Basha thotë se është “shok” me Ramën (në izolimin ndërkombëtar)

Lulzim Basha ka reaguar me anë të një statusi në Facebook, duke komentuar Samitin e Poznanit në Poloni, ku sipas kreut të PD-së, Shqipëria nuk ka përfituar asnjë qindarkë nga 180 milionë euro që BE ka dhënë për vendet e Ballkanit Perndëimor. “Shqipëria është i vetmi vend i Ballkanit Perëndimor që nuk përfitoi asnjë qindarkë nga 180 milionë eurot që Bashkimi Europian u dha vendeve të Ballkanit për projekte kombëtare infrastrukturore, për vitin 2019”, shkruan Basha.

Për kreun e PD-së, ky është ‘ndëshkim i qëllimshëm’ kundër qeverisë së lidhur me krimin, që sipas Bashës, BE do e mbajë Shqipërinë jashtë procesit të afrimit për aq kohë sa në pushtet është Edi Rama. “Është ndëshkim i qëllimshëm kundër një qeverie të korruptuar dhe të lidhur me krimin. Është vazhdim i qëndrimit të prerë të vendeve të Bashkimit Europian për të mbajtur Shqipërinë jashtë çdo procesi afrimi për aq kohë sa në pushtet është Edi Rama. Qeveria Rama është e vetmja qeveri në 30 vjet tranzicion që nuk ka bërë asnjë hap të vetëm në procesin e integrimit evropian”.

Si përfundim, për Lulzim Bashën ky është “izolim ndërkombëtar” ndaj qeverisë së Edi Ramës, që do të sjellë pasoja direkte për Shqipërinë. “Fatkeqësisht izolimi ndërkombëtar që po i bëhet qeverisë Rama po sjell pasoja direkte për Shqipërinë dhe shqiptarët, të cilët po ndëshkohen për shkak të Edi Ramës dhe lidhjeve të tij me krimin. Prandaj largimi i Ramës është një arritje që do të përmirësojë jetën e çdo shqiptari”, shprehet Basha.

Në fakt, Lulzim Basha flet për izolim ndërkombëtar, në një kohë që ai vetë kë më shumë se dy vjet, siç u shpreh Arben Imami të enjten në Real Story, që është “izolim” ndërkombëtar sidomos nga SHBA dhe administrata Trump. Ditët e fundit, Lulzim Basha, i cili po përballet me një furtunë reagimesh brenda së djathtës, me njerëz që kërkojnë largimin e tij, duket dhe më i braktisur nga ndërkombëtarët, të cilët i përcollën mesazhin para zgjedhjeve, se pas 30 qershorit e vetmja rrugë për opozitën ishte dialogu. Këmbëngulja e opozitës për të mos pranuar dialogun dhe mbajtja e protestës më 8 korrik, ka gjasa që të përkeqësojë dhe më tepër raportet e PD dhe Bashës me ndërkombëtarët, të cilët nuk lejuan prishjen e stabilitetit më 30 qershor.

Rama: Problemet të kënaqin më shumë pas fitores, se pas humbjes

Në një kohë që Lulzim Basha dhe Monika Kryemadhi po angazhohen me çdo mjet për të pasur sa më shumë protestues në shesh më 8 korrik, Kryeministri Edi Rama i është përgjigjur krerëve të opozitës me një shprehje të Winston Churchill. “Problemet pas fitores janë më të kënaqshme se sa ato pas humbjes, por jo më pak të vështira”, shkruan Rama në postimin e tij vetëm me një fjali, por që merr kuptim në aktualitetin politik në vend.

Opozita është angazhuar për të mbajtur protestë më 8 korrik, ditën kur në Kuvend do të votohet ngritja e Komisionit Hetimor, që do të përgatis raportin përfundimtar në mënyrë që më pas parlamenti të votojë shkarkimin e Ilir Metës. Protesta e opozitës e thirrur më 8 korrik, më shumë se sa për të parë reagimin e bazës pas bojkotit të zgjedhjeve, duket se do të jetë një shenjë falënderimi ndaj Ilir Metës, që u bë lideri i këtëtr i opzitën në aksionin e saj për të bllokuar rendin kushtetues dhe demokratik për mbajtjen e zgjedhjeve më 30 qershor.

Opozita është duke kaluar një moment të vështirë, tashmë që Komisioni Qendror i Zgjedhjeve po çertifikion rezultatin në çdo bashki, dhe ish të zgjedhurit e opozitës që drejtuan për katër vjet disa bashki në vend, shumë shpejt duhet të lirojnë karrigen për të zgjedhurit e rinj. Ndonëse zyrtarisht disa syresh janë shprehur se nuk do të largohen nga zyra, gjasat janë që kjo rezistencë të venitet ashtu siç ndodhi me venitjen e rezistencës për pamundësimin e zgjedhjeve të 30 qershorit.

Kërcënoi Zgurin, flet autori: Kërcënova dhe Ramën por më bëri…‘block’

Garda e Republikës mori në mbrojtje të premten më 5 korrik kryetarin e Komisionit Qendror të Zgjedhjeve, Klement Zguri. Kreu i KQZ kishte kërkuar mbrojtje për vete dhe familjen e tij, pasi kishte marrë një mesazh kërcënues në rrjetet sociale. Report TV, ka raportuar pasditen e të premtes, se ka zhvilluar një bisedë me personin që mendohet se ka qenë autor i kërcënimit të Klement Zgurit. Bëhet fjalë për shtetasin Emiljan Pjetri nga Shkodra, që aktualisht banon në Greqi. Sipas lajmit të Report Tv, personi në fjalë ka pranuar kërcënimin ndaj kreut të KQZ.

