“Një burrë hyri në dhomë, nisi të më godasë”, e moshuara rrëfen në Gjirokastër rrëfen dhunën

Një 75-vjecare ka rënë pre e dhunës mbrëmjen e djeshme në Gjirokastër, edhe pse ndodhej në banesën e saj. Ngjarja u shënua rreth orës 23:00 në fshatin Palokaster, ku mësohet se ndaj të moshuarës me inicialet P.Q është ushtruar dhunë nga një person i paidentifikuar.

Dhunuesi ka rrahur të moshuarën në shtratin ku flinte duke i lënë fraktura në trup dhe në fytyrë.

“Nuk e njoh personin, por arrita të dalloj që ishte një burrë, i veshur me rroba të ashpra. I thashë qe “nuk ka asgjë për të vjedhur”. Nuk më kërkoi gjë. Po bërtisja dhe thirra një fqinj. Autori u largua dhe nuk mori asgjë”, pohoi e moshuara, e cila ndodhet në spital, pasi ka marrë lëndime në trup dhe fytyrë. Ajo tha se ndihet e frikësuar dhe e kërcënuar me jetë pas kësaj ngjarje, ndërsa shtoi se në fshat është në hasmëri pasi i kanë vrarë edhe burrin para 3 vitesh.

“Jam e frikësuar se më kanë vrarë dhe burrin para 3 vitesh në fshat, jam me hasmëri”, tha e moshuara. Mësohet se e moshuara jeton bashkë me vajzën e saj rreth 50 vjeçe në banesë, e cila vuan nga problemet e shëndetit mendor. Aktualisht policia po vijon hetimet për zbardhjen e ngjarjes./realstory.al

Viti nis me bilanc negativ, 10 grabitje me maska për 2 javë

Policia e Shtetit njoftoi të mërkurën në 22 janar se kishte arrestuar një 36-vjeçar në Shkodër, i cili ishte kapur në flagrancë për vjedhjen e një banese. Kjo është vetëm ngjarja e fundit e regjistruar, e grabitjes së banesës nga hajdutët. Por, Realstory.al bëri një vëzhgim të ngjarjeve të kësaj natyre që kanë ndodhur gjatë fillimit të këtij viti në vendin tonë. Nga vëzhgimi, bazuar në njoftimet e Policisë së Shtetit, rezulton se janë regjistruar mbi 10 grabitje të ndodhur në harkun kohor të dy javëve. Gjithashtu, rezulton se në të paktën dy raste, grabitjet e banesave kanë përfunduar me ngjarje të rënda.

Më e rënda prej tyre ishte ajo e shënuar në fshatin Gjerbës të Mallakastrës, ku në datën 5 janar, tre të rinj u futën për të vjedhur në banesën e shtetases Drita Saliaj. Por, autorët jo vetëm vodhën, por përdhunuan dhe masakruan për vdekje 50-vjeçaren Dritan Saliaj, trupin e së cilës e hodhën në një rezervuar. I përfshirë në këtë ngjarje të rëndë ishte dhe nipi i burrit të viktimës. Ngjarja u zbardh nga policia, ndërsa tre të rinjtë u arrestuan dhe tashmë po përballen me drejtësinë.

Një tjetër rast po me pasoja të rënda ishte ai i ndodhur pak ditë më parë në zonën e Alliasit në Tiranë. Dy persona u futën në banesën e bashkëshortëve Laze, duke tentuar të vjedhin këtë banesë. Mirëpo grabitësit hasën me të zotët e shtëpisë duke shkrehur armën ndaj çiftit Petrit dhe Afërdita Laze, të cilët mbetën të plagosur rëndë. Policia ka shpallur në kërkim dy autorët, ndërsa deri më tani është bërë vetëm identifikimi i njërit prej autorëve.

Vjedhjet me dhunë nuk kanë ndodhur vetëm nëpër banesa, por edhe në rrugë apo lokale. Të martën më 21 janar, Policia e Korçës njoftoi se kishte prangosur katër shtetas, të cilët dhunuan dhe grabitën disa shetas të huaj. Gjithashtu, grupi i përbërë nga katër të rinj të moshës 19 vjeç, kishte kryer edhe vjedhje të tjera me dhunë, ku në fokus kishin pikërisht shtetasit e huaj, kryesisht emigrantë të ardhur nga vendet e Lindjes së Mesme.

