Ndërsa 6 marsi u zyrtarizua si datë për mbajtjen e zgjedhjeve të pjesshme vendore, kanë nisur të qarkullojnë edhe emrat e parë të kandidatëve që do të synojnë të marrin drejtimin e bashkive pa kryetar. Kështu në dy prej tyre, përkatësisht në Durrës e Shkodër, PS do të garojë me dy kandidate zonja.
Mësohet se socialistët do të kandidojnë në Durrës me Emirjana Sakon, emri i së cilës pritet të zyrtarizohet ne mbledhjen e Kryesisë së PS për këtë qark. Emirjana Sako ka marrë edhe mbështetjen e kryeministrit Edi Rama për të kandiduar për kryetare bashkie në Bashkinë e Durrësit.
Aktualisht, Emirjana Sako është aktualisht kryetare e komanduar e Bashkisë së Durrësit, ndërsa për disa mandate ajo ka mbajtur detyrën e drejtoreshës së Shërbimeve Publike në këtë bashki. Sako ka menaxhuar edhe periudhën pas tërmetit të 26 nëntorit në Durrës. Kujtojmë se Bashkia e Durrësit është pa kryetar që prej fundit të nëntorit 2019, pasi kryebashkiakja e asaj kohe, Valbona Sako, dha dorëheqjen, vetëm disa muaj pasi kishte marrë postin
Ndërkohë në Shkodër do të jetë prefektja Majlinda Angoni ajo e cila do të synojë të marrë drejtimin e Bashkisë më 6 mars.
Aktualisht Angoni është në krye të prefekturës së Shkodrës prej shtatorit 2020. Rama ka zgjedhur pikërisht Angonin për garën në një bashki si Shkodra, ku kanë drejtuar gjithmonë demokratët.