Dhuna ndaj arbitrit, FSHF kërkon dënimin e agresorëve

Pasditen e të shtunës në futbollin shqiptar u rikthyen aktet e dhunës. Në ndeshjen e Kategorisë së Parë, mes Shkumbinit dhe Dinamos u dhunua barbarisht arbitri i ndeshjes Sokol Bebja. Menjëherë pas këtyre akteve reagoi dhe Federata Shqiptare e Futbollit. Në një deklaratë për mediat, FSHF duke shprehur dënimin e akteve të dhunës ndaj arbitrit, kërkon Policisë së Shtetit të arrestojë agresorët.

“Federata e Futbollit dënon me ashpërsi aktin vandal të dhunimit të arbitrit Sokol Bebja në ndeshjen Shkumbini-Dinamo në qytetin e Peqinit. FSHF i bën thirrje Policisë së Shtetit të marrë urgjentisht masat për të arrestuar agresorët në fjalë dhe kërkon nxjerrjen e tyre të menjëhershme para ligjit, bazuar në nenin 274/A të Kodit Penal”.

“FSHF garanton se do ta ndjekë deri në fund këtë çështje në të gjitha instancat e drejtësisë. FSHF nuk do të lejojë në asnjë çast nëpërkëmbjen e autoriteteve sportive dhe ndërhyrjet e huliganëve në dëm të cilitdo në ambjentet sportive”, thuhet në reagimin e FSHF. Aktet e dhunës janë një problem serioz në futbollin në vend, për të cilat u ndërhy në Kodin Penal, duke i kategorizuar si vepra që dënohen deri në 3 vjet burg.

Ndërkohë, për rastin në fjalë reagoi dhe shoqata e arbitrave. “Shoqata e Arbitrave shpreh sot shqetësimin dhe indinjatën e thellë lidhur me dhunën e ushtruar ndaj arbitrit Sokol Bebja, gjatë ndeshjes Shkumbini-Dinamo në Peqin. Shoqata e konsideron të turpshme dhe të papranueshme hyrjen e agresorëve në fushën e blertë ku duhet të luhet vetëm futboll dhe dhunimin e paprecedentë të një arbitri”.

“Shoqata shpreh indinjatën e thellë për këtë ngjarje të rëndë e të dënueshme me ligj. Gjithashtu, Shoqata e Arbitrave kërkon nga policia e shtetit arrestimin urgjent të dhunuesve dhe nxjerrjen para gjykatës si dhe marrjen e masave për garantimin e punës dhe sigurisë së arbitrave. Shoqata e Arbitrave solidarizohet me arbitrin Sokol Bebja dhe i uron shërim të shpejtë”, thuhet në deklaratë.

Video/ Dy vjet pasi rrahën arbitrin, në Këlcyrë rrahin lojtarin e Maliqit

E diela riktheu dhunën në futboll. Një futbollist i skuadrës së Maliqit, mbeti i plagosur në sfidën kundër Këlcyrës, në takimin e vlefshëm për Kategorinë e Dytë. I dëmtuar ka mbetur futnollisti Arlind Xaka, i cili dyshohet se është gjutjur nga një futbollist kundërshtar, emri i të cilit raportohet të jetë Aristidhis Coli. Futbollisti i ekipit juglindor është dërguar fillimisht në spitalin e Gjirokastrës dhe më pas është nisur drejt Tiranës, pasi ka marrë dëmtime të rënda në nofull. Ngjarja është publikuar nga trajneri i skuadrës së Maliqit, Egli Malësia, i cili është shprehur për media të ndryshme se lojtarët e Këlcyrës kishin tentuar të qëllonin dhe atë vetë. Një gjë e tillë është përgënjeshtruar nga skuadra e Këlcyrës, që bëri një deklaratë publike ku pretendon se inxidenti me futbollistin Xaka ndodhi pas një dyluftimi në lojë.

“Për dëmtimin e futbollistit mik Xaka, i cili është transportuar në spital për të marrë ndihmën e shpejt, përplasja ka qenë në një dyluftim për topin”, thuhet në deklaratën e klubit të Këlcyrës. Ndërkohë, duket se deklarata përgënjeshtrohet nga videot e publikuara, ku shihen momentet e tensionit mes lojtarëve të të dyja skuadrave, pas daljes nga fusha e lojës e një prej lojtarëve të skuadrës vendase. Në video, pamjet e të cilës shpesh janë të paqarta për shkak të reshjeve të shiut, gjithësesi dallohet tensioni mes lojtarëve dhe ndërhyrja e arbitrit që tenton të qetësojë situatën. Ndërkohë, këto video, sipas klubit të Klëcyrës janë shpërndarë nga drejtues të skuadrës së Maliqit, me qëllim për të justifikuar dështimin e klubit të tyre.

