Prokuroria kërkesë noterëve: Njoftoni policinë nëse shfaqet Kajmaku

Prokuroria e Krimeve të Rënda, në lidhje me arratisjen e Agim Kajmakut, i ka dorëzuar një letër të gjithë noterëve në vend, që nëse i kërkuari nga drejtësia Agim Kajmaku paraqitet tek ato për çdo lloj veprimi, duhet të njoftojnë në mënyrë të menjëhershme policinë. Shkresa iu është shpërndarë të gjitha zyrave të noterisë në vend dhe mban firmën e drejtuesit të seksionit, Kolë Hysenaj.

“Njoftohen të gjithë noterët që nëse shtetasi Agim Kajmaku paraqitet për kryerjen e ndonjë veprim noterial cilado qoftë kërkesa e tij të njoftoni paraprakisht policinë e shtetit. Mos bërja e njoftimin ngarkon noterët me përgjegjësi penale” shkruhet në shkresën që prokuroria e Krimeve të Rënda u ka dorëzuar noterëve në vend.

Agim Kajmaku, ish kryetar i Bashkisë Vorë, është shpallur në kërkim nga policia pasi akuzohet për 3 vepra penale, për “Shpërdorim detyre”, “Falsifikim formularësh” dhe “Kryerje të funksionit pas shkarkimit nga detyra.”

Kajmaku u denoncua nga Partia Demokratike se ai ishte arrestuar dhe dënuar në Greqi për falsifikim parash nën identitetin Jorgo Toto. Kjo akuzë u mohua disa herët nga vetë Kajmaku, deri sa prokuroria shqiptare mori provat se Agim Kajmaku dhe shtetasi Jorgo Toto i dënuar në Greqi, ishin i njëjti person. Pas provave prokuroria kërkoi shkarkimin dhe arrestimin e tij, por Kajmaku rezulton i arratisur. Gjithashtu pas shkarkimit, Agim Kajmaku kishte firmosur largimin nga detyra të dy nënkryetarëve të bashkisë, por kishte ndërruar datën e shkarkimit të tyre sikur e kishte marrë vendimin para largimit të tij nga detyra e kryetarit të bashkisë, duke kryer kështu një tjetër falsifikim me dokumentet pas atij me formularin e dekriminalizimit.

Biba: PD i bëri presion KQZ. Por duhet vlerësuar për Kajmakun

Nënkryetari i Komisionit Qendror të Zgjedhjeve, Denar Biba foli në News 24, pak ditë pas vendimit për shkarkimin e kryebashkiakut të Vorës, Agim Kajmaku. Për numrin dy të KQZ, letra e sekretarit të PD drejtuar institucionit të adminsitrimit të zgjedhjeve në Shqipëri, ishte formë presioni. Megjithatë, Denar Biba vlerëson faktin që Partia Demokrati arriti të zbardhte të shkuarën e Kajmakut. “Letra e Gazmend Bardhit drejtuar KQZ ishte pa asnjë dyshim një formë presioni. Është për t’u përgëzuar PD, sepse ishte iniciatore, si duket pati informacionet, dhe shkoi përtej mundësisë së KQZ, madje edhe Prokurorisë, për Kajmakun e të tjerët. KQZ ka qenë korrekte kur iu ka kërkuar institucioneve shqiptare, jo të huaja, të dhëna për kandidatët. KQZ nuk ka asnjë lloj mundësie që të ketë kontakte apo informacion se çfarë kanë bërë shqiptarët jashtë shtetit. PD duhet përgëzuar, por letra ishte një lloj presioni”, u shpreh Biba.

