Video/ Mbyllet barazim pjesa e parë e derbit Partizani-Tirana

Është mbyllur në barazim 1-1 pjesa e parë e derbit mes Partizanit dhe Tiranës. Ndeshja nisi me dy gola të shënuar brenda 10-të minutave të para të lojës. Sapo nisi loja, të dyja skuadrat nisën sulmin në portat kundërshtare. Ndaj nuk zgjati shumë dhe erdhi zhbllokimi i rezultatit.

Një gol i shënuar nga Idi Batha i dha avantazhin Tiranës në minutën e 7 ta takimit. Mesfushori bardheblu shënoi pas një asisti të bukur nga Torasa, ndërsa Batha me kokë gjeti cepin e portës së mbrojtur nga Alban Hoxha. Por festa zgjati vetëm tre minuta. Partizani u rikthye në sulm për të vendosur barazpeshën.

Në të 10`, ishte Bardhi që tundi rrjetën e Likës. Sulmuesi i të kuqve shënoi pas një rrëmuje në zonë dhe mos kontrolli të topit mirë nga portieri bardheblu. Megjithatë, skuadra e Tiranës pretendon për një pozicion jashtë loje, por gjyqtarët e takimit vendosën të quajnë të rregullt golin. Ndërkohë, atmosfera në “Air Albania Stadium” është fantastike.

Pas shënimit të dy golave, ndeshja ka qenë e ekuilibruar por me ritëm të lartë. Të dyja ekipet kanë shkuar disa herë në portat kundërshtare, por pa arritur të ndryshonin rezultatin. Kujtojmë se Tirana nuk fiton një ndeshje derbi prej 5 vjetësh ndaj Partizanit.

Para fillimit të takimit, tifozët e Partizanit i dedikuan koreografinë e tyre viktimave të tërmetit të 26 nëntorit. Ndërkohë, në tapetin e blertë parakaluan edhe forcat e ushtrisë, zjarrfikësit apo policisë, të cilët punuan për nxjerrjen e trupave nga rrënojat. Partizani ka vendosur të dhurojë një pjesë të arkëtimeve nga biletat për fondin e rindërtimit.

Spektakël në “Air Albania Stadium”, derbi nis me dy gola të shpejtë (video)

Ndeshja derbi mes Partizanit dhe Tiranës nisi me dy gola të shënuar brenda 10-të minutave të para të lojës. Sapo nisi loja, të dyja skuadrat nisën sulmin në portat kundërshtare. Ndaj nuk zgjati shumë dhe erdhi zhbllokimi i rezultatit.

Rekord historik, mbi 19.000 bileta u shitën për derbin

Pak orë para nisjes së ndeshjes derbi, klubi i Partizanit njoftoi se u shitën 19.000 bileta, nga 21.690 vende që ka gjithsej stadiumi.

“Klubi njofton se vijon interesimi i jashtëzakonshëm për derbin Partizani – Tirana i cili luhet sonte në “Air Albania Stadium”. 19.000 bileta është deri më tani numri i biletave të shitura deri tani. Nxitoni për biletat e fundit që të jeni pjesmarës në Derbin Historik”, shkruante Partizani në një njoftim.

Të enjten, ditën që biletat dolën në shitje, pati një numër rekord të tyre. 17.500 bileta u shitën brenda disa orëve, ndërsa të premten ritmi i shitjes së biletave ka qenë më i vogël.

Sipas përllogaritjeve, Partizani mund të arkëtojë rreth 200 milion lekë nga biletat.

Partizani-Tirana, “luftë” për tribunat. Policia “mbështet” klubin bardheblu

Derbi mes Partizanit dhe Tiranës, që do të luhet të premten në “Air Albania Stadium”, është ndezur ende pa filluar ndeshja. Sapo Partizani, ekipi organizator, publikoi çmimet e biletave dhe tribunat që janë përcaktuar për tifozët e Tiranës, ka ardhur dhe reagimi i klubit bardheblu. Me anë të një deklarate në faqen zyrtare, Tirana shpreh pakënaqësinë për përcaktimin e tribunës nga Partizani. Sipas klubit bardheblu, ata kishin kërkuar që tifozët e Tiranës të qëndronin në tribunën “N”, e cila ndodhet në krahun e RTSH.

