mandatit kushtetues për anëtaret e Gjykatës Kushtetuese. Manja theksoi se nëse anëtaret e reja nuk thirren nga Meta për të bërë betimin, ato duhet të shkojnë në Gjykatën Kushtetuese dhe ta marrin atë.

“Betimi është një moment i rëndësishëm se lidhet me besueshmërinë që një anëtar ka ndaj Kushtetutës, por mbetet një element ceremonial. Kjo do të thotë se betimi nuk është element konstituimi që të lidhet me fillimin e mandatit kushtetues. Betimi nuk mund të bllokojë një funksion kushtetues dhe këtë qëndrim ka mbajtur edhe Komisioni i Venecias në një precedent në Poloni. Unë shpresoj që Meta të mos e bëjë këtë, por nëse ndodh anëtari shkon në Gjykatën Kushtetuese dhe mbledhja plenare e gjyqtareve të Gjykatës Kushtetuese konsiderohet si nisja e mandatit të anëtarëve të Gjykatës. Presidenti nuk e ka dekretuar Arta Vorpsin, por ajo konsiderohet e emëruara e parë e Gjykatës Kushtetuese. Vorpsi konsiderohet e emëruar për efekt të Kushtetutës dhe të ligjit. Jemi të detyruar të zbatojmë Kushtetutën. Po të shkojmë në absurditet, na duhet të pranojmë edhe atë letrën. Sjellja e Presidentit nuk është kushtetuese” tha Manja.

Për deputetin e opozitës Ralf Gjoni betimi është një proces kushtetues dhe se anëtarët nuk mund të nisin punën pa u betuar. Gjoni tha se nëse Meta nuk i thërret të betohen Vorpsin së bashku me Toskën e Papajorgjin, atëherë shkon në përplasje të madhe e të fortë që shkon shumë më tej se zgjedhjet lokale të qershorit.

“Nëse Arta Vorpsi nuk thërritet nga Presidenti për betimin, edhe ajo urë e vogël komunikimi mes Kuvendit dhe Presidentit, shkatërrohet. Nëse Meta nuk thërret anëtaret e zgjedhura për t’u betuar, kjo do të çojë në një përplasje të madhe Kushtetuese, shumë më e fortë se ajo e zgjedhjeve lokale të qershorit” tha Gjoni.

PS i përgjigjet Metës: Do të mbash peng ngritjen e kushtetueses për një vit

Nga foltorja e Kuvendit, deputeti socialist dhe kryetari i Komisionit të Ligjeve, Ulsi Manja, e quajti tentativën e Ilir Metës për të bllokuar ngritjen e Gjykatës Kushtetuese, si konflikt të pastër politik. Manja foli të hënën gjatë seancës parlamentare, duke u shprehur se “Presidenti e lexon Kushtetutën politikisht e jo si garant i saj”. Ndaj, Manja i kërkoi Metës të çlirohet nga konflikti dhe të bashkëpunojë për të plotësuar vakancat e Kushtetueses.

“Sot është momenti të dëshmojmë seriozitetin e vullnetin politik për ta bërë funksionale kushtetuesen. Duhet të bëjmë detyrën tonë, kandidatët që na ofrohen për votim janë dy zonja që i bëjnë nder gjykatës Kushtetuese. Kemi një debat me Presidentin, si përherë na paraqetitet si debat kushtetues po në thelb është konfliktik i pastër politik, që kur Presidenti e lexon kushtetutën politikisht e jo si garant i saj. Në rastin e kushtetueses duhet të çlirohet nga mentaliteti i konfliktit politik dhe të bashkëpunojë për plotësimin e vakancave në Gjykatën Kushtetuese”, tha Manja.

Më tej, deputeti socialist, dha dhe arsyet e vërteta pse, sipas tij, Meta po bllokon ngritjen e Gjykatës Kushtetuese. “Doja t’i bëja një pyetje presidentit: E supozojmë se do të zbatojmë radhën. Të parin e ka dekretuar presidenti, të dytin po e votojmë ne sot, radha nuk i shkon presidentit për të tretin, e ka Gjykata e Lartë por që nuk e voton dot. Atëherë çfarë do bëjmë sipas presidentit do bllokojmë Gjykatën Kushtetuese dhe për një vit? Arsyetimi i presidentit nuk është dashamirë por dashakeq. Është momenti që këto dy zonja që do t’i votojmë pak më vonë, t`i mbështesim”, tha Manja.

Të dielën, Presidenti publikoi letrën e plotë, ku argumentonte pezullimin e procesit të zgjedhjes së anëtarit të dytë të Gjykatës Kushtetuese. Meta citonte disa herë faktin që sipas Kushtetutës është përcaktuar se plotësimi i vakancave bëhet sipas radhës, President, Kuvend dhe Gjykatë e Lartë. Në kushtet kur mungon Gjykata e Lartë, gjasat janë që Ilir Meta do e përdorte si alibi për të bllokuar Gjykatën Kushtetuese.