Zëvendëskryetari i KQZ tregoi se mes anëtarëve të këtij institucioni pati rezerva për shkarkimin e Kajmakut. Megjithatë, zhvillimi i mbledhjeve me dyer të hapura për mediat kur gjykohet në bazë të ligjit të Dekriminalizimit, për Denar Bibën cënon liritë e individëve, pasi ekspozohet jeta e këtyre personave. “Kishte rezerva, tendencë për të manipuluar jo. Për fat të mirë dhe të keq, të gjitha vendimet e KQZ janë live. Jo vetëm procesi i vendimmarrjes, por edhe i arsyetimit që bëjnë anëtarët. Kjo është e mirë për publikun, por jo i rehatshëm për ne anëtarët, që duhet të bëjmë çdo mendim publik. Kam thënë se prezenca e medias gjatë gjithë gjykimit nuk është korrekte, pasi mediat në gjykata nuk lejohen gjatë gjithë kohës. Në rastet kur ne gjykojmë në bazë të ligjit të Dekriminalizimit preken thelbësisht liritë e individëve, ekspozohet jeta e tyre personave, në rast konkret e Agim Kajmakut”.

Denar Biba sqaron më tej se ligji i Dekriminalizimit është në përplasje me një vendim të Kuvendit, në lidhje me kandidimin ose jo të personave që kanë kryer vepra penale. “Legjislacioni që rregullon për Dekriminalizimin përbëhet nga norma kushtetuese, ligji i Dekriminalizimit, vendimi i Kuvendit dhe formulari përkatës që mbushin të gjithë subjektet. Ndërkohë që ligji parashikon vepra përkatëse dhe thotë “ndalohet të kandidojnë apo të zgjidhen individë që kanë kryer 1, 2.. deri 70 vepra penale”, jep edhe ndalesën tjetër për kohëzgjatje dënimi, ku shumica janë përkohësisht, shumë pak janë ata që ndalohen për të gjithë jetën, nuk parashikon rastin e deklarimit ose të mos tregimit të së vërtetës në formular si vepër penale dhe si rast për shkarkim. Në këtë pikë, vendimi i Kuvendit ka tejkaluar ligjin dhe ka përcaktuar një rast të ri shkarkimi. Kjo është qartësisht në kundërshtim me ligjin. KQZ nuk mund të bënte asgjë, ne jemi operatorë së të drejtës. Dekreti i Presidentit ishte një akt individual. Ne nuk kemi thënë që dekreti është anti-kushtetues, por është në kundërshtim me ligjin”, u shpreh Denar Biba.

KQZ, debate për Kajmakun. Avokati: S’mund të vendosim mbi opinione

Komisioni Qendror i Zgjedhjeve ka nisur diskutimet për kryebashkiakun e Vorës, Agim Kajmaku, i cili akuzohet nga PD se ka fshehur arrestimin në Greqi duke shkelur ligjin për dekriminalizimin dhe si pasojë duhet të shkarkohet nga detyra.

Prokuroria e Përgjithshme ka vërtetuar ndërkohë që Agim Kajmaku në Greqi ka përdorur emrin Jorgo Toto i cili rezulton i arrestuar në shtetin fqinj. Kjo shkresë e Prokurorisë së Përgjithshme u është shpërndarë të 5 anëtarëve të KQZ-së për të shqyrtuar aktet.

Në mbledhjen e KQZ-së avokati i Agim Kajmakut, Isuf Shehu tha se verifikimet e prokurorisë janë të paplota dhe se shkresat nga Greqia nuk kanë ardhur ende. Për këtë arsye, tha avokati, KQZ nuk mund të vendosë mbi bazën e disa opinioneve.

“Verifikimet janë të paplota nga ana e prokurorisë. Detyra e prokurorisë janë të parashikuara qartë, te cilën ata nuk e kanë zbatuar.

Prokuroria nuk ka arritur të sigurojë asnjë vendim të formës së prerë ndaj subjektit Agim Kajmaku. Letërporositë nga institucionet greke nuk kanë ardhur në organin e akuzës në Shqipëri. Kështu lind pyetja a është nisur kërkesa për këtë letërporosi?! Pa patur këto përgjigje nuk kemi një procedurë verifikimi të përfunduar.

Procedimi ndaj Kajmaku në Greqi është bërë plotësisht në mungesë të tij dhe në mungesë të dijenisë së tij. Ju të nderuar s’mund të merrni vendime mbi opinione qofshin këto edhe nga prokuroria”, është shprehur avokati.

