U konfliktuan për pronën, 62-vjeçari plagos me sëpatë komshiun

Konfliktet për pronën kanë çuar në plagosjen një 46-vjeçari në Vorë. Ngjarja ka ndodhur në fshatin Domje, ku 62-vjeçari me iniciale I.T. pas një konflikti mbi pronën ka goditur me sëpatë komshiun e tij 46-vjeçarin me iniciale B.A., i cili fatmirësisht ndodhet jashtë rreziku për jetën.

Ka qenë policia, ajo që ka ndërhyrë menjëherë, duke parandaluar përshkallëzimin e konfliktit dhe duke arrestuar autorin e plagosjes. 62-vjeçari do të gjykohet për veprën penale “Plagosja e rëndë në gjendje të tronditjes së fortë psikike”.

Kryeministri “vetëburgoset”: Reflektim për kabinet të ri?

“Gjatë tërë muajit korrik, ne do të zhvillojmë një debat të brendshëm, për të analizuar qeverisjen qendrore dhe vendore, qoftë në bashkitë e drejtuara deri dje nga ne, qoftë në të tjerat që do të drejtojmë nga nesër dhe, për të programuar të tëra korrigjimet e nevojshme, në funksion të sfidës së vështirësuar tejmase”, ishte ky mesazhi i Kryeministrit Edi Rama, për anëtarët e qeverisë, drejtuesit e bashkive dhe simpatizantët e Partisë Socialiste, mbrëmjen e 30 qershorit gjatë fjalimit të mbajtur pas përfundimit të procesit zgjedhor.

Në fakt, tashmë që Komisioni Qendror i Zgjedhjeve ka çertifikuar rezultatin e 30 qershorit, si dhe pas ngritjes së Komisionit Hetimor për shkarkimin e Ilir Metës në 8 korrik, Kryeministri Edi Rama, që prej asaj dite, ka heshtur për aktualitetin dhe krizën politike në vend. Shefi i Qeverisë nuk ka bërë asnjë reagim ditët e fundit, qoftë në daljet për mediat, apo në rrjetet sociale, duke lënë të kuptohet se për të tashmë ka nisur një periudhë reflektimi. Ashtu si dhe në të shkuarën, Edi Rama e ka bërë zakon, që gjatë muajit korrik, të shkojë në Vilën Qeveritare në Vlorë, për të kaluar ditë pushimi pranë familjes së tij.

Rama ka publikuar shpesh foto pranë të birit ditët e fundit, buzë brigjeve të Jonit, me pamje tepër frymëzuese nga perëndimi i diellit mbi det. Një vend i shkëlqyer qetësie, që kushdo do e shfrytëzonte për të reflektuar. Mesaduket, edhe shefi i Qeverisë po e shfrytëzon momentin e pushimeve për të njëjtën arsye, reflektim. Në fakt, Rama e ka bërë dhe më herët këtë gjë. E bëri në verën e 2013, kur fitoi zgjedhjet ndaj PD-së, shkoi në Vlorë për pushime, dhe pasi u kthye prej tyre, Rama mori vendimin për emrat e kabinetit qeveritar.

Në 10 shtator 2017, kryeministri prezantoi kabinetin “Rama 2”, ndërsa një vit më pas, pas pushimeve të verës, shefi i qeverisë mblodhi ministrat në Vlorë, po në fillim të muajit shtator. Anëtarët e kabinetit dhanë llogari përpara Kryeministrit për performancën e tyre për dikasteret që drejtonin, ndërsa po aty, u lajmërua dhe ndryshim i qeverisë. Ndryshimet e ndodhën në dhjetor, Rama zëvendësoi disa anëtar të kabinetit, ndërsa disa ministra që mbetën i lajmëroi “se do të ishin në provë deri në korrik të vitit 2019”.

A është ky momenti? A po planifikon Kryeministri qeverinë “Rama 4?”. A është ky një moment që duhet të lërë pa gjumë disa ministra të Qeverisë? A do të ndikojë rezultati i 30 qershorit (ku PS nuk mori votat që priste në disa bashki dhe qarqe), te disa drejtues politikë të PS në këto zona? Kjo ende s`mund të thuhet, por zakoni e do që të besosh se kjo heshtje e Edi Ramës, nuk është e rastësishme.

Vetë kryeministri nuk po merr pjesë në procesin e analizës që po zhvillohet nga drejtuesit e qareve, pasi gjasat janë, që pasi të ketë përfunduar analiza, PS të zhvillojë një takim me strukturat, për të publikuar një raport përfundimtar të këtij procesi. Kjo mund të ndodhë në fund të muajit korrik, ndoshta dhe në shtator. Dhe këtu, me shumë mundësi, Kryeministri nuk do të ketë vetëm përgëzime.

