Ish deputeti i PD-së, Flamur Noka i ka cilësuar votimet e 30 qershorit të dështuara për kryeministrin Rama. Nga studio e gazetarit Sokol Balla, Noka hodhi akuza të forta ku tha se të dhënat që paraqiten nga KQZ në fakt janë të manipuluara dhe për këtë kanë fakte dhe video. Gazetari Sokol Balla tha se nëse këto prova janë të vërteta është gati t’i publikojë ato.
Ish deputeti demokrat tha se qeveria në fakt është duke i trefishuar vlerat reale, ku paraqiti një rast në një qendër votimi në Shkodër ku sipas të dhënave të PD kanë votuar vetëm 32 persona dhe qeveria e kishte paraqitur si 93 votues.
“Ne shumicën e qyteteve kryesore të vendit pjesëmarrja në votime ka qenë 8-9 %, nuk e ka kaluar kurrë 10 %. Se çfarë shkruajnë në raporte kur partia vetë voton, vetë kontrollon dhe vetë numëron është një histori tjetër. Ne kemi pasur monitorues kudo dhe me 10 % të pjesëmarrëses është refuzim për Ramën dhe dështim për të. Në një qendër votimi në Shkodër sipas të dhënave tona rezultojnë vetëm 32 votues, ndërsa qeveria i ka paraqitur në të dhënat zyrtare si 93 persona. Kemi foto dhe video se kush ka shkuar të votojë aty nga mëngjesi deri në mbyllje të procesit të votimit.” – tha Noka
Noka tha gjithashtu se ishte e habitshme që vetëm në orën e fundit të votimit, pjesëmarrja u rrit me 300 mijë vetë.