Kjo tribunë ka qenë historikisht (në stadiumin Qemal Stafa) e tifozëve të Tiranës. Por, Partizani vendosi që në stadiumin e ri, tifozët bardheblu të vendosen në tribunën “S), e cila ndodhet në krahun e parkut. Sipas njoftimit të klubit të Tiranës, të njëjtën kërkesë për tribunën ka bërë dhe Policia, por klubi i Partizanit ka refuzuar. Ndaj, sipas klubit 24 herë kampion i vendit, Policia e Tiranës ka refuzuar të marrë përsipër mbarëvajtjen e ndeshjes.

“Klubi i Partizanit si organizator i ndeshjes ka përcaktuar ndarjen e sektorëve të stadiumit “Air Albania” si dhe çmimet e biletave. KF Tirana ka kërkuar zyrtarisht që ndarja të bëhet ndryshe, duke kërkuar tribunën “Fatmir Frashëri” për tifozët bardheblu, tribunë e cila përkon me krahun nga qyteti. Për shkaqe sigurie të njëjtën kërkesë ka bërë dhe Policia e Tiranës, që pas refuzimit të Partizanit, nuk merr përsipër mbarëvajtjen e ndeshjes”, shkruan klubi bardheblu duke publikuar edhe çmimet e biletave për tifozët e saj.

🎫 | BILETAT | PARTIZANI -TIRANAKlubi i Partizanit si organizator i ndeshjes ka percaktuar ndarjen e sektoreve te…
Gepostet von KF Tirana am Mittwoch, 11. Dezember 2019

Derbi, Partizani publikon çmimet e biletave. Ja ku mund t`i blini

Të premten në orën 19:00, në “Air Albania Stadium” do të luhet ndeshja derbi mes Partizanit dhe Tiranës. Si ekip organizator, Partizani publikoi të mërkurën çmimet e biletave, ku njofton gjithashtu se nisi shitja e tyre.

Tifozët do të kenë tre ditë në dispozicion për të blerë një biletë për të parë sfidën më të rëndësishme të kësaj jave në kampionat.

Sipas njoftimit zyrtar të klubit të Partizanit, biletat kushtojnë nga 500 lekë më e lira deri në 5000 lekë më e shtrenjta. Konkretisht, në tribunën VIP Gold, bileta kushton 5 000 lekë, ndërsa në sektorët pranë tribunës VIP Gold biletat kushtojnë 4 000 dhe 3000 mijë lekë të reja.

Përballë tribunës VIP, biletat kushtojnë 1 500 lekë, ndërsa në sektorët E (në qoshet mes tribunës përballë asaj VIP) biletat kushtojnë 1 000 lekë. Ndërkohë në tribunat pas porte, biletat kushtojnë 500 lekë.

Biletat shtiten pranë biletarisë së stadiumit “Selman Stërmasi” dhe në dyqanin e FSHF te “Rruga e Elbasanit”. Ndërkohë, klubi i Partizanit ka vendosur që tifozët e Tiranës të qëndrojnë në tribunën S dhe V.

INFORMACION për ÇMIMET E BILETAVE FK PARTIZANI – KF TIRANA E PREMTE 13 DHJETOR ORA 19:00 "AIR ALBANIA STADIUM"Ju…
Gepostet von FK Partizani Albania am Mittwoch, 11. Dezember 2019

Rastësia gjeti shpërthyesin te tifozët

Dalin në dritë të tjera detaje nga ngjarja e rëndë e të dielës në stadiumin “Selman Stërmasi”. Sipas gazetarit të kronikës së zezë, Artan Hoxha, tifozët e Tiranës kishin përgatitur 3 vazo plastike me 35 kapsolla të mëdha dhe flakadanë, të cilat ishin groposur 20 centimetra nën zhavorrin e stadiumit, pranë tribunës ku qëndruan tifozët e Partizanit.

“3 vazo plastike të mbushura me 35 kapsolla të mëdha dhe flakadanë, të groposura afro 20 centimetra nën zhavorrin e stadiumit “Selman Stërmasi” nga ana e flamurit të këndit aty ku ishin vendosur tifozët e Partizanit. Vazot ishin lidhur në seri për tu aktivizuar me tel përcjellës në distancë, ishin me të vërtetë një çmenduri që as ultranacionalistët serbë nuk ia rezervuan kombëtares shqiptare në tetorin e 2014”, shkruan Artan Hoxha, i cili publikoi dhe foto të lëndëve plasëse.

Më tej, gazetari tregon se si policia e zbuloi telin përcjellës dhe vazot me lëndë plasëse. “Për fat të mirë shpërthimi i komanduar nuk ndodhi, sepse teli-përcjellës u zbulua rastësisht nga policia gjatë ndërhyrjes së saj në stadium, ku njëri nga policët u ngatërrua me kabllin e fshehur poshtë zhavorrit”, shkruan Hoxha, ndërsa shprehet se në rast shpërthimi, pasojat mund të ishin të rënda.

