Do vrisnin Thaçin e Veselin, dënohet grupi “Syri i Popullit”

Gjykata Themelore në Prishtinë ka shpallur fajtorë të akuzuarit në rastin e njohuri si “Syri i Popullit”. Të akuzuarit janë shpallur fajtorë për përgatitje të veprave terroriste. Sipas Gjykatës të akuzuarit planifikimin vrasjen e shumë zyrtarëve të lartë në Kosovë, duke përfshirë presidentin Hashim Thaçi dhe ish-kryetarin e Kuvendit Kadri Veseli.


Sadri Ramabaja, është dënuar me 5 vite burgim, Avni Llumnica, me dënim unik prej 12 vjetësh burgim, Ragip Sallova me 4 vjet burgim, Behxhet Luzha me 2 vjet burgim, Halim Halimi me 3 vjet burgim, Bajrush Konjusha me 3 vjet burgim ndërsa i akuzuari tjetër, Rexhep Topllana me 2 vjet burgim. Të dënuarve gjykata ua ka njohur kohën sa kanë qëndruar në paraburgim. Ndërsa, për Murat Jasharin i cili kreu tentim-vrasje ndaj avokatit Azem Vllasi, Gjykata vendosi që ta dërgojë atë në 10 vjet ndalesë në institucione shëndetësore për shkak të gjendjes së tij psikike.

Çfarë është “Syri i Popullit”?

Emri i organizatës “Syri i Popullit” u bë i njohur më 12 mars të vitit 2017, kur në orët e hershme të atij mëngjesi, Murat Jashari një aktivist politik i viteve të 90-ta, trokiti në derën e banesës së avokatit Azem Vllasi në Prishtinë, për ta vrarë atë. Pak sekonda pasi Vallasi hapi derën, Murat Jashari shkrepi armë zjarri duke tentuar që ta vriste Vllasin.

Pas pak kohësh nisën arrestimet e para ku pos Murat Jasharit që kreu tentim-vrasjen u arrestua edhe Avi Llumnica. Këta dy persona u arrestuan nën akuzat se ishin pjesëtarë të organizatës “Syri i Popullit”, e cila mori përgjegjësinë për tentim-vrasjen e Azem Vllasit. Hetuesia zgjeroi hetimet duke arrestuar edhe persona të tjerë si Bajrush Konjusha, Ragip Sallova, Sadri Ramabaja, Rexhep Topllana, Sabit Berisha, Halim Halimi, Bexhet Luzha dhe Lirije Luzha.

Arrestimi më i bujshëm sa i takon pjesëtarëve të kësaj organizate ishte ai i pjesëtarit të Lëvizjes Vetëvendosje, Sadri Ramabaja, arrestimi i të cilit ndodhi më 7 tetor të vitit 2017. Ramabja u arrestua në portin e Durrësit në Shqipëri derisa tentonte që të largohej nga ky vend me pasaportë dhe leje-qëndrimi të falsifikuar franceze, kishin njoftuar autoritetet e Shqipërisë.

Gjatë seancave gjyqësore në këtë proces, Ramabaja ishte i zëshëm në kundërshtimin e akuzave me të cilat ai ngarkohej duke thënë se rasti ishte i montuar politikisht me qëllim të eliminimit të tij nga skena publike. Kush është Azem Vllasi, viktima e parë e organizatës “Syri i Popullit”?

Azem Vllasi ishte ndër politikanët më me ndikim në vitet e 80-ta në Kosovë. Vllasi ishte funksionar i lartë në kohën e ish-Jugosllavisë, derisa drejtoi atë që njihej si Krahina Autonome e Kosovës. Ai u shkarkua nga kjo pozitë në kohën e regjimit të Sllobodan Millosheviqit, kur u hoq autonomia e Kosovës.

Në vitin 1989 Vllasi u arrestua duke u shndërruar në person të burgosur politik. Një vit më vonë Vllasi u lirua nga burgu. Pas përfundimit të luftës së viteve “98-99”, Vllasi sërish mbajti disa pozita në kuadër të institucioneve të Kosovës. Fillimisht ishte këshilltar i ish-kryeministrit Bajram Kosumi, ndërsa më vonë në kuadër të Qeverisë së Kosovës, u emërua këshilltar për bisedimet me Serbinë.

