Basha stoik. Rri aty ku është.

Kryetari i PD-së, Lulzim Basha ka refuzuar dorën e shtrirë për dialog dhe bashkëpunim të kryeministrit Rama për realizimin e reformës zgjedhore. Në një deklaratë për mediat të enjten Basha, komentoi raportin e OSBE/ODIHR-it për zgjedhjet e 30 qershorit, të cilin e cilësoi si një autopsi të kapjes së shtetit nga Rama. Ai tha se vendi ka nevojë për reformë të thellë zgjedhore dhe politike dhe garantoi se ky do të jetë prioriteti i PD-së, por në asnjë rast nuk foli për zgjedhje të parakohshme. Basha akuzoi Ramën për zhvillimin e zgjedhjeve pa garë, ndërsa mbrojti bojkotin që ai dhe partia që ai drejton i bëri zgjedhjeve të 30 qershorit.

“Raporti i OSBE/ODIHR e ka rrëzuar farsën e 30 qershorit në çdo aspekt. Raporti tregon se 30 qershori ishte procesi më problematik dhe më i pandershëm i dy dekadave të fundit. Praktikisht ky është një dokument, i cili më shumë se raport zgjedhor ngjan me një raport për një ngjarje kriminale. Ky është raport që realisht përmban prova dhe fakte për të filluar hetime kriminale ndaj një sërë personash dhe institucionesh. Prandaj, 30 qershori vërtetoi edhe një herë atë që Partia Demokratike ka thënë fuqishëm:

Me Edi Ramën nuk mund të ketë zgjedhje të lira dhe të ndershme. Edi Rama është armik i zgjedhjeve, i pluralizmit dhe demokracisë. Raporti nuk është vetëm autopsia e zgjedhjeve të vdekura të 30 qershorit

Raporti është autopsia e kufomës së shtetit të së drejtës, e qeverisë së popullit dhe drejtësisë, të cilat janë vrarë nga Edi Rama për t’i zëvendësuar ato me një shtet privat, autokratik, kriminal dhe personal”, u shpreh Basha.

Kreu i PD-së, gjeti rastin t’i bëjë avokatin presidentit Meta ndërsa u kujtua për dekretet e tij, njërin prej të cilave nuk e njeh as vetë. Por sërish edhe këtu gjeti vend për të akuzuar Ramën.

“Në shtetin privat të Edi Ramës, dekretet e Presidentit, kryetarit të Shtetit, nuk botohen në Fletore Zyrtare nga Ministria e Drejtësisë siç e kërkon ligji, por zhduken pa lënë gjurmë siç e do Edi Rama”, tha Basha.

Zgjidhja sipas kreut të PD-së, vjen vetëm nga largimi i Ramës nga pushteti. Oferta e Bashës vijon të jetë ajo e bojkotit dhe e thirrjeve Rama Ik. Megjithëse thotë se vendi ka nevojë për reformë të thellë zgjedhore, Basha refuzon të dialogojë dhe të bashkëpunojë me Ramën për këtë çështje. Gjithsesi ajo që bie në sy është se në asnjë rresht të fjalës së tij, Basha nuk bëri thirrje as për protesta dhe as për zgjedhje të parakohshme. Më herët Rama ndërsa komentoi raportin e OSBE-së për zgjedhjet theksoi se me rëndësi është fakti se 30 qershori u certifikua, dhe se tani është koha për dialog dhe bashkëpunim me opozitën për reformën zgjedhore. Ftesë kjo, që u refuzua nga Basha./Realstory.al

Aleatët, presion Bashës për protesta me molotov (po SHBA?)

“Do të ketë protesta të fuqishme”. Kështu u shpreh Basha të mërkurën pas takimit me Monika Kryemadhin në selinë blu. Por mesa duket më shumë se Basha protesta të dhunshme dhe agresive po kërkojnë aleatët e tij. Një ditë më herët Dashamir Shehi u shpreh se protestat e opozitës duhet të jenë më agresive, ndërsa Nard Ndoka thotë se në protestë “nuk shkohet me lule”, por me molotov.