Po në datën 21 janar, Policia e Krujës njoftoi se zbardhi një tjetër grabitje me dhunë. Dy të rinj i grabitën xhiron ditore kamarierit të një lokali, duke e kërcënuar me armë. Një nga grabitësit u arrestua në fshatin Cudh të Krujës, ai ishte shtetasi me inicialet A.K., 24 vjeç. Gjithashtu, këtij shtetasi iu sekuestrua dhe dy armë zjarri pistoletë gjatë momentit të arrestimit. Për këtë ngjarje, është shpallur dhe një tjetër person në kërkim.

Mëngjesin e të hënës në 20 janar, tre persona, ende të paidentifikuar, grabitën një pikë karburanti në qytetin e Bilisht. Tre persona, kanë vjedhur xhiron ditore të një pike karburanti në dalje të qytetit të Bilishtit. Grabitësit kanë kërcënuar rojën dhe punonjësit e karburantit, duke kryer grabitjen. Ata kanë arritur të marrin rreth 160 mijë lekë dhe 160 euro. Policia është duke hetuar ngjarjen, ndërsa ka sekuestruar kamerat e sigurisë së karburantit.

Ndërkohë, të dielën në 19 janar, Policia e Elbasanit njoftoi arrestimin e një personi nga Durrësi, që u kap në flagrancë duke vjedhur makina luksoze në këtë qytet. 30-vjeçari me inicialet A.P., ishte autor i vjedhjes së disa makinave luksoze në Elbasan, ndërsa po hetohet edhe për vjedhjen e makinave të tjera në qytetin e Durrësit.

Në datën 18 janar, Policia e Shtetit njoftoi prangojsen e dy adoleshentëve, I.L., 14 vjeç dhe K.S., 16 vjeç, autor të disja vjedhjeve. Gjithashtu u shpallën në kërkim dhe dy 14-vjeçar të tjerë. Këta të rinj, në bashkëpunim me njëri-tjetrin, përgjatë natës kanë kryer të paktën nëntë vjedhje në lokale dhe biznese të ndryshme në Tiranë, duke marrë shuma të konsiderueshme lekësh.

Në datën 16 janar, Policia e Tiranës arrestoi një 34-vjeçar, autor i vjedhjes së pajisjeve elektronike në dyqane të ndryshme të kryeqytetit. Në pranga u vu shtetasi me inicialet E.C., 34 vjeç nga Tirana, i cili kishte vjedhur disa laptop në disa dyqane të ndryshme në kryeqytet.

Po në këtë datë, në Tiranë u arrestua një 19-vjeçar që po udhëtonte me një mjet të vjedhur në Elbasan. Ai u kap në flagrancë në tentativë për të vjedhur aksesorët e një mjeti, njoftoi policia. Pas arrestimit, u zbardhën edhe 7 vjedhje të tjera të kryera nga i riu në bashkëpunim me persona të tjerë. Ky i ri, së bashku me të tjerë, kanë vjedhur një sasi të konsiderueshme lekësh në biznese të ndryshme, sende me vlerë apo dhe celularë.

Në datën 12 janar, Policia e Shtetit njoftoi se vuri në pranga dy persona në Kavajë, pasi u kapën në flagrancë duke kryer vjedhjen e një banese. Pas arrestimit të shtetasve Q.K., dhe A.H., të dy në moshën 26 vjeç, policia zbardhi se ata ishin autorë të vjedhjes së 11 banesave në Kavajë.

Këto janë disa nga vjedhjet e raportuara nga Policia e Shtetit, shumë prej të cilave janë zbardhur. Ajo që vihet re, është fakti se në shumë raste vjedhjet janë kryer nga të rinj të moshës nën 30 vjeç. Gjithashtu, në objektivin e grabitësve janë banesat, ku në dy raste ngjarjet kanë përfunduar me pasoja, si humbje jete apo plagosje e rëndë. Një tjetër fakt është se grabitetjet më të shumta janë raportuar në qarkun e Tiranës, e kryesisht në kryeqytet. /Realstory.al/

Tifozët rrahin arbitrin në Peqin

Dhuna vijon të mbetet një shqetësim për futbollin shqiptar. Të shtunën aktet e shëmtuara të dhunës u shfaqën në stadiumin e Peqinit, aty ku zhvillohej ndeshja me Shkumbinit dhe Dinamos, e vlefshme për Kategorinë e Parë. Arbitri i takimit, Sokol Bebja është dhunuar barbarisht nga tifozët e skuadrës së Shkumbinit, të cilët u futën në fushën e blertë duke qëlluar me grushta e shklema arbitrin. Ndeshja ishte mjaft e tensionuar gjatë gjithë zhvillimit të saj. arbitri Bebja u detyrua të nxirrte 3 kartonë të kuq dhe 8 verdhë gjatë takimit për të dyja skuadrat.