“Kam shumë vite që jam jashtë kam nja 10 vite që nuk vij në Shqipëri, jam në Athinë. Po shoh atje disa kriminelë si puna e Klement Zgurit, kujtojnë se mund të bëjnë çfarë të duan. Klement Zguri më shqetëson se është një këlysh i Ilir Metës. Nuk ka gardë republike që t’i mbrojnë nëse ata duan të bëjnë çfarë të duan vet. Këto kërcënime nuk i bëj si militant, i bëj për Shqipërinë, unë jam emigrant”, është shprehur Pjetri.

Megjithatë, ky kërcënim nuk është i vetëm, që Pjetri ka bërë ndaj politikanëve apo zyrtarëve të lartë në Shqipëri. Ai ka pohuar se të njëjtën gjë ka bërë dhe ndaj Kryeministrit Edi Rama apo presidentit Ilir Meta. Madje, Emiljan Pjetri kathënë se Rama i kishte bërë dhe ‘block’ në rrjetet sociale.

“Unë të njëjtën gjë ja kam bërë edhe Edi Ramës për armët kimike, ja kam bërë me telefon madje. Me arsyen që ka dashur të sjellë armët kimike në Shqipëri, prandaj e kërcënova Ramën. I kam thënë se nëse i sjell armët kimike do të kesh pasoja ti dhe familja jote. Edi Rama më ka bërë block në Facebook sepse nuk i pëlqen e vërteta. Arsyeja është që ata janë kriminelë. Ata e kanë bërë dynjanë me ikë nga Shqipëria. Do t’ja bëj nëse…nuk e bëj për Edi Ramën, jo e kërcënoj por ja bëj atij legeni”, thotë Pjetrit për gazetaren Kodra.

“Akuzë e rëndë, po ja bëj vërtetë. Nuk mund të tallet njeri me popullin”, thekson ai. “Edhe Ilir Metës ja kam bërë këtë punë unë. Jo tani për zgjedhjet se nuk ja kam numrin e telefonit se më ka bllokuar”, tregon shkodrani. “Policia më ka shpallur në kërkim mua? Policia shpall në kërkim kot. Unë mund të arrestohem por ata nuk e dinë se çfarë do bëj kur të dal nga burgu. Ata mund të kenë frikë kur të dal unë prej burgut pastaj”, rrëfen ai. “Edhe Ditmir Bushatit kur ishte ministër i Jashtëm, që bëri diçka jo të mirë për popullin, nuk po e jap arsyen”, përfundon ai.

Rama: Kemi mbështetjen e Gjermanisë

Kryeministri Edi Rama ka folur pas mbajtjes së samitit të Poznanit në Poloni. Kreu i qeverisë është shprehur se Samiti i Ballkanit Perëndimor kishte si qëllim bërjen e një bilanci për atë që është bërë deri më tani. Rama tha se Gjermania dhe Franca janë mbështetje të forcimit të bashkëpunimit rajonal.

“Ky është një samit për të bërë një bilanc të ecurisë së punëve në terësi në rajonin tonë.Kemi pasur diskutime intensive, interesante, të hapura dhe është me shumë rëndësi që procesi i Berlinit është një proces që konsolidohet vit pas viti, pa diskutim dhe arritjet nuk janë pak. Çfarë është planifikuar për të nesërmen është më e sigurt se ka qenë më pare”.

“Ne kemi vetëm një rrugë, rrugën e forcimit të bashkëpunimit rajonal. Në këtë aspekt, Bashkimi Europian, Gjermania por edhe Franca së fundmi me riangazhimin në rajon dhe agjencinë franceze të zhvillimit të përfshirë për herë të parë historikisht në rajon, janë në mbështetje”, tha Rama.

Basha konfuz: Duhet ndryshim, fituam në 30 qershor, Rama Ik

Lulzim Basha ka patur të hënën një ditë të ngjeshur takimesh me aleatët. Aksioni opozitar pas mbajtjes së zgjedhjeve të 30 qershorit, tashmë është më konfuz se kurrë. PD është praktikisht pa asnjë pushtet, humbi dhe bashkitë, të cilat në fakt ishin furnizuesi kryesor i opozitës me protestues, prej shkurtit deri në qershor. Tani që zgjedhjet u mbajtën dhe kryebashkiakët e opozitës duhet të largohen, për ti lënë vendin të zgjedhurve të PS, opozita duhet të mendojë për aksionin e saj nëse do të vijojë të jetë në rrugë apo do të pranojë dorën e shtrirë të dialogut, ofruar nga kryeministri Edi Rama.

Në fakt, gjatë takimeve të aleatve me Bashën, u la të kuptohet se protestat mund të jenë një alternativë e aksionit opozitar. Por, vetë Basha, duket se nuk është më me këtë mendim, të paktën publikisht nuk e shprehu në daljen për shtyp që pati nga Selia Blu, mbrëmien e së hënës. Por, Basha, ndonëse nuk e njeh 30 qershorin si ditë zgjedhjesh, ai i njeh një meritë kësaj date, pasi ka kuptuar se “shqiptarët duan ndryshim”.