Siç duket aleatët po i bëjnë presion kreut të PD-së të nisë sezonin e protestave të cilin e kishte premtuar se nuk do të pushonte as gjatë muajve të verës, por e kundërta ndodhi. Gjatë muajve të verës aksioni opozitar u ndërpre, sepse PD mbeti pa asnjë pushtet edhe në bashkitë e djathta. Ndërkohë Basha premtoi se protestat do të rinisin në shtator, por ndërsa ndodhemi në javën e parë të shtatorit ende nuk ka një njoftim për këtë aksion opozitar, ndërkohë që presioni i aleatëve të PD-së është në rritje.

“Opozita i ka plotësuar angazhimet e veta. Opozita duhet të ketë një qasje tjetër ndaj protestave, një tjetër stil më të ashpër, pasi kryeministri e ka rritur arrogancën e tij. Aksioni do të jetë frontal, mjaft i ashpër në përballje me shumicën, Ramën, protesta në çdo qytet dhe kombëtare. Do të pengojmë kryeministrin në arrogancën e tij që të largohet edhe me pahir.

Askush nuk e do dhunën, edhe ne që i organizojmë nuk e duam dhunën. Protesta e dhunshme janë kur tenton të marrësh pushtetin me dhunë, jo molotovi, pasi në protestë nuk shkohet me lule. Është tjetër kur qytetarët shfryjnë dufin e tyre dhe tjetër kur tentojnë të marrin pushtetin me dhunë”, shprehet Ndoka.

Mirëpo kreu i PDK-së, Ndoka, harron se protestat me molotov të para 30 qershorit sollën reagimin e ashpër të SHBA-së. Palmer u shpreh se SHBA po mban shënim dhe nëse vazhdon dhuna në protesta drejtuesit e tyre do të futen në listën e zezë të SHBA-së dhe do të ndërpritet çdo marrëdhënie me ta. Pikërisht kjo deklaratë e Palmerit bëri që Basha dhe Kryemadhi të ndërrojnë molotovët në protestë me tullumbace blu. Pavarësisht presionit të aleatëve nuk mendohet që Basha do të marrë guximin t’i kundërvihet SHBA-së dhe të kthehet sërish te molotovi./realstory.al

BASHA KËRKON ZGJEDHJE NË PRANVERË, SHEHI: PROTESTA AGRESIVE DHE RAPORT TË RI ME NDËRKOMBËTARËT

MATHEW PALMER: PD-LSI, NËSE PENGOJNË ZGJEDHJET, PËRJASHTOHEN NGA MARRËDHËNIET ME SHBA!

I hetuari për paratë ruse takon zyrtarin amerikan

Kreu i Partisë Demokratike Lulzim Basha, i cili është nën hetim nga prokuroria shqiptare për përdorim të parave ruse gjatë lobimit në SHBA, ka mbajtur një qëndrim më të zbutur kundrejt amerikanëve, marrëdhënie të cilat ishin ftohur dhe ishin nën tension prej disa kohësh mes DASH dhe PD. Kjo zmbrapsje dhe zbutje e Bashës është vënë re gjatë takimit që ka zhvilluar me drejtorin për Europën Qendrore e Jugore në Departamentin e Shtetit, David Kostelancik.

Përmes një twitteri të shkurtër, Basha tha se forcimi i partneritetit strategjik të Shqipërisë me SHBA ka qenë pjesë e diskutimit me zyrtarin e lartë të DASH duke larguar kështu nga vetja çdo dyshim në lidhje me influencën ruse. Rritja e influencës ruse në Shqipëri ka qenë pikërisht arsyeja pse zyrtari i lartë i DASH ka mbërritur për një vizitë zyrtare në Tiranë.

