Italia njoftoi sot dëbimin e dy agjentëve të shërbimeve sekrete ruse, të cilët ndodheshin në vend me status diplomatik.
Qeveria italiane e cilësoi rastin si një “ndërhyrje të rëndë dhe të papranueshme”, vetëm dy ditë pasi u arrestuan dy ish-agjentë italianë të zbulimit të dyshuar për bashkëpunim me Moskën.
Ministri i Jashtëm italian, Antonio Tajani, bëri të ditur në rrjetin X se qeveria ka vendosur të dëbojë dy atashe ushtarakë të Ambasadës së Federatës Ruse në Itali, pasi hetimet e Prokurorisë së Romës zbuluan përfshirjen e tyre në veprimtari spiunazhi.
Sipas Tajanit, Ministria e Jashtme i ka komunikuar ambasadorit rus në Romë se Ivan Petrovich Gorbachev dhe Mikhail Vasilyevich Astakhov duhet të largohen nga Italia brenda tre ditësh.
Vendimi vjen pas arrestimit të dy ish-zyrtarëve italian të zbulimit, të cilët akuzohen se i kanë dorëzuar Rusisë informacione të ndjeshme, përfshirë të dhëna mbi ndihmën ushtarake që Italia dhe aleatët po i ofrojnë Ukrainës.
Sipas gazetave italiane “La Repubblica” dhe “Il Messaggero”, të paktën njëri prej agjentëve rusë kishte siguruar, në këmbim të parave, informacione mbi sistemin franko-italian të mbrojtjes ajrore SAMP/T, të cilin Ukraina pritet ta marrë këtë vit për testim, si edhe mbi raketat frankotaliane Aster, që tashmë janë dorëzuar në Kiev.
Raportimet shtojnë se interesi i agjentit rus shtrihej edhe te misioni i NATO-s në Bullgari dhe kompania italiane ”Avio”, e cila prodhon motorë për dronë dhe raketa supersonike.
Sipas gazetës “Corriere della Sera”, njëri prej ish-agjentëve italianë të arrestuar dyshohet se i ka zbuluar kontaktit të tij rus identitetet e agjentëve të kundërzbulimit italian, të angazhuar në zbulimin dhe pengimin e aktiviteteve të inteligjencës ruse në Itali.
Avokati i ish-agjentit mohon kategorikisht akuzat për tradhti, duke deklaruar se klienti i tij, i cili pritet të merret nesër në pyetje, ka mbledhur vetëm informacione të disponueshme publikisht.
Ministri italian i Mbrojtjes, Guido Crosetto, e cilësoi këtë rast si “vetëm majën e ajsbergut”, duke akuzuar Rusinë se po zhvillon një “konflikt hibrid” kundër Italisë dhe vendeve të tjera perëndimore./ATA