Një aksident i rëndë ka ndodhur mesditën e së shtunës në Lungomare të Vlorës, ku një makinë ka përplasur një fëmijë 10 vjeç.
Ngjarja ka ndodhur në afërsi të zonës së Ujit të Ftohtë.
Fëmija ndodhet në spital të Vlorës, ndërkohë që policia ka shkuar në vendngjarje dhe po heton shkaqet e aksidentit.
Mbrëmjen e të enjtes Kryeministri Edi Rama ka publikuar foto nga transformimi që po i bëhet Bulevardit “Ismail Qemali” në Vlorë. Shefi i qeverisë në një postim në rrjetet sociale, shkruan se “pak nga pak po del në dritë dhe Bulevardi “Ismail Qemali”, i cili ka qenë prej dekadash në degradim dhe zymtësie të pistë.
“Pak nga pak po del në dritë edhe Bulevardi “Ismail Qemali” në Vlorë, ku pas dekadash degradimi e zymtie të pistë, po rritet fuqia tërheqëse e qytetit turistik, vlera e apartamenteve e njësive tregtare, mundësitë e punësimit e të vetëpunësimit përmes shërbimeve, interesi për investime të mëdha private në turizëm”, shkruan Rama.
Më tej, kryeministri Edi Rama shprehet se “gur gur bëhet mur”, duke përballuar padurimin e vlonjatëve, ndërsa paralajmëron një tjetër investim të madh për qytetarët e Vlorës. “Gur gur bëhet mur e mur mur bëhet kalaja, duke përballuar padurimin epik të vlonjatëve dhe sharjet e përqeshjet e atyre që për çdo punë kanë një llaf të keq për të thënë. Së shpejti Sheshi i Ri i Flamurit dhe të tjera akoma…Vlora që Duam, Shqipëria që Duam”, shkruan Rama.
Policia e Vlorës ka bërë të mundur arrestimin e një personi, i cili prej 10 vitesh i kishte shpëtuar drejtësisë. Gjatë aksionit të koduar “Lapardhaja”, polica ka vënë në pranga shtetasin Sandër Likja, 31 vjeç, i cili është akuzohet për pjesëmarrje në grup kriminal dhe trafikim të lëndëve narkotike. 31-vjeçari u arrestuar pas informacioneve në rrugë operative se ai fshihej në fshatin Lapardha të Vlorës.
Sandër Likja ishte kapur në 2009 nga policia italiane me gomone në të cilën transportonte drogë dhe u dënua në mungesë nga drejtësia italiane me 15 vite burg. Gjatë atij aksioni policia zbuloi dhe shkatërroi të gjithë grupin kriminal që çoi në arrestimin e 9 shtetas shqiptarë dhe 5 shtetas italianë. Grupi kriminal dyshohet se ka trafikuar mbi 1 ton kanabis.
Që prej 2009 ai ishte shpallur në kërkim ndërkombëtar për trafik të lëndëve narkotike dhe ushtrim të veprimtarisë në grupe kriminale.
Një makinë ka marrë flakë gjatë kohës që ishte në lëvizje në qytetin e Vlorës. Fatmirësisht drejtuesi i saj ka dalë në kohë nga makina tip ‘Ford” duke mos u lënduar.
Ngjarja ka ndodhur në zonën e Skelës në Vlorë, ndërsa forcat zjarrfikëse kanë bërë të mundur shuarjen e flakëve.
Nga të dhënat paraprake të policisë dyshohet se shkak i zjarrit është bërë një shkëndijë elektrike.
Një ngjarje e rëndë tronditi mbrëmjen e së mërkurës Selenicën, ku një 47-vjeçar u ekzekutua në derë të shtëpisë. Nikola Ikonomi, i njohur me emrin Laver Tozaj u gjet i plagosur rëndë në derën e shtëpisë dhe më pas ndërroi jetë në spitalin e Vlorës.
