Thyerja e bojkotit, Duka: Presion ndërkombëtar

Kryetari i Partisë Agrare, Agron Duka, i ftuar në emisionin “Real Story” të gazetarit Sokol Balla, u shpreh se “presioni” ndaj Bashës nuk është nga aleatët, por i ndërkombëtarëve ndaj klasës politike. “Opozita thyeu bojkotin, të mërkurën ulet në tryezë me mazhorancën për Reformën Zgjedhore.

“Nuk është e vërtetë që unë apo drejtues të tjerët nga opozita, kemi bërë përpjekje të veçuara. Veprimet e opozitës janë hap para, jo hap pas. Jemi në kushtet kur presioni ndaj politikës shqiptare është bërë nga ndërkombëtarët. Negociatat dhe Reforma Zgjedhore. Ne kemi thënë nuk mund të ulemi me njerëz që akuzohen për vjedhjen e votës”, tha Duka.

Ai shtoi më tej, se kushtet e vendosura nga CDU/CSU për hapjen e negociatave me Shqipërinë, konfirmojnë shqetësimet e opozitës. “Kushtet e CDU/CSU janë ato që ka thënë opozita”, tha ai. Sipas Agron Dukës, 7 kërkesat drejtuar Bashës, kërkojnë unifikimin e produktit politik. “Ka qenë një veprim i të gjithë opozitës. Mendoj që të rakordojmë mendimet tona që të kemi një produkt politik. Ky ka qenë nga bisedat e përbashkëta që ka bërë opozita”, tha Duka./Realstory.al/

Aleatët e Bashës në fushatë, Duka: Vëmendje për fshatin

Kreu i Partisë Agrare Ambientalise, Agron Duka, ka nisur takimet në terren me simpatizantët e partisë së tij. Duka është ndalur në fshatin Vihsaj, ku nëpërmjet një njoftimi në rrjetet sociale, njofton se ka zhvilluar një takim me strukturat e PAA-së. Pavarësisht se më herët ka shprehur qëndrimet kundër Bashës dhe PD, duke kërkuar dialog dhe bisedime me kryeministrin Edi Rama, Duka, nëpërmjet njoftimit në Facebook, konfirmon se duhet qeveri tranzitore, me qëllim ‘përgatitjen e zgjedhjeve të lira e të ndershme’, që sipas Dukës, është garancia që ‘kriza të mos përsëritet më’.

“Nga Vishaj, me strukturat e PAA-së, po përgatitemi për fillimin e një stine të re të politikës shqiptare, në të cilën çelësat e zgjidhjes së krizës nuk i ka më mazhoranca, por opozita. Vullneti për të mos pranuar asnjë marrëveshje, veç asaj me të cilën do të ngrihet një qeveri tranzitore, dhe do të përgatiten kushtet e nevojshme që vendi të shkojë në zgjedhje të lira dhe të ndershme, është garancia që kriza të tilla nuk do të përsëriten më. Duhet të shembim njëherë e mirë simbiozën e politikës me krimin, tjetërsimin e zgjedhjeve dhe mungesën e përgjegjshmërisë politike që buron nga marrja dhe mbajtja e pushtetit në forma jo legjitime”, shkruan Duka.

Më tej, duke u shprehur se duhet shembur simbioza e ‘politikës me krimin’, Duka indirekt bën dhe fushatë elektorale. Sipas tij, pas pastrimit të politikës nga krimi, fundi i debatit për këtë temë, do të pasohet nga një vëmendje më e madhe për zonat rurale. “Nëse beteja për pastrimin e politikës ka dominuar në debatin publik, fundi i saj do të përkojë me një vëmendje të domosdoshme për zonat rurale. Nevojat e fermerëve, nga subvencionet e drejtpërdrejta dhe çmimi i naftës deri tek infrastruktura dhe sistemet e kullimit dhe vaditjes, përbëjnë shqetësime konkrete që presin zgjidhje. Zgjidhje që PAA është gati ti ofrojë në zgjedhjet e ardhshme”, shkruan Agron Duka.

