Kryebashkiakë me precedentë, Gjekmarkaj: Fenomen dramatik, u zgjodhën për këtë CV

Analisti Agron Gjekmarkaj tha se video ku pretendohet se është kryebashkiaku i Bulqizës, Lefter Alla duke pirë kokainë, tregon qartë se si ka degjeneruar shteti shqiptar dhe se ky është një fenomen dramatik. Gjekmarkaj tha në emisionin “Real Story” në News 24 se njerëz të tillë më precedentë janë zgjedhur pikërisht për shkak të shkuarës së tyre për t’u përballur me opozitën në zgjedhje por u mbeti fitorja në dorë pasi opozita iku nga zgjedhjet.

“Ku shohim se ku ka degjeneruar administrimi i Shqipërisë dhe sa sa i fuqishëm është banaliteti. Paraja në dorë të horrit thonë gjyshërit tonë. Kjo para ka shkuar vërtetë në dorë të horrave. Nuk kemi të bëjmë me një individ, kemi të bëjmë me një fenomen. Kemi të bëmë me fenomenin dramatik, është shqetësues. S’ka më kategori, pasi shteti në raport me disa standarde nuk ekziston. Ky fare mirë shpallet i pafajshëm, mund të ketë qenë dhe miell. S’e dimë. Mund t’ia heqin akuzat dhe mund të denoncojnë prapë ish-deputetin e PD (Ervis Salianjin). Dhe jo gazetarin. Ky është paradoks se do që ta politizojë. Unë mendoj se është e vërtetë, bindja ime personale. Kjo tregon se ku ka degjeneruar kjo gjë. Problemi është në Shkodër, Pogradec, etj. I bie që të gjithë kryebashkiakët, ka shkuar në 7 numri i tyre, u zgjodhën për këtë CV, këto standarde. U zgjodhën për t’u përballur me opozitën, por u mbeti fitorja në dorë pasi opozita nuk mori pjesë në zgjedhje. Pra kështu e meriton Bulqiza, Shkodra, këta japin vota.. askujt nuk i shkon të kapë dorën e mësuesit të fshatit. Nuk i shkon dora që të marrë një njeri normal, por marrin të fortin e lagjes. Pra i forti na merr ne të dobëtëve diçka. Ky është degjenerim i Shqipërisë. Ky është kulmi i dekadencës së shtetit shqiptar në këto 30 vite liri”, tha Gjekmarkaj.

Alfred Lela: Paqja ashtu si lufta, kërkon b…ë. Basha po i kërkon te ne, pa i pasur vetë

Nga Alfred Lela

Në një shkrim në gazetën Panorama analisti Agron Gjekmarkaj e cilësonte fitore marrëveshjen e arritur mes opozitës dhe mazhorancës për Reformën Zgjedhore. Sepse, arsyetonte Gjekmarkaj, parlamenti delegjitimohej dhe bojkoti i PD jepte më në fund frute. Kryetari i PD, që ka qenë në zor për të gjetur teknika komunikimi që do të shisnin te publiku një marrëveshje të re me Ramën, e ka rimarrë tezën e Gjekmarkajt dhe e ka përsëritur në Kolegjin e Kryetarëve (krerëve të degëve të partisë) të thirrur pasditen e së mërkurës. Analistët që kanë b…ë, ka thënë Basha sipas burimeve të Politiko.al duhet ta trajtojnë marrëveshjen si fitore të opozitës dhe si delegjitimim të Parlamentit.

Thënë më qartë: parlamenti duke dalë nga institucioni dhe duke u ulur me përfaqësuesit e opozitës në një mjedis neutral si Pallati i Kongreseve është ‘dorëzuar’. Basha me anë të këtij lejtmotitvi ka dashur, jo vetëm të qetësojë të vetët, duke u dhënë një fitore në tavolinë, por edhe të kompleksojë analistët duke u thënë se, nëse mbroni një tezë tjetër veç kësaj ‘jeni të shitur te Rama’. Agron Gjekmarkaj, i ftuar mbrëmë në Real Story në News 24, ka ngulmuar se nuk ia ka marrë ai Bashës tezën, por është e kundërta, Basha po përdor tezën e tij.

Pavarësisht e kujt është teza dhe pavarësisht se ajo përdoret për qëllime të ndryshme nga analisti dhe politikani, ajo që i intereson diskutimit është vërtetësia e saj. A qëndron ideja se opozita duke i marrë këtë marrëveshje shumicës delegjitimoi atë institucion që u nis të nxirrte nga shinat më 17 shkurt të vitit të shkuar kur braktisi parlamentin? Kjo e vërtetë ka dy gjysma të cilat komplotojnë kundër njëra-tjetrës. Sa ç’është e vërtetë se opozita e tërhoqi shumicën në fushë asnjanëse për të diskutuar dhe miratura së bashku Reformën Zgjedhore po aq qëndron edhe e kundërta.

