Prestigjozja italiane Corriere Della Sera i ka kushtuar një artikull kërkimeve për shpëtim në Shqipëri pas tërmetit me pasoja tragjike, ku shkruan se kjo ka bërë bashkë disa shtete që kanë qenë armiq mes tyre, duke gërmuar nën rrënojat e Durrësit dhe Thumanës në kërkim të mrekullisë, shpirtrave të gjallë.
“Saktësisht njëzet vjet pas luftës në Kosovë, për herë të parë pas shpërbërjes së saj të përgjakshme dhe spastrimit etnik, ish Jugosllavia e dikurshme duket se është ringritur, por me qëllimin e saj më të mirë. Në emër të solidaritetit, Ballkani është bashkuar, qoftë edhe vetëm për disa ditë, në përpjekje për të shpëtuar jetët e goditura nga tërmeti që goditi bregdetin shqiptar dhe rrethinat e kryeqytetit natën midis të hënës dhe të martës”, shkruan Corriere.
Që prej ditës së djeshme, ekipet e shpëtimit të dërguara nga Prishtina, Beogradi, Tirana, Zagrebi dhe Shkupi, kanë formuar një zinxhir njerëzor shpëtimtarësh.
Zjarrfikësit, ushtarët, njësitë e qenve, ekipe me uniforma me stema dhe flamuj të ndryshëm, dikur armiqësorë me njëri tjetrin, janë në garë për të rikuperuar të gjallë dhe viktima. Ata mund të mos vëllazërohen, por kanë bashkuar forcat për një qëllim të përbashkët.
Në Thumanë, një njësi serbe nga Nishi, e përbërë nga rreth 20 zjarrfikës, mbërriti dje dhe iu përvesh punës për të gërmuar nëpër rrënojat e një ndërtese trekatëshe të shembur pjesërisht.
Pak metra më tutje vazhdojnë punë zjarrfikës nga Prishtina dhe një grup ushtarësh me emblemën e Republikës së Kosovës, të qepur në mëngët e uniformës.
“Askush nuk ka pasur probleme – sigurojnë ata – në fakt, mbase kjo është koha për t’u bërë miq”. Ata shprehen se “Ndonjëherë jemi të burgosur nga paragjykimet tona”.