“Sipas specialistëve antieksploziv të policisë, nëse shpërthimi do të realizohej, fuqia e tij do të ishte e madhe, jo vetëm prej përbërjes me barut të materialeve piroteknike por edhe prej izolimit në vazot plastike që e shumëfishon fuqinë dhe sidomos prej sasisë së madhe të gurëve që ndodheshin sipër vazove të mbushura me kapsolla shpërthyese”.

“Shpërthimi, përveç se do të shkaktonte panik në stadiumin e mbushur plot një orë para ndeshjes, nuk do godiste vetëm tifozët e Partizanit, por edhe stafin e rojeve private, personelin e stadiumit që ndodhej në atë zonë, gazetarë dhe fotografë, stafin e KF Tirana që ndodhej pranë por edhe vetë tifozët e Tiranës. Historia dhe fanella 100 vjeçare e Tiranës, si dhe historia e fanella 73 vjeçare e Partizanit, vlejnë me tepër se çdo huligan apo ultras i papërgjegjshëm që e cilëson kundërshtarin “armik”, shkruan Artan Hoxha.

Dhuna në derby, Tirana: S’jemi polici, Partizani të mos bëj hetuesin

Klubi i Tiranës është distancuar nga dhuna që përfshiu fushën e blerët ku u zhvillua derbi kryeqytetas. Klubi i bardhebluve ka dënuar dhunën e ndodhur mes tifozerisë së dy skuadrave, si dhe është shprehur qartë se nuk mban përgjegjësi për 3 gropat e hapura gjatë natës, që ishin mbushur me një sasi lënde piroteknike me mekanizëm me ndezje elektrike. “Ne jemi klub futbolli dhe jo institucion policor” është shprehur klubi i bardhebluve, i cili ishte dhe ekipi mikpritës i ndeshjes.

Në një komunikatë për mediat, Klubi i Tiranës shprehet se të gjitha pamjet filmike i janë vënë në dispozicion policisë për të hetuar dhe arrestuar përgjegjësit. Gjithashtu Klubi i Tiranës i ka bërë thirrje atij të Partizanit që të bashkëpunojë me policinë nëse ka prova, ndërsa i ka dhënë një mesazh të qartë që të mos hiqet si hetues apo provokator.

“Klubi i Futbollit Tirana distancohet nga te gjitha aktet e dhunës, shfaqjet e shëmtuara jo sportive dhe dënon ashpër te gjitha problematikat e krijuara nga tifozët në ndeshjen Tirana – Partizani. KF Tirana ka zbatuar me rigorozitet planin e masave të hartuar me Policinë e Tiranës për mbarëvajtjen e takimit brenda dhe jashtë stadiumit “Selman Stermasi”. Në përfundim të takimit, klubi ka venë në dispozicion të Policisë, serverat e sistemit të kamerave të stadiumit, për të gjetur dhe dënuar më pas përgjegjësit e incidenteve në stadium por edhe autoret e incidenteve të mbetura fatmirësisht në tentativë.

Klubi i Futbollit Tirana është një klub futbolli dhe jo një institucion policor. Si i tillë, konform të gjithë rregullave të Federatës Shqiptare të Futbollit dhe ligjeve të Shtetit Shqiptar, kemi marre masa organizative për ndeshjen, si dhe dokumentuar me pamje filmike incidentet dhe dorëzuar ato me pas në institucionet përkatëse.

Ftojmë KF Partizanin të ruaj qetësinë, bashkëpunojë me Policinë nëse disponon materiale filmike apo prova për të gjetur autorët dhe fajtorët e incidenteve në stadium. Një klub futbolli mund dhe duhet të mos kalojë kompetencat për të folur nxituar here si hetues dhe here te tjera si prokuror” thuhet në deklaratën e klubit të Tiranës.

Para fillimit të ndeshjes Tirana-Partizani, në stadiumin ‘Selman Stermasi’, tifozët e të dy skuadrave u përfshinë një dhunë e skena përgjakje. Për ndalimin e saj është dashur ndërhyrja e policisë private, policisë së Tiranës dhe FNSH, për qetësimin e gjendjes.