Për këtë ngjarje policia ka shoqëruar deri tani 15 persona të cilët po merren në pyetje për të zbardhur më tej ngjarjen.
Në vendin ku vra Tozaj u gjetën 7 gëzhoja plumbash. Fqinjët e Tozajt kanë deklaruar në polici se nuk kanë parë lëvizje makinash. Ndërsa në rrugën ku ai u gjet i vrarë nuk kishte ndriçim. Dyshohet se ka qenë vetëm një person që e ka qëlluar. Policia po heton pistën e prishjes së pazareve të drogës.
Dyshohet se ai është qëlluar me pistoletë nga një person që e njihte mirë zonën.
Tozaj nuk ishte emër i panjohur për policinë. Më herët ai është akuzuar për trafik të lëndëve narkotike. Prishja e pazareve të drogës është edhe pista kryesore e hetimit.
Një ngjarje e rëndë ka ndodhur në zonën e Skelës në Vlorë, ku një grua ka tentuar të hidhet nga kati i shtatë i një pallati.
Ngjarja, që do të kishte një fund tragjik është parandaluar nga bashkëshorti i saj, i cili e ka kapur në kohë nga duart duke e ngritur lart.
Në një video të filmuar nga kalimtarët në rrugë dallohet gruaja e cila mbahet dhe ngihet lart nga bashkëshorti i saj, ndërsa dëgjohen edhe ulërimat.
Pronari i lokalit në Vlorë është vrarë për një kalë. Ka qenë pikërisht xhiroja me kalë në breg të detit që është bërë shkak për nisjen e një konflikti, fillimisht me fjalë e grushte dhe më pas me breshëri armësh që sollën vrasjen e Arben Beqirajt në Vlorë dhe plagosjen e djalit dhe nipit të tij.
Një person ka bërë xhiro me kalë në mes të plazhistëve në plazhin e administruar nga Arben Beqiraj dhe Ergest Beqiraj. Ata janë konfliktuar me personin që po kalëronte duke u përfshirë në konflikt fizik me të. Ai më pas është larguar nga zona dhe një orë më vonë është kthyer me një makinë dhe katër persona të tjerë, Eduart Xhezon, Ariel Kingjin, Çelik dhe Geno Lenan. Dy prej tyre janë afruar pranë Beqirajve për të diskutuar por debati është përshkallëzuar dhe autorët kanë nxjerrë armët duke qëlluar në drejtim të Arben dhe Ergest Beqirajt dhe kushëririt të tyre.
Beqiraj ka ndërruar jetë pas disa orës në spital. Ndërkohë që policia ka shpallur në kërkim autorët e ngjarjes.
Kryeministri Edi Rama e ka nisur me një lajm të mirë mëngjesin e kësaj të hëne duke njoftuar përfundimin e Lotit të Parë të rrugës në zonën e Lumit të Vlorës, ndërsa bën me dije se shumë shpejt do të nisë edhe loti i dytë i punimeve. Ky segment do të shërbejë në zhvillimin ekonomik dhe turistik të zonës.
“Me këtë natyrë të qetë nga zona e Lumit të Vlorës, ku përfundoi Loti i Parë dhe ka nisur puna për të Dytin, e ku pa hapet për turistët e për ekonominë e zonës, një thesar i fshehur i natyrës së mrekullueshme shqiptare, ju uroj një javë të bukur”, shkruan kryeministri.
LOT II i rrugës së Lumit të Vlorës është një projekt madhor që lidh fshatrat e kësaj zone me pjesën tjetër të vendit dhe del në zemër të bregdetit jonian.
Segmenti Ura e Gjormit-Brataj-Ura e Laskos ofron parametra më të mirë të sigurisë. Projekti parashikon përmirësimin e parametrave gjeometrikë të rrugës, zgjerimin e trasesë, rritjen e shpejtësisë së lëvizjes, nivelimin e rrugës me material shkëmbor dhe trajtimin e të gjitha nënshtresave.