Shumica ‘e futi opozitën në Parlament’ sepse aty do të jetë vula e fundit që do të certifikojë vullnetin politik për marrëveshje të palëve. Madje ‘futja në Parlament’ dhe në sistem duket se është qëllimi i marrëveshjes. Marrëveshja nuk ka pse të jetë fitore sa kohë që mjafton të jetë armëpushim. Basha e futi partinë e vet dhe opozitën në një përballje të cilën nuk mundi ta çonte deri në fund, as si luftë dhe as si paqe. Duke iu trembur gëzimit të kësaj të fundit, nisur nga precedenti i ‘muajve të mjaltit’ të verës 2017, Basha bërtet ‘fitore’ dhe kërkon b…ë te të tjerët. Nga droja se mos të tjerët i vërejnë pikërisht këtë mungesë.

“Diktatura iu imponua shumicës nga pakica”, Gjekmarkaj: Gjithë shoqëria fajtore, të kërkohet falje

Gjatë emisionit “Real Story”, analisti Agron Gjekmarkaj ngriti tezën se gjithë shoqëria ishte fajtore për diktaturën komuniste dhe jo vetëm Enver Hoxha. Sipas tij, ata njerëz që kanë akte për komunizmin, duhet të kërkojnë falje. Ai theksoi se komunizmi u krijua si pakicë që iu imponua shumcisë.

“Diktaturat lindin si vullnet i pakicës mbi shumicën. Si fillim i është imponuar pakica shumicës dhe më pas kemi një bashkëpunim të shoqërisë me diktaturën. Kjo ka ndodhur në 46 vite në Shqipëri. Shumica e popullsisë shtypte pakicën. Bashkëpunoi në çdo fshat dhe qytet. Është kaq e rëndë pesha e fajit e bashkëpunimit moral dhe etik. Ato që kanë akte konkrete gjatë komunizmit, duhet të kërkojnë falje. Nuk është vetëm Enver Hoxha fajtor, është dhe shoqëria. Camaj ka një shprehje “Sitemi jemi na”, tha Gjekmarkaj.

Debati mbi dëshmorët e luftës antifashiste krijoi përplasjes në stydion e “Real Story” mes historianëve Kasmi dhe Butka, ku ndërhyri dhe analisti Agron Gjekmarkaj. Historiani Marenglen Kasmi fillimisht një dokument të arkivave të ushtrisë gjermane, ku identifikoheshin 77 banda (çeta) ushtarake që i përkisnin Ballit Kombëtar, dhe që sipas dokumentit, ishin në shërbim të Gjermanëve. Por, publikimi i këtij dokumenti solli reagim të ashpër te të ftuarit. Marenglen Kasmi e quajti “përçrës të shqiptarëve” historianin Uran Butka, ndërsa ndërhyri Agron Gjekmarkaj i cili iu drejtua historianit Kasmi se: “S`të vjen turp”.

Pjesë nga debati në studio:

Marenglen Kasmi- Nuk po merem me karakterin luftarak, por me organizatën politike të Ballit Kombëtar. Kam një raport të timin 14 prill 1944 ku rreshtohen të gjitha bandat. Arkivi ushtarak i ushtrisë gjermane. Janë 77 banda, me numrin e pushkëve dhe detyrave që bashkëpunojnë me gjermanët. Këto janë të Ballit Kombëtar. Numri i pushkëve të Ballit Kombëtar është 15 mijë në historiografi. 15600 janë këtu. Të gjitha forcat e Ballit Kombëtar kanë bashkëpunuar me gjermanët. Janë organizata që kanë bashkëpunuar. Ti je kontribuuesi kryesor i përçarjes historike të kombit shqiptar. Ta them drejtpërdrejt. Ti e ke nisur me krijesën e Luftës Civile.

Agron Gjekmarkaj- Kush jet ti, stë vjen turp….

Uran Butka – Kujt i thua përçarës i kombit tij?! ..

Marenglen Kasmi – Harxhojmë energji duke u marrë me Ballin Kombëtar…

Uran Butka – Po ju merreni me Ballin. E ke shumë gabim. Unë mbroj këtë tezë, që të gjithë ata që kanë luftuar për çlirimin e atdheut, duhet të vlerësohet dhe të nderohet. Me këtë rast është bërë një manipulim i keq.

