Rasti Pjetri dhe Kajmaku, Patozi: Dekriminalizimi, ligj poshtërues, zgjidhja vjen me zgjedhje

Në kulmin e debatit nëse kryebashkiaku i Vorës, Agim Kajmaku ka qenë i dënuar apo jo në Greqi, ka reaguar dhe kryetari i Partisë Bindja Demokratike. Me anë të një reagimi në rrjetet sociale, Astrit Patozi shkruan se ‘ligji i dekriminalizmit’ ishte poshtërues që në fillim për vendin, megjithëse, në atë kohë, sipas Patozit, ky ligj u mendua se do të ishte i përkohshëm.

“Dekriminalizimi ka qenë që nga fillimi një ligj poshtërues për vendin, i cili kishte shkak dhe pasojë kryesisht vesin e “Rilindjes” për t’u furnizuar me “politikanë bashkëkohorë” tek kontigjentet më të inkriminuara të shoqërisë. Kur ai u miratua disa vjet më parë në parlament, gjithkush mendonte se ai do të ishte i përkohshëm dhe do të kishte vlerë aq sa udhëheqësit dhe partitë e tyre të mësoheshin me rregullat e reja, që banditët apo trafikantët nuk mund të ishin më deputetë, kryetarë bashkish apo zyrtarë të tjerë rangjesh të larta”, shkruan Patozi.

Megjithatë, sipas Patozit, edhe pa atë ligj, kishte vetëm dy rrugë që vendi të shpëtonte na fenomeni i futjes në politikë të personave të inkriminuar. Sipas tij, duhej krijimi i një ‘tradite të konsoliduar të sistemit politik’ dhe tjetra, ndërhyrja menjëherë për të ‘shkulur rrënjët e së keqes’. Në këto kushte, Astrit Patozi shprehet se nisur nga rastet e fundit, arrihet në ‘përfundimin se Shqipëria nuk ka asnjë arsye pse të presë dhe shpresojë në efektet vetërregulluese të dekriminalizimit”.

Ndaj, Patozi, duke folur si kryetar i një partie opozitare, shprehet se zgjidhja e vetme është largimi i Edi Ramës dhe mbajtja e zgjedhjeve të parakohshme. Sipas Patozit, shembujt e fundit nuk janë argument për të mos marrë pjesë në zgjedhje, por mundësisht duke i zhvilluar ato që nesër, shprehet kreu i PD duke i dërguar një mesazh ‘pajtimi’ edhe Bashës. “Ndaj edhe është detyrim i çdo formacioni opozitar që të kërkojë dhe provokojë zgjedhje të parakohshme për t’i shkurtuar ditët kësaj qeverie të korruptuar dhe të diskretituar. Çdo qëndrim tjetër do të ishte një akrobaci fyese për shqiptarët, të cilët, në rastin më të mirë, do të konsideroheshin si të pandjeshëm ndaj “të fortëve”, që u serviren si shefa politikë prej “Rilindjes”, për të mos shkuar më larg se kaq”, përfundon Patozi.

Kolegji rrëzon BD, Patozi: Duhet reformë e thellë zgjedhore

Kolegji Zgjedhor rrëzoi kërkesën e Partisë Bindja Demokratike të shpallte të pavlefshme zgjedhjet në Bashkinë e Selenicës. Kjo ka sjell reagimin e koordinatorit të saj, Astrit Patozi, i cili tha se e priste këtë vendin edhe pse pretendimet e tyre për parregullsi dhe deformim të procesit zgjedhor ishin të drejta dhe të mbështetura fort në Kodin Zgjedhor. Patozi tha se si garues në këto zgjedhje u bënë dëshmitarë të manipulimit dhe deformimit të procesit të zgjedhjeve duke e cilësuar këtë si “një sëmundje të rëndë të politikës shqiptare prej vitesh”. Ai bëri thirrje për një reformë të thellë zgjedhore që do të ishte e vetmja zgjidhje që do të ndalojnë një proces të deformuar dhe të siguronte një proces zgjedhjesh normal në të ardhmen.