“Diskutim i hapur dhe konstruktiv me David Kostelancik, Drejtorin për Evropën Qendrore e Jugore në DASH. U përqendruam në ndalimin e mosndëshkimit për politikanët dhe rikthimin e sundimit të ligjit; përfundimi i kapjes së shtetit dhe korrupsionit dhe forcimi i partneritetit strategjik të Shqipërisë me SH.B.A.” – shkruan Basha, i cili kohët e fundit pati një largim të tij me Departamentin e Shtetit. Kjo ftohje u pa që gjatë protestave, pas kërcënimeve të DASH se nëse PD nuk ndalte dhunën do e përfshinte Bashën në listën e zezë. Që nga ajo ditë, në fjalimet e Bashës, pothuajse nuk kanë ekzistuar SHBA-të, ku ai më së shumti ka vënë theksin te zgjidhja gjermane. Kjo distancë e vendosur mes PD dhe amerikanëve, bëri që Basha të mos shikonte më SHBA si një ndërmjetësuese mes palëve politike për t’i ulur në tryezën e dialogut, por mbështetja dhe shpresat e tij ishin kthyer nga Gjermania. Megjithatë, pas vizitës së zyrtarit të lartë të DASH Kostelancik, kursi i PD duket se do të ndryshojë sërish.

Basha-Kryemadhi, asnjë reflektim: Protesta të fuqishme, “Rama Ik”

Aksioni opozitar do të vijojë të mbajë emrin “Rama IK”. Këtë njoftuan të mërkurën dy drejtuesit e koalicionit opozitar, Monika Kryemadhi e LSI-së dhe Lulzim Basha i PD-së pas takimit që zhvilluan në selinë blu.

Megjithëse pritej që ata të ofronin diçka të re pas pushimeve 2 mujore, por edhe pas premtimeve se në shtator do të nisë një aksion i ri opozitar, e kundërta ndodhi. Basha dhe Kryemadhi dolën para gazetarëve dhe përsëritën të njëjtin refren: Rama IK.

“Aksioni opozitar do të vazhdojë i drejtpërdrejtë, evidentues për të zgjuar çdo qelizë të shqiptarëve që po margjinalizohen për shkak të varfërisë. Votimet e 30 qershorit treguan se 85% nuk e duan Edi Ramën dhe largimi i tij është një kusht që e kërkojnë shqiptarët.

E rëndësishme është që çdo ditë shqiptarët protestojnë. Sepse mbajnë çdo ditë rradhën me bidona uji”, tha Kryemadhi pas takimit që zhvilloi me Bashën.

Ndërsa ky i fundit akuzoi qeverinë se përmes rrëzimit të dekreteve të Metës për dy koncesionet për ndërtimin e segmenteve Milot Balldren dhe Orikum-Dukat synon të vjedhë shuma të mëdha parash, ndaj dhe largimi i Ramës është dosmodoshmëri.

“Skandali me PPP-të Milot-Balldren dhe Dukat-Orikum, bëhet fjalë për një aferë të tmerrshme korruptive. Ata duan që shqiptarët të paguajnë një çmim 45 herë më të lartë se çmimi real. Të vjedhin mbi 200 milionë euro nga shqiptarët. Për këtë arsye u rrëzuan dekretet e Metës”, tha Basha i cili akuzoi parlamentin se është kthyer në noter të hajdutërisë së Ramës.

