Fatmir Mediu, Agron Duka dhe Dashamir Shehi, por edhe Monika Kryemadhi, kanë dalë kundër Lulzim Bashës, kur vjen puna te dialogu me Edi Ramën. Katër aleatët kryesor të kryedemokratit janë shprehur vazhdimisht në media “se Basha duhet të ulet në tryezë me Ramën për të zgjidhur krizën”, ndërsa kanë shprehur edhe qëndrimin se do të regjistrohen për të marrë pjesë në zgjedhjet e 13 tetorit.
Nga ana tjetër, Lulzim Basha ka mbajtur të njëjtin qëndrim, duke u shprehur se “nuk ka pazare për zgjidhjen e krizës pa u larguar Rama”. Por, duket se Lulzim Basha nuk i ka kaluar pa vënë re deklaratat e aleatëve të tij, që i kanë “dezertuar” një e nga një. Ndaj, siç raportojnë disa media në vend, kryedemokrati ka thirrur në një mbledhje urgjente aleatët në selinë e PD-së, ku raportohet që tema e diskutimit të jenë zgjedhjet e 13 tetorit.
Por në fakt, zgjedhjet e 13 tetorit janë “nul” pasi dekreti për to është hedhur poshtë nga Kolegji Zgjedhor, që legjitimoi zgjedhjet e 30 qershorit, si procesin e vetëm ligjor të mbajtjes të zgjedhjeve lokale. Megjithatë, 13 tetori mund të jetë shqetësimi i fundit për Lulzim Bashën, për të cilin dozat e kritikës nga aleatët e tij janë shtuar.
Së fundit, të enjten, Fatmir Mediu u shpreh se “Basha bëri gabim që i liroi bashkitë e djathta në paqe”. Ndaj, kritikat dhe përçarja brenda opozitës mund të jenë arsyeja kryesore, që ka detyruar Lulzim Bashën të mbledhë me urgjencë aleatët në PD, vetëm një orë para mesnate.