Agron Duka: S’ka zgjedhje më 13 tetor, por Meta s’do dekretojë datë tjetër

Aleati i Partisë Demokratike, Agron Duka ka hedhur poshtë çdo mundësi që në 13 Tetor të zhvillohen zgjedhje të reja vendore. Sipas Dukës janë tejkaluar të gjitha afatet që të zhvillohen zgjedhje në këtë datë. Ai ka komentuar edhe sitiatën e krijuar në Shkodër pas dorëheqjes së kryebashkiakut socialist Valdrin Pjetrin, ndërsa thotë se Meta nuk do të rrëzojë veten dhe nuk do të nxjerrë dekret tjetër përveç 13 tetorit.

Duka e shikon situatën politike të komplikuar dhe apelon për një marrëveshje gjithëpërfshirëse.

“Ne në respekt të dekretit të Presidentit, disa nga partitë opozitare u regjistruan për zgjedhjet e 13 Tetorit. Ju thoni sa shanse ka? Zero shanse ka që të bëhen zgjedhje. Pyetja që bëhet është pse disa nga partitë u regjistruan dhe parti të tjera jo? Mendoj që ne thjesht shprehëm respektin për dekretin e Presidentit.

Situata që po kalojmë është e pakuptimtë. Ju bëni pyetje se çfarë do të bëjmë me Shkodrën. Nuk ka matematicien që ta gjejë se ça do bëhet. Mazhoranca thotë njoh 30 Qershorin, opozita thotë njoh 13 Tetorin. 13 Tetori i kaloi të gjitha afatet kushtetuese. Nuk bëhet më që të ribëhen zgjedhjet në Shkodër nëse ky zotëria penalizohet me ligjin e dekriminalizimit. Duhet dekreti i Presidentit. Presidenti ka dhënë dekretin me 13 dhe nuk jep datë tjetër. Ça do bëhet? E zgjidh Gjykata Kushtetuese. Gjykatë Kushtetuese nuk ka. Gjithë kjo situatë e pakuptimtë kërkon t’i thërrasim arsyes që të gjithë”, tha Duka për ABC news.

Zgjidhja duhet të vijë vetëm përmes një marrëveshjeje. Por Duka është kategorik kur shprehet se pakte si ai i 2017-s mes Ramës e Bashës, politika shqiptare nuk duhet t’i përsërisë më.

“Larg qoftë. Vetëm ajo jo. E 2017-s, ajo tregoi që nuk zgjidhi asgjë. Përkundrazi e ricikloi krizën. Nëse bëhen marrëveshje të tilla për të ricikluar kriza në leverdi të individëve të veçantë kjo është në dëm të Shqipërisë. Duhen marrëveshje që të kenë një zgjidhje të qëndrueshme”, tha Duka.

Kur pushimeve të gushtit po i vjen fundi, politikës i duhet që me nisjen e Shtatorit të marrë vendime të forta. Ndërkombëtarët presin që zgjidhja të vijë nga institucionet shqiptare, ndërkohë që politikanët tanë i kanë var shpresat tek ndërkombëtarët. Pritet që së shpejti Tiranën zyrtare ta vizitojnë disa delegacione ndërkombëtare që mund të ndikojnë në zgjidhjen e krizës.

Goni letër Edit: Robo tërhiqu!

Kreu i Partisë Agrare Ambientaliste, Agron Duka, aletat i Bashës, i ka drejtuar një letër publike kryeministrit Edi Rama, ku i kërkon të reflektojë dhe të bëj një hap pas për të shmangur përplasjen, që me përkeqësimin e situatës në vend duhet se është e pashmangshme. Duka e këshillon Ramën që të mos bëhet kurban vetë apo vendin tonë, por të heq dorë nga pushteti sa është ende në kohë për të bërë gjënë e duhur.