Siç duket nuk ka asnjë reflektim nga liderët e opozitës. Ata vazhdojnë serinë e akuzave kundër qeverisë dhe vijojnë në kërkesën për largimin e Ramës, por nuk japin asnjë ide sesi do të vijojë aksioni i opozitës në vijim. Të dy si Basha ashtu edhe Kryemadhi i janë shmangur kërkesës së vazhdueshme të Metës për zgjedhje në 13 tetor. Kjo është data që i ndan të dy krerët e opozitës për shkak se PD nuk është për zgjedhje në 13 tetor, ndërsa Kryemadhi mbështet dekretin e bashkëshortit të saj. Një ditë më herët Edi Paloka zbuloi se PD po bëhet gati për zgjedhje me Ramën në pranverë duke rrëzuar të gjithë aksionin opozitar të 7 muajve të fundit./Realstory.al

Basha kërkon zgjedhje në pranverë, Shehi: Protesta agresive dhe raport të ri me ndërkombëtarët

Kreu i Lëvizjes për Zhvillim Kombëtar, Dashamir Shehi mendon se rruga e protestave agresive është e vetmja për të rrëzuar Ramën dhe për të marrë pushtetin. Por duket se ky qëndrim i tij nuk përputhet me qëndrimin e lidershipit të PD-së. Një ditë më herët Edi Paloka u shpreh se PD po përgatitet për zgjedhje në pranverë bashkë me Ramën. Bazuar në këtë deklaratë PD pranon të futet në zgjedhje me Ramën kryeministër, gjë që e kundërshtoi me forcë para 30 qershorit, dhe kjo ishte kauza e 10 protestave të Bashës. Më herët kreu i PD-së ka deklaruar se me nisjen e shtatorit do të rifillojnë protestat e opozitës, por deri tani nuk ka asnjë deklaratë të tij ku të flitet për protesta.

Nga ana tjetër aleati i PD-së, Dashamir Shehi në një prononcimi për mediat, tha se protestat e opozitës do të jenë më të mëdha dhe më agresive.“Unë mendoj që rruga e protestës është kryesorja. Opozita ka shumë ‘armë’, ka prezencën mediatike, raportin me ndërkombëtarët, raportin me qytetarët. Por kjo opozitë si e jona, e cila është jashtë institucioneve, jashtë zgjedhjeve, jashtë të gjitha pushteteve, armën më të madhe ka rrugën. Kjo do të mbetet kryesorja. Sigurisht që protestat do të jenë edhe më të mëdhaja dhe më agresive, por ndërkohë që do i ofrojmë shqiptarëve edhe një platformë jo vetëm se si dilet nga kjo krizë, por si do të jetë Shqipëria e së nesërmes”, deklaroi ai.

Ndryshe nga Basha, Shehi gjithashtu mendon se opozita duhet të përmirësojë marrëdhëniet me ndërkombëtarët dhe të krijojë një raport të ri me ta duke i treguar se PD mbështet reformën në drejtësi.

“Ne kemi për detyrim t’i shpjegojmë ndërkombëtarëve se çfarë po ndodh në Shqipëri. Unë e shoh që nuk e kuptojnë pasi janë nën presionin e Edi Ramës. E dyta është që ne t’i krijojmë ndërkombëtarëve idenë, që duhet t’ua krijojmë të gjithë shqiptarëve, që ne jemi alternativa. Një tjetër pikë është që ne jemi për reformën në drejtësi. Unë jam për reformën në drejtësi. Jam i bindur që Edi Rama po e kontrollon reformën në drejtësi. Pse po e kap, sepse është ky, ky, ky, të gjitha veglat e Edi Ramës. Ne brenda opozitës duhet të kuptojmë se ndërkombëtarët kanë agjendën e tyre, që është reforma në drejtësi”, u shpreh ai.

Më herët Basha ashtu sikurse Meta kanë sulmuar reformën në drejtësi dhe kanë akuzuar Ramën për kapjen e saj duke krijuar një përplasje me qëndrimin e ndërkombëtarëve të cilët mbështesin fuqishëm këtë reformë, dhe vetëm një ditë më herët ambasada Amerikane deklaroi se kjo reformë po ecën në rrugën e duhur.

