Iu merrte para studentëve për provimet, arrestohet pedagogu i Universitetit të Korçës

Arrestimi i pedagogut dhe sekserit në Korçë, policia jep detajet: U kapën me 300 euro dhe 50 mijë lekë, dyshohet se i përfituan nga studentët

Policia e Korçës njofton se ka arrestuar sot një pedagog dhe një sekser, të cilët dyshohet se merrnin para nga studentët, në këmbim të dhënies së provimeve.


Në pranga ka rënë pedagogu i Shkencave Humane Alket Dino dhe sekseri i tij, shtetasi Xhevi Dervishi.

Policia shprehet se ata janë kapur secili me një sasi prej përkatësisht 300 euro dhe 50 mijë lekë të reja, të dyshuara të përfituara nga studentët, në këmbim të dhënies së provimeve.

Njoftimi i policisë:

Korçë

Specialistët për Hetimin kundër Korrupsionit në Drejtorinë Vendore të Policisë Korçë, nën drejtimin e SPAK, bënë arrestimin në flagrancë të shtetasve:

D., 34 vjeç, banues në Korçë (me detyrë pedagog pranë Fakultetit të Shkencave të Natyrës dhe atyre Humane) dhe Xh. D., 35 vjeç (sekser) të dy banues në Korçë.

Shtetasit e mësipërm, janë kapur në afërsi të këtij Fakulteti me një sasi prej 300 eurosh dhe 50 000 lekë, të cilat nga hetimet e kryera dyshohet se i kanë përfituar në mënyrë të kundërligjshme nga studentët, të cilat u sekuestruan në cilësinë e provës materiale.

Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë për veprat penale “Korrupsioni pasiv i personave që ushtrojnë funksione publike”, “Korrupsioni aktiv” dhe “Ushtrimi i ndikimit të paligjshëm”.


Drejtonte rrjetin e shpërndarjes së drogës në Korçë, arrestohet 35-vjeçari, subjekt i OFL

Policia e Korçës ka arrestuar një 35-vjeçar që organizonte dhe drejtonte një grup shpërndarësish droge në këtë qytet. Sipas të dhënave zyrtare, operacioni antidrogë i koduar “Përsëritësi” është finalizuar pas një hetimi disa mujor zhvilluar nga Seksioni për Hetimin e Trafiqeve të Paligjshme dhe Narkotikëve në DVP Korçë në drejtimin e Prokurorisë së Rrethit.

Specialistët për Hetimin e Trafiqeve të Paligjshme dhe Narkotikëve në DVP Korçë, në vijim të punës për parandalimin dhe goditjen e aktivitetit kriminal të shpërndarjes së drogave të forta, finalizuan operacionin antidrogë të koduar “Përsëritësi”, si rezultat i të cilit u bë kapja dhe arrestimi në flagrancë i shtetasit:


Zalmir Qyteti, 35 vjeç, banues në Korçë (i dënuar më parë për “Prodhimi dhe shitja e narkotikëve), subjekt i OFL-së për të deklaruar pasurinë.

Si edhe filloi procedimi penal në gjendje të lirë ndaj 7 shtetasve të tjerë.

Nga veprimet hetimore të kryera dhe provat ligjore të grumbulluara gjatë operacionit, rezultoi se shtetasi Z. Q., është poeseduesi dhe organizatori i shpërndarjes së lëndëve narkoitke, i cili nëpërmjet 7 shtetasve të tjerë bënte shpërndarjen e sasive të drogave të forta në qytet, të llojit heroinë dhe metadon, sasi të cilat këta shtetas i blinin tek 37-vjeçari dhe më pas e shisnin tek persona të tjerë, kundrejt fitimit.

Gjatë operacionit dhe kontrollit në banesë, Policia ka sekuestruar lëndë narkotike heroinë, një pjesë e ndarë në doza gati për shitje dhjetra kokrra metadoni, si edhe një sasi lënde e dyshuar si prokusor.

Shtetasi i mësipërm, aktualisht rezulton i dënuar me kusht, për një periudhë prej 3 vjet e 6 muaj, për veprën penale “Prodhimi dhe shitja e narkotikëve”, si edhe është subjekt i OFL-së ku i është dërguar formulari për deklarimin e pasurisë.

Materialet i kaluan Prokurorisë Pranë Gjykatës së Shkallës së Parë Korçë për hetime të mëtejshme.