Dëshmorët e LANÇ, Butka: Vlerësim i njëanshëm

Prej disa ditësh në Bulevardin “Dëshmorët e Kombit” janë vendosur dëshmorë të Luftës Nacional Çlirimtare. Mirëpo, disa nga emrat dhe fotot e vendosur në bulevard, kanë ngjallur debat publik. Historiani Uran Butka u shpreh se është gabuar për mënyrën se si janë përzgjedhur emrat e vendosur në bulevard. Sipas tij, nëse do të bazohej mbi dokumente historike, debati aktual nuk do të ndodhte.

“Nëse ky akt do bëhej mbi dokumente historike, natyrisht nuk do ishte ky reagim i historianëve, politikanëve dhe popullsisë. Unë kam marrë shumë telefonata për njerëz që nuk janë paraqitur. Është lënduar dhe një pjesë e popullsisë që nuk duhet të ndodhte”, tha historiani. Më tej ai shtoi se ky është vlerësim i njëanshëm.

Uran Butka u shpreh se ky veprim është politik dhe ideologjik, antihistorik. “Unë do ta konsideroj këtë një vlerësim krejt të njënanshëm. Është një akt politik dhe ideologjik. Është antihistorik. Është një akt përçarës sepse nuk e nderon luftën anti-fashiste. Në këtë 75 vjetor, në vend të luante rol bashkues, janë përjashtuar figura të shquara nga nacionalizmit”, tha Uran Butak.

Sipas Uran Butkës, Lufta Nacional Çlirimtare u monopolizua nga komunistët. “Lufta çlirimtare nuk është vetëm e komunistëve, është e të gjithë faktorëve, kush më shumë e kush më pak. Enver Hoxha dhe jugosllavët e paraqitën luftën si vetëm të tyre. E monopolizuan luftën dhe më pas pushtetin. Para Mukjes, lufta ishte e përbashkët. Brenda luftës antifashiste u zhvillua një luftë civile. U shtua pesha në një luftë vëllavrasëse. Është një luftë civile që pati shumë viktima. Ku të çoi kjo luftë, të çoi te regjimi komunist”, tha Butka.

Lufta çlirimtare, Paskal Milo: Më e suksesshmja në historinë e Shqipërisë

Paskal Milo u shpreh në “Real Story” se lufta për çlirimin e Shqipërisë është nga më të suksesshmet e kombit. Sipas tij, lufta e radhiti Shqipërinë me forcat aleate.

“Mendoj që këtu jemi. Ky debat që bëjmë sot nuk është i shëndetshëm. Ne duhet të debatojmë për rrjedhojat e luftës. Lufta është një kontribut real, konkret që na radhiti te fitimtarët. Përmasat, organizimi dhe rezultatet, është lufta më e suksesshme që është bërë ndonjëherë në historinë e popullit shqiptar”.

“E dyta, Skënderbeu ka bërë një rezistencë aktive mbijetese, ndërsa kishte aleancë në Perëndim. Siç pati Lufta e Dytë Botërore aleatë, edhe Skënderbeu pati aleatë. Aleatët perëndimorë Skënderbeut jo gjithmonë i kanë ardhur në ndihmë. Në këtë kuptim, Lufta Nacional-Çlirimtare është më e rëndësishme madje edhe se e Skënderbeut, në disa tipare flasim”, tha Milo.

Fotot e dëshmorëve, Milo: Nëse do na pyesnin ne, s`do gabonin

Historiani Paskal Milo e cilësoi si një veprim për tu vlerësuar, vendosjen e fotove në bulevard të dëshmorëve të Luftës Antifashiste Nacional Çlirimtare. Në studion e emisionit “Real Story” të gazetarit Sokol Balla, se ata njerëz dhanë jetën e tyre për lirinë e Shqipërisë. “Së pari duhet të jemi të ndërgjegjshëm, ajo që u bë për të vendosur fotot e heronjëve të luftës për 75 vjetorin e çlirmit, është për tu vlerësuar. Vlerësohet lufta dhe njerëzit që dhanë jetën në lule të rinisë për këtë vend. Vendosja e fotografive në bulevard është një vlerësim. Ky është thelbi i debatit”, tha Milo.