Në fakt, Lulzim Basha përmendi ndryshimin shpesh në fjalimin e tij, por asnjë fjalë për rrugën se si do të vij ky ndryshim, asnjë fjalë për rezistencë, asnjë fjalë për protesta. “Ndryshimi është qëllimi im më i madh. 85% e shqiptareve duan ndryshim. Kjo është e vetmja vlerë e asaj që ndodhi dje”, tha Basha. Megjithatë, gjatë fjalës së tij, Lulzim Basha, ndonëse i tërhequr nga gjuha e ashpër ndaj kundërshtarit, u shpreh përsëri se Rama duhet të largohet.

“Qëndrimi ynë për Edi Ramën nuk ndryshon: Edi Rama duhet të largohet dhe të hetohen të gjithë ata që janë kapur duke manipuluar zgjedhjet me krimin. Dhe 30 qershori tregoi se me Edi Ramën nuk ka dhe nuk mund të ketë zgjedhje te lira dhe të ndershme. Edi Rama duhet refuzuar siç e refuzuat ju. Ai nuk mund të jetë më pjesë e asnjë hapi drej të ardhmes”, u shpreh Basha.

Raportin e OSBE-ODIHR për zgjedhjet Basha e lexon si konfirmim të kauzës së opozitës, duke u shprehur se 30 qershori e nxori më të fortë PD-në. “Votimet ishin të paligjshme dhe tani ky është fakt i pranuar nga të gjithë. Farsa dështoi. PD doli më e forte dhe më e bashkuar nga 30 qershori. Opozita doli më e fortë dhe më e bashkuar nga 30 qershori. Të gjithë së bashku si qytetarë jemi sot më të bashkuar se kurrë më parë dhe më të fortë se kurrë më parë. Edi Rama doli më i vetmuar dhe më i dobët nga 30 qershori”, u shpreh Basha.

Në fakt, PD nuk doli më e fortë nga 30 qershori. Basha, tashmë që nuk ka më asnjë pushtet lokal, duket se më shumë se sa Edi Ramës, po i trembet zërit kundër brenda së djathtës. Ndaj, 30 qershorin vijon ta quajë si fitore, të tijën, të PD-së, të Shqiptarëve.

Rama ironik me Bashën: Po s`kuptove pse humbe, humbet prapë!

Partia Socialiste nuk bëri festën për fitoren e zgjedhjeve të 30 qershorit, madje Kryeministri Edi Rama u shpreh të dielën në mbrëmje, se pas datës 1 korrik, PS do të bëj një analizë të zgjeruar të situatës brenda saj. PS mori votat e saj në këto zgjedhje, pra, pavarësisht mungesës së opozitës në garë, Partia Socialiste konfirmoi numrin e votave që mori dhe në zgjedhjet e fundit elektorale.

Kryeministri Rama ka shkruar një Tëitter pasditen e të hënës, ku i drejtohet me një mesazh sa filozofik aq dhe ironik kundërshtarit të tij politik. Me një thënie filozofike, të cilën Rama thotë se është shprehje e gjyshes, ai i përcjell edhe një mesazh opozitës, të cilës më herët i ka shtrirë dorën për dialog dhe bashkëpunim për reformat.

“Gjyshja ime thoshte po s’e kuptove pse ke humbur, s’e kupton dot pse tjetri ka fituar dhe humbet prapë. Ndërsa unë për vete kam mësuar që kur fituesi nuk kupton se ka fituar ngaqë dikush tjetër ka humbur, atëherë ai rrezikon ta humbasë fitoren e tij”, shkruan Rama. Mesazhi, sa filozofik aq dhe ironik, duket se e fton përsëri Lulzim Bashën për të reflektuar dhe nisur dialogun.

Gjyshja ime thoshte po s’e kuptove pse ke humbur, s’e kupton dot pse tjetri ka fituar dhe humbet prapë😊Ndërsa unë për vete kam mësuar që kur fituesi nuk kupton se ka fituar ngaqë dikush tjetër ka humbur, atëherë ai rrezikon ta humbasë fitoren e tij😁
— Edi Rama (@ediramaal) July 1, 2019

Rama shtrin dorën po s`ul kokën: Fitoi Shqipëria e re, reforma me PD

Kryeministri Edi Rama ka mbajtur një konferencë për shtyp, e cila ka nisur në orën 21:00 të mbrëmjes të së dielës, dy orë pas mbylljes së procesit të votimit. Duke e cilësuar një fitore të vështirë, Edi Rama, shprehu falënderim ndaj prtnerëve ndërkombëtar, të cilët, sipas Kryeministrit, u kërcënuan por nuk u lëkundën.

“Ishte një fitore e vështirë, sepse nuk luftuan kundërshtarë, por vetë sistemi ende i brishtë demokratik. Sot 30 qershori qe dukej sikur s’do vinte kurrë, po ikën paqësisht, duke marrë me vete ankthin, pasigurinë dhe kaosin institucional. Një faleminderit miqve dhe partnerëve, që u kërcënuan, por nuk u lëkundën në mbrojtje të demokracisë, lirisë së zgjedhjeve dhe të së drejtës për të zgjedhur. Faleminderit SHBA, BE, Misionit të OSBE dhe çdokujt tjetër nga përfaqësuesit e nderuar të botës demokratike që dhanë një dorë në këtë betejë. Jo vetëm faleminderit, por edhe ndjesë, shumë ndjesë, miqve të huaj që u bënë objekt e sulmeve të turpshme. Me ato sulme na turpëruan të gjithëve, si vend, si popull, si njerëz. Pas pas hyn një ditë e re që e gjen Shqipërinë të çliruar nga makthi, por vjen e ngarkuar nga plagët që hija e marrëzisë ka lënë pas”, tha fillimisht Rama.