Ndryshimet në qeveri, mund të shërbejnë edhe si një argument për të afruar opozitën në dialog, të cilën prej ditësh, Edi Rama e ka lënë të qetë në aksionin e saj, duke u përqëndruar te angazhimet që i detyron posti që mban, dhe stina e pushimeve. Moti i korrikut pasoi temperaturat e nxehta të qershorit, edhe në politikë ndodhi e njëjta gjë, por vetëm në ditët e para të korrikut. Pas datës 8, Shqipëria është përfshirë nga mot i paqëndrueshëm, me furtuna dhe rrebeshe të forta. Tashmë, pyetja shtrohet, a do të ketë të njëjtin ngjashmëri dhe “moti” i politikës në Shqipëri?

Basha harron fjalën “Fitore”: PD ka plan të qartë për daljen nga kriza

Kreu i Partisë Demokratike, Lulzim Basha nuk e ka cilësuar 30 qershorin më si një fitore ku sipas tij 85 % e shqiptarëve refuzuan zgjedhjet farsë të Ramës, por e ka quajtur atë një përgjegjës të madhe për PD që ta kthejë këtë refuzim në një energji ndryshimi për Shqipërinë.

Nga Vlora, ku vijon takimet me struktura e degës së PD-së, Basha tha se opozita e shikon këtë refuzim masiv të qytetarëve si një shtysë të jashtëzakonshme për të bërë ndryshimin për shqiptarët dhe se Partia Demokratike do vij me një plan të qartë për daljen nga kriza dhe nga regjimi i hajdutërisë dhe krimit.

“Ndryshimi që shqiptarët kanë kërkuar me votën e tyre më të pastër, refuzonin e 30 qershorit, do ta kthejnë në energji për ndryshimin e pandalshëm dhe të pashmangshëm, që po vjen për Vlorën dhe për gjithë Shqipërinë. Për këtë dua t’u shpreh mirënjohjen në radhë të parë çdo vlonjati e vlonjateje, që refuzoi në mënyrë ekzemplare farsën e 30 qershorit, dhe i dha një mesazh të fuqishëm regjimit të hajdutërisë dhe të krimit. Partia Demokratike dhe opozita e shikon refuzimin e farsës së Edi Ramës, jo si një triumf, por si një përgjegjësi të jashtëzakonshme për ta kthyer këtë energji në një energji për ndryshim, ndryshim për çdo shqiptar… të cilët meritojnë dhe do të kenë nga Partia Demokratike një plan të qartë për daljen nga kriza, një plan të qartë që Shqipëria të jetë Shqipëria e të gjithë shqiptarëve dhe jo e një grushti njerëzish që e kanë shtrydhur Shqipërinë dhe Vlorën, siç kanë bërë deri më sot.” – tha Basha

Nuk dihet se si Basha planifikon ta bëjë këtë ndryshim, pasi edhe për 5 muaj me radhën u premtoi demokratëve të tij se zgjedhje nuk do të kishte pa PD, por faktet flasin ndryshe. Prej disa ditësh Basha vijon takimet me strukturat e PD, për të ruajtur veten nga kundërshtarët brenda partisë pas dështimit të protestave 5 mujore dhe mbajtjes së zgjedhjeve më 30 qershor. Mbështetësit e tij brenda partisë, kryesisht kryebashkiakët e djathtë, i janë kthyer kundër Bashës që nuk i la të garonin më 30 qershor si kandidatë të pavarur, ku me shumë mundësi mund të kishin fituar.

Autobusi bllokon rrugën për disa orë, trafiku bëhet makth për pushuesit në Vlorë

Pasditen e të dielës, qindra mjete janë bllokuar në aksin rrugor Vlorë-Orikum dhe anasjelltas, duke krijuar rradhë të gjata për disa orë.

Shkak i trafikut të rënduar është bërë bllokimi i një autobusi në vendin e njohur “Kalaja” në Vlorë, i cili ka bllokuar tërësisht rrugën dhe si rrjedhojë është krijuar trafik i rënduar.

Situata është përkeqësuar më shumë edhe për shkak të fundjavës dhe fluksit të lartë të pushuesve që kishin zgjedhur jugun për të kaluar të dielën. Si në kthim, ashtu dhe në ikje, radha e mjeteve ka qenë kilometrike.

Është dashur ndërhyrja e policisë dhe mjeteve të rënda, për të bërë të mundur lëvizjen e autobusit, (ende nuk raportohet nëse ka pasur defekt), duke zhbllokuar rrugën.

Megjithatë, situata nuk është normalizuar menjëherë, pasi rruga e ngushtë dhe radhët e gjata të mjeteve, kanë bërë që “makthi” të vijojë deri në orët e vona të pasdites.