Gjatë ditës së hënë policia tha se janë proceduar 9 persona për aktet e dhunës, nga këta 1 është arrestuar, 2 janë shpallur në kërkim dhe 6 persona të tjerë do hetohen në gjendje të lirë. Dy persona që janë ende në kërkim dyshohet se janë edhe përgjegjësit e hapjes së gropave gjatë natës, të cilat i kishin mbushur me një sasi lënde piroteknike me mekanizëm me ndezje elektrike, përmes të cilave do të sulmonin kundërshtarët. Fatmirësisht ky mekanizëm mbeti thjeshtë në tentativë.

Derby, Partizani e fitoi pa filluar

Derbi Tirana-Partizani është një ndeshje “mitike” për kryeqytetin e vendit. Historia, trofetë e fituar, rivaliteti i përjetshëm i tifozerive, identiteti dhe spektakli që i japin fushës së lojës kët dy skuadra, e bëjnë ndeshjen të krahasueshme me derbe të rëndësishme evropiane. Megjithatë, nëse “lufta” në tribuna është gjithmonë në lartësinë e pritshmërive për një ndeshje derbi (siç ishte dhe të shtunën), në fushën e lojës gjërat ndryshojnë. Partizani dhe Tirana rivalizojnë për trofe këtë sezon, por, dëshira duhet parë gjithmonë edhe me investimet.

Merkato e Tiranës

Tirana ishte një nga klubet më aktive në merkaton e verës, duke afruar plotë 10 futbollistë të rinj. Dhe jo lojtarë do si do, por emra që do t`i kishin zili shumë klubet, pse jo, edhe ato që luajnë në Europë. Emra si: Tefik Osmani, Elton Cale, Idriz Batha, Kristi Vangjeli, Edvan Bakaj, Ismael Dunga, Agustin Torasa, apo mesfushori i kombëtares Andi Lila, iu bashkuan ekipit bardheblu gjatë merkatos së verës. Pesë prej tyre (Osmani, Vangjeli, Batha, Torasa dhe Cale) e nisën si titullar derbin ndaj Partizanit, duke treguar se klubi bardheblu ka pritshmëri të mëdha nga këta lojtarë.

Por, sa është vlera e tyre financiare?

Në fakt, të gjithë lojtarët e afruar nga Tirana erdhën me parametra zero, pra Tirana i gjeti pa kontratë dhe u ofroi atyre mundësi të luanin për klubin bardheblu. Por, nëse ata erdhën me kosto zero (në transferim), pagat e tyre janë nga më të lartat. Ato mund të shkojnë nga 1000 euro (sipas referencave të tregut) deri në 10.000 euro më e larta.

Merkato e Partizanit

Partizani bëri pothuajse gjysmën e afrimeve të Tiranës. William Cordeiro, Esin Haka, Amir Bilali, Solomon, Ron Broja dhe Aldo Teqja ishin lojtarët që Partizani i mbajti në ekip gjatë merkatos së verës. Ashtu si Tirana, edhe klubi i kuq nuk pagoi asnjë lekë për transferimin e tyre, ndërsa pagat, gjithashtu presupozohet të jenë të larta. Trajneri Franko Lerda aktivizoi katër lotjarë në derbin ndaj Tiranës, të cilët erdhën gjatë merkatos së verës.

Vlera financiare e të dy klubeve

Sipas të dhënave të sajtit të specializuar të vlerësimit të klubeve, Transfermarkt, vlera financiare e Partizanit është 6.30 milion euro, ndërsa e Tiranës 4.18 milion euro. Pra, Partizani vlen 2 milion euro më shumë se Tirana si klub. Futbollisti i ardhur nga Flamurtari në Verë, Elton Cale, është lojtari me çmimin më të madh i bardhebluve. Nëse do të shitej tani, vlera e kartonit do arrinte në 450 mijë euro. Ndërsa, Jurgen Bardhi është futbollisti më i shtrenjtë te Partizani. Sulmuesi 21 vjeçar kushton 600 mijë euro. Por Partizani ka dhe lojtarë të tjerë që janë në vlerë mbi 400 mijë euro si: Kordeiro apo Esat Mala.