Gënjeu me vetëdeklarimin, PS i bën “dalje” Kajmakut

Me anë të një shkrese zyrtare dërguar PD-së, Prokuroria e Përgjithshme vërtetoi të hënën se kryebashkiaku i Vorës Agim Kajmaku, ishte i njëjti person me Jorgo Toto, i arrestuar dhe hetuar vite më parë në Greqi.

Veç PD-së, Realstory.al mësoi se të hënën Prokuroria i kishte dërguar shkresë zyrtare edhe Komisionit Qendror të Zgjedhjeve, ku vërtetohet se Kajmaku ka deklaruar të dhëna të rreme në formularin e vetëdeklarimit, duke u bërë kështu subjekt i ligjit të dekriminalizimit.

Tashmë KQZ është vënë në lëvizje, ku pritet që të merret vendimi për shkarkimin ose jo të kryebashkiakut të Vorës. Ndërkohë, deputeti i Partisë Socialiste Ulsi Manja është shprehur për A2 CNN se Kajmaku do të trajtohet sipas ligjit, pasi askush nuk është mbi të.

“Rasti Kajmaku do të trajtohet sipas ligjit. Askush nuk mund të jetë mbi ligjin e dekriminalizimit. Janë çështje që i kemi sqaruar që kur ka hyrë në fuqi ky ligj. Partia Socialiste e ka kryer detyrimin e saj ditën kur ka votuar me konsensus të plotë bashkë me opozitën ligjin e dekriminalizimit”, tha Ulsi Manja. Ndërkohë, të martën u njoftua se Prokuroria e Përgjithshme nisi hetimet për Agim Kajmakun, i cili rrezikon deri në 4 vite burg.

Fshehu dënimin në Greqi, Prokuroria nis hetimet për Kajmakun

Prokuroria e Përgjithshme ka nisur hetimet ndaj kryetarit të bashkisë së Vorës, Agim Kajmaku, pasi ka gënjyer në formularin e dekriminalizimit duke mos deklaruar se ka qenë në hetim nga drejtësia greke. Sipas ligjit Kajmaku rrezikon të dënohet nga 6 muaj deri në 4 vite burg pas falsifikimit që ka bërë në plotësimin e formularit të dekriminalizimit.

Prokuroria nisi hetimet një ditë pasi deklaroi se letërporosia nga Athina vërtetoi se Agim Kajmaku dhe Jorgo Toto, ishin i njëjti person. Prokuroria gjithashtu i kërkoi KQZ-së heqjen e mandatit për kryebashkiaku socialist të Vorës, Agim Kajmaku për të cilën pritet të vendoset nga Komisioni Qendror i Zgjedhjeve.

Letërporosia e ardhur nga Athina vërteton se gjurmët e gishtërinjve të Agim Kajmakut janë të njëjta me Jorgo Toton, i cili është arrestuar në Greqi. PD ishte e para që denoncoi rastin që vuri në punë prokurorinë për zbardhjen e të vërtetës, ndërsa vetë Kajmaku mohoi të ketë pasur dijeni se po hetohej nga Gjykata e Janinës.

Prokuroria: Kajmaku gënjeu në formular për dënimin. Kreu i Vorës e mohon

Pas publikimit të shkresës së Prokurorisë së Përgjithshme nga Partia Demokratike, ku vërtetohej se Agim Kajmaku ishte i njëjti person me shtetasin Jorgo Toto, i arrestuar dhe hetuar në Greqi, Realstory.al mësoi se e njëjta shkresë e Prokurorisë ka mbërritur dhe në Komisionin Qendror të Zgjedhjeve. Tashmë, pritet që KQZ të mblidhet për të marrë një vendim në lidhje me z.Kajmaku, i cili më herët ka herdhur poshtë akuzat se ishte i dënuar apo hetuar në shtetin fqinj. Ndërkohë, Realstory.al tentoi të kontaktonte kryebashkiakun e Vorës për të marrë një prononcim prej tij në lidhje me verifikimin e Prokurorisë së Përgjithshme, por ai nuk u përgjigj.