Duke e cilësuar si ditë historike 30 qershorin, Kryeministri Edi Rama u shpreh se nuk do të largohet, pavarësisht kërkesës së opozitës. Ai tha se gjatë muajit korrik do të nis një debat brenda së majtës për të analizuar qeverisjen, duke korrigjuar gabimet e bëra deri më tani. “Nuk iki, megjithëse e di sesa shumëfish më shumë se sot është sfida e shlyerjes së tij nëse nuk fillojmë të ndryshojmë nga ata që jemi sot. Do të zhvillojmë një debat në korrik për të analizuar qeverisjen. Do të programojmë të tëra korrigjimet e nevojshme në funksion të sfidës. Një debat të gjerë për të analizuar situatën në familjen tonë politike”, tha Rama.

Ndërsa shtoi se tani, ai dhe PS do të jetë gati për dialog me opozitën, nëse kjo e fundit do të pranojë rrugën e paqes dhe duke hequr dorë sulmet ndaj vendit. Dhe pozicionin tonë të ri në skenën politike dhe marrëdhëniet ndërpartiake, qoftë me opozitën brenda parlamentit apo jashtë. Plaga e hapur kërkon kurim, ne do të bëjmë cdo gjë, pavarësisht se e hapën humbësit me turp. Nëse duan paqe, paqe do të kenë dhe paqja mund të fillojë vetëm duke u tërhequr nga sulmet kundër Shqipërisë. Nëse duan marrëveshje për Shqipërinë, marrëveshje do të kenë, vetëm me dialog pa kushte dhe shprehje për t’u angazhuar të gjithë për celjen e negociatave. Dora ime është e shtrirë, reforma zgjedhore mbetet sfidë me opozitën parlamentare dhe atë jo parlamentare, shtoi Rama.

Duke folur për opozitën, që në gjashtë muaj ka sulmuar institucionet në mënyrë të dhunshme, Rama la derën e hapur, duke u shprehur se tani fillon një ditë e re. “Molotovët i kishin zëvendësuar me firzamonika dhe lehjet komike kundër monizmit imagjinar. Pas pak fillon një ditë e re, dita dhe koha kur ne do të vijojmë të bëjmë tonën, në radhë të parë duke u përulur shumë më tepër para popullit, duke reflektuar shumë më tepër sesa sot para qeverisjes jonë në nivelin qendror dhe vendor. Ne nuk fituam ndonjë betejë për mandatin e ardhshëm të bashkive, por luftën përgjithmonë për zgjedhjet. Nga sot, Shqipëria nuk do të shohë më djegie mandatesh, molotov, bojkot dhe fronte. Për ata është një mësim, por edhe të gjitha partitë dhe përgjithmonë. Nga sot, ne, fitimtarët e 30 qershorit, nuk fituam ngaqë kemi bërë punë shumë të mira, apo se mjaftojnë ato që kemi bërë”.

Basha: Fitore! Nuk iki. Rama ik!

Lulzim Basha nxitoi për të folur i pari në konferencë për mediat, pasi është njohur me vendimin e kryeministrit Edi Rama, se do të dilte në konferencë për shtyp në orën 21:00. Ndonëse numri i zgjedhësve që kanë shprehur vullnetin ka shkuar rreth 760 mijë, shifër shumë e përafërt me votat që PS mori në zgjedhjet e fundit, për Lulzim Bashën, kjo është braktisje e Edi Ramës.

“Sot shqiptarë braktisën në masë maskaradën e votimit një partiak të Edi Ramës. 85 për qind e votuesve të regjistruar refuzuan votimet e paligjshme moniste. Edi Ramën sot e bojkotuan edhe socialistët, pasi për të sot votuan më pak se në vitin 2015 dhe 2017. Votimi i sotëm njëpartiak dhe nën kontroll të plotë njëpartiak ishte një ngjarje që nuk ndodhte askund në Europë, që nga koha e komunizmit”, u shpreh Basha.

Kryedemokrati, i cili vendosi të braktiste garën e 30 qershorit së bashku me aleatët e tij, pretendon se votuesit e të dielës, janë rrogëtar, të cilët kanë dalë në votime, sipas Bashës, nga kërcënimi se do të largohen nga puna.

“Në mënyrë të veçantë, regjimi ka ushtruar trysni dhe kërcënime ndaj punonjësve të sektorit publik. Mbi 150 mijë punonjësit publikë janë kërcënuar me pushim nga puna, nëse nuk votojnë së bashku me familjarët e tyre. Ata janë identifikuar dhe matrikuluar më një sistem të veçantë kodifikimi në të gjitha qendrat e votimit për të vertetuar pjesëmarrjen e tyre në votim. Në të vërtetë, thuajse e gjithë vota e sotme është vota e sektorit publik, e rrogëtarëve të shtetit, e marrë nën kërcënim dhe dhunim të vullnetit të lirë të punonjësve dhe familjarëve të tyre”, u shpreh Basha.

Megjithatë, Basha, ashtu siç ka premtuar nga 16 shkurti se largimi i Ramës është afër, edhe në konferencën për shtyp nga Selia Blu, u shpreh përsëri se fundi i Ramës do jetë i afërt, por nuk tha si dhe kur, do të vij, ajo që Basha e quajti “ankth”.