Korrupsion me certifikata pronësie false, burg për ish zyrtarët e hipotekës Korçë

Gjykata e Korçës ka dhënë masat e sigurisë për ish zyrtarët e Hipotekës Korçë, të cilët akuzohen për falsifikim dokumentesh të certifikatave të pronësisë përmes një skeme korrupsioni. Në total gjyqtari i Korçës, Besnik Shehu dha 7.8 vite burg për të gjithë ish zyrtarët e hipotekës, ndërsa pranoi për to edhe masën e gjykimit të shkurtuar. Në lidhje me ish kreun e Hipotekës së Korçës, Lefton Bardho,  gjykata vendosi pushimin e çështjes, për shkak të mungesës së provave dhe dëshmitarëve.

Gjykata e Korçës ka dënuar me 4 vite burg Ersild Gorarin, që përmes gjykimit të shkurtuar i është ulur në 3 vite burg dhe 3 vjet heqje të së drejtës për të mbajtur funksione publike.


Me 3 vite burg është dënuar dhe ish-zyrtarja e hipotekës Arsidesa Hysi, që me gjykim të shkurtuar i konvertohet në 2 vjet burg dhe 3 vjet heqje të së drejtës për të ushtruar funksione publike.

Me 3 vjet burgi është dënuar dhe Erjon Arifi, e konvertuar në 2 vjet burg nga gjykimi i shkurtuar dhe 3 vjet heqje të së drejtës për të mbajtur funksione publike.

Eriston Ziu, është dënuar me 8 muaj burgim.

Si u zbardh skema e korrupsionit mes zyrtarëve të hipotekës Korçë?

Ish zyrtari Ersild Gorari i akuzuar fillimisht për shpërdorim detyre ka pranuar të bashkëpunojë me prokurorinë dhe të tregojë të gjithë skemën e korrupsionit dhe falsifikimit të certifikatave të pasurive në hipotekën e Korçës, ku dolën në pah dhe emrat e tjerë të zyrtarëve të dënuar.

Sipas Gorarit, zyrtarët e hipotekës Korçë, pajisnin me certifikata pasurie, qytetarë të cilët nuk kishin aplikuar asnjëherë dhe s’kishin bërë ndonjë pagesë për këtë shërbim. Për më tepër që zyrtarët zhduknin nga arkiva e hipotekës regjistrat hipotekorë, duke i marrë me vete lokale dhe në shtëpi dhe ja lënë në dorë të personave të panjohur në rrugë e lokale, të cilët plotësonin certifikatat e pasurisë dhe firmosnin ato, duke e bërë më të vështirë zbardhjen e përgjegjësisë edhe nëse do kryhej ekspertim grafik të shkrimit.

Hetimi ka zbuluar se kartelat e pasurisë janë konstatuar se në një pjesë të tyre ka ndërhyrje të bëra nga Ersild Gorari apo zv/kryeregjistruesja Arsidesa Hysi dhe në shumicën e rasteve, kartelat dhe certifikatat janë plotësuar fiktive, pa u regjistruar në sistem, raste që janë në një masë shumë të madhe.


“Alo, po vjedhin banesën”, policia kap në flagrancë 35-vjeçarin në Korçë

Policia e Korçës parandaloi vjedhjen e një vjedhje në këtë qytet. Në fakt, gjithçka ndodhi falë telefonatës së një qytetari në komisariat. Në numrin 129 të policisë, një qytetar ka njoftuar se në lagjen nr. 4 Korçë, në banesën e shtetasit P. N., (emigrant) një shtetas kishte hyrë për të vjedhur.

Menjëherë pas marrjes së këtij njoftimi shërbimet e Komisariatit të Policisë Korçë, kanë shkuar drejt adresës së raportuar, ku kanë konstatuar në ambjentet e brendshme të banesës, shtetasin L. Sh., 35 vjeç, i cili po tentonte të kryente vjedhje.


Policia arrestoi në flagrancë shtetasin L. SH., (i dënuar më parë për veprën penale “Vjedhja”) dhe materialet hetimore i kaluan Prokurorisë pranë Gjykatës së Shkallës së Parë Korçë për veprime të mëtejshme.


Dy aksidente në Cërrik dhe Korçë, plagosen tre persona

Një person mbeti i plagosur rëndë mbrëmjen e të martës, pasi u përplas nga një makinë. Aksidenti ndodhi në aksin rrugor Gostimë-Cërrik, teksa mësohet se një burrë rreth 50 vjeç ka qenë duke kaluar rrugën në momentin që u përplas nga një makinë.

Ai është dërguar me urgjencë në spitalin e Elbasanit për të marrë ndihmë mjekësore. Ndërkohë, policia shkoi në vendin e ngjarjes dhe po kryen hetime për zbardhjen e aksidentit. Uniformat Blu shoqëruan për sqarime të rrethanave të këtij aksidenti edhe shoferin e mjetit.