Arrestohet një 59-vjeçar në Vlorë, akuzohet për trafik droge në Itali

Policia e Vlorës ka arrestuar një 59-vjeçar, i cili ishte në kërkim nga autoritetet italiane për trafik droge. Ndaj shtetasit Ramadan Budani, banues në fshatin Fitore, është lëshuar një urdhër arresti ndërkombëtar që në 2009 nga Gjykata e Palermos, pasi akuzohet i përfshirë në organizatë kriminale që merrej me trafikimin e lëndëve narkotike.

Arrestimi i 59-vjeçari u bë në bazë të informacioneve të marra në rrugë operative duke bashkëpunuar ngushtë me qytetarët. Ndalimi i tij ndodhi në fshatin Novoselë, ndërsa pritet që të ekstradohet drejt Italisë.

Voton Dritan Leli, thirrje qytetarëve: Ushtroni të drejtën e votës

Kutive të votimit iu bashkua edhe kryetari i Bashkisë së Vlorës, Dritan Leli, i cili kandidon për një mandat të dytë. Leli ishte i shoqëruar me të birin, i cili votonte për herë të parë. Pas hedhjes së votës, kryebashkiaku i Vlorës ka bërë thirrje për qytetarët që të dalin të votojnë dhe të ushtrojnë të lirë të drejtën e tyre.

“Votova në qendrën time elektorale bashkë me djalin tim që është votues për herë të parë për të shprehur vullnetin. Shfrytëzoj rastin t’u bëj thirrje të gjithë qytetarëve të votojnë, të ushtrojnë votën e lirë për të zgjedhur përfaqësuesit e tyre në pushtetin vendor.” -tha Leli

Ndërsa i biri tha se kjo ishte vota e tij e parë dhe një moment mjaft emocionues për të.

Rama: 30 qershori, fitore e ligjit. Pas të dielës fillon lufta mes opozitës

Kryeministri Edi Rama ka mbyllur fushatën elektorale të zgjedhjeve lokale te 2019 në qytetin e Vlorës, qyteti që e zgjodhi atë deputet dy vite më parë. Rama është shprehu i emocionuar nga pjesëmarrja e qytetarëve duke i cilësuar ato si njerëz bio të Vlorës dhe jo turistë apo persona që vijnë më autobusë nga rreth të tjera të Shqipërisë. Këtë mbështetje Rama e quajti mesazhin më të mirë që i jepej çdo shqiptari, nga veriu në jug, që kërkon të mundi Shqipërinë e vjetër të frikës dhe të kërcënimeve.

Mbajtjen e zgjedhjeve më 30 qershor, Rama e cilësoi si një fitore të ligjit dhe Kushtetutës, pavarësisht tentativat të dhunshme si me molotov në rrugë ashtu edhe me dekrete për ta hedhur poshtë. Rama tha se pas ditës së diel do të shohim nisjen e vërtet të luftës me atyre që tentuan me çdo mënyrë për ta hedhur poshtë.

“Sot mbaroi kafja turke. Sot ka mbetur vetëm xhezvja për ti rënë njëri-tjetrit. Do e shihni pas të dielës si do fillojë lufta me xhezve, se çizmet kanë mbetur në parlament. U thanë shqiptarëve se do të vinte qameti, do vinte 1997, do bëhej nami e Shqipërisë do ti dilte tymi. Ata e bën sepse janë gati ta djegin Shqipërinë dhe njëherë tjetër, sepse ndjejnë nxehtësinë e drejtësisë që po vjen, që s`kanë për ta ndalur dhe s`do ta ndalin dot kurrë.” – tha Rama.

Rama foli për reformën në drejtësi, një reformë që ka nisur punën e saj 4 vite më parë dhe sot është në kulmin e arritjeve të rezultateve dhe kjo gjë tremb ato të katërt duke përfshirë Lulin, Monikën, Ilirin dhe Saliun.

“Shqipëria sot përjeton një moment historik të veçantë, një moment kulmor të një përplasjeje të madhe, që ka nisur katër vjet më parë. Ka nisur pa zhurmë, pa bujë, ka nisur pa zë, një përplasje që ka nisur me pëshpërima në korridoret e politikës, që ka nisur për të tronditur nga themelet Shqipërinë duke tronditur nga themelet Drejtësinë, për ti hapur rrugë që Drejtësia të kthehet në kuptimin e vërtetë të fjalës së saj. Që Drejtësia të bëhet ajo që i vendos të gjithë shqiptarët të barabartë para ligjit. Ky është kulmimi i asaj që është zhvilluar për katër vite pak nga pak.” – tha Rama

Militantët e PD-së e presin me protesta, Rama: Mungon Luli me matrapik dhe Liri me llastik!