“Numri real tregon asgjë më shumë sesa rrogëtarët e shtetit nën terror, të detyruar, njësoj siç e tregojnë përgjimet e BILD-it të dalin bashkë me familjarët që të mos e humbasin bukën e gojës. Atyre u jap fjalën se ne do të çlirohemi shumë shpejt nga ky ankth, nga ky krim ndaj jush dhe fëmijëve tuaj. Njësoj si të gjithë qytetarët, Ju do të jetoni me dinjitet dhe do t’u shërbeni me dinjitet vetëm qytetarëve dhe ligjit dhe jo pushtetit të radhës”, u shpreh ndër të tjera.

Një demokrat President, pas Ilir Metës?

Mes një zhurme të madhe në ditën e heshtjes zgjedhore, gjithsesi ulëret fort një heshtje e paprecedentë. Sali Berisha njoftohet prej disa kohësh se gjendet në kurim jashtë shtetit në një klinikë mjekësore. Prej dy javësh lideri historik i së djathtës, hesht. Lider? Kështu e quajti të premten në darkë në Real Story edhe Edi Rama. Njeriu që hoqi picirin prej Doktorit nga 1997 kur e rrahu, në 2011 kur desh e vrau para Kryeministrisë e pak muaj më vonë i vodhi pa e vrarë mendjen bashkinë në tavolinë, njeriu që s’e njohu kurrë për tetë vjet si kundërshtar zyrtar, befas është “lider” për Edi Ramën???

Ajo që të habit është edhe teatraliteti i gjoja përballjeve të dy ditëve të fundit. Për shembull rasti i Zef Hilës. Kryetari i Bashkisë së Vaut të Dejës sipas qeverisë është shkarkuar dhe mediat raportuan gjatë ditës ndalimin e tij. Por vetë Hila në liri të plotë në një intervistë tha se ishte pyetur si qytetar në polici për ngjarjet, por ndërkohë vazhdonte të ishte në detyrë.

Që përpjekjet ndërkombëtare për negociata kanë nisur, realstory. al e ka raportuar prej disa ditësh. Burime diplomatike thonë se kushti i Bashës për të mos u ulur me Ramën si kryeministër mund të zgjidhet me një teknikalitet: takim fillimisht i Bashës me një socialist të një niveli të lartë e ndoshta pastaj me Ramën. Por po sikur në këtë skemë, të ketë diçka gabim? Po sikur në të vërtetë të jetë fillimisht një takim i Ramës me një zyrtar të lartë demokrat?

I vetmi që mund të kishte këtë staturë është Sali Berisha, por ai dihet se me Edi Ramën funksionon më mirë në distancë. Ashtu si në prill 2008 kur për 48 orë ndryshuan kushtetutën me dy korrierë: Damian Gjiknurin dhe Oerd Bylykbashin. Por thirrja e pak ditëve më parë për Doktorin e Ilir Metës në letrën e koduar që i çoi Ramës, kishte dhe fjalinë: “Edhe ti e ke pikë të dobët Doktorin, pavarësisht se ndryshe nga unë, nuk e thua me zë të larte”. Mos vallë Ilir Meta ka marrë vesh diçka? Mos mes Ramës dhe Berishës ka nisur një komunikim në distancë, që përjashton për momentin Bashën, dhe (sigurisht) edhe Ilir Metën? Mos vallë këtu bazohet shqetësimi i Presidentit për heshtjen e Doktorit, shprehur hapur në daljet e tij publike të herëve të fundit?

Gjithsesi gjithçka duket lidhet me atë se çfarë do të ishte objekti i marrëveshjes PD PS? PD pas 1 korrikut është totalisht në rrugë, jashtë çdo pushteti, dhe përfaqësohet në institucione vetëm me një figurë groteske, Erinda Ballancën, në postin e avokatit të popullit. Pra marrëveshja e mundshme duhet t’i japë diçka PD. Diçka të madhe dhe me vlerë, që të garantojë çbalancimin e pushteteve pas 30 qershorit dhe të jetë fletë garancia e rikthimit të saj në institucione. Për momentin e vetmja gjë në tavolinë, është koka e Ilir Metës. Ose më saktë, karrikja që ai do të lerë bosh shumë shpejt.

Maxhoranca tashmë është në rrugën pa kthim të shkarkimit të tij, që mund të ndodhë mes korrikut dhe shtatorit 2019. Ilir Meta sot është pothuajse i shkarkuar, sa kohë maxhoranca, gjyqësori dhe ndërkombëtarët nuk i njohin si të ligjshme dekretet e tij. Por befas të enjten atë nuk e “njohu” as Lulzim Basha. A ishte edhe ky një sinjal i koduar në distancë se Basha ishte game on, në skemën që duket ka edhe mbështetjen Amerikane?

Per këtë, le t’i rikthehemi fushatës. Rama nuk ka kursyer Ironinë ndaj liderit të PD, por kurrë nuk e ka quajtur me tone fyese. Edhe retorika ndaj Berishës është zbutur dy javët e fundit, përjashto kur Rama i është referuar reformës në drejtësi. Por ka një tjetër personazh që është sulmuar këtë fushatë: Ilir Meta. Ashtu si vjet më parë si Tepsi, sot si Haxhi Qamil. Dhe në këtë diskurs, në fjalorin e Ramës është përsëritur disa herë dhe fort, një Mea Culpa Ndaj Bujar Nishanit. Ai është krahasuar, sigurisht me Ironi me Xhefersonin, krahasuar me Metën, gjë që ka një të vërtetë në mes. Se pavarësisht Vokacionit të djathtë, Nishani nuk bëri kurrë lojëra me Kushtetutën. Bile në 2017, i dha leksion paraprak Metës sesi nuk duhet të luajë me dekretin e zgjedhjeve.

