Miratohet “Anti-shpifja”, më 19 dhjetor kalon në Kuvend

Komisioni Parlamentar i Ligjeve miratoi në parim paketën “Anti-shpifje”, të propozuar nga Këshilli i Ministrave për miratim në Kuvend. Të hënën u zhvilluan diskutime në komisionin e ligjeve, ndërkohë që në të njëjtën orë opozita zhvillonte një tryezë me gazetarët ku premtoi se do anulonte ligjet e kësaj pakete, kur PD të vinte në pushtet.

Ligjet e paketës “Anti-shpifje” tashmë i shkojnë Kuvendit për miratim në seancën e 19 dhjetorit. Ndonëse këto ligje janë kundërshtuar nga shoqatat e gazetarëve dhe organizata të ndryshme ndërkombëtare, deputetët e Komisionit të Ligjeve e shohin në këndvështrim pozitiv paketën. Klotilda Bushka u shpreh se “Regjistrim i operatorëve mediatikë online, nuk është i detyrueshëm, por mundësi që u ofrohet dhe regjistrimi i tyre është mundësia për të përfituar nga iniciativat fiskale”, u shpreh Klotilda Bushka, relatorja e kësaj pakete.

Më tej, relatorja shpjegoi edhe mënyrën e përzgjedhjes së anëtarëve të Këshillit të Ankesave, që do të krijohet me paketën e re ligjore si institucion pranë AMA. Ajo tha se ky institucion do të jetë me konkurs, që do të organizohet nga Autoriteti i Mediave Audiovizive.

“Nisur nga ndjeshmëria e grupit të interesit, që ka pasur ankesa për pavarësinë e Këshillit e Ankesave, sesa i pavarur do të jetë ky këshill, për sa kohë që ai krijohet nga AMA. Kemi vlerësuar, që Këshilli i Ankesave garanton pavarësi, kemi sugjeruar, procedurën e anëtarëve të Këshillit, çka do të thotë që AMA do të hapë një konkurs”, tha Bushka.

Kryetari i AMA, Gentian Sala u shpreh se për këtë institucion duhen gazetarë me mbi 10 vite eksperiencë, ndërsa sugjeroi që nuk duhet të ketë persona që vijnë nga fusha të tjera, jo e gazetarisë. “Duhet të ndryshohet sesi është konceptuar Këshilli i Ankesave, është specifikisht me gazetarë me 10 vite eksperiencë, nuk duhet të futet persona me profesione të tjera”, tha Gentian Sala, kryetari i AMA-së.

Krimet e komunizmit fusin në sherr deputetët te Ligjet

Si gjithmonë çështjet që lidhen me periudhën e komunizmit vazhdojnë ende të shkaktojnë debate të ashpra në politikën shqiptare. Kështu ka ndodhur edhe në mbledhjen e së martës të Komisionit të Ligjeve ku deputetët kanë debatuar në lidhje me ndryshimet që i janë bërë ligjit për “Krimet dhe Pasojat e Komunizmit në Shqipëri”.

Projektligji propozonte kufizim të punës së Institutit që do të merret me studimin e krimeve të komunizmit, pra të mos kalojë 29 Nëntorin e 1944-ës.

Gjatë diskutimit ka pasur edhe një përplasje mes deputetit të opozitës, kryetar i Ballit Kombëtar, Adriatik Alimadhi dhe deputetes së PS-së, Klotilda Bushkas në lidhje me kufizimin kohor të punës së Komisionit.

“Projektligji synon saktësimin e periudhës së Komunizmit në Shqipëri. Regjimi komunist nuk mund të lidhet me periudhën e luftës antifashiste nacional çlirimtare, nuk mund të jetë objekt periudhe pas periudhës 29 nëntor 1944”, tha relatori i çështjes, deklaratë që u mbështet nga deputetja Bushka.

“Më duhet të them që pikënisja e kësaj nisme ka nisur te rezoluta për vlerësimin e raportit të Institutit për krimet dhe pasojat e komunizimit ne Shqipëri. Çdo detyrë e këtij instituti ka të bëjë me periudhën nga nëntori i 1944 e më pas”, tha Bushka.

Por kjo u cilësua nga Alimadhi si një mendësi komuniste. Ai kërkonte që hetimet për krimet komuniste të nisin që në vitin 1941 pasi, sipas tij Partia Komuniste e ka nisur terrorin që në nëntor të këtij viti.

Mazhoranca gati të votojë dy ligje të Reformës në Drejtësi

Në seancën plenare të Kuvendit të Shqipërisë, të enjten më 18 korrik, pritet të miratohen dhe dy ligjet e mbetur të Reformës në Drejtësi. Bëhet fjalë për ligjin “Për statusin e gjyqtarëve dhe prokurorëve” dhe “Për organet e qeverisjes së sistemit të drejtësisë”. Këto dy ligje kanë mbetur pa u miratuar prej dy vjetësh, kur Gjykata Kushtetuese vendosi t`i rikthente për shqyrtim, pasi shfuqizoi 22 nene të tyre.

Në atë periudhë, mazhoranca i kërkoi konsensus PD-LSI për të ndryshuar dy ligjet e Reformës në Drejtësi, sipas sugjerimeve të bëra nga Gjykata Kushtetuese, por opozita e refuzoi kërkesën. Në këto kushte, mazhoranca i la këto dy ligje pa miratuar, pasi nuk kishte 84 vota të nevojshme.

Por duket se mazhoranca ka gjetur tashmë mbështetjen e opozitës parlamentare (që ka konfirmuar më herët mbështetjen për Reformën në Drejtësi), duke i rikthyer këto dy ligje në axhendën e Kuvendit.

Të hënën, në Komisionin e Ligjeve do të diskutohen nen për nen këto ligje, të cilët mund të marrin dhe “ok” për të shkuar më pas për miratim të enjten. Miratimi i këtyre dy ligjeve do të plotësojnë kuadrin ligjor të Reformës në Drejtësi.

Zbatimi i Reformës në Drejtësi, është një ng akushtet themelore për hapjen e negociatave me Bashkimin Europian. Tashmë duket gjithçka në rrugën e duhur, pasi kalimi i Vettingut nga disa gjyqtar dhe prokuror, i ka hapur rrugë ngritjes së institucioneve të reja të drejtësisë, si SPAK, Gjykata Kushtetuese, Gjykata e Lartë apo Byroja e Hetimit.