Megjithatë, ai shprehu rezerva për faktin se për vendosjen e tyre nuk janë pyetur historianët. “Përtej kësaj, ka ndodhur një lajthitje, një gabim… Unë u intersova të di se kush është marrë me listën e njerëzve që janë vendosur në bulevard. Pyeta, dhe nuk duhet të përmend emrat. U interesova në Institutin e Historisë, u interesova në fakultetin e Historisë, po qe se do ishin pyetur historianët dhe specailsitët, ata patjetër që do e kishin shmangur këtë gabim që qoftë me dashje qoftë padashje ndikoi”, tha historiani. Ndërkohë, ai shtoi, se edhe nëse ato tre fotot që kanë ngjallur debat nuk do të ishin vendosur, përsëri do të ishte gjeneruar debat. “Edhe nëse këta persona të mos ishin vënë, përsëri debati do gjenerohej. Pse do kishte debat? Do kishte për shkak të rrjedhoja që erdhën nga lufta dhe interpretimit që i bëhet luftës për objektiva aktuale politike”./

Gjekmarkaj: Në Bulevard qëndrojnë dhe ata që përndoqën martirët, kritere për emërimin hero

Analisti Agron Gjekmarkaj tha se në listat e dëshmorëve duhet të nderohen ata heronj të vërtetë që dhanë jetën kundër pushtuesit dhe jo ata emra që kanë dalë nga lista e Byrosë Politike. Gjekmarkaj tha në emisionin “Real Story” se pavarësisht se bie dakord me thelbin e drejtë të Luftës Nacional Çlirimtare, në fakt vendi ka një problem madhor pasi nuk di se sa heronj e dëshmorë ka. Ai madje hodhi akuza se shumica e heronjve janë zhveshur nga solemniteti i tyre dhe janë përdorur për propaganda politike. Këtë qëndrim Gjarmarkaj e mbajti në lidhje me debatet e krijuara me fotot e dëshmorëve të Kombit të vendosura prej disa ditësh në Bulevardin “Dëshmorët e Kombit”. Ai tha se jo të gjithë dëshmorët e varur e meritojnë titullin hero.

“Bie dakord me thelbin e luftës që ka qenë i drejtë, por nuk bie dakord me përmasat e saj. Ne nuk dimë ende se sa heronj kemi, sa dëshmorë. Heronjtë tonë gjatë historisë janë zhveshur nga solemniteti me propaganda politike. Në atë bulevard një pjesë e heronjve janë të vërtetë dhe meritojnë respekt. Një vend që nuk respekton dëshmorët e vet nuk meriton të ketë histori.

Titullin hero nuk e meritojnë atë që kanë vrarë ballistë dhe janë vrarë prej tyre. Por hero janë ata që janë vrare në përpjekje për të larguar pushtuesin. Ne duhet t’i respektojmë heronjtë e vërtetë të Shqipërisë, jo ata që janë bërë me lista nga Byroja Politike.” tha Gjekmarkaj

Pjesë nga debati:

Sokol Balla: Ata që janë vrarë nuk janë vrarë?

Agron Gjekmarkaj: Ka disa kategori të vrarësh. Kush e meriton statusin e heroit, e meriton ai që bie në përpjekje me okupatorin. E meriton Qemal Stafa, e meriton Vojo Kushi, Perlat Rexhepi, Branko Kadia, e meritojnë shumë të tjerë.

Sokol Balla: Pse ata që u vranë nga ballistët çfarë janë?

Agron Gjekmarkaj: Nuk e meritojnë ata që kanë vrarë ballistët dhe janë vrarë nga ballistët. Nuk e meritojnë ata që kanë ndjekur Abaz Kupin dhe janë vrarë nga forcat e Abaz Kupit. Absolutisht jo.

Sepse deri në 1943, lufta ka qenë plurale, rezistenca ka qenë pluraliste. Nga Mukja deri në mbarim ka pasur të gjitha trajtat e luftës civile për pushtet. Komunistët e kuptuan dhe ka dokumente pafund që lufta ndryshoi thelbin për arsye pushteti, jo për arsye kauze, jo për arsye drejtësie.

Sokol Balla: Nuk jam dakord me atë që njëra palë ishin mëkatarët dhe pala tjetër ishin shenjtorët. Gjersa flasim për elementë të luftës civile, nuk është se vetëm partizanët kanë shkrehur armën ndaj ballistëve ka pasur dhe ballistë që kanë shkrehur armën ndaj partizanëve.

Agron Gjekmarkaj: Sigurisht ndaj them që kjo kategori nuk e meriton të quhet hero, kjo që janë vrarë shqiptarët me njeri-tjetrin. Pastaj ka edhe një gjë tjetër që është edhe më e poshtër. Cila është? Në qoftë se para 6 vitesh ne e konsideruam një gjetje dhe ishte një gjetje brilante ajo e kryeministrit që i vuri martirët e kishës katolike në Bulevard, sot pas 6 vitesh ai vë aty disa nga ata që i kanë përndjekur që kanë bërë terror më shumë se Turgut Pasha në zonat katolike të Shqipërisë, në Kurbin, në Malësi të Madhe.

