Një 60-vjeçar, i cili po drejtonte një motor ka humbur kontrollin dhe ka dalë nga rruga. Për pasojë ka marrë plagë të rënda dhe është në kujdesin intesiv të mjekëve. Aksidenti ka ndodhur në aksion Korçë-Voskop pranë vendit të quajtur “Ura e Turanit”,.
Sipas policisë, aksidenti ka ndodhur për shkak të shpejtësisë me të cilin drejtuesi po i jepte motorit, duke dalë nga rruga dhe përplasur me bordurat anësore.
I plagosur ka mbetur shtetasi Haki Leska, 60 vjeç, banues në Voskop.
Një aksident i rëndë ka ndodhur mesditën e së shtunës në rrugën nacionale Korçë Kapshticë, ku si pasojë kanë mbetur tre vajza të plagosura.
Aksidenti ka ndodhur në afërsi të Bitinckës dhe sipas policisë automjeti ka humbur kontrollin duke dalë nga rruga dhe për pasojë janë plagosur drejtuesja e makinës dhe dy vajza që ishin pasagjere.
Të plagosurat janë transportuar në spitalin e Korçës dhe ende nuk ka informacion për gjendjen e tyre shëndetësore.
Policia në vendngjarje po punon për zbardhjen e rrethanave të aksidentit, shkak për të cilin dyshohet shpejtësia tej normave të lejuara.
Policia e Korçës ka arrestuar në flagrancë një 28-vjeçar, i cili qarkullonte me armë zjarri në brez.
28 vjeçari me inicialet I.Q është arrestuar në lagjen nr.17, teksa udhëtonte me automjetin tip “Mercedes Benz”. Policia e ka ndaluar dhe ka ushtruar kontroll ndaj tij dhe mjetit që ky shtetas drejtonte.
Gjatë kontrollit fizik të ushtruar ndaj 28-vjeçarit, Policia i gjeti në brez, një armë zjarri pistoletë me fishekë, të cilat i posedonte pa lejen e organeve përkatëse.
Shtetasi I.Q, u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese e municionit” dhe materialet për veprime të mëtejshme i kaluan Prokurorisë pranë Gjykatës së Shkallës së Parë Korçë.
Shtëpitë e shkatërruara nga tërmetet e rëna në Korçë kanë nisur të rindërtohen. Dëmet më të mëdha tërmeti i shkaktoi në fshatin Floq, Qafzez dhe Vidohovë. Të martën ka nisur simbolikisht ndërtimi i shtëpisë së parë por që do të vijojë me ndërtimin e 124 banesave që janë shkatërruar plotësisht nga tërmeti. Gjatë nisjes së punimeve ka qenë e pranishme Ministrja e Infrastrukturës dhe Energjisë, Belinda Balluku dhe drejtori i Emergjencave Civile, Haki Çako.
Ministrja Balluku tha se qeveria është e impenjuar për të mbledhur fonde për rindërtimin e të gjitha shtëpive të shkatërruara dhe në rikonstruksionin e atyre pjesërisht të dëmtuara. Puna do të nis me 40 shtëpitë e para të familjeve më në nevojë tha Balluku, deri në përfundimin e të gjitha shtëpive të dëmtuara.
“Qeveria shqiptare është impenjuar për të ngritur fonde solidariteti qoftë nga bizneset, bashkitë që na kanë mbështetur. 124 shtëpitë që janë të pabanueshme do të ndërtohen. Janë 40 shtëpi që do të nisin nga puna. Jemi duke nisur simbolikisht me njërën nga banesat. Sot një ditë me shi si për të na treguar që duhet ti marrim sa me shpejt masat. Kantieret do të hapen paralelisht në zone dhe do nisin punën menjëherë. Të gjithë investitorët do nisin punën paralelisht. Edhe në Qafzez e në Vidohovë. Ne kemi priorizuar familjet me vështirësi sipas kritereve apo problemeve sociale. Do nisim punë nga ata që janë më të dëmtuar. Këto fonde janë siguruar nga investitorët që bashkëpunojnë me ministrinë e Infrastrukturës dhe Energjisë” tha Balluku
Dy persona kanë mbetur të plagosur pasi makina me të cilën po udhëtonin ka dalë nga rruga. Ngjarja ka ndodhur në aksion rrugor Korçë-Pogradec, ku të plagosur kanë mbetur shtetasit Arjan Latifi 41-vjeç dhe Silvjano Gjoza 31-vjeç.
Dy personat po lëviznin me një makinë tip BMW me targat AA 188 CD, që ka dalë nga rruga dhe ka përfunduar duke u përplasur me një bordurë.
Makina sapo ishte marrë nga servisi dhe pronari i saj po e testonte atë në rrugë. Në makinë bashkë me të ishte edhe xheneriku i servisit. Sipas policisë drejtuesi po i jepte makinës me shumë shpejtësi duke humbur kontrollin dhe dalë jashtë rruge.
I plagosur Silvjano Gjoza ndodhet në gjendje të rëndë për jetën, ndërsa 41-vjeçari ka marrë plagë më të lehta.
Ministrja e Infrastrukturës dhe Energjisë, Belinda Balluku ka marrë pjesë në përurimin e zyrave të reja të OSHEE në Korçë. Balluku i ka cilësuar zyrat si një investim që plotëson kushtet dhe standardet si për punonjësit ashtu edhe për qytetarët. Rritjen e cilësisë së punës tha Balluku do ta bëjë edhe më e lehtë arritjen e objektivave të vendosura.