Duket sikur Letra e Dukës është frymëzuar nga shkrimi i RealStory, në të cilin i kërkon Ramës ose të marrë përgjegjësitë e garantimit të rendit dhe qetësisë në vend ose të tërhiqet para se të ketë viktima më 30 qershor.

Lexoni letrën e plotë

I dashur Edi,

Ndryshe nga ty, nuk kam qenë kurrë i aftë të ndaj politikën nga miqësia, por, ashtu si ty, nuk kam bërë ndonjëherë politikë me dimensionin privat të miqve apo kundërshtarëve. Sot po e thyej këtë rregull dhe po të shkruaj si mik, si një person me të cilin më ka lidhur jo vetëm puna por edhe momente jete.

Nuk di nëse po të keqkëshillojnë apo nëse pushteti të ka hequr aftësinë për të parë qartë atë që po ndodh; por më lejo të të them se je bërë i mirë i botës, të paktën i atyre që të rrethojnë sepse nga ty varen privilegjet dhe suksesi që gëzojnë, dhe i keqi i vetes.

Situata në vend po përkeqësohet nga ora në orë, dhe tashmë përplasja duket e pashmangshme. Paraardhësit e tu, pa asnjë përjashtim, janë ndodhur përballë mundësisë së humbjes së pushtetit. Megjithatë, Nano, Meta, Berisha, në mënyrat e tyre, kanë ditur të bëjnë një hap pas. Për këtë arsye, qytetarët janë treguar bujar me ta, edhe kur kanë gabuar, madje u kanë dhënë besimin për t’i qeverisur sërishmi.

Nuk është turp të tërhiqesh dhe nuk ka asnjë lavdi në mbajtjen e pushtetit me çdo mjet. Sepse e vetmja gjë që të përket është familja jote dhe nderi yt, gjithë të tjerat janë të përkohshme dhe mbi të gjitha janë të shqiptarëve. Herët apo vonë do të duhet t’i dorëzosh, veçse mënyra se si e bën këtë dorëzim do të jetë domethënëse për interesin e vendit.

Nëse vazhdon kështu, kam frik se do të jesh ti vetë kurbani që lips fundi i tranzicionit. Bëj që kurban të bëhet pushteti yt, jo ti, jo vendi ynë.

Reflekto robo, je ende në kohë për të bërë gjënë e duhur. Goni

Aleati i Bashës: I kam fqinj Avdylajt, janë familje e ndershme

Ndërsa skena politike dhe mediatike u ndez të mërkurën nga publikimi i telefonatave të përgjuara mes Astrit Avdulajt dhe drejtues të lartë të PS-së së Durrësit dhe Shijakut, mediat kanë rikthyer në vëmendje deklaratën e bërë nga aleati i Bashës, Agron Duka.

Në një intervistë për Report Tv disa muaj më parë, Agron Duka ka deklaruar se familja Avdulaj është e ndershme dhe se paratë i kanë siguruar nga puna në emigracion.

“Unë vetë jam shijakas dhe familjen Avdylaj i kam pasur fqinjë. Ata me origjinë janë çamë. Kanë punuar për vite në Gjermani. Flamuri, Flamur Avdyli ka punuar për vite me radhë në Gjermani.

Ka atë hotelin në Durrës, por ata kanë punuar për mua si njerëz të ndershëm në emigracion”, tha Duka, në tetor të vitit të kaluar.

Të mërkurën gazeta gjermane Bild publikoi biseda telefonike të përgjuara të Astrit Avdylaj që konsiderohet si anëtar i bandës së Shijakut.

Protesta e opozitës, Baçi: Nuk mund të quhen të dhunshme shishet që i quajnë si molotovë

Kreu i PD-së në Fier, Luan Baçi ka deklaruar në nisje të protestës se ajo nuk do të jetë e dhunshme ndërsa akuzoi policinë si provokatore të saj. Gjithashtu Baçi foli edhe për bombat molotov të hedhura në protestën e dhunshme duke u shprehur se “nuk mund të quhen të dhunshme ato shishet që i quajnë si molotovë.”

