Kryetari i Partisë Demokratike Lulzim Basha ka reaguar për tërmetin e sotëm, që preku rajonin juglindor të vendit. Bashak ka bërë një reagim në rrjetet sociale, ku kërkon shpalljen e gjendjes së jashtëzakonshme për të ndihmuar familjet e goditura nga lëkundjet e tokës.
“Të shpallet gjendje e jashtëzakonshme për ndihmë ndaj familjeve të goditura nga tërmeti ne Korcë. Qindra banesa janë dëmtuar nga tërmeti që goditi në orët e para të mëngjesit rajonin e Korçës. Shumë banorë kanë mbetur në qiell të hapur dhe qindra të tjerë janë në panik se çfarë do të ndodhë me banesat e tyre. Gjithçka kishin ndërtuar me sakrificë të madhe është shkatërruar”, shkruan Basha.
Më tej, Basha shkruan se duke shpallur gjendjen e jashtëzakonshme, duhen dedikuar fonde për shtëpitë e dëmtuara. Ai shprehet se nuk duhet humbuar asnjë çast për shkak të lojrave politike. “Duhet shpallur menjëherë gjendja e jashtëzakonshme në zonën e goditur dhe duhen dedikuar urgjent fonde për shtëpitë e dëmtuara”.
“Familjeve të mbetura në mes të katër rrugëve dhe në gjendje tronditje dhe pamundësie totale shteti duhet t’ju ofrojë menjëherë ndihmë financiare dhe ushqim e strehë. Nuk duhet humbur asnjë çast për shkak të paaftësisë apo lojrave politike, por duhet vepruar menjëherë dhe me veprime konkrete për të ndihmuar banorët e goditur”, shkruan Lulzim Basha.