Zyrat e reja janë një investim prej 60 milionë lekësh nga OSHEE dhe i përfshin të gjitha shërbimet në një godinë të vetme duke bërë që qytetarët të evitojë lëvizjet nëpër disa zyra.
“Është një investim 60 milionë lekësh i OSHEE-së, dhe çfarë është më e rëndësishme, sot të gjithë punonjësit e këtij rajonit, dhe Agjencisë që mbulon Korçën dhe Agjencinë Rajonale, janë në kushte optimale kështu që ne presim nga ana e tyre që rendimenti të jetë akoma dhe më i lartë dhe të arrihen objektivat e vendosura”. – tha Balluku
Ministrja Balluku shtoi se shumë shpejt do të bëhet edhe instalimi i sistemit të ndjekjes së proceseve teknike kudo në rajonin e Korçës, ashtu siç bëhet në Tiranë.
“Presim që shpejti të ketë edhe instalimin e SCADA-ës, pjesës teknologjike të ndjekës së sistemeve, që është e instaluar si në qendër në Tiranë por dhe në disa qytete të tjera, që do të ndihmojë ndjekjen e proceseve teknike në rajonin e Korçës, i cili është një rajon shumë i rëndësishëm dhe që ka vëmendjen e qeverisë, qoftë për sa i përket zhvillimit industrial, atij turistik duke qenë se është një nga rajonet që përfshinë dy qytete të rëndësishme siç është Korça dhe Pogradeci, por dhe zona të tjera rurale të cilat kanë potencial të madh zhvillimi turistik, bujqësor dhe industrial.” – tha Balluku
Një person ka mbetur i vrarë me armë zjarri në banesën e tij në qytetin e Korçës. Ngjarja e rëndë mendohet se ka ndodhur pas një grabitje që i është bërë banesës së tij. Viktima, shtetasi Gëzim Nako, 57 vjeç, babai i dy fëmijëve, jetonte në Shtetet e Bashkuara të Amerikës dhe ishte kthyer në vendlindje vetëm dy ditë më parë, pasi kishte kaluar pushimet verore në Turqi me gjithë familjen.
Nako është gjetur pa jetë në banesën e tij, ndërsa policia ka konstatuar vrasjen me armë zjarri.
Sipas policisë dyshohet se disa persona kanë hyrë për të grabitur banesën e tij, në të cilën jetonte së bashku me bashkëshorten në lagjen numër 7 të Korçës.
Policia vijon hetimet për zbardhjen e plotë të ngjarjes dhe autorëve të krimit.
Gjykata e Korçës ka caktuar masën e sigurisë arrest me burg për 47-vjeçarin Olsi Belortaja, doganierin që mbrëmjen e 30 qershorit aksidentoi për vdekje dy gra dhe një fëmijë në aksin rrugor Kapshticë-Bilisht.
Sipas prokurorisë, e cila kërkoi arrest me burg për 47-vjeçarin, në 30 qershor 2019, rreth orës 18:30, Olsi Belortaja, ishte duke qarkulluar me automjetin e tij të markës Benz me targë KO 775 0B në rrugën nacionale Kapshticë-Bilisht. Në një pjesë të kësaj rruge, konkretisht në kryqëzimin e saj me rrugën e fshatit Kapshticë, ishin duke ecur në këmbë Anjeza Gani, Valmira Çuko, të cilat me vete kishin dhe fëmijën Semi Çuko.
Në atë kryqëzim, automjeti i drejtuar nga Olsi Belortaja ka humbur kontrollin dhe ka goditur këmbësorët. Anjeza Gani dhe Valmira Çuko kanë ndërruar jetë menjëherë pas aksidentit, ndërsa fëmija Semi Çuko, është dërguar në spital në gjendje të rëndë, por më pas ka ndërruar jetë në një spital në Tiranë. Menjëherë pas aksidentit Olsi Belortaja është larguar nga vendi i ngjarjes dhe më pas është kapur në afërsi të fshatit Zëmblak nga punonjësit e Policisë Gjyqësore. Prokuroria tha se doganieri, i cili shkaktoi aksidentin ishte në gjendje të dehur në momentin e aksidentit.
Një ngjarje tragjike ka ndodhur gjatë mbrëmjes së të dielës në aksin rrugor Korçë-Kapshticë. Një makinë tip “ML” me drejtues shtetasin O.B, 47 vjeç, ka aksidentuar 3 kalimtarë në rrugë.
Përplasja ka qenë e fortë, ku dy femra përkatësisht A.G, 32 vjeçe dhe V.Ç, 34 vjeçe, banuese në Kapshticë, kanë gjetur vdekjen e menjëhershme, ndërsa një fëmijë i vogël, i cili ndodhej me dy viktimat, është transportuar në gjendje të rëndë drejt Spitalit të Korçës.
Drejtuesi i mjetit është arrestuar nga policia, ndërsa rezulton se po drejtonte mjetin në gjendje të dehur.
Korça vijon të lëkundet sërish. Një tërmet me magnitudë 3.6 të shkallës Rihter, ka tronditur rreth orës 14:44 të ditës së premte. Epiqendra e tërmetit ka qenë 4 km në lindje të fshatit Nikolicë.
Pak orë më vonë është ndjerë edhe një lëkundje tjetër më e fortë. Lëkundja e dytë ka qenë në orën 16:36 me magnitudë 3.9 , 14 km në jug të Korçës.
Nuk raportohet që të ketë dëme materiale apo të plagosur nga dy tërmetet e rëna gjatë ditës së premte.
Korça në fillim të qershorit është tronditur nga disa tërmete të forta, që çuan në dëme të mëdha materiale sidomos në fshatin Floq dhe Qafzezë.