Edhe njëherë këto deklarata që vijnë nga kampi i opozitës tregojnë se ajo është ende në kaos dhe se akoma nuk e ka të kristalizuar strategjinë që do të ndjekë për t’u futur në rrugën institucionale, nga e cila doli dhe mbeti pa asnjë pushtet./realstory.al

DËSHTIMI ME 30 QERSHORIN, PD SHTYN PËR NË PRANVERË RRËZIMIN E RAMËS

Ristani “kryqëzon” Bashën: Mjaft me strategjinë anti-sistem, po dështoni

Fakti që opozita është fajtore e vetme për krizën e krijuar në vend kjo tashmë është e ditur nga të gjithë dhe vetë opozitarët. Ish-sekretari i përgjithshëm i PD-së, Arben Ristani, i cili prej kohësh ka dalë hapur me qëndrimet kritike ndaj kryedemokratit Basha, duke u bërë pjesë e një prej zërave të rëndësishëm në lëvizjen “Basha Ik”, ka dhënë një tjetër mesazh për demokratët me shpresën se dikush do e dëgjojë dhe do i mbush mendjen Bashës se kush është rruga e duhur për të fituar. Ristani tha se strategjia e opozitës për të rrëzuar qeverinë nuk është duke dalë vetë jashtë sistemit, pasi kjo vetëm e përkeqësoi gjendjen dhe se i dha asaj më shumë pushtet dhe fuqi. Ai tha se zgjidhja e vetme në këtë rast është vënia përballë qeverisë të një opozite të fortë, parimore dhe me përfaqësues politikë të denjë, e jo duke ndjekur rrugën e saj anti-sistem me shpresën se kështu, Rama mund të ikë vetë.

“Nxjerrja e vendit nga qorrsokaku politik, nga impasi i sistemit, i cili nxit në mënyrë artificiale krizën në çdo fushë, në një vend demokratik, ka vetëm një ilaç bazë: opozitën e vërtetë, të fuqishme, parimore, të njerëzve të këtij vendi, të përfaqësuar nga kontributorë të besueshëm publik. Interesi themelor i çdo shqiptari është, të ruajë demokracinë si sistem politik. Strategjia e PD, për të mundur Ramën dhe Rilindjen, nëpërmjet daljes nga sistemi, rezulton të jetë rrugë e gabuar. Kjo, jo se Rama dhe krimi janë të fortë dhe të pathyeshëm, përkundrazi, Ramës i ka mbaruar koha morale për të qeverisur. Është strategjia anti-sistem, e ndjekur nga opozita, në thelb e gabuar dhe e destinuar të dështojë, e cila i jep Ramës mundësinë të ketë në dorë të gjitha pushtetet .” – shkruan Ristani, i cili bën thirrje për opozitën që të rikthehet në vendimmarrje dhe të marrë pjesë në komisionet e posaçme për reformën zgjedhore apo edhe atë në drejtësi. Madje Ristani shkruan se opozita nuk duhet të ketë më naze e pretendimet me kërkesat e saj për dialog apo përfshirje politike, por duhet të fokusohet në përmirësimin e reformave dhe të jap kontributin e saj, në mënyrë që ky sistem të marrë fund. Opozita duhet të shmang sulmet ndaj reformës në drejtësi dhe të përfshihet në përmirësimin e saj tha Ristani, pasi vetëm në këtë mënyrë mund të arrijë atë që kërkon, një sistem demokratike të pa kapur nga politika.

“Rikthimi i opozitës në sistem, tashmë, në këtë fazë ku ndodhemi, nuk bëhet me pretendime, por me veprime që provojnë qenien pro sistem. Prova kryesore sot, pro sistem, është qëndrimi ndaj reformës në drejtësi dhe kontributi konkret për ta mbështetur atë, për ta përmirësuar atë, dhe për të mirëpritur rezultatet e saj.”- shprehet Ristani

“Toyota Yaris” i kthehet në bumerang Bashës, rrezikon të merret i pandehur

Në përpjekje për të dëmtuar imazhin e deputetit Balla, Manja dhe Cyrbja. Lulzim Basha po rrezikon të merret në akuzë për dëshmi të rreme në lidhje me çështjen “Toyota Yaris”. Kryetari i PD-së, Lulzim Basha, u paraqit më datë 25 korrik 2019 për të dhënë shpjegime përpara prokurorit belg L.H. për denoncimin që bëri në Kuvend, dy ditë para se të bllokoheshin në portin e Durrësit automjetet që vinin nga Belgjika, në të cilat ishte fshehur shuma prej 3.4 milionë eurosh.