Pra, nëse Kuvendi do të votonte vetëm një anëtar të hënën, duke ndjekur procedurën e sipërpërmendur, alibia e Metës për të kundërshtuar më pas zgjedhjen e anëtarit të dytë prej tij do të forcohej, pasi radha, pas Kuvendit, do të ishte e Gjykatës së Lartë, dhe jo e presidentit. Atë që Ulsi Manja e tha sot, Realstory.al e paralajmëroi të dielën, bllokimi i Gjykatës Kushtetuese nga Presidenti duket i paramenduar. /Realstory.al/

KUSHTETUESJA, META AKUZON KED. POR A KISHTE PARASHIKUAR BLLOKIMIN?

Të hënën, zgjidhen dy anëtarët e “Kushtetueses”

Kuvendi voton të hënën, më datë 11 nëntor, dy anëtarët e tij për të plotësuar vakancat në Gjykatën Kushtetuese. Kryetari i Komisionit të Ligjeve, Ulsi Manja tha se Kuvendi do ushtrojë të drejtën e tij në bazë të rregullores për t’i zgjedhur të hënën, ndërsa në lidhje me kërkesën e presidentit Meta për pezullim të procesit tha se “një letër nuk ka fuqinë të anulojë një veprim juridik”. Manja tha se Kushtetuta është e qartë në këtë pikë dhe vepron njësoj për të gjithë si për Presidencën, Kuvendin dhe Gjykatën e Lartë, në lidhje me afatin e zgjedhjes së anëtarit për plotësimin e vakancës në Kushtetuese dhe se si do të zgjidhet ai nëse një nga këto organe nuk vendos në kohë.

“Presidenti ka dërguar një letër ku kërkon pezullimin e dekretimit të vakancës së dytë që i takon presidentit, dhe unë nuk di që letra pezullon një veprim juridik. Kushtetuta flet shumë qartë. Secili nga institucionet kushtetuese të përfshira në procesin e kompozimit të Gjykatës Kushtetuese, dhe këtu e kam fjalën për Presidentin, Kuvendin dhe Gjykatën e Lartë nëse nuk e ushtrojnë këtë kompetencë brenda afatit 30 ditor kandidati i listuar i pari konsiderohet i emëruar dhe ky afat është afat prekluziv. Kuvendi i Shqipërisë ditën e hënë do të ushtrojë këtë kompetencë në përputhje me rregulloren e Kuvendit”, tha Manja.

Manja tha se Presidenti dhe Kuvendi kanë këndvështrime të ndryshme për mënyrën si e lexojnë Kushtetutën, ku fton Metën që ta lexojë atë me “frymën e zhbllokimit”.

“Kemi këndvështrime të ndryshme si gjykojmë Kushtetutën dhe Ligjin. Nga sot presidentit i ka skaduar afati 30 ditor për të dekretuar vakancën e dytë të shpallur prej tij për Gjykatën Kushtetuese. Unë e ftoj presidentit që në këtë fazë të procesit të plotësimit të vakancave Kushtetuese të lexojë kushtetutën në frymën e zhbllokimit të procesit”, shprehet Manja.

Presidenti Meta kërkoi më 7 nëntor, një ditë para skadimit të afatit, pezullim të procesit me arsyetimin se ishte shkelur Kushtetuta dhe se ai nuk mund të zgjidhte anëtarin e dytë pa folur ende Kuvendit. Vetë KED iu përgjigj menjëherë letrës së presidentit duke i lënë të kuptohet se ajo ka për detyrë vetëm të hartojë listat e kandidatëve dhe jo të pezullojë procese, afatet e të cilave janë të vendosura në Kushtetutë. Në këtë mënyrë pritet që mbrëmjen e 8 nëntorit, kur mbaron edhe afati i Presidentit për plotësimin e vakancës në Kushtetuese, të zgjidhet Arta Vorpsi, e cila renditet e para në listë.

Nis seanca për shkarkimin e Metës, Manja: Refuzoi Komisionin me gjuhë fyese, shkeli rëndë Kushtetutën

Ulsi Manja, ka lexuar raportin përfundimtar përpara deputetëve në seancën e posaçme, miratuar disa ditë më parë në Komisionin e Ligjeve, ku kërkohet ngritja e Komisionit Hetimor për shkarkimin e Presidentit të Republikës Ilir Meta. Manja u shpreh se Ilir Meta ka bërë shkelje të rënda kushtetuese. “Duke vlerësuar se me anulimin e datës së zgjedhjeve, Presidenti ka bërë shkelje të rëndë kushtetuese, 55 deputetë kërkuan shkarkimin e tij. Ky akt i Presidentit është në kundërshtim me parimet kushtetuese. Presidenti ka bërë disa shkelje kushtetuese. Komisioni i Ligjeve shqyrtoi këtë kërkesë, dhe vlerësoi se ajo është në përputhje me rregulloren e Kuvendit. Nga pikëpamja substanciale përmban shkaqe nga ato që përcaktohen në kushtetutë për të legjitimuar ngritjen e Komisionit Hetimor”, tha ndër të tjera Ulsi Manja.

