Shtyrja e vendimi nuk është inkurajues, pasi Shqipëria e ka merituar hapjen e negociatave që në qershor të 2018 tha ministri i Jashtëm Cakaj, i cili ishte shpresëplotë që negociatat të hapeshin në qershor dhe të mos shtyheshin në tetor. Megjithatë Cakaj tha se Shqipëria nuk mund të vendos dot axhendën e Këshillit, prandaj i duhet të pres që në tetor të merret një vendim të prerë në lidhje me hapjen e tyre.
Këshilli i Europës vlerësoi arritjet dhe rezultatet pozitive të Shqipërisë, por e shtyu vendimin për hapjen ose jo në tetor për shkak se i duhej më shumë kohë për të shqyrtuar raportin e Komisionit Europian.
“Shqipëria nuk mund të përcaktojë axhendën e vendimmarrjes së Këshillit por mund të përmbushë të gjitha kushtet teknike. Ndaj duke u mbështetur edhe në zotimin e prerë të Këshillit, jo për të diskutuar në tetor nëse negociatat do të hapen apo jo por për të marrë një vendim të prerë, Shqipëria mbetet shpresëplotë për një vendim pozitiv në tetor. Shpresa jonë duhet të marrë trajtën për një angazhim pozitiv. Shtyrja e vendimmarrjes sidoqoftë nuk është një lajm inkurajues për Shqipërinë. E ka merituar hapjen e negociatave që në qershor të vitit të shkuar. Vonesa nuk është shkaktuar nga rezultatet, por mungesa e kohës së BE për ta shqyrtuar atë.” – tha Cakaj
Krahasuar me ministrin e jashtëm Gent Cakaj, Rama u shpreh më optimist për vlerësimin pozitiv që Këshilli i Europës i ka bërë rekomandimit të Komisionit Europian për përmbushjen nga Shqipëria të kushteve për çeljen e negociatave me BE duke thënë se “ky ishte një lajm pozitiv dhe se Shqipëria do t’i rezistojë deri në fund ofensivës së sharjeve dhe baltosje.”