Në shpjegimet e dhëna nga Lulzim Basha rezulton se ai është tërhequr nga akuza e drejtëpërdrejtë për deputetet Taulant Balla, Ulsi Manja dhe Jurgis Cyrbja, por ka sjelle si provë të akuzës së tij në Parlament, informacionin për një udhëtim të tre deputeteve socialist jashtë Shqipërisë disa ditë përpara se ngjarja të ndodhte në Durrës raporton Tema. Basha, gjatë fjalës së tij në parlament, ka theksuar se Taulant Balla kishte qenë para disa ditësh në Gjermani, ndërsa përpara prokurorit belg ka thënë se Balla ka qenë jashtë Shqipërisë, pa specifikuar Gjermaninë.

Për këtë qëllim, prokurori belg dhe ata shqiptare kanë bërë verifikimet në sistemin TIMS dhe u rezulton se deputetet kanë udhëtuar jashtë Shqipërisë, por në asnjë rast nuk kanë lidhje me deklarimet e Lulzim Bashës. Dosja “Toyota Yaris” është gati për të shkuar në Gjykatën e Krimeve të Rënda, ndërsa Basha mund të merret i pandehur bazuar në nenin 305/b “Deklaratat e rreme përpara oficerit të policisë gjyqësore”.

Lulzim Basha ka gjithashtu çështje të hapura me drejtësi, ku ai akuzohet për pastrim parash me rusët gjatë një lotimi në Amerikë, çështje e cila po hetohet si në Shqipëri, ashtu edhe në SHBA.

Kriza, Meta takon gjermanen e CDU-CSU, insiston te 13 tetori

Pas dhënies së sinjalit të Bashës se Gjermania mund të jetë negociatorja mes opozitës dhe qeverisë për të ulur palët në dialog duket se e kanë vënë presidentin Meta në punë duke iu rikujtuar palëve se zgjidhja e vetme nuk vjen nga jashtë, por ajo është 13 tetori, zgjidhje që e kanë pasur gjithmonë para syve. Duke mos dashur të largohet nga roli i protagonistit dhe i negociatorit “që do të sjell sërish paqen dhe qetësinë në vend” Meta vijon të këmbëngul se 13 tetori është alternativa e vetme dhe më e mira për palët, për zgjidhjen e krizës.

Këtë deklaratë ai e bëri gjatë takimit që pati me Zëvendës Kryetaren e Grupit Parlamentar të CDU/CSU, deputeten gjermane Katja Leikert. Meta bën sërish thirrje që 13 tetori të zbatohet, përndryshe kriza do të thellohet edhe më shumë në vend. “Nëse politikanët vendas e kanë të pamundur të mësojnë nga vendet me përvojë të konsoliduar demokratike se si zgjidhen krizat, kanë rastin të mësojnë nga një shtet i ri si Kosova se si u jepet mundësia qytetarëve të thonë fjalën e tyre përmes zgjedhjeve të parakohshme për të ardhmen e institucioneve qeverisëse”, – tha Meta

Zëvendës Kryetarja e Grupit Parlamentar të CDU/CSU, Katja Leikert, u takua një ditë më herët me kryedemokratin Basha dhe kryeministrin Rama, takime që lanë të kuptohet se është folur për një mënyrë për të zgjidhur krizën politike dhe palët të ulen në tryezën e dialogut. Takime që kurrsesi nuk mund të priten mirë nga Meta, i cili ka gjatë gjithë sezonit veror “që bërtet me statuse në facebook” për të treguar se ai është personi i vetëm që mund të jap zgjidhjen e krizës dhe se roli i negociatorit i takon atij, pasi është në krye të shtetit.

