Baftjar Çelaj rrëqeth teksa flet për të birin e vrarë të enjten me një plumb në kokë nga vëllezërit Kusi, teksa ishte duke punuar në vilën e tyre.
Në një reagim për News 24, Baftjar Çelaj ngren supet lart kur thotë se ku ta kërkojë drejtësinë kur djalin e tij e vranë vetëm 26-vjeç teksa ishte duke punuar.
Çelaj thotë se e ka marrë vesh lajmin nga mediat, në orën 19 të darkës ndërkohë që ngjarja ka ndodhur në orën 11 të mesditës së të enjtes.
“Kjo që më ndodhi mua mos i ndodhtë asnjërit. Kjo është fatkeqësi e madhe në Shqipëri. Ti nisesh në punë dhe kthehesh i vdekur është fatkeqësi. E kam marrë vesh nga gazetat. Çuni është vrarë ne 11 paradite unë e mora vesh në orën 7 në darkë se i kishin marrë edhe dokumentet. Çunin e kishte marrë policia. Djali ishte në punë, punonte me kondicionerë se ka mbaruar edhe elektriken. Montonte kondicionerët.
Asnjë konflikt nuk ka pasur djali, ka qenë i kulturuar dhe i sjellshëm. Rrallë gjen djalë si ai, nuk dinte të ofendonte ishte i matur. Ma morën djalin në moshë të re. Në fillim të shtatorit do bënim bufenë. Kur vajta në spital vetëm kam mbajtur veten. Sikur të kisha fuqi nuk dija se ca mund të bëja. Ku do kërkoj drejtësi, kush ma zgjidh mua”, tregon Baftjar Çelaj.
Djali i tij Indrit Çelaj u qëllua me një plumb në kokë nga vëllezërit Kusi në Tiranë, pas një debati për kondicionerin. Vëllezërit Kusi janë shpallur në kërkim nga policia, ndërkohë që të dy janë me precedentë penalë.