“Duke qenë garues në këto zgjedhje, ne u bëmë dëshmitarë të manipulimit të vullnetit të zgjedhësve, një sëmundje e rëndë kjo e politikës sonë, që vijon prej shumë vitesh…Manipulimi i rezultatit të 30 qershorit e bëjnë të domosdoshme nevojën e një reforme të thellë zgjedhore, si kushti i parë për të pasur një proces normal në të ardhmen. Shqipëria duhet të hyjë në një cikël të ri duke i dhënë fund këtij sistemi të kalbur politik, i cili për shkak se është në grahmat e fundit, ka prodhuar këtë krizë të pashembullt, që po i shkakton shumë kosto vendit. BINDJA DEMOKRATIKE është e vendosur që të japë kontributin e vet në funksion të këtij qëllimi madhor, i cili më shumë se për të zgjidhur hallet e partive politike, duhet t’i shërbejë të gjithë shoqërisë shqiptare, që vuan prej shumë vitesh padrejtësisht pasojat…Natyrisht, që vendimet e KQZ-së në fillim dhe sot të Kolegjit Zgjedhor nuk sollën asnjë surprizë për ne dhe për publikun, ndonëse pretendimet tona ishin të drejta dhe të mbështetura fort në Kodin Zgjedhor.”- shkruan Patozi

EDHE KOLEGJI ZBATON POROSINË E EDI RAMËS PER T’I VËNË KAPAK 30 QERSHORITKolegji Zgjedhor rrëzoi sot ankimimet e…
Gepostet von Astrit Patozi am Montag, 22. Juli 2019

Patozi sulmon ashpër Bashën: Ndaje mendjen jurist, O fol e mba, o…

Astrit Patozi, koordinator i Bindjes Demokratike, ka pasur një reagim të fortë ndaj kreut të PD-se, Lulzim Basha, pas entuziazmit të tij për mosnjohjen e 30 qershorit nga Gjykata e Durrësit. Patozi tha se nuk do të komentonte vendimin e çmendur të një gjykate, por ka përdorur sulme të ashpra në drejtim të Bashës. Patozi i është drejtuar me një shprehje të Shqipërisë së Mesme “O fol e mba, o dh.. e ha” duke treguar rastet që Basha nuk i mban kurrë fjalët e tij dhe se ndryshon qëndrim sipas interesit personal. Patozit, i cili vë në dyshin edhe arsimimin e Bashës në Holandë, i drejtohet kreut të demokrateve se nuk mund të njohë vetëm ato vendime gjykate që i interesojnë dhe i pëlqejnë.

“Ti je duke i shtyrë ditët e tua, derisa të dalë një gjë tjetër e të harrohet fakti që i fale kundërshtarit 61 bashki pa betejë” tha Patozi duke kritikuar edhe një herë vendimet e dështuara që Basha ka marrë, që nga djegia e mandateve e deri tek mospjesëmarrja në zgjedhje.

Patozi nuk la pa përmendur edhe sulmin që Basha ka bërë ndaj Bindjes Demokratike, por sërish me dy qëndrime të tij, ku njëherë e akuzon se “mori pjesë për të legjitimuar fitoren e Ramës, ndërsa sot thotë se mori pjesë për të deligjitimuar procesin.”

“Eh, mor jurist, që nuk e tregon diplomën, megjithëse ta kanë bërë çështje prej shumë kohësh shkollimin tënd në Holandë! Qenke gëzuar për një vendim gjykate në Durrës, ndërkohë që po të kishe formimim elementar për atë, që pretendon se je arsimuar, duhet t’i njohësh të gjitha vendimet e institucioneve, jo vetëm ato që të pëlqejnë ty.

Ka një anekdotë me qershitë, për dikë që i ndante në të bëra pis ose jo. Dhe në fund i hëngri të gjitha, ngaqë i dukeshin të pastra edhe ato që kishin ngelur të fundit.

Sepse ka dhjetëra vendime të tjera gjykatash të cilat ti nuk i pranon, se nuk të interesojnë.

Por unë ta njoh hallin dhe nuk të vë shumë faj. Ti thjesht po shtyn ditët e tua, derisa të dalë një gjë tjetër e të harrohet fakti që i fale kundërshtarit 61 bashkitë pa betejë, kur u the njerëzve që zgjedhje vendore pa ty në Shqipëri nuk do të ketë.