“Për protestën e sotme vendosin qytetarët. Protestat duhet të jenë jo të dhunshme. Protestat e PD nuk kanë qenë të dhunshme. Nuk mund të quhen të dhunshme ato shishet që i quajnë si molotovë. Policia është provokatore e dhunës. Nga një opozitë në kushte depresioni, ka dalë në rrugë dhe ka në mbështetje popullin, nuk mund të presin që t’i hedhim lule. Mund të ketë edhe tensione të cilat gjithmonë janë prezent në një protestë. Këto qytetarët që vijnë pas opozitës nuk vijnë vetëm për ndërrim pushteti”, u shpreh Baçi.

Nga protesta foli edhe kreu i PAA, Agron Duka , i cili theksoi se protesta e opozitës është për një kauzë të drejtë, ndërsa bëri apel kundër dhunës.

“Ne luftojmë për një kauzë të drejtë dhe përveçse janë dokumentuar që zgjedhjet janë të vjedhura, politika është e lidhur me krimin. Edhe unë kam të njëjtin apel. Jemi kundër dhunës. Nuk është shumë e lehtë për arsye të zemërimit popullor”

“Basha dhe Rama duhet të lëshojnë diçka. Do ketë protesta të dhunshme”

“Si Basha, si Rama duhet të lëshojnë diçka.” Kështu është shprehur mbrëmë në një intervistë televizive në Report Tv aleati i Bashës, Agron Duka. Madje ai ka deklaruar se protestat e opozitës do të jenë të dhunshme në mënyrë që të detyrojnë Ramën që të ulet në një tryezë bisedimi. Duka gjithashtu ka thënë se PD dhe opozita e bashkuar nuk do të marrë pjesë në zgjedhjet e 30 qershorit dhe se ato do të shtyhen.

“Dy krahët duhet të lëshojnë dicka për të arritur një zgjidhje të qëndrueshme. Ne nuk do të regjistrohemi nesër në KQZ për zgjedhjet. Ne nesër bëjmë akt marrëveshjen me PD-në, si parakusht është formimi i qeverisë tranzitore. Nesër do i firmosim në një akt marrëveshje. Ne angazhohemi që të mos hyjmë në zgjedhjet vendore, dhe jam i bindur që nuk do të bëhen. Asnjë nga ne, apo socialistët nuk do të ishte i kënaqur sikur po krijohet kjo partia, apo joshin demokratët që të kandidojnë për bashkitë. Këta po bëjnë po mundohen që të krijojnë parti opozitare, në mënyrë që të regjistrojnë kryetarë të pavarur, madje kanë filluar bisedat. Protesta të dhunshme? Janë të pashmangshme, edhe ndonjë konflikt i mundshëm. Kjo nuk është gjendje normale.

Dhe nëse bëhen zgjedhjet dhe nëse fiton 61 bashkitë është më e ndershme sesa të krijojë këtë opozitë farsë. Ramën ka për ta mbytur pushteti i vet, pasi ka gjithçka. Ne partitë e vogla kemi kërkuar dhe kemi arritur që të bindim PD-në, që ne jemi gati të rishikojmë sistemin zgjedhor për elementë mazhoritar. Opozita në datë 11 maj ka një tjetër protestë të madhe. Protestat mund të jenë paqësore apo dicka më të dhunshme për të ulur Ramën në bisedime këtë e vendosin vetë njerëzit. Nëse nënvlerësohet cdo gjë mund të ketë reagim i ashpër që mund të sjellë pasoja negative në të gjithë vendin. Bllokim të akseve rrugore? Është një vendim i PD-së, e kam mësuar nga mediat”, tha Agron Duka.