Pas humbjes të së dielës në derby, Presidenti i Tiranës Refik Halili u shpreh se “disa lojtarë të Tiranës nuk do të luajnë më kurrë në ekipin e parë”, duke lënë të kuptohet se për të “disa nga blerjet” kanë dështuar. Ndërsa merkato e Partizanit ka rezultatuar më efektive, pasi dy nga lojtarët që erdhën në merkaton e verës, Solomon dhe Melo, shënuan golat që i dhanë fitoren e derbit. Pra, Tirana bëri merkato në sasi, ndërsa Partizani në cilësi! Kjo e bëri skuadrën kampione, që ta “fitojë” ndeshjen, ende pa filluar. /Realstory.al/

“Gropa me lëndë plasëse”, 1 në pranga 2 në kërkim për dhunën në derbi

Mëngjesin e të hënës Policia e Shtetit ka dhënë informacion zyrtar në lidhje me dhunën që ndodhi të dielën në mbrëmje në ndeshjen derbi mes Tiranës dhe Partizanit. Sipas Policisë, janë proceduar 9 persona për aktet e dhunës, nga këta 1 është arrestuar, 2 janë shpallur në kërkim dhe 6 persona të tjerë do hetohen në gjendje të lirë. Personi i arrestuar është shtetasi me inicialet E.B., 29-vjeç, i cili sipas Policisë është konfliktuar me tifozët e Partizanit.

Ky shtetas, është vënë në pranga nga shërbimet “Shqiponja” dhe “Shigjeta”, pasi akuzohet për “Prishje të qetësisë publike”. Pasi është shoqëruar në komisariat, dhe janë bërë verifikimet e nevojshme, rezulton se 29-vjeçari, kishte thyer masën e sigurisë “Arrest shtëpie”. Ndaj tij, akuzojnë tre akuza” “Prishja e qetësisë publike”, “Plagosja e lehtë me dashje” dhe “Largimi i të burgosurit nga vendi i qëndrimit”.

Në gjendje të lirë janë proceduar 6 shtetas të tjerë, të cilët akuzohen për “Mosbindje ndaj urdhërit të punonjësit të policisë”, “Shkelja e rregullave mbi lëndët plasëse dhe radioaktive”.Personat e proceduar janë: M.M. 22 vjeç, A.M., 19 vjeç., Th.B., 25 vjeç., B.L., 46 vjeç., G.Q., 28 vjeç dhe E.B. 29 vjeç. Këta shtetas gjatë zhvillimit të ndeshjes së futbollit Tirana-Partizani kanë hedhur në fushë lëndë piroteknike.

Janë shpallur në kërkim dhe dy shtetas për veprat penale për “Mosbindje ndaj urdhrit të punonjësit të policisë”, “Shkelja e rregullave mbi lëndët plasëse dhe radioaktive” “Dëmtime të tjera me dashje”, “Prishja e qetësisë publike”, të cilët gjatë zhvillimit të ndeshjes janë konfliktuar me tifozët e Partizanit.

Gjithashtu dyshohet se këta dy shtetas, gjatë natës, përballë tribunës ku ishin ulur, kishin hapur tre gropa, të cilat i kishin mbushur me një sasi lënde piroteknike me menkanizëm me ndezje elektrike. Materialet procedurale iu referuan për veprime të mëtejshme Prokurorisë së Rrethit Gjyqësor Tiranë.

Humbja në derbi, Halili paralajmëron ndëshkime te Tirana

Humbja në derbi ka tronditur pozitat e stafit teknik dhe të disa lojtarëve. Presidenti bardhebluve ka paralajmëruar lojtarët dhe drejtuesit e skuadrës për masa, pas dështimit në derbi. “Ishte lojë në favor të Partizanit. Rezultati vendos gjithçka. E merituan fitoren, i uroj suksese. Duhet të flasin specialistët dhe trajneri se çfarë i mungoi Tiranës”.

“Për mua ishte shumë e rëndësishme si ndeshje, duhet të vazhdojmë kampionatin, sepse kampionati është i gjatë. Kemi folur shumë shpejt për objektivat. Ishte një ndeshje që shpresonim dhe unë kisha bindje që do ta fitonim. Ja që fati nuk ishte me ne, e fitoi Partizani”, tha Halili.

I pyetur nëse rrezikon trajneri të shkarkohet, Halili u shpreh me fjalët: “E çfarë nuk bën vakti të gjitha i kemi në tavolinë”. Të hënën pritet një mbledhje urgjente te Tirana, për të vendosur rreth vazhdimësisë së lojtarëve dhe stafit teknik, ndërsa presidenti i klubit bardheblu paralajmëroi edhe largim lojtarësh nga ekipi i parë.

“Skuadra ka lojtarë goxha të mirë. Kam besim që ato do bëjnë më të mirën në të ardhmen. Duhet t’i marrin gjërat shtruar. Do shikojmë te drejtuesit, aty e kemi problemin. Do marrim masa për më të mirën. Do ketë lojtarë që do luajnë te ekipi B dhe nuk do luajnë kurrë tek ekipi i parë siç luajtën”, u shpreh Halili.