Gjatë mbrëmjes të së martës dy mejete u përplasën në qytetin e Korçës. Nga përplasja e dy mjeteve mësohet se janë plagosur dy persona. Policia po heton për shkaqet e këtij aksidenti.


U goditën nga vinçi, një i vdekur dhe një i plagosur

Mesditën e të premtes në qytetin e Korçës ndodhi një aksident i rëndë. Një i ri 35 vjeç mbeti i vdekur në vend, pasi pompa e një vinçi që transporton beton e goditi në kokë. Punëtorit, Elvis Josifi, ishte duke punuar në një pallat 4 katësh, kur u godit për vdekje nga pompa e vinçit. Ndërkohë, nga goditja mbeti i plagosur dhe një tjetër punëtor i pallati.

Ai është dërguar në spital për të marrë kurim të specializuar. Megjithatë ende nuk dihet se si është gjendja e tij shëndetësore. Ndërkohë, dëshmitarë në vendin e ngjarjes janë shprehur se numri i viktimave mund të ishte më i madh, pasi në pallat ishin duke punuar shumë persona.


“Ngjarja mund të ishte më e rëndë. Ishin të gjithë punëtorët lart. Mund të kishte më shumë viktima. Vinçi u këput. Gjithë Korça shkoi për ndihmë. Zjarrfikësja dhe Policia erdhën në kohë, ishte e paparashikuar.”- tha dëshmitari Muharrem Hysolli, thotë Balkanweb.


Vinçi godet punëtorin e pallatit, humb jetën 35-vjeçari në Korçë

Një aksident i rëndë ndodhi të premten nëqytetin e Korçës, ku për pasojë mbeti një person i vdekur. Rreth mesditës, një vinç që po punonte për ndërtimin e një pallati u rrëzua, duke zënë poshtë një nga punëtorët.

Ngjarja ndodhi pranë Pazarit të Ri në qytetin juglindor. Personi që humbi jetën është shtetasi Elvis Josifi, i cili ishte punëtor në kantierin ku po punonte vinçi. Ai është goditur fillimisht në kokë dhe më pas është zënë poshtë nga makineria e rëndë, që i mori dhe jetën.


Për këtë ngjarje Policia e Korçës u shpreh: “Më datë 03.01.2020, rreth orës 12:17, jemi njoftuar se në lagjen nr. 9, pranë stacionit të autobuzëve, në një objekt në ndërtim, dyshohet se është aksidentuar gjatë punës, shtetasi E.J., rreth 35 vjeç, banues në Korçë, i cili për pasojë ka gjetur vdekjen. Grupi hetimor po punon për zbardhjen e rrethanave dhe shkaqeve të ngjarjes”, thuhet në deklaratën e policisë.


Digjet makina në Korçë, shpëton çifti dhe fëmija 7 vjeç

Një makinë u përfshi nga flakët të premten në qytetin e Korçës. Makina ishte duke ecur në momentin që ra zjarri.

Ngjarja ndodhi në afër Pazarit të Vjetër në qytetin e Korçës. Ende nuk dihen shkaqet e djegies së kësaj makine, ndërsa dyshimet e para lidhen me një shkëndijë elektrike. Ajo dyshohet se ka shkaktuar zjarrin në makinë.


Ndërkohë, mjeti i djegur është është një “Volkswagen” ngjyrë gri. Në momentin që në mjet ra zjarri ishin duke ushëtuar një çift bashkëshortësh dhe një fëmijë 7 vjeç.

Fatmirësisht asnjë nga personat që po udhëtonin në mjet nuk mori lëndime nga zjarri.

Drejtuesi i mjetit është shprehur pas ngjarjes se “nuk ndjemë asgjë vetëm kur pamë flakët”. Policia dhe zjarrfikësja shkoi në vendin e ngjarjes për të shuar flakët.


Vrasja e komshiut, burg 18-vjeçarit

Gjykata e Korçës vendosi masën “arrest në burg” për shtetasin Devis Hoti, i cili akuzohet për vrasjen e shtetasit Flamur Duçi, ngjarje e ndodhur katër ditë më parë në fshatin Mborje të Korçës. Flamur Duçi u gjet i vrarë në një lokal ku ushtronte një aktivitet biznesi.

Gjatë ekzaminimit të trupit, atij ju gjet një shenjë afër zemrës e cila dyshohet se i ishte bërë me thikë. Gjithashtu, autorët kishin tentuar të digjnin trupin e tij. Për ngjarjen e rëndë, policia ndaloi 18-vjeçarin Devis Hoti.