Por Bujar Nishani ka deklaruar se nuk synon më poste, pasi arriti të bëhej President i Republikës, por ai për shumë demokratë sot, shihet si kandidati më i mirë për të zëvendësuar kryetarin aktual, nëse nis një lëvizje Basha IK. Shenjat për këtë janë të forta, dhe Doktori e di shumë mirë se një çarje e re, do ta shkatërronte PD. Nishani si kryetar i PD do të ruante kohezionin e partisë, legacinë e Berishës, por edhe rregullonte raportet me amerikanët.

Por Berisha nuk mund të lërë Bashën në mes të rrugëve, pavarësisht dështimeve të shumta të tij. Vetëm kafshët i ngordhin vetë këlyshët e dobët, që të mbijetojnë më të fortët. NJerëzit funksionojnë ndryshe, qoftë edhe nëse quhen Sali Berisha: ruajnë fëmijën më të dobët. Berisha do që Basha të shpëtojë nga mali i dështimeve të veta.

Dhe sot politikisht Basha është më i dobët se kurrë. Më keq se kurrë me amerikanët që kontrollojnë BKH dhe SPAK. Dhe për më keq, ka futur gjithë PD në paralistën e zezë të tyre. Bujar Nishani jo. Ai kishte dhe ka raporte te shkëlqyera me amerikanët. Ai mund të ishte një element i besueshëm per ta. Nishani, ose “Xhefersoni” sic e quan Rama, do të kthente edhe PD në oborrin e ambasadës amerikane, (aty dhe e meriton të jetë). Berisha i heshtur prej takimit me amerikanët pak javë më parë, me siguri do të dëshironte pa fund rikuperimin me SHBA, para ngritjes së SPAk dhe të BKH.

Por për këtë, duhet të jetë dakort sigurisht Edi Rama. Dhe për këtë s’mjaftojnë vetëm “komplimentat” ironikë për Bujar Nishanin. Por të enjten në darkë ai bëri deklaratën që kaloi pa u vënë re nga shtypi. Skender Minxhozi duke folur për shkarkimin e Metës, i tha Kryeministrit se tashmë pas shkarkimit të Metës, socialistët do merrnin edhe presidencën. Një e drejtë morale sipas Taulant Ballës që në Real Story pak muaj më pare, kishte deklaruar se “presidenti i ardhshëm do të ishte një socialist”. Dhe sigurisht nuk e kishte për Ilir Metën, i cili hyri dy vjet më parë me fanfarën e një feste europiane, dhe po e del jashtë me shpejtësi nga zyra, sikur të ishte një element i rrezikshëm kamikaz i Boko Haram. Por Reagimi i Ramës ishte befasues të enjten në Real Story: “Kush tha se Presidenti i ardhshëm do jetë socialist?”

A është ky sinjali më i qartë i një marrëveshjeje të mundshme që do qetësonte vendin, Partinë Demokratike, por dhe Sali Berishën e Lulzim Bashën? Fundja Luli do kishte atë që kishte ëndërruar. një post të lartë pa u lodhur ta fitojë me garë. Vendin kështu në tetor do ta priste një skenar krejt tjetër nga ai i dekretit te Metës në datën 13 (ters), dy ditë para vendimit për hapjen e negociatave.

Dhe ja ku kthehemi te skenari amerikan për nisjen e negociatave: takimi i Ramës me një funksionar të lartë demokrat. Në këtë rast me Kryetarin Këshillit Kombëtar Bujar Nishani. Negocimi i tij direkt me Ramën si kryetar i ardhshëm i PD, do ta shpëtonte dhe Bashën nga sikleti i shtrengimit të dorës me një person që i tha “IK” pa sukses për gjashtë muaj rresht.

Kjo skemë do të ishte PINI dhe PUKU i kartës së bllokuar të krizës politike në vend dhe pikënisja e re jo thjesht e rikthimit të PD në sistem, por dhe ai i një klime të re të një vendi me tashmë një datë për hapjen e negociatave.

Kjo skemë sigurisht do të ketë edhe të humbur. Por Ilir Meta nuk mund të fitojë gjithmonë, megjithëse i ka patur të gjitha. Ai nuk mund të luajë me Ramën sa ai ta bëjë president e më pas të futet në fushatë për ta nxjerrë atë në opozitë. Ai nuk mund të luajë me Bashën e ta fusë në çadër, e më pas të hajë darkë me Ramën të restoranti i Pazarit. Ai nuk mund të përdorë Berishën për të fituar gjyqe, e të nesërmen të shkojë e të hajë ngjala me kundërshtarin e tij. Ai s’mund të bëjë gjithmonë negociatorin, se në fund dy të mëdhenjtë e kuptuan që në 2017, se janë në gjendje të bëjnë marrëveshje edhe pa nevojën e tij.

Dy të mëdhenjtë PD e PS, duket po e kuptojnë se i kanë ata, njëri PIN dhe tjetri PUK për zgjidhjen e krizës. Me koston që Ilir Meta do mbetet PAK i mërzitur. Po Iliri le të mërzitet S(PAK).

