Përveç Thumanës e Durrësit ku tërmeti shënoi viktima, edhe disa zona në Tiranë kanë pësuar dëme të shumta. Kryeministri Rama ka qenë mëngjesin e së shtunës në zonën e Kombinatit ku pa nga afër dëmet e tërmetit dhe ku zhvilloi një takim me banorët e kësaj zone ku nuk mungoi debati i zjarrtë mes palëve. Banorët i kërkuan kryeministrit zgjidhje për situatën, ndërsa i thanë se kanë disa ditë që flenë jashtë në të ftohtë.
Kryeministri u premtoi banorëve se ekspertët e bashkisë por edhe të huaj do të inspektojnë pallatet dhe banesat e tyre dhe do të vendosin si do të veprohet me to. Ndërkohë, tha Rama të gjithë banorët nuk kanë pse flenë jashtë, por t’i drejtohen qendrave sociale ku përveç fjetjes sigurojnë edhe ushqim të ngrohtë dhe falas.
“ Sa do zgjasi nuk ta them dot sot. Ju kemi ofruar të shkoni në qendrat e pritjes. Pallat gati tani për tani nuk kemi. Një vend ku të fusësh kokën është në qendrën sociale të pritjes. Më ke mua përballë, merre gocën dhe ikim bashkë.
Nuk të ndaloj dot nëse do të rrish në shi. Qendra sociale të mban me bukë do të kesh edhe dyshek. Do më lini ta mbaroj. S’po më lini të flas.
Nga ky moment do të vijojnë punën ekspertet. Nëse do shemben banesat në Kombinat. Qendrat Sociale janë të përkohëshme. Mos më vdisni para kohe, se nuk do gjeni zgjidhje. Me durim dhe qetësi do bëhen gjërat. Shkoni tek të afërmit. Tërmeti ka rënë edhe në Itali. Janë akoma nëpër kabina.
Është e shkruar kjo. Unë për vete nuk lëviz nga krevati ra nuk ra, tërmet, nuk lëviz. Ja dole përjashtë i shpëtove tërmetit, shkelje lëvoren e portokallit, rrëshqite e vdiqe, është e shkruar kjo punë”, tha Rama në takim me banorët e Kombinatit.