Sokol Balla: E diskutuam atë gafën dhe gabimin dhe pse vjen ajo. Ajo vjen për shkak se nuk sillen historianët.

Agron Gjekmarkaj: Nuk mund ta quajmë çështje të injorancës një gjë të tillë në 75-vjetorin e çlirimit. Mund ta quajmë një sinjal, një shkelje syri për një kategori të caktuar elektorale në Shqipëri, për t’u thënë që unë e kam një vështrim për ju.

Debati është i shëndoshë, debat duhet të bëjmë sepse historia në vetvete është dialektikë debati. Nuk mund të jetë totalitare që të biem të gjithë dakord me historinë.

Gjekmarkaj: Opozita e çoi krizën në Europë

Agron Gjekmarkaj u shpreh në emisionin “Real Story” të gazetarit Sokol Balla, se ndryshimi i kursit të Lulzim Bashës në të bërin opozitë, është një lajm i mirë. Sipas Gjekmarkaj, Basha ka ndryshuar strategji, që sipas tij, prej tani, opozita do të jetë prodhuese e lajmeve. “Është lajm i mirë, nga videot që ne pamë të kujton fushatën elektorale të kryetarit të Stambollit. Ky është një reflektim në planin e diskursit publik. Ky është një ndryshim strategjie. Nuk jam dakord për leximin që i bëri Erli situatës së opozitës”.

“Nëse do ishte për protestat Rama do kishte rënë. Ai nuk ra se e mbajtën ndërkombëtarët. Opozita nuk pati sukses ta rrëzoi me protesta. Por ia doli të eksportojë krizën në kancelaritë evropiane. Kushtet e Bundestagut e shndërruan qeverinë në kufomë politike. Opozitës i takon të bëhet iniciatore e lajmeve në Shqipëri. Nga sot lajmet do i diktojë opozita dhe jo më qeveria”, tha Gjekmarkaj. Më tej, analisti Gjekmarkaj u shpreh se protestat e opozitës janë ndaluar, pasi çështja është jashtë kufijve të Shqipërisë dhe po monitorohet nga ndërkombëtarët.

Sipas Gjekmarkaj, opozita në parlament është marionetë, duke shtuar se nuk beson se Shqipëria do të ketë hapje të negociatave me Edi Ramën. “Opozita e bashkuar sot është njësoj sikur dikush ta ngul thikën pas shpine dhe ti normalisht do të kesh tjetër rrugë. Rrugët tashmë janë të ndara. Opozita në parlament janë marioneta. Për mua, opozita në parlament nuk janë fare në koncept politik. Unë nuk besoj se negociatat mund të hapen me Edi Ramën. Rama ka 7 vjet që qeveris, 4 herë ka gënjyer për hapje negociatash”.

“Nuk besoj se ka shqiptar që beson se Edi Rama do hapë negociatat. Unë besoj se Rama është pengesa kryesore që ne nuk na lejon të hyjmë në Europë, me kanabizimin, me krimin, me aferat, me skandalet. Edhe në zgjedhjet e 30 qershorit, pjesëmarrja ishte e ulët dhe po ashtu as negociatat nuk u hapën dhe ka krizë të thellë. Me këto që ka ndodhur, nuk ka arsye pse të kenë ulje. Mendoj se Basha është në rritje cilësore në këtë moment”, tha Gjekmarkaj. /Realstory.al/

Opozita në Kosovë dhe Shqipëri. Gjekmarkaj-Topollaj përplasen në “Real Story”

Pyetja e gazetarit Sokol Balla, për opozitën në Kosovë dhe atë në Shqipëri, për të ftuarit në “Real Story”, përplasi analistin Agron Gjekmarkaj dhe përfaqësuesin e Bindjes Demokratike Fabian Topollaj. Sipas përfaqësuesit të BD, opozita në Kosovë erdhi në pushtet duke ndryshuar qasje, ndërsa opozita në Shqipëri, pasi doli nga sistemi, po kërkon të rifutet në sistem duke kërkuar largimin e deputetëve që nuk pranuan djegien e mandatave. Ndërkohë, Agron Gjerkmarkaj u shpreh se Bindja Demokratike hyri në zgjedhjet e 30 qershorit si parti e dytë, dhe doli e treta.