Duket se kjo gjë nuk u pëlqeu tifozëve vendas, të cilët u futën në fushën e lojës dhe dhunuan arbitrin e ndeshjes. Ky nuk është rasti i parë që dhuna shfaqet në kampionatin e futbollit në vend për këtë sezon. Ndërkohë që qeveria ka miratuar ashpërsimin e masave në Kodin Penal, ku të gjithë ata që dhunojnë lojtarët apo zyrtarët e ndeshjeve, dënohen deri në 3 vite burg.

Dinamo reagoi me një komunikatë, duke i quajtur të tilla akte të nxitura nga faktorë të jashtëm që mundohen të diktojnë fatet e ndeshjes. “Çdo ndeshje e Dinamos në transfertë po shoqërohet me presione që nuk kanë lidhje me fushën e lojës. Në fund të ndeshjes së sotme është dhunuar arbitri Sokol Bebja! Nuk është hera e parë që faktorë të jashtëm mundohen të ndikojnë në fatet e ndeshjes. Dinamo ka qënë, është dhe do të jetë gjithmonë Fair Play, brenda dhe jashtë fushe”, thuhet në deklaratën e klubit të Dinamos. Ndeshja midis Shkumbinit dhe Dinamos u mbyll me rezultatin 1-1.

“Tualet bëjnë vetëm prostitutat”, dhunoi gruan, arrestohet 40-vjeçari

“Tualet bëjnë vetëm prostitutat”,” Burri mund të tradhtoj, ndërsa gruaja jo”, “gruaja lindi nga brinjët e një burri dhe duhet të nënshtrohet”, ishin disa nga shprehjet më të zakonshme që një shqiptare dëgjonte çdo ditë nga bashkëshorti i saj. Ajo dhunohej fizikisht dhe psikologjikisht prej 6 vitesh nga 40-vjeçari në Itali.

40-vjeçari e detyronte bashkëshorten e tij të mos bënte “makeu-up” nuk e linte të dilte nga shtëpia, vishte rroba shumë më të mëdha se masa e saj, e kishte urdhëruar të mbyllte të gjitha profilet në rrjetet sociale dhe kishte hequr të gjitha pasqyrat në shtëpi, për shkak të xhelozisë së tij të sëmurë.

Ajo dhunohej vazhdimisht para syve të fëmijëve, derisa një ditë gjeti mundësinë për t’u arratisur dhe u drejtua në polici.

Policia italiane vuri në pranga bashkëshortin dhunues , ndërsa mori në mbrojtje gruan së bashku me fëmijët.

Dhunë ndaj policisë, arrestohet 50-vjeçari në Tiranë

Policia e Tiranës ka vënë në pranga një 50-vjeçar, i cili është arrestuar në flagrancë pasi ka kundërshtuar punonjësit e policisë. Sipas një komunikate zyrtare, mësohet se është arrestuar shtetasi me inicialet A.B., 50 vjeç banues në Tiranë.

Në rrugën “Isuf Banga” ky shtetas ka kundërshtuar me dhunë, punonjësit e policisë të cilët do e shoqëronin në Komisariatin e Policisë Nr.2, për të dhënë shpjegime në lidhje me një ngjarje, ku ky shtetas ishte person i dyshuar.

Materialet i kaluan për veprime të mëtejshme Prokurorisë së Rrethit Gjyqësor Tiranë në ngarkim të shtetasit të lartpërmendur për veprën penale “Kundërshtimi me dhunë i punonjësit të policisë së rendit publik”.

Babë e bir bëjnë për spital nusen e shtëpisë, nën hetim vjehrra

Nusja e shtëpisë 25-vjeçare ka rënë pre e dhunës fizike të ushtruar jo vetëm nga bashkëshorti por edhe nga vjehrra dhe vjehrri në Elbasan.

