Emërimi i Artur Metanit në krye të Inspektorit të Lartë të Drejtësisë është dënuar nga Partia Demokratike, duke e cilësuar si një dështim të reformës në drejtësi dhe politizimit të saj. Përmes një deklarate, PD shprehet se Metani, vëllai i deputetes Eglantina Gjermeni, është shërbëtori dhe militant partiak i Edi Ramës dhe emërimi i tij është në kundërshtim me ligjin. ILD do të hetojë prokurore e gjyqtarë dhe sipas PD-së emërimi i Metanit, është kapje e sistemit nga Rama për të mos lejuar hetimet e vjedhjeve të votave nga qeveria.
“Sot u emërua si Inspektor i Lartë i Drejtësisë vartësi i Edi Ramës, vëllai i ish ministres dhe deputetes së tij. Artur Metani, që duhet të garantojë pavarësinë e drejtësisë nga politika, u emërua sot në kundërshtim me Kushtetutën dhe ligjet. Sot është një ditë e keqe për demokracinë dhe drejtësinë në Shqipëri. Emërimi i Artur Metanit në krye të Inspektoriatit të Lartë të Drejtësisë, në kundërshtim me Kushtetutën dhe ligjet, është një emërim partiak në një nga pikat kyçe të sistemit të drejtësisë, që verifikon dhe nis hetime për të gjithë gjyqtarët, prokurorët, si dhe për anëtarët e Këshillit të Lartë Gjyqesor dhe atë të Prokurorisë.
Vartës i Edi Ramës për vite me radhë, Artur Metani nuk do t’i shërbejë drejtësisë së pavarur. Ai është emëruar aty për të qenë shërbëtor i Edi Ramës. Me këtë emërim Edi Rama investohet personalisht kundër prokurorëve dhe gjyqtarëve që gjykojnë dosjet e korrupsionit, vjedhjen e votave nga qeveria e Edi Ramës apo lidhjet e tij me krimin e organizuar. Emërimi i Artur Metanit, një militanti partiak, vartës i Ramës, vëlla i deputetes dhe ish ministres së Ramës është një tjetër zhgënjim i thellë për të gjithë shqiptarët që prisnin drejtësi të pavarur nga reforma në drejtësi e cila, me hapin e sotëm është pranë vdekjes klinike” shprehet PD.
Artur Metanit iu besua posti i drejtimit të Inspektorit të Lartë të Drejtësisë gjatë seancës së parë të sesionit të ri parlamentar për 2020, me 98 vota pro, të mazhorancës dhe opozitës parlamentare.