Topollaj- Albin Kurti fitoi zgjedhjet dhe erdhi në pushtet duke ndryshuar qasje. Opozita shqiptare janë duke kërkuar të rikuperojnë daljen nga sistemi. Madje kërkojnë që të hiqen ata që ndenjën në sistem, dhe të futemi ne sistem, të paktën për Reformën Zgjedhore. Ti akuzon Rudina Hajdarin dhe Bindjen Demokratike se kuptuan përpara teje atë që ka ndodhur sot.

Gjekmarkaj- Ju hytë si parti e dytë në zgjedhje dhe dolët të tretët…

Topollaj- Sot Basha i kërkon Edi Ramës që ta zëvendësojë me Rudina Hajdarin…

Gjekmarkaj- Absolutisht po, këtu bëhet fjalë për një reformë që e kërkon BE….

Topollaj- Epo ligji thotë që Reforma bëhet në Parlament… Vetëvendosja ishte koherente, ndërsa Lulzim Basha i dogji mandatet për të bindur njerëzit që nuk kishte marrëveshje me Edi Ramën.

Gjekmarkaj- Po pse e kundërshtoi këtë…

Gjekmarkaj-Çupi përplasen për rrymat ruse dhe islamike në Tiranë

Ndërhyrja ruse dhe influencat e lindjes janë një problem që po ndihen edhe në Shqipëri. Për gazetarin Frrok Çupi kjo është bërë evidente, por janë partnerët perëndimorë ata që e mbajnë Shqipërinë drejt perëndimit dhe e ruajnë atë nga fryma islamike apo anti-amerikane.

“Ne sot kemi embrione të një anti-amerikanizmi. Kemi politikanë që frynë rryma islamike dhe pro ruse. Influencat e lindjes kanë hyrë në Shqipëri dhe jemi në një rrezik, por është interesi i shtuar i partenerëve Perëndimore që na ruan.” tha Çupi gjatë emisionit “Real Story” në News 24.

Ndërsa analisti Agron Gjekmarkaj akuzoi kryeministrin Rama si sjellës të këtyre influencave erdoganiste-putiniste, pasi është mik me presidentin turk dhe kjo u pa që nga memoriali i turpshëm te kodrat e Liqenit.

“Ndikimin më të madh e shoh nga influenca erdoganiste-putiniste dhe kjo u duk që tek memoriali i turpshëm tek Kodrat e Liqenit. Ky ndikim i erdoganzimit bëhet nën drejtimin e kryeministrit Rama, pasi është mik me Erdoganin.” tha Gjekmarkaj

Përtej lobimeve në SHBA apo dyshimeve për ndërhyrje të parave ruse duket se edhe problemet e qeverisjes apo humbja e terrenit nga opozita janë kthyer në një debat mes gazetarit Frrrok Çupi dhe analistit Agron Gjekmarkaj në emisionin “Real Story” të gazetarit Sokol balla në News 24.

Për Çupin në politikë ka ende elita dhe intelektualë dhe se fatmirësisht qeveria ka një qasje pro amerikane. Por për Çupin është për të ardhur keq që opozita po humb terren çdo ditë e më shumë “Një qeveri ka elita, ka intelektualë, ka elita diplomatike. Unë flas në parim. Opozita jonë rrjedh nga shifrat përditë. Ne kemi një qeveri që është e detyruar të jetë pro-amerikane.” tha Çupi.

Analisti Gjekmarkaj nuk është në një mendje duke deklaruar se në fakt në qeveri jo që nuk ka elita por vetëm shërbëtor të Ramës. “ Çfarë elitash. Nuk ka elita, ka shërbëtorë. Të shikosh te Edi Rama elitarizëm është tmerr.”

Për Edvin Kulluri i vetmi fat i mirë në gjithë këtë histori është se Shqipëria është pjesë e NATO-s dhe se siguria është më e madhe nga lotimet ruse. “Shqipëria do të shndërrohet në një brez të sigurisë së madhe nën ombrellën e NATO-s. Ky është lajm i mirë, fat i mbarë.”

Debati në Real Story, Veliaj-Gjekmarkajt: PD do t’i ikë përgjegjësive të veta

Në studion e emisionit “Real Story” të gazetarit Sokol Balla, ka pasur dhe një debat mes analistit Agron Gjekmarkaj dhe kryetarit të bashkisë Erion Veliaj.

Gjekmarkaj u shpreh se zgjedhjet e 30 qershorit ishin ‘moniste’, ndërsa Veliaj u përgjigj se ‘opozita nuk doli të luante’, duke bojkotuar zgjedhjet. Gjatë debatit, Veliaj u shpreh se PD i ka ikur përgjegjësive të veta.