13 tetorit është njohur vetëm nga ish partia e tij, LSI dhe disa aleatë të vegjël të opozitës, që vendosën të regjistroheshin në këto zgjedhje, ndërsa për PD, ajo shihet si data e vetme kushtetuese për zgjedhjet vendore, por që Basha sërish vendosi të mos regjistrohet, pasi deklaroi se “nuk do të marrë pjesë në asnjë palë zgjedhje me Ramën kryeministër.”

Duke e ndjerë veten të lënë mënjanë si nga zgjidhja e krizës, të cilin e thelloi edhe më shumë e dekretin për anulimin e 30 qershorit, ashtu edhe nga vetë aleatët dhe bashkëpunëtorët e tij, Basha e Berisha, që nuk e përkrahën për13 tetorin, kanë bërë që Meta të shfrytëzojë takimet me ato pak ndërkombëtarë, të cilat më së shumit janë takime kortezie apo përfundimi të mandatit të tyre në Tiranë, për t’u bërë protagonist edhe ën sytë e ndërkombëtarëve dhe të tregojë se ai vërtet kërkon zgjidhjen e krizës në vend.

Pas sinjaleve për negociata, Basha tërhiqet: Nuk ka marrëveshje me të keqen

“Nuk do të heshtim dhe nuk do të pranojmë kurrfarë kompromisi me të keqen që po shkatërron shoqërinë dhe sjell qeverisje korruptive” ky ka qenë mesazhi që kreu i demokratëve Lulzim Basha ka dhënë që herët mëngjesin e të mërkurës për qeverinë, gjatë një urimi për 95 vjetorin e lindjes së At Zef Pllumit. Basha tha se politika ende nuk i ka kuptuar mesazhet që At Zef Pllumit dha për të gjithë shqiptarët me guximin dhe drejtësinë e tij. Sipas Bashës ku mesazh guximi e bën Partinë Demokratike të luftojë edhe më shumë ndaj padrejtësive, të refuzojë qeverisjen e korruptuar dhe të mos bëjë asnjë lloj kompromisi me të keqen.

“Ato dëshmi të guximshme na dhanë shembullin se e keqja duhet nxjerrë nga institucionet e shtetit, nga politika, drejtësia e shkollat, pasi bashkëjetesa me të vetëm na pengon në rrugën tonë, e shndërron demokracinë tonë në një mostër që s’ka as drejtësi e as moral. Këtë leksion s’e kemi nxënë mirë, politika sidomos s’e ka nxënë, sepse ajo për 30 vjet, u end mes marrëveshjeve që kanë sjellë një qeverisje korruptive, rritje të varfërisë dhe rikthim në linjën e parë të politikës, ekonomisë e të njerëzve të suksesshëm të hajdutit, dallkaukut, të paaftit dhe këto vitet e fundit edhe në një emulacion të kriminelit, si një njeri i zoti e që vetëm ai bën hajër në këtë vend. Në 95-vjetorin e Padër Zefit e ndjej me vend të përsëris se nuk do të heshtim dhe nuk do të pranojmë kurrfarë kompromisi me të keqen. E keqja po e shkatërron shoqërinë dhe ne nuk do të reshtim duke e kundërshtuar atë.”- shkruan Basha

Ky sulm dhe mesazh i koduar që Basha i dërgon Ramës duke i thënë se nuk do të ketë marrëveshje me të, e bën edhe më shumë kaotike situatën. Vetëm një ditë më parë ai dha sinjale të qarta se mund të kishte një tryeze dialogu me qeverinë nëse Gjermania do të ishte ndërmjetësuese e saj. Duket se të gjithë jemi mësuar tashmë me paaftësinë e Lulit për të mbajtur një qëndrim të caktuar. Fjalimet pa kuptim të Bashës që nisin me protesta e revolta kundër krimit dhe më pas përfundojnë me sinjale se mund të ketë bisedime mes palëve, e bëjnë situatën edhe më të paqartë politikisht se çfarë pritet të ndodh në shtator.