Ndërkohë, në shkresën e publikuar nga Partia Demokratike, sipas Prokurorisë, “Zyra Qendrore e Kombëtare e INTERPOL Tiranës, me shkresën Nr. 10709/6, datë 24/09/2019; ka sqaruar se nga informacioni i marrë nga zyra homologe INTERPOL Athinë rezulton se nga krahasimi i gjurmëve të gishtërinjve të shtetasit Agim Kajmaku, me gjurmët e gishtërinjve që ndodhen në databazen e të dhënave kriminale në Greqi ka përputhshmëri të plotë me ato të shtetasit Jorgo Toto”, thuhej në këtë shkresë.

Gjithashtu theksohej se “se subjekti Agim Kajmaku ka pasur dijeni të plotë në lidhje me faktin që ka qenë në hetim penal në Greqi dhe se ndaj tij kishte një proces gjyqësor penal në zhvillim. Kjo, sepse ai është arrestuar, në flagrancë dhe ka dalë para gjykatës greke ku është bërë e ditur e gjithë procedura që do të ndiqej ndaj tij”, thuhet në shkresë.

Në këto kushte, Agim Kajmaku është subjekt i ligjit të Dekriminalizimit. Sipas ligjit për dekriminalizimin, pasqyrimi i të dhënave të rreme në formularin e vetëdeklarimit, i cili plotësohet nga kandidatët për kryetar bashkie, përbën vepër penale dhe dënohet me burgim sipas nenit 190 të Kodit Penal”. Ndërkohë, Neni 190 i Kodit Penal flet pikërisht për falsifikimin e formularëve dhe në pikën 1 të tij deklarohet se falsifikimi i tyre dënohet nga 6 muaj deri në 4 vite burg.

Pak pasi Partia Demokratike publikoi letrën e Prokurorisë së Përgjithshme, ku vërtetohej se personi Agim Kajmaku ishte i njëjti me Jorgo Toton, reagoi kryebashkiaku i Vorës, që akuzohet për deklarim të rremë në formularin e vetëdeklarimit. Me anë të një shkrese zyrtare, Agim Kajmaku i drejtohet Prokurores së Përgjithshme Arta Marku, duke sqaruar se nuk kishte dijeni për procesin gjyqësor në ngarkim të tij që zhvillohej në Greqi. Kajmaku sqaron në letër, se pasi ishte informuar nga media për hetimet ndaj tij, ai kishte kërkuar nga Gjykata e Janinës informacion në lidhje me këtë çështje.

“Si subjekt i interesuar menjëherë jam paraqitur pranë autoriteteve përkatëse greke dhe kam kërkuar informacion lidhur me pretendimet e mësipërme. Nga informacionet e marra ka rezultuar se në ngarkim ekzistonte një çështje penale e pezulluar nga autoritetet përkatëse të distriktit të Artës, Greqi, lidhur me një ngjarje të datës 13 janar 2003, për të cilën unë nuk kam patur dijeni më parë. Me kërkesën time nëpërmjet përfaqësuesit ligjor është kërkuar heqja e pezullimit, vënia në lëvizje e kësaj çështje dhe dërgimi i saj për gjykim pranë gjykatës kompetente përkatëse. Mbi këtë bazë çështja është gjykuar nga Gjykata e Apelit e Krimeve të Rënda Janinë, e cila në pëfundim të këtij hetimi ka vendosur në datë 12 shtator 2019 shpalljen të pafajshëm të të akuzuarit për aktin e vënies në qarkullim të monedhave të falsifikuara që pretendohet se është kryer në Arta, Greqi datë 13 janar 2003”, shkruan Kajmaku.

Ndërkohë, lidhur me mospasqyrimin e të dhënave të sakta në “Formularin e Vetëdeklarimit”, Agim Kajmaku shprehet se kjo gjë ka ndodhur për shkak të mospasjes dijeni për çështjen. “Lidhur me mospasqyrimin e të dhënave të sakta në “Formularin e Vetëdeklarimit” të fakteve lidhur me ndonjë masë sigurimi ose urdhër kërkimi ndaj personit tim sqaroj se një gjë e tillë ka ndodhur për shkak të mungesës së plotë të dijenisë time lidhur me fakte të tilla sikundër del edhe nga përmbajtja e shkurtimit të vendimit duke qenë se i gjithë procesi hetimor është zhvilluar në mungesën time. Në dijeninë time ngjarja e vitit 2003 është trajtuar administrativisht nga ana e autoriteteve policore greke dhe çdo gjë ka përfunduar aty pa u përfshirë ndonjë autoritet gjyqësor”, shprehet Agim Kajmaku, duke pretenduar se në ngarkim të tij nuk pati kurrë proces gjyqësor, të paktën në dijeninë e tij.