Gjekmarkaj: 30 qershori ishte një maskaradë. Ishin zgjedhje moniste.

Arben Skënderi: Jo, unë mendoj se partitë e vogla duhet të hynin në parlament. Ne kemi një zë.

Gjekmarkaj: Ju i shërbyet thjesht Ramës.

Veliaj: Opozita na del e na thotë se nuk dua të luaj. Si nuk dua të luaj. Ti nuk thua që nuk dal në fushë.

Gjekmarkaj: Me këtë vend është bërë që edhe gomari të qeshë. Po iu dalin njerëz kriminelë. Nuk është rastësi që iu dalin vetëm juve.

Veliaj: O Agron, po ata që hyjnë në fushë plagosen.

Gjekmarkaj: A ka njerëz që nuk kanë probleme kriminale?

Veliaj: Po ka, jam unë pa dosje kriminale dhe jam kryetar bashkie.

Gjekmarkaj: Kjo është të tallesh me opinionin publik. PS ka edhe njerëz të mirë.

Veliaj: Pse PD merret vetëm me PS. Nëse situata qenka kaq e rëndë, pse nuk dilni në protesta, por silleni si fëmija. Opozita do t’i ikë përgjegjësive të veta.

Gjekmarkaj: Topalli gaboi, por më shumë PD

Debatet e nxehta politike që janë duke ndodhur në mesin e të djathtëve, duket se nuk po e favorizojnë aspak Partinë Demokratike dhe kjo sigurisht që është duke e dobësuar atë. Kështu e shikon “luftën civile” brenda PD, analisti Agron Gjekmarkaj. Një prej kritikeve më të nxehta dhe të ashpra brenda të djathtëve është Jozefina Topalli, e cila kërkon në mënyrë të përsëritur largimin e Bashës duke e akuzuar atë për rrënimin e PD. Mirëpo deklaratat e saj, Gjekmarkaj i ka cilësuar të pashëndetshme dhe të ndodhura në kohën e gabuar. Madje e akuzon Topallin se ishte ajo që i hodhi benzinë zjarrit dhe bëri që të shpërthenin kritikat e tjera brenda të djathtëve. Topalli duhet të priste dhe të gjente një tjetër moment për kritikat, u shpreh Gjekmarkaj, pasi zbehu të gjithë aksionin politik të PD për të vënë në vështirës Ramën me dorëheqjen e Valdrin Pjetrit.

“Nuk është as i duhur, as i shëndetshëm. Për hir të së vërtetës, benzinë zjarrit i hodhi zonja Topalli e cila, sipas meje, në raport me evolumin e ngjarjeve nuk gjeti momentin e duhur për të folur. Mund të priste edhe pak ditë. Sapo PD, nëpërmjet çështjes së Valdrin Pjetrit kishte vënë në pozite të vështirë Ramën, erdhi qëndrimi i saj radikal ndaj Bashës. Në demokraci gjithkush ka të drejtë të flasë, duke marrë për vete koston dhe nderin e atyre që nënshkruan. Gjithashtu, nuk jam dakord që, pas çdo kritike të thuhet që po i shërbehet Ramës, sikur gjithçka në PD të jetë një mrekulli. Por ‘lufta civile’ në PD i shërben Edi Ramës; kjo s’ka pikë dyshimi.”- ka thënë Gjekmarkaj në një intervistë për politiko.al

Megjithatë Gjekmarkaj është i bindur se Topalli është një aset i çmuar për PD dhe se Basha gaboi me largimin e figurave të rëndësishme demokrate. Gjekmarkaj tha se Bashës i duheshin pranë këto persona falë eksperiencave politike, pasi e pa se largimi i tyre nuk i shërbeu aspak për mirë sidomos nga pikëpamja elektorale. “ Unë kam besuar, dhe ende besoj, që Jozefina Topalli është një aset i së djathtës. Jam dakord që elitat duhet të qarkullojnë. Por në PD-në e sotme, veç në qofsha unë qorr dy sysh, nuk shoh rreth Lulzim Bashës asnjë, të mbetur as të ardhur, të vlejë më shumë se Jozefina Topalli me eksperiencën e saj të gjatë në politikë. Diçka është e qartë: largimi i Topallit dhe disa të tjerëve nuk është bërë për asgjë parimore. Basha e ka bërë krejt për qëllime personale. Nga pikëpamja elektorale nuk i dha rezultat.”

Gjekmarkaj ka folur edhe për lëvizjen “Basha ik” brenda të djathtëve, duke u shprehur se është kundër kësaj ideje që nuk ka vend aspak. “Nuk jam dakord as me këta që i thonë Bashës ‘ik ti të vijmë ne!’. As kjo nuk rri, as në qiell as në tokë.”