Kryeministri Edi Rama ka zgjedhur Vlorën për të mbyllur fushatën elektorale për zgjedhjet lokalet ë 30 qershorit. Mitingu përmbyllës i fushatës së kreut të Qeverisë, është pritur me protesta nga disa militantë të Partisë Demokratike, që në fakt nuk është gjë e re. Por, këtë herë Edi Rama ka publikuar një foto në Tëitter, ku shihen disa dhjetra militantët, që kanë synuar të pengojnë kreun e Qeverisë të zhvillojë mitingun elektoral në qytetin bregdetar.

Në foton e shpërndarë në rrjetet sociale, Rama shkruan “Ja dhe çeta haxhiqamiliste e Vlorës gati për antimitingun enverist të radhës, “Rama Ik”, ku mungon vetëm Saliu me automatik, Luli me matrapik, Iliri me llastik dhe Fallxhorja me zhapik, po ama turpi i ngrënë me bukë vazhdon sistematik dhe revolucioni është bërë mekanik”. Në fakt, protesta e militantëve të PD-së ka qenë e qetë, megjithëse forcat e policisë nuk kanë lejuar asnjë tensionim të situatës.

Pas mitingut elektoral përmbyllës të fushatës, Edi Rama, praktikisht dhe zyrtarisht, fushatën do ta mbyll në studion e “Real Story” me gazetarin Sokol Balla dhe analistët, të cilët gjithashtu janë zhvendosur në qytetin bregdetar, ku do të diskutojnë fushatën elektorale, që më shumë ka qenë politike, krizën në vend, dhe mbi të gjitha, atë që do të ndodhë pas datës 30 qershor.

Vlorë, sekuestrohet 1.5 milionë euro pasuri, të ngritura nga pastrimi parave

Policia e krimit Ekonomik në Vlorë në bashkëpunim me Prokurorinë e këtij qyteti kanë bërë të mundur sekuestrimin e disa pasurive, pasi dyshohet se janë blerë nga pastrimi i parave.

Gjatë ditës së enjte, policia ka sekuestruar 5 apartamente banimi, 1 vilë trekatëshe, 1 mjet lundrimi, anije peshkimi dhe 4 automjete, të gjitha në pronësi të shtetasit me iniciale M.M. Ky shtetas, që prej 2018, ndodhet në procedim penal pro-aktiv, si person i dyshuar për kryerjen e veprës penale “Pastrimi i produkteve të veprës penale ose veprimtarisë kriminale”.

Vlera financiare e këtyre pasurive kap shifrën rreth 1.503.000 euro. Këto sekuestro janë preventive , ndërsa policia vijon veprimet e tjera procedurale në lidhje me rastin, të kërkuara nga prokuroria e Vlorës.

VlorëSekuestro preventive mbi disa pasuri me vlerë rreth 1.5 milion euro, që dyshohen se janë ngritur me pastrim…
Gepostet von Policia e Shtetit am Donnerstag, 27. Juni 2019

Dhunë në familje, kultivim kanabisi, 3 të arrestuar brenda 24 orëve në Vlorë

Policia e Vlorës ka arrestuar 3 persona brenda 24 orëve të fundit. Arrestimet janë kryer për vepra të ndryshme penale, që nga dhuna në familje, kultivimit të lëndëve narkotike dhe drejtim mjeti në gjendje të dehur.

Policia ka ndaluar shtetasin e shpallur në kërkim G. Q., 41 vjeç, banues në Vlorë. Ndalimi i këtij shtetasi të shpallur në kërkim u bë pasi më datë 26.06.2019, dyshohet se ka ushtruar dhunë fizike dhe psikologjike ndaj bashkëjetueses së tij 30 vjeçare V.M, për motive të dobëta. Materialet iu referuan Prokurorisë për veprën penale “Dhunë në familje”.

Gjithashtu është arrestuar në flagrancë shtetasin L. S., 28 vjeç, banues në fshatin Vodicë, Vlorë. Arrestimi i tij u bë pasi ditën e djeshme ky shtetas është kapur në vendin e quajtur “Ish-Parku i Tregtisë” duke drejtuar automjetin tip Ford Focus në gjendje të dehur.

Materialet iu referuan Prokurorisë në ngarkim të tij për veprën penale “Drejtimi i automjetit në mënyrë të parregullt”.

Policia ka arrestuar edhe shtetasin M. M., 68 vjeç, banues në fshatin Gjormë, Selenicë.

Arrestimi i tij u bë pasi më datë 26.06.2019, pas informacioneve policore, në fshatin Gjormë u gjetën të kultivuara disa fidanë të dyshuara cannabis sattiva, për të cilat shtetasi M.M dyshohet të jetë kultivuesi i tyre.

Materialet iu referuan Prokurorisë në ngarkim të tij për veprën penale “Kultivimi i bimëve narkotike”.