Rruga e Lumit të Vlorës, 94 km fillon nga Bypass i Vlorës – Peshkëpi – Ura e Gjormit – Brataj –Ura e Kudhësit- Qeparo, degëzimi për në fshatin Kuç, si dhe segmenti nga Rreth-rrotullimi i Peshkëpisë – Selenicë – superstrada Levan -Tepelenë. Ky aks përshkon fshatrat Peshkëpi, Kote, Gjorm, Lepenicë, Kallarat, Brataj, Kuç, Kudhës dhe përfundon në Qeparo.
Popullsia e zonës arrin në mbi 40,000 banorë dhe përbën rreth 16% të të gjithë popullsisë së Qarkut të Vlorës. Në zonën në fjalë ka më shumë se 60 fshatra me një dendësi të madhe popullsie dhe veçanërisht moshë të re.
Përveçse siguron lidhjen e këtyre fshatrave me Vlorën dhe bregdetin duke nxitur mundësi të reja për zhvillimin e bujqësisë e agroturzimit, panorama fantastike që shoqëron përgjatë të gjithë rrugës pritet të nxisë zhvillimin e aktiviteteve sportive si trekking dhe ecje me biçikileta, të cilat eventualisht mund të sjellin transformimin e të gjithë luginës në atraksion turistik.
Ka ndërruar jetë në spital pronari i lokalit në Vlorë, Arben Beqiraj i cili u qëllua me armë në lokalin e tij gjatë të dielës në një breshëri plumbash ku mbetën të plasur djali dhe nipi i tij.
Arben Beqiraj u plagos në lokalin e tij pasi dy persona të cilët janë identifikuar nga polica dhe janë vënë në kërkim, hapën zjarr me armë, në zonën e plazhit të vjetër. Bashkë me të u plagosën edhe Egert Beqiraj dhe Nesim Hodaj të cilët janë jashtë rrezikut për jetën.
Viktima ka ndërruar jetë rreth orës 01:00 pas mesnate në spitalin e Vlorës. Ai kishte në trup 6 plumba, në pjesën e barkut, në duar dhe në këmbë. Një prej plumbave e ka kapur Arben Beqirajn në pjesën e kraharorit duke i shkaktuar atij plagë të rënda. Kjo ka bërë që ai të humbasë jetën.
Dy autorët e identifikuar, me iniciale SH.L dhe E.XH janë konfliktuar fillimisht me fjalë me pronarin e lokalit, ndërsa më pas janë përdorur grushtet nga të dyja palët.
Pas konfliktit fizik dy autorët kanë shkuar tek makinat e tyre të parkuara jashtë lokalit nga ku kanë marrë një kallashnikov dhe një pistoletë me të cilat kanë qëlluar drejt Beqirajt, djalit dhe nipit të tij.
Dy persona të dyshuar si autorë të kësaj ngjarjeje janë larguar në drejtim të Pyllit të Sodës. Policia bën të ditur se po punohet për kapjen e dy autorëve nga policia e Vlorës dhe FNSH-ja e Fierit. Ndërkohë janë shoqëruar rreth 20 persona të cilët kanë qenë të pranishëm në vendin e ngjarjes.
Dy aksidente automobilistike kanë ndodhur në qytetin e Vlorës duke lënë të plagosur dy persona, fatmirësisht jashtë rreziku për jetën. Një aksident është shënuar në zonën e Ujit të Ftohtë ose siç njihet ndryshe ‘Kalaja’. Një automjet ka përplasur një këmbësor, i cili po kalonte rrugën. Gjatë manovrimit makina është përplasur edhe me një makinë tjetër.
Nga aksidenti ka mbetur i plagosur këmbësori, i cili është jashtë rrezikut për jetën. Aksidenti i dytë ka ndodhur në zonën e quajtur ‘Kuzum Baba’, ku një automjet tip ‘Renault Clio’ ka humbur kontrollin dhe është përmbysur në rrugë. Si pasojë është plagosur drejtuesi i automjetit, i cili ka marrë plagë të lehta.