E nise këtë punë me gënjeshtrën që Bindja Demokratike mori pjesë në procesin e 30 qershorit për të legjitimuar fitoren e Edi Ramës. Tani e paske ndërruar pllakën e gramafonit dhe po thua që ne ishim në këto zgjedhje për të deligjitimuar procesin.

Ka një shprehje të Shqipërisë së Mesme, që të shkon shumë në këtë rast: “O fol e mba, o dh.. e ha”.

Kaq për sot…Sepse unë nuk kam ndërmend të komentoj një vendim gjykate, sado i çmendur apo i porositur nga ndonjë kamikaz i dëshpëruar si ty që të më duket.” – shkruan Patozi në reagimin e tij.

Pas vendimit të marrë nga Gjykata e Durrësit për të mos i dhënë mandatin kandidates së PS-së fituese në Bashkinë e Durrësit në zgjedhjet e 30 qershorit, i menjëhershëm ka qenë reagimi i Bashës, i cili ka mbështetur këtë vendim duke thënë se zgjedhjet e 30 qershorit ishin farsë dhe se në vend ka gjyqtarë që respektojnë ligjet.

KQZ kthen mbrapsht Bindjen Demokratike. Kërkon prova për manipulimin e zgjedhjeve

Me katër vota pro dhe një kundër, Komisioni Qendror i Zgjedhjeve ka rrëzuar ankesën e bërë nga Bindja Demokratike për zgjedhjet e 30 qershorit.

KQZ vendosur të kthejë mbrapsht 41 kërkesat e paraqitura nga Bindja Demokratike dhe bërë kërkesë që kjo forcë politike të sjellë materialet e nevojshme për të analizuar ankimimet e saj.

Nënkryetari Denar Biba deklaroi se Bindja Demokratike duhet të paraqesë prova për të bazuar ankimimin e saj, për t’i hapur kështu rrugë edhe një hetim për manipulim të rezultatit.

Në mbledhjen e sotme u certifikua edhe rezultati i zgjedhjeve të 30 qershorit për bashkitë Kamëz dhe Korçë duke konfirmuar zyrtarisht në detyrë kryebashkiakët e rinj, Rakip Suli dhe Sotiraq Filo, dhe listat e këshilltarëve bashkiakë për këto dy bashki.

Bindja Demokratike do të ankimojë zgjedhjet e 30 qershorit me argumentin se për shkak se nuk u përfaqësua me komisionerë në komisionet e votimit dhe në ato të numërimit, procesi u keqadministrua nga përfaqësuesit e PS-së.

Vetëm dy ditë më herët Kreu i partisë Bindja Demokratike, Astrit Patozi, njoftoi vendimin për të ankimuar zgjedhjet ndërsa akuzon KQZ-në që la jashtë komisioneve të administrimit të zgjedhjeve partinë e tij.

Një tjetër shqetësim që ngre ai është edhe dyshimi se në shumë qendra votimi janë shtuar votat në mënyrë fiktive.

Ai thotë se kontestimi i zgjedhjeve nuk ka lidhje me rezultatin e Bindjes Demokratike, por me keqadministrimin e procesit zgjedhor.

Në bazë të Kodit Zgjedhor Bindjes Demokratike nuk i takon të ketë komisionerë në komisionet e votimit dhe në ato të numërimit pasi nuk është parti parlamentare.

BINDJEN DEMOKRATIKE S’E BINDIN ZGJEDHJET. ANKIMON 30 QERSHORIN

Bindjen Demokratike s’e bindin zgjedhjet. Ankimon 30 qershorin

Kreu i partisë Bindja Demokratike, Astrit Patozi, i cili u fut në garën e 30 qershorit bashkë me PS-në, njofton vendimin për të ankimuar zgjedhjet ndërsa akuzon KQZ-në që la jashtë komisioneve të administrimit të zgjedhjeve partinë e tij.

“Aspekti më i rëndë i këtyre zgjedhjeve ishte mospranimi nga ana e tyre që ne të kishim një sy në administrimin e zgjedhjeve, në kushtet e mungesës së Partisë Demokratike dhe të Lëvizjes Socialiste për Integrim.

Kërkesës sonë të përsëritur për të pasur komisionerë dhe numurues në të gjitha qendrat e bashkive ku konkurronim KQZ-ja dhe KZAZ-të nuk iu përgjigjën kurrë, madje në kundërshtim flagrant me ligjin, as që denjuan ta marrin fare në shqyrtim.