Kësaj radhe siç thotë Doktori: “E ka meritue”.

/Realstory.al/

Rama në “Real Story”: Të hënën ftoj Bashën, s’ndaj më pushtet, zgjedhjet më 2021

Kryeministri Edi Rama zgjodhi Vlorën për të mbyllur fushatën elektorale për zgjedhjet e 30 qershorit. Në fakt, mitingu përbmbyllës në “Lungo Mare”, nuk ishte fjala e fundit elektorale e Edi Ramës, pasi atë e tha, padyshim, në “Real Story” të gazetarit Sokol Balla dhe përballë analistëve Skënder Minxhozi, Arian Vasiari, Agron Gjekmarkaj dhe Alfred Lela. Në studion e improvizuar të “Real Story” në qytetin e Vlorës, Kryeministri Edi Rama foli për shumë tema, duke nisur fillimisht me fushatën elektorale, dhe më pas me krizën politike. Ai sqaroi se pas zgjedhjeve do të ftojë Lulzim Bashën për të zgjidhur krizën, ndërsa theksoi se nuk do të pranojë ndarje të pushtetit si në 2017 me PD-në. Për më tepër, lexoni pjesët më të rëndësishme të deklaratave të Kryeministrit në “Real Story”, që ishte një transmetim maratonë, nisi rreth orës 20:00 dhe përfundoi vetëm disa minuta para nisjes së heshtjes elektorale.

Rama në “Real Story”: Negociatat me BE kanë nisur teknikisht, dialogu me PD varet nga 30 qershori

Nga Vlora në “Real Story”, Edi Rama u shpreh se negociatat me BE-në janë hapur teknikisht, ndërsa PO-ja, politike, do të vij në tetor. “Vjet KiE ka thënë që negociatat do të hapen në qershor të këtij viti. Teknikisht negociatat Shqipëria ka nisur procesin, por politikisht PO-ja nuk është dhënë e plotë. Defakto procesi teknik ka filluar”, tha Rama. Ndërkohë, pas 30 qershorit, dialogu me PD-në, për Edi Ramën do të varet pikërisht nga ajo që do të ndodhë ditën e zgjedhjeve. Shmangia e dhunës ditën e zgjedhjeve nga PD, për Edi Ramën do të jetë një barrë më e madhe për PS-në që të jetë më kreative për të ofruar hapësira dhe pika kontakti me kundërshtarët.

“Nëse ata nuk do futen në një narrativë të re do të jetë tmerrësisht e vështirë për ta. Pas 30 qershorit do të jetë barrë më e madh për ne që të jemi më kreativ për të ofruar hapësira dhe pika kontakti për ta. Do varet shumë nga e diela, nëse ata do vazhdojnë me marrëzinë, do të jetë shumë e vështirë. Të dielën harroje, shko në plazh. Harroje të dielën, do marrësh më qafë PD”. Më tej, kreu i Qeverisë, u shpreh se zgjedhjet e ardhshme do të jenë më 2021, ndërsa ndarje të pushtetit me PD-në nuk do të ketë, duke lënë të kuptohet, se në negociatat për dialog pas 30 qershorit, PS-ja nuk do të pranojë kushtin e qeverisë teknike dhe largimin e Kryeministrit.

“Zgjedhjet janë në 2021, periudha është e gjatë për ata që janë angazhuar në revolucionin imagjinar. Nëse do dalin nga kjo rrugë marrëzie, do tu duket shumë e shkurtër pasi do duhet të organizohen. Pushtetin e ndan populli, ajo që po them është kjo; nëse nuk do dimë këtë përgjegjësi të madhe, do të jetë një plus për ata, që do të kapitalizojnë mbi kusuret tona. Ata janë një parti njerëzish rrogtarësh. Votuesit e tyre nuk mund të angazhohen me ato kapacitete për të përmbysur PS-në”.

Realstory, Rama: Jam gati të ulem që të hënën me PD në tavolinë

I pyetur nga gazetari Sokol Balla në Real Story a do të ketë dialog dhe marrëveshje pas 30 qershorit, Rama tha se ai është i hapur dhe çdo gjë varet nga ata. Rama tha se takimi në tavolinë und të ndodh që të hënën, mjafton që PD të ketë ardhur në vete. “A do ketë apo jo dialog apo një marrëveshje bashkëpunimin pas 30 qershorit, kjo varet nga ata. Unë jam i hapur për çdo dialog dhe marrëveshje bashkëpunimi. Jam gati të dialogojë dhe të ulem në tavolinë që të hënën për të gjetur një rrugë për rikthimin e opozitës në parlament . Nuk kam asnjë lloj kushti apo paragjykimi. Basha mund të vijë në tavolinë dhe të thot “Rama ik” por ta thotë në tavolinë. Nëse shoh që PD ende nuk ka ardhur në vetë do i them hajde po iki…nga tavolina.”

Kryeministri Edi Rama foli edhe për fenomenin e shit-blerjes së votës, duke thënë se ka qenë gjithmonë kështu. Por Rama mohoni se Partia Socialiste dhe ajo Demokratike nuk vjedhin vota, nuk kanë interes dhe nuk funksionon kështu. LSI dhe partitë e vogla janë tjetër gjë tha Rama në Real Story. “PS dhe PD nuk vjedhin vota, se nuk funksion. LSI dhe partitë e vogla janë tjetër gjë. Mund të ketë fenomene sporadike, tek PD apo PS, por janë të rralla. Shikoni sondazhet dhe do t’i shihni”. Rama tha gjithashtu se populli nuk është budalla dhe gjithmonë ka votuar saktë. “Populli shqiptar është shumë i mençur dhe nuk kane votuar kurrë gabim. Nuk votoi gabim në 1991, as në 1992 dhe as në 2009. Edhe në 2009 kanë votuar shumë saktë. Kanë votuar për një barazim. Ka qenë një rezultat shumë i ngushtë.”