Megjithatë, Prokuroria e Përgjithshme pretendon të kundërtën. Në shkresën e saj, thuhet se Kajmaku “nga verifikimet e kryera konfirmohet se subjekti Agim Kajmaku ka patur dijeni të plotë në lidhje me faktin që ka qenë në hetim penal në Greqi dhe se ndaj tij kishte një proces gjyqësor penal në zhvillim. Kjo, sepse ai është arrestuar në flagrancë dhe ka dalë para gjykatës greke ku i është bërë e ditur e gjithë procedura që do ndiqet ndaj tij. Nga ana tjetër rezulton se subjekti ka kryer veprime konkrete për fshehjen e këtij fakti para autoriteteve shqiptare, duke ndryshuar në datë 30.03.2004 emër/mbiemër nga “Jorgo Toto” në “Agim Kajmaku”, si dhe duke mos e deklaruar këtë fakt në Formularin e Vetëdeklarimit”, thuhet në shkresën e Prokurorisë.

/Realstory.al/

Vendimi i Gjykatës: Kajmaku i pafajshëm

Kryebashkiaku i Vorës, Agim Kajmaku, që ka mbajtur emrin Jorgo Toto gjatë periudhës që ka qenë emigrant në Greqi, ka fituar në 12 shtator pafajësinë nga Gjykata e Janinës për akuzën e “falsifikimit të parave”. “Gjykata e Janinës e mbledhur në 12 shtator 2019 pas ndërprerjes së seancës së datës 11 shtator. Të gjykohet i akuzuari i paraqitur (nëpërmjet avokatit të tij me prokurë, Jiorgo Toto, Thanas ose Thanasi, i Paraskevi, i lindur në 1971, Tiranë). Person i cili ka qenë në kërkim sipas vendimit nr. 79/2003 i gjykatës së Artës. Vendosim që i akuzuari të shpallet i pafajshëm për akuzën e falsifikimit të kartëmonedhave, për të cilat është akuzuar në Artë në 13.01.2003” mbyllet vendimi i gjykatës, publikuar nga Sekretari i Përgjithshëm i Partisë Demokratike, Gazmend Bardhi. Ndërkohë, në këto kushte, Jorgo Toto apo Agim Kajmaku, shpallet i pafajshëm nga akuzat në shtetin grek. Megjithatë, Partia Demokratike, nëpërmjet Gazmend Bardhit shprehet se vendimi i Gjykatës Janinës ka vërtetuar akuzat e saj se “Agim Kajmaku alias Jorgo Toto, ishte në kërkim nga drejtësia greke”.

“Gjykata e Janinës konfirmoi të gjithë denoncimet e Partisë Demokratike se Agim Kajmaku ishte në kërkim nga drejtësia greke, pasi është arrestuar në Janar 2003 me emrin Jorgo Toto dhe ai e kishte fshehur këtë fakt në formularin e dekriminalizimit. Seancat gjyqësore për Jorgo Toton e Bashkisë së Vorës, të zhvilluara në Janinë për 4 ditë, u japin fund zvarritjeve të prokurorisë për zbulimin e identitetit të kandidatit të Edi Ramës”, shkruan Gazmend Bardhi. Më tej, numri dy i PD-së, shprehet se Agim Kajmaku tashmë ka punë me drejtësinë shqiptare. Sipas Bardhit, ky vendim i gjykatës greke, konfirmon se Agim Kajmaku alias Jorgo Toto, ka gënjyer në Formularin e Dekriminalizimit.