Viktima dhe Hoti ishin komshinj në fshatin Mborje. Familjarët e Devis Hotit mohuan krimin, por gjatë një përgjimi ambiental me një të afërm, në qelinë e paraburgimit, policia ngriti dyshime të forta se Devis Hoti është autor i ngjarjes.

Gjatë përgjimit, 18-vjeçari i jepte udhëzime xhaxhait të tij se çfarë duhet të deklaronte në polici. Ndërkohë, autori ishte më herë i dënuar për “plagosje me dashje”. Dyshimet e grupit hetimor lidhen me tentativën e vjedhjes së lokalit të shtetasit Flamur Duçi nga i riu Devis Hoti.

Por, viktima bëri rezistencë duke u përleshur me autorin, pasi 18-vjeçarit i janë gjetur shenja goditje në trup. Por ai ka mohuar duke u shprehur se shenjat i ishin bërë kohë më parë nga përplasja në një mur në fshat. Megjithatë, i riu do të vijojë të qëndrojë në burg deri në zbardhjen e plotë të ngjarjes dhe të së vërtetës.


Fshatari vdes në spital. Faji i mjekut?

Të mërkurën në mëngjes, shtetasi Telha Kelo, nga fshati Pojan i Korçës humbi jetën në spitalin e Korçës. Ai ishte paraqitur në spital me dhimbje barku e koke, dy ditë para se të ndërronte jetë. Ndërkohë, familjarët e 57-vjeçarit kanë ngritur akuza ndaj mjekut që trajtoi familjarin e tyre. Sipas shtetasit Fluturim Kelo, faji pë vdekjen e vëllait të tij është i mjekut të spitalit të Korçës. Vëllai i viktimës shprehet se i kërkuan mjekut ta dërgonin vëllain e tyre për mjekim në Tiranë, por ata nuk e autorizuan largimin e të ndjerit. Babai i dy fëmijëve ishte paraqitur me dhimbje të forta, ndërsa mjekët e diagnostikuan me gurë në tëmth.

 “E solli pardje vëllai tjetër me dhimbje koke. E shtruan këtu në spital, e mbajtën këtu dy ditë dhe në mëngjes mbaroi. Pretendimet tona janë për mjekun. A mund të vdesë njeriu nga dhimbja e kokës?! Normale që jo. Ai nuk ka vuajtur nga asnjë sëmundje më parë. Mjekët i bënin serume dhe thoshin do bëhet më mirë, kaq. U kërkuam mjekëve që ta çonim në Tiranë, por ata na thanë se nuk e kishin përcaktuar ende diagnozën që ta çonin në Tiranë. Të gjithë përgjegjësinë e ka mjeku sepse po të na e kishte dhënë diagnozën, ne do kishim shkuar në Tiranë ta mjekonim. Drejtësia duhet të veprojë, presim të përcaktohet shkaku i vdekjes nga autopsia dhe më pas të kërkojmë drejtësinë”, shprehet Fluturim Kelo, vëllai i viktimës, sipas gazetës “Panorama”.


Ndërkohë, familjarët e viktimës kanë bërë denoncim në polici për ngjarjen. Blutë e Korçës reaguan duke vënë në hetim mjekun 47-vjeçar me inicialet V.K. Ai akuzohet për “Neglizhencë në trajtimin mjekësor”. Hetuesit kanë kryer të gjitha veprimet procedurale, ku janë sekuestruar në cilësinë e provës kartelat mjekësore të 57-vjeçarit, deklarimet e familjarëve të tij dhe të mjekëve të spitalit, si edhe u dërguan vendimet e ekspertimit mjeko-ligjor pranë Institutit të Mjekësisë Ligjore në Tiranë, ku do të priten aktekspertimet përkatëse për përcaktimin e shkakut të vdekjes.

Për ngjarjen ka reaguar dhe Spitali i Korçës, duke u shprehur se pacientit i është dhënë ndihma maksimale, ndërsa pritet që të dali ekspertiza mjeko-ligjore. “Pas kryerjes së ekzaminimeve, pacienti ka rezultuar me Kolecistit Kalkuloz. Pas kësaj, pacienti është shtruar në kirurgji. Gjendja e tij është rënduar mëngjesin e së mërkurës dhe është dërguar menjëherë në reanimacion, ku për rreth dy orë është trajtuar nga reanimatori. Spitali Rajonal Korçë sqaron se, bazuar në protokollet e mjekimit pacientit i është dhënë ndihma maksimale nga personeli i spitalit. Jemi në pritje të autopsisë”, thuhet në deklaratën e Drejtorisë së Shërbimit të Spitalit Rajonal Korçë.


Skip to toolbar