Megjithatë, trajneri i skuadrës së Maliqit, Egli Malësia i ka cilësuar si momente tmerri ngjarjet e ditës së diel në fushën e futbollit të Këlcyrës. “Kemi përjetuar tmerr në fushën e Këlcyrës, gjë të cilën nuk e kemi hasur në asnjë fushë tjetër. Jeta e lojtareve ishte ne rrezik. Falënderojmë zotin që dolëm gjallë nga fusha e Këlcyrës, në kushte të tilla dhune fizike, psikologjike vetëm për futbollin nuk behet fjalë me. Me lojtare te gjakosur, me lojtarë në rrezik për jetën më thoni ju a mund të luhet futboll? Sot në ndeshje me Këlcyrën një prej futbollisteve i është rrezikuar jeta. Dikush duhet të mbajë përgjegjësi për këtë”, u shpreh trajneri i Maliqit, për News 24. Për ngjarjen ende nuk ka reagim zyrtar nga Policia e Shtetit.

Precedenti

Në fakt, nuk është hera e parë që në Këlcyrë ndodhin të tilla akte dhune në fushën e futbollit. Vetëm dy vjet më parë, në derbin Këlcyra-Përmeti, futbollistët vendas sulmuan arbitrin Alvi Paço, pas pretendimit për një penallti. Pamjet ishin të rënda, ku dukeshin lojtarët që sulmonin me grushte e shkelma arbitrin, që përfundoi në spital. Ndërkohë, për atë ngjarje, një nga lojtarët u shoqërua në komisariat, ndërsa klubi i Këlcyrës u përjashtua nga kampionati për pjesën e mbetur të sezonit. Gjithashtu ndaj disa lojtarëve të këtij klubi u aplikuan masa të ashpra ndëshkimore deri në përjashtim përjetë nga futbolli. Ndërkohë, gjatë ditës së diel janë shënuar dhe incidente të tjera të rënda në ekipet e Kategorisë së Dytë. /Realstory.al/

Prej kësaj jave, 5 vjet burg, nëse godet arbitrin

Duke nisur nga fundi i kësaj jave, kur do të zhvillohen garat e radhës sportive në vend, tifozët që dhunojnë lojtarin, trajnerin, arbitrin apo ndërjmetësin sportiv, do të përfundojnë në burg. Në datën 24 shtator u botuan në Fletoren Zyrtare ndryshimet në Kodin Penal, që ashpërsojnë masat për të gjithë personat që shkaktojnë akte dhune në stadime apo gara sportive.

Sipas Nenit 274/a, “Goditja ose vepra të tjera dhune ndaj sportistit, trajnerit, arbitrit, ndërmjetësit sportiv, për shkak të veprimtarisë sportive, dënohet me burgim nga një deri në tre vjet. Po kjo vepër, kur kryhet në mjediset sportive më shumë se një herë, apo është kryer nga drejtues apo anëtarë të klubeve sportive, dënohet me burgim nga një deri në pesë vjet”, thuhet në nenin e ri të Kodit Penal, që do të përdoret për akte të shëmtuara në tribunat e stadiumeve.

Në ndryshimet e Kodit Penal, është shtuar dhe Neni 274/b, i cili parashikon masa ndëshkuese të ashpra edhe për tifozët që hedhin mjete piroteknike, fishekzjarre, flakadanë gjatë zhvillimit të një ndeshje. Tifozët, që kryejnë aktet e sipërpërmendura, do të dënohen deri në 3 vjet me burg.

“Hedhja e sendeve të forta në fushën e lojës ose mbi masën e njerëzve, mbajtja apo përdorimi i lëndëve piroteknike, fishekzjarrëve, flakadanëve, gjatë zhvillimit të një aktiviteti sportiv, dënohet me burgim nga gjashtë muaj deri në tre vjet. Hyrja në fushën e lojës, gjatë kohës së zhvillimit të aktivitetit sportiv, nga persona të paautorizuar ose pengimi i zhvillimit normal të aktivitetit sportiv, dënohet me burgim nga një deri në tre vjet. Po kjo vepër penale, kur kryhet në aktivitetet sportive ndërkombëtare, dënohet me burgim nga një deri në pesë vjet”, thuhet në nenin e shtuar në Kodin Penal.

Këto ndryshime ligjore u kërkuan nga Federata Shqiptare e Futbollit, pas akteve të dhunës në stadiumin e Kamzës, ku zyrtarët e klubeve sulmuan arbitrin e ndeshjes së bashku me tifozët. Për këtë arsye, ndaj klubit të Kamzës u morën masa të ashpra disiplinore duke u përjashtuar nga kampionati, ndërsa FSHF kërkoi ndihmën e qeverisë për ashpërsimin e Kodit Penal për personat që kryejnë akte të tilla dhune. /Realstory.al/