Kryeministri Rama nga ana tjetër, ka qëndruar i heshtur, larg deklaratave politike dhe i fokusuar në punët e qeverisë. Pas zgjedhjeve të 30 qershorit, Rama i dha disa herë mesazh kryedemokratit Basha se dora e tij mbetet e shtrirë për tryezën e dialogut, por ai nuk do t’i lutet më apo të rri të pres “zhulietën e tij” deri sa t’i mbushet mendja siç bëri në marrëveshjen e 17 majit 2017.

Tërhiqet Basha?! Pranon negociata me Ramën me ndërmjetësim gjerman

Kreu i PD, Lulzim Basha duket se ka bërë një tërheqje të fortë, duke nënkuptuar se do të pranonte negociata me Ramën, nëse Gjermania do të ishte negociatore, një derë e hapur për kryeopozitarin pas ftohjes së marrëdhënieve të tij me SHBA për shkak të protestave të dhunshme para zgjedhjeve të 30 qershorit. Pas një sërë takimesh me ndërkombëtarët, i pyetur nëse gjermanët do të luajnë rolin e negociatorit, apo do të jetë një faktor tjetër ndërkombëtar për t’u ulur në tryezë me Kryeministrin Rama, kreu i PD ka deklaruar se Partia Demokratike është në bashkëpunim me faktorin ndërkombëtar dhe vlerëson rolin e Gjermanisë.

“PD dhe opozita e bashkuar janë në bashkëpunim dhe koordinim të përditshëm me të gjithë faktorin ndërkombëtar. Ne vlerësojmë shumë rolin e tyre, vëmendjen e tyre, në këtë rast, pa dyshim vlerësojmë rolin dhe interesin dhe ndihmën që Gjermania dhe CDU/CSU, si pjesë e Bundestagut gjerman po japin për të mundësuar që Shqipëria të mos mbetet mbrapa, të mos mbetet peng i krimit dhe korrupsionit, por të ecë drejt integrimit në BE, të ecë drejt hapjes së negociatave. Padyshim që vendi mund të shkojë dhe do të shkojë drejt BE, duke u sjellë si një vend europian, duke u sjellë si një shoqëri europiane, si një politikë europiane”, deklaroi ndër të tjera Basha.

Prishja e marrëdhënieve me SHBA pas protestave të dhunshme duket se kanë bërë që Basha të shikojë për të tjerë partnerë strategjikë të PD-së, Gjermaninë. Basha tha se PD ka bashkëpunim me Gjermaninë dhe faktorin ndërkombëtar, por çmon interesimin e Gjermanisë për të ndihmuar vendin të dalë nga kjo krizë duke lënë të kuptohej se mund të jetë edhe negociatore e tryezës Rama-Basha. Kthimi i syve nga Gjermania si shpresa për të nxjerrë vendin nga kriza dhe rifutur edhe njëherë në jetën politike PD-në, konfirmon se Basha nuk ka mbështetjen e SHBA dhe të Departamentit Amerikan të Shtetit. Realstory.al paralajmëroi më herët se lobimi që PD bëri pranë Kongresit Amerikan kundër emërimit të ambasadores Kavalec, si dhe qëndrimi ambig ndaj Reformës në Drejtësi dhe përplasjet e forta gjatë muajve të krizës, kur Basha injoroi hapur kërkesat e DASH, duket e kanë futur kreun e PD në ‘luftë të ftohtë’ me Departamentin Amerikan të Shtetit.