Argjentina ka nisur një hetim ndaj 45 personave dhe kompanive për lidhje të mundshme me projekte të kërkimit dhe shfrytëzimit të hidrokarbureve pranë Ishujve Malvine, të njohur si Ishujt Falkland në Britani.
Autoritetet argjentinase e dhanë njoftimin këtë të shtunë, pasi një ditë më parë presidenti Javier Milei mbajti një fjalim të ashpër mbi pretendimin e Buenos Airesit për sovranitetin mbi arkipelagun në Atlantikun e Jugut.
Në një deklaratë, Presidenca argjentinase tha se ka urdhëruar nisjen e procedurave ndaj 45 personave fizikë dhe juridikë, me qëllim hetimin dhe, në rast shkeljesh, ndëshkimin e aktiviteteve që lidhen me kërkimin dhe shfrytëzimin e hidrokarbureve në zonën që Argjentina e konsideron pjesë të territorit të saj.
Autoritetet argjentinase nuk kanë publikuar emrat e subjekteve nën hetim. Sipas mediave argjentinase, mes tyre ka kompani nga Britania e Madhe, Kanadaja, Danimarka, Shtetet e Bashkuara, Holanda dhe Izraeli.
Presidenca argjentinase paralajmëroi se masat mund të prekin jo vetëm kompanitë që, sipas Buenos Airesit, kryejnë në mënyrë të paligjshme aktivitete për nxjerrjen e naftës, por edhe kompanitë që ofrojnë shërbime për këto subjekte.
Ishujt Malvine, të njohur si Falkland nga Britania e Madhe, ndodhen rreth 600 kilometra larg brigjeve të Patagonisë dhe administrohen nga Londra.
Sovraniteti mbi arkipelagun është objekt i një mosmarrëveshjeje të gjatë mes Argjentinës dhe Mbretërisë së Bashkuar. Në vitin 1982, konflikti për ishujt çoi në një luftë 74-ditore mes dy vendeve. Në atë konflikt humbën jetën 649 ushtarakë argjentinas dhe 255 britanikë.
Tensionet janë rritur sërish pas deklaratave të presidentit Javier Milei, i cili tha se Argjentina ndodhet në një moment që e konsideron të favorshëm për të forcuar pretendimin e saj historik mbi ishujt. Ai njoftoi gjithashtu masa më të ashpra ndaj projekteve të naftës dhe gazit në zonën përreth arkipelagut.
Deklaratat e Mileit erdhën pak ditë pasi presidenti amerikan Donald Trump tha se nuk përjashtonte mundësinë e rishikimit të qëndrimit tradicional amerikan të neutralitetit në mosmarrëveshjen për Falklandet.
Londra reagoi duke përsëritur qëndrimin e saj se Ishujt Falkland janë dhe do të mbeten britanikë, duke argumentuar se kjo pasqyron vullnetin e banorëve të ishujve.
Britania deklaroi gjithashtu se angazhimi i saj për mbrojtjen e ishujve është “absolut dhe i palëkundur”.