Sipas policisë tre personat në bashkëpunim me njëri tjetrin ushtruan dhunë fizike duke goditur me sende të forta nusen 25-vjeçe, e cila ka marrë dëmtime dhe ndodhet në spital jashtë rrezikut për jetën.

Babë e bir janë arrestuar, ndërsa nëna e djalit dhe vjehrra e nuses është proceduar në gjendje të lirë.

Të arrestuarit janë G.I. 50 vjeç dhe H.I. 26 vjeç, (at e bir) banues në Elbasan, ndërsa A.I. 46 vjeçe u procedua në gjendje të lirë.

Raporti i World Vision: 70% e fëmijëve në Shqipëri janë dhunuar

Organizata World Vision ka bërë publike të mërkurën shifrat e një raporti të hartuar prej saj mbi situatën e Mirëqenies së Fëmijëve në Shqipëri gjatë vitit të fundit.

Sipas raportit të World Vision gjatë vitit të fundit 70% e fëmijëve të moshës 8 deri në 18 vjeç kanë përjetuar një formë dhune.

Ky raport thotë se 46 % e fëmijëve janë indiferentë dhe nuk duan të përfshihen në raportimin e rasteve të dhunës dhe 34% e tyre nuk e raportojnë për shkak të mungesës së besimit që institucionet do ta zgjidhin situatën.

Dhuna është një prej faktorëve kryesorë që pengon zhvillimin dhe mirëqenien e fëmijëve si dhe cenon arritjen e rezultateve në ndërhyrjet socio-ekonomike, që çojnë në përmirësimin e cilësisë së jetës në Shqipëri.

Raporti bën të ditur se dhuna fizike dhe psikologjike është e pranishme në të gjitha hallkat kryesore të shoqërisë. Fëmijët raportojnë se shpesh nuk ndihen të sigurt në ambientet e lagjes apo shkollës së tyre.

Basha nxit dhunë: T’i shporrim me çdo mjet

Kreu i PD, Lulzim Basha ka bërë thirrje për dhunë dhe për mbrojtje me çdo mjet e formë bashkitë e djathta. Kreu i PD-së ka qenë të martën në Devoll atje ku të hënën kryebashkiaku socialist mori zyrën dhe nisi mandatin e fituar në zgjedhjet e 30 qershorit.

Basha së bashku me militantët e PD-së u mblodhën para bashkisë së Devollit dhe kërkuan që kryebashkiaku socialist të lirojë zyrën. Basha bëri thirrje që demokratët të përdorin çdo mjet për t’i larguar socialistët. Madje ai njoftoi se socialistët nuk do të qeverisin asnjë ditë pasi do të përballen me PD-në, madje edhe në Tiranë.

“Kam kënaqësinë të ndodhem në këtë manifestim të madh të Demokracisë dhe vendosmërisë për të mos pranuar vjedhjen dhe uzurpimin e pushtetit vendor nga një bandë që është në pushtet. Pakica kriminale ka uzurpuar bashkinë e Devollit, shumë shpejtë do ta shporrim këtë pakicë nga Devolli dhe nga Shqipëria. Hajduteskë…me pushtimin e bashkisë si hajdutë me pushtimin e pushtetit vendor si kriminel dhe me tentativën për të vendosur mbi 94% të qytetarëve të Devollit. Rama dhe sozitë e tij kanë shkruar fatin e tyre ne Devoll dhe në mbar vendit. Fati i tyre është ai që pret çdo hajdut. Shporrja me çdo kusht me çdo mjet me çdo formë. Kjo është dhunë antikushtetuese kriminale dhe antiligjore. Keqardhje për përdorimin e policëve duhet të arrestonin hajdutin. Nëse i njëjti fat do ti pres hajdutët në Shqipëri. Hajdutët i kanë bërë llogaritë në ditët e fundit të Korrikut. Kanë kujtuar se me vapën e verës do të realizojnë vjedhjen. Nuk do të qeverisin dot asnjë ditë. Sot në Devoll, Kavajë Pogradec, Kamëz e në të gjithë Shqipërinë… Do të përballen me vendosmërinë tonë. Edhe në Tiranë. Rrëzim i këtyre hajdutëve”, ka deklaruar Basha.