Rama në Realstory: PD Nuk do marrë fund pas 30 qershorit, i duhet të reflektojë

Menjëherë pas mbarimit të fushatës elektorale në Vlorë, Kryeministri Rama ishte i ftuar në emisionin Real Story të gazetarit Sokol Balla. Rama foli për Partinë Demokratike dhe reflektimin që ajo duhet të bëjë pas 30 qershorit. Gjithashtu Rama nuk pranoi që këto zgjedhje të quhen monopartiake, pasi ka shumë parti të tjera që marrin pjesë, pavarësisht se në të mungon kandidati kryesor.

“Kërkuan të veremosin Shqipërisë dhe do të marrin atë që meritojnë. Nuk do zhduken si parti pas 30 qershori, të pakën jo PD, ajo do të jetë aty. Patjetër që do të dalë shumë rrënuar nga kjo histori, por duhet të reflektojë dhe riorganizohet, për t’u rikthyer si një alternativë e besueshme. E vetmja gjë që PD do përballet pas 30 qershorit është me militantët, struktura dhe demokratët e saj. Jemi në kushte ku nuk kemi kundërshtarë kryesorë në garë dhe për këtë nuk mund të fajësohemi, por këto nuk janë zgjedhje moniste pasi ka parti të tjera në garë. Për sa i takon dekreteve të Metës janë si të kohës së Haxhi Qamilit. Ato nuk janë dekrete janë një marrëzi dhe fakti që Shqipëria ka institucione sot kemi një 30 qershor që do dalim të votojmë. Nëse 30 qershori do të ishte i paligjshëm, nuk do të kishim një zë kaq të fuqishëm të SHBA dhe BE kundër opozitës dhe mbajtjes së zgjedhjeve në atë datë.” – tha Rama

Kriza politike, Rama në Real Story: Leksion demokracie, s`ka arsye për frikë në 30 qershor

Kryeministri Edi Rama deklaroi në “Real Story” për gazetarin Sokol Balla, se nuk ka arsye për të pasur frikë për të dalë për të votuar në 30 qershor. “Kjo botë nuk është e frikacakëve. Nuk ka arsye për të pasur frikë, mund të ketë gjëra sporadike, por ne i kemi marrë të gjitha masat, por kushdo që do të shkelë vijën e kuqe do të përballet me të gjitha pasojat. Është e vërtetë besimtar dhe votues, anëtar të atyre që nuk janë në garë, mund të jenë krejtësisht në pamundësi për të shkuar për të votuar, por këtë nuk ua hoqi PS, ua hoqi partia e tyre”, u shpreh Rama. Shefi i Qeverisë, që zgjodhi studion e “Real Story” për të mbyllur publikisht fushatën elektorale, u shpreh se PD-ja është tërhequr pas një presioni të jashtëzakonshëm të SHBA-së, ndërsa tha se plani për dhunë dështoi. “Merrni në pyetje kryebashkiakun e shkarkuar të Vaut të Dejës dhe dëgjoni çfarë thotë ai. Nga njëra anë PD thotë e organizuam ne sulmin ndaj KZAZ-së, ndërsa ai thotë që e organizoi partia. PD ka një javë që hedhë gurin dhe fsheh dorën, pas një trysnie të jashtëzakonshme nga SHBA. Kjo është e gjitha pjesë e të njëjtit plan, plani ka dështuar, por ka kërcitje tek-tuk. Nëse plani nuk do kishte dështuar, do ishin djegur të gjitha KZAZ-të e Shqipërisë. Pra ky ka qenë plani”, tha Kryeministri Rama.

Ram u shpreh gjithashtu, se Shqipëria do e kalojë me sukses testin e zgjedhjeve të 30 qershorit, ndërsa pas kësaj date, historia e partive politike që kërkojnë fitore në tavolinë dhe që imponojnë rregulla të pashkruara, do të marrë fund njëherë e mirë. Ndërkohë, shtoi se ai nuk e ndjen veten as fajtor, as faktor dhe aktor për krizën.

“Nuk ndihem as aktor, as faktor as fajtor per krizën. Ndihem mirë që plani për të futur Shqipërinë në një rruge pa krye, ka dështuar. Unë ndihem mirë që Shqipëria do e kalojë këtë test me sukses. Plani i turpshëm për ta marrë peng procesin zgjedhor, dështoi. Mund të ketë dëmtuar çeljen e negociatave përkohësisht, por nuk ka arritur dot të imponojë një rregull të ri që një palë imponon rregull të pashkruar për palën tjetër. Nuk do kemi më pas 30 qershorit parti politike që do ëndërrojnë fitore duke braktisur zgjedhjet. Ky film ka këtë fund dhe ky është sezoni i fundit i një seriali që ka vite që zhvillohet. Do nis një serial i ri, që nuk përjashtohen tensionet dhe polemikat. Ama jo më kështu, kjo histori mbaroi. Nuk kanë për të parë më shqiptarët situata të tilla. Ky është një leksion historik demokracie”, tha Rama./Realstory.al/