“Megjithëse i dha kohë të sigurojë që nuk futet në burg në Greqi duke mbyllur çëshjtjen atje, Agim Kajmaku ka punë me ligjin shqiptar. Vendimi konfirmon se Agim Kajmaku alias Jorgo Toto ka qenë me proces penal të hapur në Greqi dhe me urdhër arresti në fuqi, ashtu sikurse Partia Demokratike denoncoi. Vendimi konfirmon se Agim Kajmakut, alias Jorgo Toto, nuk i lejohej nga ligji i dekriminalizimit të kandidonte për kryetar bashkie. Vendimi konfirmon se Agim Kajmaku, alias Jorgo Toto ka gënjyer në Formularin e Dekriminalzimit, duke kryer veprën penale të fallsifikimit të dokumenteve. Agim Kajmaku ka fshehur arrestimin në Greqi me emrin Jorgo Toto. Për këtë duhet të shkarkohet nga detyra dhe t’i vihen menjeherë prangat për shkeljen flagrante të ligjit të dekriminalizimit dhe mashtrimin e qytetarëve shqiptarë”, përfundon Bardhi.

Kajmaku dorëzon shenjat e gishtave, pritet krahasimi me ato greke

Kryetari i sapozgjedhur i Bashkisë Vorë, Agim Kajmaku, ka dorëzuar shenjat e gishtërinjve në policinë shkencore, të cilat janë administruar nga Njësia e Dekriminalizimit dhe Prokuroria e Përgjithshme më datë 3 shtator, pasi posta i ka dorëzuar letrën në adresën e shtëpisë në Prezë, sipas Report TV.

Në lidhje me vonesën e dorëzimit të shenjave të gishtërinjve lindi një përplasje në distancë mes prokurorisë dhe Postës Shqiptare. Prokuroria e Përgjithshme deklaroi se Kajmakut iu dërgua një kërkesë të dorëzojë gjurmët e gishtërinjve, por shtoi se nuk mbërriti për shkak se shërbimi postar ngatërroi adresë. I menjëhershëm ka qenë edhe reagimi i Postës Shqiptare e cila hodhi poshtë duke thënë se letra për Agim Kajmakun është dorëzuar në Bashkinë Vorë dhe kjo është lehtësisht e verifikueshme.

Gjurmët e gishtave të dorëzuara nga Kajmaku, pritet të krahasohen me ato që do të mbërrijnë nga autoritete greke, ku më herët Prokuroria e Përgjithshme ka dërguar një letërporosi për të marrë të gjithë informacionin e nevojshëm dhe të dhënat biometrike të shtetasit Jorgo Toto, të arrestuar në Greqi. Partia Demokratike deklaron se Jorgo Toto i arrestuar në Greqi dhe Agim Kajmaku janë i njëjti person duke bërë publike për mediat edhe numrin e pasaportës dhe foton e Jorgo Totos, që sipas saj korrespondon me atë të Agim Kajmakut. Vetë kryebashkiaku i Vorës, i ka hedhur poshtë këto akuza duke i cilësuar si sulme politike dhe se ai nuk është dënuar asnjëherë në jetën e tij.

Në lidhje me rastin Prokuroria e Përgjithshme ka nisur një hetim dhe ka kërkuar më shumë informacion nga autoritetet greke për të bërë krahasimin të dhënave, ndërsa ka marrë nga PD-ja të gjithë dokumentacionin që zotëron. Disa ditë më parë PD akuzoi prokurorinë për zvarritje të hetimit ndaj Agim Kajmakut, ndërsa Prokuroria e Përgjithshme deklaroi se është në pritje të letërporosisë së dërguar në Greqi.

Akuzat e PD, prokuroria administron gjurmët e gishtërinjve të Agim Kajmakut

Akuzave të opozitës se Agim Kajmaku, kryebashkiaku i Vorës, dhe Jorgo Toto, i arrestuar dhe kërkuar për falsifikim parash në Greqi janë i njëjti person, do u japin përgjigje gjurmët e gishtërinjve. Prokuroria e Përgjithshme ka administruar gjurmët e gishtërinjve të kryebashkiakut të sapozgjedhur të Vorës, Agim Kajmaku, i cili i ka dhënë ato në njësinë e dekriminalizimit.