Ky është skenari që Basha ka përgatitur për të mbrojtur karrigen e tij në PD, fill pas zgjedhjeve të 30 qershorit. Realstory publikoi pak ditë më herët një dokument të hartuar nga kryesia e PD-së më 2 korrik dhe ku bëhej thirrje që të mbroheshin me çdo kusht bashkitë e djathta. Pra Partia demokratike është e vendosur që të përdorë akte dhune për të mbrojtur një pushtet që ra në 30 qershor dhe që ndërkombëtarët e njohën zyrtarisht. Basha ka nisur të përsërisë të njejtën gjë që bëri para zgjedhjeve të 30 qershorit ku u mundua të pengonte zgjedhjet me protesta të dhunshme, por u tërhoq pas presionit të ndërkombëtarëve. Kreu i PD-së këtë herë po përpiqet që përmes dhunës në bashkitë e ndryshme, të mbajë të ndezur frymën e opozitës kundër qeverisë dhe nga ana tjetër të mbrojë veten e tij nga sulmet dhe kritikat brenda PD-së për nxjerrjen e partisë në rrugë dhe për mbetjen pa asnjë pushtet./Realstory

Paloka thirri për dhunë, PD në Kavajë sulmon policinë

Është tensionuar situata në qytetin e Kavajës ku militantët e PD-së të vendosur për të mos lejuar lirimin e zyrës së kryebashkiakut të djathtë kanë sulmuar policinë dhe prefekten e Tiranës, Suzana Jahollari e cila ka qenë e pranishme në ceremoninë e betimit të kryebashkiakut të ri.

Militantët e PD-së kishin rrethuar godinën e bashkisë mëngjesin e së martës dhe ishin të vendosur për të mos lejuar lirimin e zyrës së kryebashkiakut. Vetë Isa Sakja kryebashkiaku i djathtë në ikje tha se është në ende në punë dhe se po respekton dekretin e presidentin që është ende në fuqi dhe se në 30 qershor nuk ka patur zgjedhje.

Ndërkohë ceremonia e betimit te kryebashkiakut socialist Redjan Krali u zhvillua në ambientet e nënprefekturës.

Fill pas mbledhjes ndërsa prefektja e Tiranës, Suzana Jahollari po jepte një prononcim për mediat është sulmuar nga militantët demokratë që hidhni parrulla “Rama ik”.

Pas acarimit të situatës policia është tërhequr për të mos nxitur agravim të mëtejshëm të situatës dhe për të mos iu përgjigjur me dhunë agresivitetit të ushtruar nga militantët e PD.

Kryebashkiakët e djathtë janë duke zbatuar dokumentin e shpërndarë nga sekretari i përgjithshëm i PD-së, dokument i cili është publikuar të shtunën nga realstory dhe ku lidershipi i PD-së thotë se do të mbështesë kryebashkiakët e djathtë për të mos liruar zyrat. Në dokument shkruhet se PD nuk mund ta llogarisë sesi do të reagojë populli në këto raste, duke nënkuptuar mbrojtjen me dhunë të godinave të bashkive. Gjatë të hënës nënkryetari i PD-së, Edi Paloka bëri thirrje për dhunë ndaj policisë duke iu referuar situatës në Devoll. Paloka i bënte thirrje njerëzve që të silleshin me policët njëlloj siç duhet të silleshin me një grabitës. Ky është skenari i përgatitur dhe i planifikuar nga lidershipi i PD-së fill pas zgjedhjeve të 30 qershorit.

Grushte nënës dhe gruas, në pranga dy dhunuesit

Dy persona janë arrestuar nga policia mëngjesin e së premtes në Krujë e Bulqizë për shkak se kanë ushtruar dhunë brenda familjes.

Në Tiranë është arrestuar 27- vjeçari E.G. banues në Krujë, për shkak se ka rrahur bashkëshorten. Ajo e akuzon për dhunë të vazhdueshme fizike dhe psikologjike.

Ai është arrestuar nga forcat e Komisariatit Nr.2 në Tiranë. E.G., ka qenë i dënuar më parë për prodhim, mbajtje apo shitje pa leje të armëve të ftohta.

Ndërsa në Bulqizë është arrestuar 32- vjeçari, V.S., pasi dhunoi fizikisht dhe psikologjikisht nënën e tij. Ai u arrestua nga forcat e Komisariatit të këtij qyteti.