Gjithashtu, Ulsi Manja u shpreh se Presidenti ishte vënë në dijeni për të folur në Komisionin e Ligjeve, por ai ktheu përgjigje me një shkresë denigruese dhe fyese. “Kam vënë në dijeni Presidentin e Republikës Ilir Meta në lidhje me datën për mbledhjen e Komisionit të Ligjeve, për të respektuar të drejtën e tij për tu përgjigjur. Shkresat së tij i është përgjigjur sekretarja, me gjuhë fyese, jo etike, me këtë shkresë Presidenti i Republikës dëshmoi qartazi se presidenti nuk kishte inters për të folur në Komisionin e Ligjeve. Komisioni ka konstatuar se: Presidenti ka nxjerr dekretin për miratimin e datës 30 qershor për mbajtjen e zgjedhjeve”, tha Manja.

Më tej, Ulsi manja u shpreh se dekreti i 10 qershorit, që anulonte zgjedhjet e datës 30 qershor, ishte i pavlerë dhe i paligjshëm, i rrëzuar nga KQZ dhe nga Kolegji Zgjedhor. “Ky akt i presidentit të republikës është i pavlerë. Sipas Kushtetutës presidenti nuk mund të zhvillojë kompetenca të tjera veç atyre që janë të përcaktuara në Kushtetutë. Në respektim të parashikimit kushtetues, se Shqipëria është Republikë Parlamentare, parlamenti mbështeti vijimin e procesit zgjedhor në datën 30 qershor, duke njohur si aktin e vetëm të ligjshëm dekretin e parë të presidentin. Në këtë rezolutë Kuvendi i Shqipërisë i bëri thirrje të zbatonin ligjin dhe Kodit Zgjedhor për të garantuar të drejtën kushtetuese për të zgjedhur strukturat e tyre drejtuese nëpërmjet zgjedhjeve”.

“Ka përgjime me 200 mijë euro të kërkuara copë”. Ulsi Manja, mesazh Metës

Kryetari i Komisionit të Ligjeve, Ulsi Manja gjatë konferencës për shtyp të mërkurën ku kërkoi që prokuroria të hetojë nxjerrjen e sekretit hetimor, tha ndër të tjera se ka edhe dosje me përgjime ku flitet për 200 mijë euro të kërkuara copë dhe për të cilën prokuroria e ka për detyrë të hetojë. Deputeti socialist nuk tregoi emra se për kë bëhet fjalë dhe kush është i përfshirë në këtë dosje.

Por kujtojmë se pak kohë më parë gazetari Artan Hoxha deklaroi se presidenti Meta ka kërkuar 200 mijë euro nga një biznesmen në fushatën e 2013.

“Ka pasur përgjime edhe me 200 mijë euro të kërkuara copë, të pazbardhura nga prokuroria. Shpresojmë që SPAK dhe BKH t’i zbardhë ato sa më shpejt”, tha ai.

Manja më tej i çoi një mesazh edhe kryedemokratit Lulzim Basha.

“Ka edhe dosje të tjera, 1 miliard USD lobime nga kryetari i saj. Është ora që prokuroria dhe agjensitë e zbatimit të ligjit të flasin me gjuhën e së vërtetës. Kushdo i përfshirë në vepra penale të marrë ndëshkim sipas ligjit. Të mos e mbarsin opinionin publik me gjëra të panevojshme”, shtoi ai.

Përgjimet e fundit Dako-Avdylaj:

Ulsi Manja: Të hetohen dhe të dënohen prokurorët dhe oficerët që nxorrën sekretin

Kryetari i Komisionit Parlamentar të Ligjeve kërkoi në një konferencë për shtyp që prokuroria të nisë hetimin dhe të vërë para ligjit ata prokurorë apo oficerë gjyqësor që kanë nxjerrë në publik sekretin hetimor.

Ai tha se nxjerrja e sekretit hetimor është vepër penale. Sipas Ulsi Manjës përdorimi i dosjes 339 nga Partia Demokratike, kujton kohërat e errëta të diktaturës kur njerëzve i bëhej gjyq publik.

“Jam i shqetësuar për dy gjëra. Është koha që prokuroria dhe policia gjyqësore të vlerësojnë seriozisht çështjet e daljes në publik të sekretit hetimor dhe të kthehen në hullitë e zbatimit të ligjit penal. Jo vetëm për personat e dosjes 339 por për çdo person tjetër dhe të hetojë të gjithë ata prokurorë dhe oficerë që kanë braktisur misionin që i ngarkon kushtetuta duke i marrë dhe duke i çuar dosjet penale nën hetim në zyrat e PD-së duke thyer rëndë sekretin hetimor.

Për të gjitha ata që janë juristë e dinë shumë mirë që sekreti hetimor është vepër e dënueshme sipas kodit penal.

Prokuroria e ka për detyrë që të hetojë autorët e përfshirë për vepra penale, edhe brenda rradhëve të veta.

Jam i shqetësuar për përdorimin politik të dosjes 339 nga PD e cila ka dalë në rrugë dhe po e kthen në një gjyq publik si në kohërat më të errëta të diktaturës”, tha Ulsi Manja, duke iu referuar përgjimeve të dalë në gazetën gjermane Bild.

Përgjimet e fundit Dako-Avdylaj: