Kreu i SPAK, sot intervista me 3 kandidatët në KLP

Këshilli i Lartë i Prokurorisë do të intervistojë të mërkurën (18 dhjetor 2019) tre kandidatët që synojnë të marrin kreun e Prokurorisë Speciale. Edvin Kondili, Altin Dumani dhe Arben Kraja janë tre kandidatët që do të synojnë drejtimin e SPAK.

Pasi u emëruan nga KLP si anëtar të këtij institucioni, Kondili, Kraja dhe Dumani shprehën interesin për të drejtuar një nga organet më të rëndësishme të reformës në drejtësi, atë që do të hetojë krimin e organizuar dhe korrupsionin në nivele të larta.

Intervistat me Dumanin, Krajën dhe Kondilin do të zhvillohen me të njëjtën procedurë si në rastin e zgjedhjes së Prokurorit të Përgjithshëm. Pra, gjithçka do të transmetohet në media edhe për qytetarët.

I pari që del përpara Këshillit të Lartë të Prokurorisë është Altin Dumani. Ai u rendit i pari dhe në listën e 8 prokurorëve që morën detyrën në SPAK. Më pas është prokurori Arben Kraja, ndërsa i fundit është Edvin Kondili.

Disa ditë më parë, kreu i KLP, Gent Ibrahimi u shpreh në media se kandidatët për kreun e SPAK do të vlerësohen në disa aspekte. Një ditë më pas, 8 prokurorët e parë të SPAK do të bëjnë betimin te Presidenti i Republikës, duke nisur zyrtarisht punën në institucionin që zëvendëson Prokurorinë e Krimeve të Rënda.

Prokurori i “Gërdecit”, la pa fjalë ONM. Kush është Altin Dumani, që pritet të drejtojë SPAK!

Të hënën, Këshilli i Lartë i Prokurorisë do të emërojë 8 prokurorët e parë në Prokurorinë Speciale, SPAK. Njëkohësisht me emërimin e prokurorëve të parë në SPAK, do të hapet gara edhe për drejtuesin e kësaj prokurorie. Sipas renditjes së KLP, Altin Dumani është prokurori me më shumë pikë, i renditur i pari në listë. Ai është përfolur edhe si një nga kandidatët kryesor për të marrë drejtimin e SPAK.

Po kush është Altin Dumani?

Në moshë 45-vjeçare, Altin Dumani vjen nga radhët e Prokurorisë së Apelit. Ai është lindur në Shupenzë të Dibrës, dhe njihet si “prokurori i pakompromis”. Ai është një nga prokurorët që drejtoi i pari njësinë Task Forcë, ngritur vite më parë për të luftuar krimin e jakave të bardha. Ka një karrierë prej 20 vitesh si prokuror, në mars të vitit 1999, ka shkelur për herë të parë në prokurori, me detyrë në Sarandë, ndërsa sot është kreu i komanduar i prokurorisë së Apelit për Krimet e Rënda.

Ai u bë drejtues prokurorie për herë të parë në Tropojë, në vitin 2000, një post sipas Dumanit që u refuzua nga shumë të tjerë për shkak të çështjeve problematike atje. Ai bëri bujë me qëndrimin e akullt që mbajti gjatë gjykimit të 29 të pandehurve të Gërdecit dhe 3 dënimet e përjetshme që kërkoi për tre nga të pandehurit kryesorë të tragjedisë së 15 marsit 2008.

Gjatë mbledhjes ku u pyet se pse vendosi që të jetë pjesë e SPAK, Dumani u përgjigj duke thënë se ka lënë mënjënanë komoditetin e prokurorisë së apelit dhe do ti përkushtohet luftës ndaj krimit. “Lufta ndaj krimit është më prioritare se komoditeti zyrës”. Dumani është një nga prokurorët e vetëm që la “pa fjalë” edhe të dërguarin e Operacionit Ndërkombëtar të Monitorimit, Theo Jacobs, ditën që doli përpara Komisionit të Pavarur të Kualifikimit. “Kam marrë pjesë në 25 çështje dhe kjo është hera e parë që s’kam asnjë pyetje. Zoti Dumani qenka me fat”, u shpreh Jacobs.

Veç Dumanit, në garë për SPAK janë dhe prokurorët Arben Kraja, hetuesi i rrugës Durrës-Kukës, Edvin Kondili i dosjeve “Kokaina”, Klodian Braho prokurori që heton korrupsionin, Enkeleda Millonai drejtuesja e prokurorirsë së Elbasanit, Behar Dibra prokurori i bandave të 97-ës, Ened Nakuçi dhe Elida Kaçkini.

Kandidati për kryetar të SPAK kalon me sukses ‘Vettingun’, lë pa fjalë ONM

Komisioni i Pavarur i Kualifikimit ka konfirmuar në detyrë prokurorin Altin Dumani, një nga 15 kandidatët për t`u bërë anëtar i Prokurorisë së Posaçme. Dumani ka kaluar vlerësimin e pastërtisë së figurës së tij në të gjitha nivelet, nga pasuria, integriteti profesional dhe ai moral. Vendimi për të lënë në detyrë prokurorin Altin Dumani, është pritur me duartrokitje në sallë, ndërkohë që për herë të parë, as Operacioni Ndërkombëtar i Monitorimit nuk ka pasur asnjë pyetje për Dumanin.

Theo Jacobs u shpreh pas seancës për vendimin ndaj Dumanit se “Kam marrë pjesë në 25 çështje dhe kjo është hera e parë që s’kam asnjë pyetje. Zoti Dumani qenka me fat”, u shpreh Jacobs. Altin Dumani është një nga kandidatët e SPAK, Prokurorisë së Posaçme që do të luftojë korrupsionin dhe krimin e organizuar në vend në nivele të larta të politikës.

Ai mori pikët maksimale në vlerësimin e Këshillit të Lartë të Prokurorisë pak ditë më parë, duke u renditur i pari në listën prej 15 anëtarësh, kandidat të SPAK. Në këto kushte, Atlin Dumani pritet jo vetëm të jetë një nga anëtarët e parë të SPAK, por njëkohësisht kandidat kryesor për të drejtuar këtë strukturë hetimore, që pritet me mjaft interes në vendin tonë, dalë nga Reforma në Drejtësi. Aktualisht Atlin Dumani është Prokuror i Apelit për Krimet e Rënda.