Biznesmeni: Si u përlesha me grabitësit në Allias

Biznesmeni i mbetur i plagosur së bashku me bashkëshorten e tij gjatë grabitjes së shtëpisë së tyre në Allias, ka treguar momentin e përleshjes së tij me dy grabitësit. Petrit Laze ka dëshmuar në polici se në tentativë për t’i nxjerrë jashtë shtëpisë grabitësit, njëri prej tyre e ka qëlluar me armë dhe më pas e mbylli në banjë. Laze thotë se edhe pse i plagosur ka arritur të dalë nga dritarja e tualetit dhe të futet sërish në shtëpi për të shpëtuar gruan dhe vajzën që ndodheshin në shtëpi, por grabitësit ishin larguar.

Duke tentuar që t’i nxirrja jashtë shtëpisë, ata më qëlluan me armë. E ndjeva se isha plagosur, por ata më shtynë drejt banjës dhe më mbyllën aty. Kam marrë një levë dhe jam hedhur nga dritarja për t’u rifutur në shtëpi, por ata ishin larguar pa marrë gjë”, është shprehur 61-vjeçari.

Ka qenë vajza e çiftit që ka ndjerë fillimisht zhurmën e grabitësve duke u thërritur prindërve dhe më pas telefonuar dajën e saj për ta lajmëruar se kishin hyrë në shtëpi për të vjedhur dhe po i vrisnin. Ka qenë daja që ka lajmëruar policinë, e cila erdhi menjëherë në vendin e ngjarjes.

Grabitësit, të cilët mendohen se janë dy 18-vjeçarë, plagosën çiftin Petrit dhe Afërdita Laze, në tentativë për të grabitur, por u larguan duarbosh kur hasën rezistencën e tyre. Ngjarja e rëndë ndodhi mbrëmjen e së dielës në zonën e Alliasit në Tiranë.

“Bërtisnin; ‘lekët, lekët”. Afërdita Laze tregon tmerrin e grabitjes dhe plagosjes

Kanë dalë të tjera detaje nga hetimet për plagosjen e rëndë mbrëmjen e të dielës në zonën e Alliasit në Tiranë. Afërdita Laze, që mbeti e plagosur së bashku me bashkëshortin në banesën e tyre nga dy grabitës, tregoi për policinë ngjarjen e rëndë. Sipas dëshmisë së dhënë nga Afërdita Laze për policinë, zbardhur nga Balkanweb, ajo tregon se grabitësit kërkonin vetëm lekët. Afërdita rrëfen se në momentin që dëgjuan zhurma në banesë ndodheshin në dhomë. Bashkëshorti i saj, Petriti, që është plagosur më rëndë, ishte i pari që shkoi për të parë çfarë po ndohte kur u përballë me dy grabitësit e maskuar.

“Ishim në dhomë. Dëgjuam një zhurmë dhe vajzën që bërtiti; “kush është aty?”. Doli Petriti (burri) të shihte kur u ndesh në korridor me 2 veta të maskuar. Dukeshin të rinj. Ata bërtisnin vetëm “lekët, lekët” dhe i drejtuan pistoletën. Petriti tentoi t’i nxjerrë jashtë nga shtëpia, ata e qëlluan. Kur u afrova dhe mua me qëlluan dhe ikën me vrap”, tha gruaja.

Bashkëshortët Petrit dhe Afërdita Laze u plagosën mbrëmjen e të dielës në banesën e tyre nga dy persona të maskuar, që u futën për të grabitur lekët. Çifti Laze ushtronin një aktivitet biznesi “Furrë Buke”, të cilin e kishin në katin e parë të godinës ku dhe banonin. Petrit Laze ka marrë plagë në bark dhe ndodhet në gjendje më të rëndë, ndërsa bashkëshortja e tij Afërdita është dëmtuar në pjesën e gjymtyrëve, por fatmirësisht pa rrezik për jetën.

I paarmatosur dhe vetëm me një levë, autori grabit filialin e kredive te Komuna e Parisit

Një institucion financiar që lëshon kredi është grabitur mbrëmjen e 7 janarit në zonën e Lulishtes te Komuna e Parisit.