Ndaj ne vendosëm t’i ankimojmë këto zgjedhje, sepse mendojmë që ato u drejtuan dhe administruan keq vetëm nga përfaqësuesit e Partisë Socialiste, të cilët, me sa duket, nuk hoqën dorë nga vesi i vjetër i tjetërsimit të votës, edhe në kushtet e mungesës së shumë partive opozitare më 30 qershor”, shkruan Patozi.

Një tjetër shqetësim që ngre ai është edhe dyshimi se në shumë qendra votimi janë shtuar votat në mënyrë fiktive.

“Refuzimi i pranisë sonë nëpër komisionet e votimit dhe në tavolinat e numurimit është një argument i mjaftueshëm që ne të kemi dyshime të arsyeshme se rezultati i këtyre zgjedhjeve është trukuar nga profesionistët e vjedhjes së votës në Shqipëri. Ky ankimim mbështetet edhe nga të dhëna të besueshme që na sjellin përfaqësuesit dhe vëzhguesit tanë nga disa bashki të vendit, ku shkeljet kanë qenë më flagrante.

Ne kemi dyshime se në shumë qendra votimi janë hedhur fletë votimi për të rritur fiktivisht numrin e mbështetësve të qeverisë, në shumë zona ka pasur haptazi votim familjar, ndërsa në tavolinat e numurimit janë ndryshuar rezultatet e zgjedhjeve në favor të Partisë Socialiste ose aleatëve të saj”, shkruan Patozi.

Ai thotë se kontestimi i zgjedhjeve nuk ka lidhje me rezultatin e Bindjes Demokratike, por me keqadministrimin e procesit zgjedhor.

“Ky kontestim nuk ka lidhje me rezultatin e BINDJES DEMOKRATIKE, i cili mund të konsiderohet i mirë për kushtet dhe trysninë e jashtëzakonshme, që ushtruan palët mbi të gjithë procesin, por është një shërbim që kryhet për të nxjerrë dhe zbardhur të vërtetën e 30 qershorit”, shkruan Patozi.

Kujtojmë se Partia Demokratike dhe LSI iu drejtuan KQZ me kërkesë për të marrë pjesë me përfaqësuesit e tyre në Komisionet e votimit dhe në ato të numërimit, por kjo kërkesë nuk u pranua nga KQZ me argumentin se nuk janë subjekte pjesëmarrëse në zgjedhje. Më pas PD iu drejtua Kolegjit Zgjedhor dhe Kolegji la në fuqi vendimin e KQZ-së.

Në bazë të Kodit Zgjedhor Bindjes Demokratike nuk i takon të ketë komisionerë në komisionet e votimit dhe në ato të numërimit pasi nuk është parti parlamentare.

BINDJA DEMOKRATIKE DO T’I ANKIMOJË ZGJEDHJET E 30 QERSHORITE vetmja fitore e zgjedhjeve të 30 qershorit ishte që ditën…
Gepostet von Astrit Patozi am Donnerstag, 4. Juli 2019

Patozi hedh votën: Më mirë zgjedhje problematike, se sa pa zgjedhje

Kryetari i Bindjes Demokratike Astrit Patozi ka hedhur votën e tij këtë të dielë në qendrën e votimit në shkollën “Lidhja e Prizrenit” në Tiranë, ku theksoi se Shqipëria më mirë të ketë një palë zgjedhje problematike se sa të mos i zhvillonte ato.

“Kemi pare zgjedhje, ku kanë marrë pjesë edhe të gjitha partitë, por pas këtyre zgjedhjeve pas 1 korrikut një frymë e re politike do ta presë vendin. Sot është një ditë normale votimi që Shqipëria nuk duhet ta kapërceje edhe ta lërë pas. Nuk është vendi që të bëjmë analiza politike, por mendoj më mirë që të kishim zgjedhje problematike sesa mos të bëheshin zgjedhjet”, tha Patozi për gazetarët pas votimit.

Astrit Patozi në siglën e partisë Bindja Demokratike është rivali i PS-së në këto zgjedhje duke kandiduar në 30 bashki të vendit me kandidatët e saj. Në Tiranë në siglën e kësaj partie kandidon Arben Skënderi.

