Ditën e djeshme Partia Demokratike tha se do të dërgojë komisionerët e saj në KAZA për të vërtetuar shkeljet që do të bëheshin gjatë këtij procesi. E para që reagoi ndaj këtij lajmi ishte Bindja Demokratike dhe më pas PS ku të dyja thanë se “ky është një skenar i PD për të prishur zgjedhjet”.
Nëse këto ishin thjeshtë dyshime, duket se Çlirim Gjata e konfirmoi këtë në emër të të gjithëve në “Open”.
“Regjistrimi i komisionerëve në KZAZ është moment teknik, se na duhen ata komisioner, pikërisht për këtë, për të mos pasur zgjedhje.”- tha Gjata
Kjo deklaratë bën të kuptosh që puna e tyre do të jetë sabotimi i të gjitha procedurave për të bojkotuar procesin zgjedhor. Mirëpo Kodi Zgjedhor është i ashpër në këtë drejtim ku që nga braktisja e detyrës e deri tek aktet më të rënda të prishjes së materialeve zgjedhore e dënon me burg.
Neni 330/a i Kodit Penal, në kapitullin “Braktisja e detyrës nga anëtarët e komisioneve të zgjedhjeve” përcakton:
“Braktisja e detyrës apo refuzimi për të kryer detyrën nga personat e ngarkuar me administrimin e procesit të votimit dhe të numërimit, përbën kundërvajtje penale dhe dënohet me burgim nga gjashtë muaj gjer në dy vjet.
Kur veprimet e mësipërme kryhen duke marrë me vete ose duke zhdukur materialet zgjedhore, ose kur kanë sjellë pasoja të rënda për procesin e votimit apo kanë çuar në pavlefshmërinë e zgjedhjeve, dënohet me burgim nga dy gjer në pesë vjet”.
Prandaj skenari i Partisë Demokratike për të bllokuar procesin zgjedhor përmes komisionarëve të saj, rrezikon t’i dërgojë ato në burg.