Një person i maskuar me kapuç, i paarmatosur dhe me një levë në dorë ka kërcënuar punonjësit e institucionit duke u grabitur një shumë parash prej 50 mijë lekë të rinj. Kjo shumë ndodhej në kasat e banakut të institucionit, ndërsa autori është larguar menjëherë pas grabitjes.

Ngjarja ka ndodhur rreth orës 18:07, në rrugën “Medar Shtylla”, në një zyrë që i përket një institucioni financiar për kredidhënie në shuma të vogla, një person ende i paidentifikuar dhe i pa armatosur, ka marrë një sasi parash rreth 50 mijë lekë të reja dhe është larguar me vrap.

Në ndjekje të autorit janë vënë shërbimet e Policisë “Shqiponjat”, Patrulla e Përgjithshme dhe Forca e Posaçme Operacionale e DVP Tiranë.

Policia ka nisur hetimet për identifikimin dhe kapjen e grabitësit si dhe ka nisur këqyrjen e kamerave të sigurisë për zbardhjen e plotë të ngjarjes.

Dyshohet se morën 300 milionë lekë, grabitet mjeti që transportonte lekët e bankës

Një grabitje ndodhi mesditën e të hënës në zonën e Kasharit. Sipas News 24, në autostradën Tiranë-Durrës, autorë të paidentifikuar morën një shumë të konsiderueshme parash nga një makinë e “Security Spartan”, duke dhunuar personat që ndodheshin në mjet. Paraprakisht dyshohet se atutorët kanë marrë të paktën 30 milionë lekë të reja, të një banke të nivelit të dytë, që po transportoheshin me makinën e shërbimit privat.

Autorët ende të paidentifikuar i kanë prerë rrugën makinës, i kanë nxjerrë personat nga makina dhe janë larguar drejt Tiranës nga rruga dytësore. Vetëm pak metra më larg, ata kanë braktisur makinën dhe nuk dihet nga kanë ikur me shumën e parave. Policia ka ngritur pika kontrolli në të gjithë Tiranën dhe po kryen kontrolle, ndërkohë që po merren në pyetje dy personat që ishin në makinë.

Në informacionin zyrtar të policisë, thuhet se “Shërbimet e policisë kanë shkuar menjëherë në vendngjarje dhe vijojnë kontrollet dhe krehjen e zonën ku u gjet mjeti i braktisur me qëllim kapjen e autorëve. Grupi hetimor nën drejtimin e Prokurorisë po kryen veprimet për administrimin e çdo prove të vlefshme që do t’i shërbejë hetimit për identifikimin e autorëve dhe zbardhjen e ngjarjes”.

Vidhet posta në Krujë, roja se raporton: Më kërcënuan

11 milionë lekë janë grabitur nga kasaforta e postës në Krujë, ndërsa është arrestuar roja e objektit, pasi nuk kallëzoi ngjarjen.

51-vjeçari Besnik Parruca, i cili ishte dhe roja private e postës në Krujë, nuk ka kallëzuar grabitjen e ndodhur paraditen e së hënës. Roja nuk ka raportuar as te patrulla e policisë, që kaloi aty pak pas grabitjes, për t’u interesuar se gjithçka shkonte në rregull. Pas arrestimit, 51-vjeçari tha se nuk tregoi për vjedhjen pasi e kërcënuan grabitësit. Policia vuri në pranga rojën nën akuzën e “moskallëzimit të krimit”, ndërsa shpalli në kërkim edhe specialistin e sallës S. T., 28 vjeç, pasi akuzohet se ka shpërdoruar detyrën duke mos njoftuar Policinë e Shtetit në lidhje me ngjarjen.

Grabitësit arritën të merrnin 11 milionë lekë nga posta dhe më pas të largoheshin të qetë, pasi askush nuk raportoi për të. Policia vijon hetimet për të identifikuar autorët dhe kapjen e tyre.

Tiranë, grabitet banesa e diplomatit të Kuvajtit

Shtëpia e diplomatit të Kuvajtit në Tiranë ka rënë pre e grabitjes. Denoncimi është bërë në komisariatin nr. 1, pas mungesës së disa bizhuterive me vlerë në shtëpi.

Dyshimet e para bien mbi pastruesen e vilës, një 28 vjeçare nga Filipinet, pasi banesa nuk është hapur me forcë.