Thirrja e Astrit Patozit: Mos iu bind atij që të fton t`i vësh flakën shtëpisë!

Kryetari i Bindjes Demokratike Astrit Patozi u është drejtuar qytetarëve shqiptarë që dalin në votimet e 30 qershorit, duke u shprehur se “Shqipëria normale nuk ka asnjë lidhje me thirrjet dhe kërcënimet e tyre”, shprehet kreu i BD-së.

Ai ka shpërndarë një video mesazh drejtuar qytetarëve, ku shprehet se e vetmja mundësi, sipas Patozit, për të shprehur “mospranimin ndaj kësaj politike të shëmtuar sherresh dhe pazaresh të pista, ku të njëtët personazhe të konsumuar, veçse ndërrojnë rolet prej 30 vjetësh”, është vota për partinë që ai drejton.

Më tej, Astrit Patozi shprehet: “Mos iu bind atyre që të ftojnë për të shkuar në një festë me lugë të zbrazët dhe, as të tjerëve që të ndjellin t’i vesh flakën shtëpisë tënde. Secili e bën për hallin e vet, që nuk ka asnjë lidhje me tëndin”. Për të gjitha këto arsye, kreu i Bindjes Demokratike u kërkon qytetarëve shqiptarë që të mbështesin BD-në në zgjedhjet lokale të 30 qershorit.

“Ka vetëm një mënyrë për t’i ndëshkuar ata që e kanë shkaktuar; në mes të kësaj marrëzie mëkatarësh, ndiq zërin e ftohtë të arsyes. Ne nuk kemi asnjë përgjegjësi për sa po ndodh, por përmes teje duam të marrim të gjitha përgjegjësitë për një të ardhme tjetër për Shqipërinë. Voto BINDJEN tënde më 30 qershor”, shprehet ndër të tjera ai.

Ftesa e Astrit Patozit: Të votojmë më 30 qershor për të marrë hak ndaj sistemit

Astrit Patozi u është drejtuar shqiptarëve me një letër publike, ku u kërkon që të dalin për të votuar më 30 qershor. Sipas Patozit, e vetmja mënyrë për ndëshkuar qeverinë, që sipas tij ka treguar që është e korruptuar, është vota. Ndaj, kreu i Bindjes Demokratike kërkon hakmarrje, jo vetëm ndaj qeverisë, por gjithë sistemit, që sipas tij, të gjithë e kemi pranuar prej vitit 1990.

“Por është po kaq e vërtetë se e vetmja mënyrë për të “marrë hak” në këtë sistem, që vetë e kemi pranuar prej vitit 1990, është vota juaj. Natyrisht edhe drejtësia, por atë nuk e kemi ne në dorë, dhe jemi ende larg ditës kur ajo mund të veprojë edhe mbi mëkatarët e gjithëpushtetshëm, të cilët deri më sot nuk janë ndëshkuar asnjëherë”, shprehet Patozi.

Duke u kërkuar qytetarëve që të zgjedhin Bindjen Demokratike, si alternativë kundër “Rilindjes”, Astrit Patozi shprehet se më 30 qershor shqiptarët duhet të dalin për të votuar, pavarësisht se në fushë mund të mos jetë “fanella” e ekipit të zemrës.

“Askush prej jush nuk duhet të mbetet peng i një keqkuptimi apo sedre, për shkak se mund të mos e gjejë në fushë fanellën e ekipit të vet të zemrës. Sepse gabime në vendimmarrje të rëndësishme janë bërë edhe në të shkuarën, por jeta politike ka vijuar normalisht dhe ata që i kanë kryer janë përpjekur që t’i korrigjojnë rrugës dhe të marrin sa më pak kosto prej tyre”, thekson ai.

Sipas Astrit Patozit, vetëm duke votuar më 30 qershor, është shansi për të ndëshkuar qeverinë me votë, duke matur njëkohësisht pakënaqësinë ndaj saj. “Do të ishte e vetmja mënyrë për ta matur pakënaqësinë e madhe të shqiptarëve ndaj kësaj qeverie në këto zgjedhje, të cilat me gjithë defektet e tyre serioze, sipas të gjitha gjasave, do të mbahen. Ndaj i drejtohemi me përulësi çdo zgjedhësi shqiptar, që është kundër kësaj qeverie, pavarësisht partisë që përfaqëson apo simpatizon, se nuk duhet ta humbë këtë shans. Kjo qeveri duhet ndëshkuar me votë dhe rrëzimi i saj duhet të fillojë më 30 qershor”, është shprehur Patozi.

