RealStory.al me një shkrim ekskluziv tha se shumë shpejt do të krijohet një strukturë elitë për të “luftuar të fortët” dhe të prangos ato. E ngjashme me njësinë speciale elitë “Fauda” izraelite, krijimi i një “Faude” shqiptare do jetë shumë shpejt gati dhe këtë e vërtetoi edhe zëvendësministri i Brendshëm Besfort Lamallari për emisioni “Real Story” në News 24. Edhe pse nuk dha detaje, Lamallari tha se shumë shpejt do të prezantohet baza ligjore e kësaj nga qeveria.
“Prisni dhe pak dhe do të shihni nismën ligjore të Qeverisë për goditjen e kriminelëve. Shumë shpejt do të prezantohet i gjithë programi.” tha Lamallari.
Ndërsa për ish drejtuesin e policisë Arben Hajdarmataj tha policia e shtetit e ka një njësi të tillë dhe ajo është RENEA duke e parë me skepticizëm krijimin e një grupi elitë të posaçme.
“Për të ndaluar të fortët duhet të ketë një informacion dhe këtë duhet të ta sjell dikush. Përgjegjësia kryesore e menaxhimit dhe ekzekutimit të informacionit bëhet nga policia e Shtetit. Policia aktualisht ka një repart shumë të mirë që është RENEA, që nuk kanë ceduar kurrë me informacionet që ka pasur. Nuk e shoh dot mënyrën se si mund të funksionojë një strukturë e tillë. Një polic i thjeshtë që merr informacionin dhe sheh se drejtuesi i tij është i lidhur me krimin, atëherë nuk ta jep atë informacion.” tha Hajdarmataj