Diplomati i Ambasadës së Kuvajtit në Tiranë, Humoud Saleh Alhusaini,  jeton në kompleksin e vilave, në zonën e Petrelës.

Grabitja e aeroportit në Brazil, CNN: E ngjashme me atë në Rinas

Një film i denjë për Hollywood, kështu është cilësuar grabitja e arit që u bë në aeroportin e San Paolos në Brazil. Në një kohë rekord prej 2 minuta e 30 sekonda, 8 persona të armatosur arritën që të merrnin 750 kilogram ar.

Ajo që bie në sy është ngjashmëria e kësaj vjedhje me atë të ndodhur në prill në aeroportin e Rinasit në Tiranë.

Këtë ngjashmëri nuk ka hezituar ta theksojë edhe CNN, që në një shkrim të saj cilëson “ Grabitësit ishin veshur si agjentë, erdhën me një mjet që ngjante me mjetet e policisë federale të Brazilit,  dyshohet se kanë pasur akses në informacionin e brendshëm rreth operacioneve të aeroportit dhe nën kërcënimin e armëve arritën të vidhnin një sasi të madhe ari që kishte një vlerë mbi 40 milionë euro.”

 Ky përshkrim është thuajse i njëjtë me ngjarjen e ndodhur në Rinas, ku “autorët ishin maskuar si policë, erdhën me një fugon me mbishkrimin “Hetimi Tatimor”, dyshohet se kishin informacion të brendshme në lidhej me transportin e parave dhe e gjithë vjedhja u krye në një kohë rekord në më pak se 4 minuta.”

Dy skena shumë të ngjashme grabitje, por që në atë të Rinas rezultoi me vrasjen e kreu i bandës, Admir Murataj.

Mbetet në burg “daja” nga Kosova

Gjykata e Apelit ka lënë në fuqi masën “arrest me burg” për Ragip Hajdinin, i njohur si “daja” nga Kosova i përfshirë në grabitjen në Rinas.

Gjykata e Apelit tha se nuk ka ndryshuar asnjë rrethanë për të lehtësuar pozitën e Hajdinit dhe për këtë arsye ka lënë në fuqi vendimin e Gjykatës së Shkallës së Parë.

“Daja” nga Kosova u arrestua tek Shkëmbi i Kavajës si bashkëpunëtor i grabitjes në Rinas.

Grabitja dhe dhunimi i tregtarit në Peqin, policia zbardh ngjarjen

Policia ka zbardhur ngjarjen e ndodhur disa ditë më parë në Peqin, ku një 75 vjeçar u dhunua dhe më pas u grabit në banesën e tij.

Policia ka bërë të mundur arrestimin e 3 personave, të dyshuar si pjesëmarrës në grabitje, përkatësisht B.H., 30 vjeç, M.Ll., 27 vjeç, të dy banues në Peqin dhe E.Sh., 27 vjeçe , banuese në Durrës si dhe është shpallur në kërkim, shtetasi S.I., 19 vjeç.

Arrestimi i tyre u bë pasi, dyshohen se në bashkëpunim me njëri- tjetrin, kanë vjedhur në banesën e shtetasit S.Z., një sasi të konsiderueshme parash.

Materialet hetimore i kaluan Prokurorisë pranë Gjykatës së Shkallës Parë Elbasan për veprën penale ” Vjedhja”.

Dhunojnë dhe grabisin tregtarin, në kërkim çifti bashkëshortëve

Një çift bashkëshortor kanë dhunuar një tregtar dhe më pas kanë grabitur një shumë të konsiderueshme parash.

Ngjarja ka ndodhur në qytetin e Peqinit, ku viktimë e grabitjes ka rënë tregtari Skënder Beqiri, 75 vjeç, i cili është lidhur dhe dhunuar në banesën e tij nga një çift i paftuar.

Bashkëshortja e tregtarit ka thënë për mediat se autorët kanë grabitur 60 mijë euro dhe sende me vlerë. Efektivët blu kanë nisur hetimet për identifikimin e çiftit dhe zbardhjen e ngjarjes së plotë.

Sipas familjareve në shtëpi në momentin e grabitjes ka qenë vetëm 75 vjeçari, sipas të cilit i është shfaqur në derë një vajzë e cila ka kërkuar të përdori tualetin.

Skip to toolbar