Astrit Patozi: Marrëzia e opozitës s`mund të pengojë zgjedhjet

“Nuk ka asnjë forcë në tokë, ndoshta dhe jshtë kësaj toke, që mund të ndalojë vullnetin e shqiptarëve për të ndryshuar qeverisjen vendore”, është shprehur Astrit Patozi nga Korça, ku ka prezantuar kandidatin e Bindjes Demokratike për këtë bashki në zgjedhjet e 30 qershorit, Leonard Olli. Patozi thotë se duan apo nuk duan, më 30 qershor do të ketë zgjedhje, duke e quajtur lindjen e Bindjes Demokratike si forcën e perspektivës politike.

“Duan apo nuk duan 30 qershori është datë e vendosur, qytetarët janë të detyruar të votojnë për të ndryshuar qeverisjen vendore. Nuk ka asnjë forcë në këtë tokë, por ndoshta edhe jashtë kësaj toke që mund të ndalojë vullnetin e shqiptarëve për të ndryshuar qeverisjen vendore. Leonard Olli është kandidatura e duhur për Korçën. Një djalë qytetar i Korçës. Korça do reflektojë, do reagojë sepse nuk ka arsye të eksperimentojë prapë modelin e shëmtuar që kemi përballë”.

“Korça nuk ka nevojë për dikë që thonë është djalë i mirë, por bën sic i thonë të tjerët. Korça ka nevojë për një personalitet publik që do bëjë ndryshimin e madh në këtë qytet. Një model të ri politik. Bindja Demokratike është forca e re e perspektivës politike, sepse ka lindur në kulmin e një tensioni politik. Shqiptarët kanë parë se ku e kanë çuar vendin forcat e vjetra politike që sot janë në një ndeshje për jetë a vdekje duke treguar që janë ata shkaktarët e krizës së thellë që po përjeton vendi”, tha Patozi.

Astrit Patozi e ka cilësuar aksionin opozitar të udhëhequr nga PD-LSI si marrëzi politike, duke u shprehur se rruga për ndryshimin e situatës janë zgjedhjet, dhe jo dhuna. “Ajo protestë ishte epilogu i një marrëzie politike. Ne kemi qenë kundër djegies së mandateve, kundër daljes në rrugë, kundër revolucionit dhe goditjes së pushtetit me dhunë. Zgjedhjet i vetmi instrument që mund t’i ndryshojë gjërat në Shqipëri, sepse jemi forcë politike e djathtë dhe perëndimore”, u shpreh kreu i BD-së.

Patozi nis fushatën jashtë Tiranës: I kthejmë Laçit borxhin që i ka PD

Kryetari i partisë Bindja Demokratike, Astrit Patozi, ka zhvilluar një takim elektoral në Laç, ku ka prezantuar kandidatin për kryetar bashkie Edmond Piroli. Gjatë fjalës së tij Patozi, siç shkruhet në njoftim në faqen zyrtare të BD-së, partia e tij do të fitojë zgjedhjet në Kurbin, ndërsa me kryetarin e ri qyteti do të ndryshojë.

“Ne jo thjesht kemi gjetur një qytetar të denjë të Laçit, që nesër pritet të zgjidhet kryetar bashkie i Kurbinit, por ju garantojmë se Edmond Piroli do të ndryshojë gjithçka në administrimin dhe në qeverisjen e qytetit”, nënvizoi Patozi.

Më tej, Astrit Patozi u shpreh se e djathta i ka borxh Kurbinit, pasi sipas tij, katër vite më parë Partia Demokratike e la pa kandidat garën për bashkinë e Kurbinit.

“E djathta i kishte një borxh Kurbinit, se katër vjet të shkuara e la pa kandidat Laçin, dhe këto zgjedhje ishin një shans për t`ia kthyer atë. Por Partia Demokratike ka vendsur të mos hyjë në këto zgjedhje dhe me këtë logjikë i bie që Kurbini të qëndronte 8 vjet rresht pa pasur garë për kryetar bashkie”, u shpreh Patozi.