Prokuroria ka marrë në dorëzim edhe dokumentet dhe provat që Partia Demokratike zotëron ndaj Agim Kajmakut si dhe është në pritje të letërporosisë dërguar autoriteteve greke për marrjen e dosjes së plotë dhe informacioneve nga homologët e tyre në shtetin helen.

Prej disa ditësh, Partia Demokratike ka dalë në deklarata për shtyp thuajse çdo ditë, ku akuzon dhe publikon dokumente e foto, që sipas saj, Agim Kajmaku dhe Jorgo Toto janë i njëjti person.

Pas publikimit të numrit të pasaportës Z 0148497 të Jorgo Totos nga sistemi TIMS me të cilin është arrestuar, ka publikuar edhe numrin e pasaportës të Agim Kajmakut nën emrin e Jorgo Toto me po të njëjtin numër. PD gjithashtu ka publikuar edhe fotot e pasaportës së Agim Kajmakut dhe Jorgo Totos që kanë në pasaportë ku vihet re se është i njëjti person.

Kajmaku i ka hedhur poshtë të gjitha këto detaje duke deklaruar se ai nuk është arrestuar asnjëherë dhe kjo është e vërteta e vetme. Do të jetë prokuroria që do i jap përgjigje kësaj çështje duke përcaktuar përmes gjurmëve të gishtërinjve nëse ato të Agim Kajmakut janë të njëjta apo jo me ato të Jorgo Totos, të arrestuar në Greqi.

PD nxjerr fotot nga TIMS: Kajmaku dhe Jorgo Toto i arrestuar, i njëjti person

Pas nxjerrjes së dokumenteve nga PD, përmes të cilave deklaron se janë prova që Agim Kajmaku dhe Jorgo Toto i kërkuar nga autoritetet greke janë i njëjti person, ka vijuar me publikimin e fotove të pasaportës. Partia Demokratike ka publikuar dy fotografi, që sipas saj vërtetojnë se Agim Kajmaku dhe Jorgo Toto janë i njëjti person. Ish-deputeti Gent Strazimiri deklaroi se të dhënat e nxjerr nga sistemi TIMS tregojnë se foto në pasaportën e Jorgo Totos me nr Z 0148497, të arrestuar dhe i shpallur në kërkim nga policia greke është i njëjtë me foton e pasaportës që përdor Agim Kajmaku, nxjerrë po nga sistemi TIMS. Fotot vërtetojnë se Jorgo dhe Kajmaku janë i njëjti persona, deklaron Strazimiri nga selia blu.

“Ky dokument, i marrë nga sistemi TIMS është me foton e Jorgo Totos në pasaportën me nr. Z 0148497, me të cilën dhe është arrestuar. Dokumenti i dytë është po ashtu i nxjerrë nga sistemi TIMS tregon pasaportën me emrin Agim Kajmaku, por me të njëjtën foto si edhe Jorgo Toto në pasaportën me të cilën është arrestuar. Krahasimi i dy fotove që janë të të njëjtit person, vërteton se personi i kërkuar nën emrin Jorgo Toto, në fakt është Agim Kajmaku.

Provat janë të pakontestueshme dhe Agim Kajmaku apo Jorgo Toto duhet të largohet dhe të merret i pandehur për veprën e tij penale të kryer në shtetin grek dhe për veprën penale të mashtrimit me deklarimet e formularit të dekriminalizimit.” – thotë Strazimiri.

Gjatë gjithë kësaj javë Partia Demokratike ka publikuar dosjen greke në të cilën është në kërkim për falsifikim parash Jorgo Toto, për të cilin PD thotë se është kryebashkiaku i sapozgjedhur i Vorës, Agim Kajmaku. Nga ana tjetër vetë Kajmaku i ka mohuar këto akuza dhe nuk ka pranuar të këtë qenë ndonjëherë i arrestuar. Prokuroria e Përgjithshme ka nisur një letërporosi në Greqi për marrjen e dosjes dhe verifikimin e rastit. Gjithashtu, një ditë më parë, edhe PD dorëzoi në prokuroi të gjitha materialet që zotëronte me kërkesë të organit hetues.