Në fillim të shtatorit pritet që të marrë jetë lëvizja ‘Basha Ik”, pjesë e të cilave do të jenë zërat kritikë ndaj Bashës, të cilët kanë mbajtur qëndrime të forta kundër Bashës pas zgjedhjeve të 30 qershorit. Realstory.al e paralajmëroi më herët këtë lëvizje pjesë e të cilës pritet të jenë Jozefina Topalli, Arben Ristani, Arben Imami, Edit Harxhi, Edvin Kulluri, Ibsen Elezi etj. Lëvizja “Basha ik”, një revoltë e organizuar nga të mënjanuarit e PD, do të nis si një aksion për të ngjallur shpresën në PD.

Ristani: Agron ja ke fut kot!

Pas deklaratave që Arben Ristani bëri për emisionin “Real Sotry” të gazetarit Sokol Balla në një edicion special, ka reaguar në lidhje me kritikat që janë bërë në drejtim të tij. Ristani ka mbajtur të njëjtin qëndrim duke thënë se djegia e mandateve ishte e gabuar, edhe pse në fillim ai e kishte mbështetur duke e menduar si zgjidhjen e duhur. Ristani tha se mënyra e vetme me të cilën tashmë Rama largohet është përmes zgjedhjeve dhe këtë duhet ta kuptojnë të gjithë, i pari lideri i PD, Lulzim Basha.

Ristani thekson se Rama nuk largohem me llafe, por me zgjedhje, si e vetmja rruge ligjore që ka opozita. Madje Ristani i ka kujtuar edhe analistit Agron Gjekmarkaj se edhe pse nuk kundërshtoi djegien e mandateve, nuk mundet sot të mbyll gojën e të hesht përgjithmonë duke parë PD të rrënohet. “Kjo nuk është një këshillë me vend, as për atë dhe as për PD” tha Ristani, i cili i ka kujtuar vetë analistit Gjekmarkaj se në 2017 ishte shprehur se lista “Basha” ishte e neveritshme.

“Sipas analizës së analistit Gjekmarkaj, meqë atëherë unë nuk dola kundër vendimit për të dorëzuar mandatet e për të bojkotuar zgjedhjet e Ramës, që sot e tutje duhet të mbyll gojën e të hesht përgjithmonë. Kjo nuk më duket një këshillë me vend – as për mua, as për këdo, që si unë, do që PD të vijë në pushtet, për të mirën e shqiptarëve. Nuk më duket me vend që të mos kemi të drejtë të reflektojmë mbi gabimet tona. Nuk më duket me vend që një analist të mund të ketë të drejtën të ndryshojë qëndrime e deklarata sipas rastit dhe dëshirës, ndërsa politikanit i hiqet mundësia të reflektojë mbi gabimet e bëra dhe konkluzionet e nxjerra.

Vetë Gjekmarkaj, pak kohë më parë është shprehur se Lista “Basha” e kandidatëve për deputetë në 2017 ishte e fëlliqur, e neveritshme, e hartuar për të vjelë frytet e një marrëveshje okulte të bazuar në interesa financiare. Akuza këto tmerrësisht të rënda, ndoshta të justifikuara në një farë mënyre nga lënia e tij jashtë listës së kandidatëve.”- ka shkruar Ristani në një postim të gjatë në Facebook.

Ristani gjithashtu bëri sërish thirrje për reflektim nga ana e Bashës dhe të krijojë një strategji të qartë, të mirëorganizuar dhe me njerëz të besuar për të ngritur sërish partinë dhe forcuar besimin e njerëzve tek PD. Nëse vazhdojmë kështu tha Ristani, PD do të shkojë drejt humnerës.

“Shqipëria sot ka nevojë më shumë se kurrë për një opozitë me strategji të qartë, të mirëorganizuar, të fuqizuar me njerëz të aftë e të besueshëm. Ku do na shpjerë ky qëndrim? Uniteti grusht-bashkuar rreth verbërisë ndaj realitetit të mban të mbërthyer në një rrugë e cila çon vetëm në një drejtim – drejt humnerës.”- shkruan Ristani

Para disa ditësh jam shprehur publikisht në lidhje me një fakt të qartë si drita e diellit: pavarësisht përpjekjeve,…
Gepostet von Arben Ristani am Freitag, 26. Juli 2019

RISTANI NË REAL STORY: BOJKOTI DËSHTOI, KËSHILLI TË RISHIKOJË VENDIMIN. RAMA IKËN VETËM ME ZGJEDHJE