Viteve të fundit Vllasi punon si avokat, ndërkohë që në opinion njihet edhe si analist politik. Prokuroria akuzoi “Syrin e Popullit” se planifikonte vrasjen e figurave politike Në një dokument prej më shumë se 70 faqesh, Prokuroria Speciale e Kosovës akuzonte organizatën “Syri i Popullit” se planifikonte veprimtari terroriste në Kosovë. Sipas aktakuzës, pjesëtarët e kësaj organizate po planifikonin shkatërrimin e strukturave themelore politike, kushtetuese, ekonomike apo shoqërore të shtetit të Kosovës.

Prokuroria pretendonte se pjesëtarët e organizatës “Syri i Popullit”, synonin që të arrinin qëllimet e tyre përmes sulmeve dhe me vrasjes së personaliteteve më të larta shtetërore duke u nisur nga ish-funksionarët e lartë të Kosovës që kishin qenë aktiv nga viti 1980 deri më 1991, duke i konsideruar ata si tradhtarë të vendit.

Sipas Prokurorisë Speciale të Kosovës, “Syri i Popullit”, po ashtu planifikonte vrasjen e disa prej funksionarëve që kishin mbajtur dhe mbanin pozita udhëheqëse nga viti 1999 deri në vitin 2016. Në aktakuzë thuhet se në listë për t’u vrarë nga kjo organizatë ishin edhe shumë emra të tjerë, si Hashim Thaçi, Kadri Veseli, Isa Mustafa, Fatmir Limaj, Xhavit Haliti si dhe shumë të tjerë që nga kjo organizatë konsideroheshin tradhtarë që duhej eliminuar.

Prokuroria Speciale: “Syri i Popullit” kishte strukturë dhe planifikim

Aktakuza e Prokurorisë Speciale, shpjegonte se organizata “Syri i Popullit” kishte logon, vulat dhe betimet, të cilat kryheshin para flamurit kombëtar dhe fotografisë së ish-komandantit të Ushtrisë Çlirimtare të Kosovë, Adem Jasharit.

Prokuroria pretendonte se organizata kishte dy grupe të njohura si “Grupi Gueril” dhe “Grupi i Dajakut”. Ndërsa sa i takon financimit, sipas Prokurorisë Speciale të Kosovës, veprimtarët e kësaj organizate do të kishin rroga mujore, derisa financimi do të bëhej nga afaristët vendorë si dhe nga mërgata në kohën sa do të krijoheshin rrethanat.

Thaçi e Veseli: Kurti e Konjufca janë pjesëtarë të organizatës “Syri i Popullit”

Në procesin gjyqësor për rastin “Syri i Popullit dëshmuan edhe presidenti i Kosovës Hashim Thaçi si dhe kryetari i Partisë Demokratike të Kosovës, Kadri Veseli. Gjatë dëshmisë para gjykatës, që të dy, si Thaçi ashtu edhe Veseli, i kishin përmendur dy drejtuesit e Vetëvendosjes, Albin Kurtin e Glauk Konjufcën, se qëndrojnë prapa organizatës “Syri i Popullit”.

Si reagim ndaj deklaratës së Thaçit e Veselit, drejtuesi i Vetëvendosjes Albin Kurti si dhe Glauk Konjucfa dorëzuan kallëzim penal për lajmërim apo kallëzim të rremë. Kurti dhe Konjufca pretendojnë se Thaçi e Veseli, nën betim më datën 28 dhjetor të vitit 2018, në procesin gjyqësor ndaj të ashtuquajturës organizata “Syri i Popullit”, kanë deklaruar se dy anëtarët e Vetëvendosjes, Kurti dhe Konjucfa janë pjesë e kësaj organizate. /REL/

Kosovë, lirohen të akuzuarit në rastin “pronto”

Gjykata Themelore në Prishtinë liroi të premten 11 personat e akuzuar për përfshirje në një skandal përgjimesh telefonike, që u bë i njohur si rasti “pronto”, për shkak të përdorimit të kësaj fjale gjatë komunikimeve.


Pjesë e këtij rasti ishin ish ministra dhe ish deputetë, si dhe zyrtarë të lartë të institucioneve të Kosovës të cilët sipas prokurorisë, ngarkoheshin për kryerjen e veprës penale “shkelja e statusit të barabartë të shtetasve dhe banorëve të Republikës së Kosovës”.

“Trupi gjykues shpall këtë aktgjykim ndaj të pandehurve Adem Grabovci, Arbenita Pajaziti, Ilhami Gashi, Besim Beqaj, Njazi Kryeziu, Zenun Pajaziti, Fatmir Shurdhaj, Sedat Gashi, Ismet Neziri, Xhavit Dakaj, Rexhë Abazi. Në emër të popullit në kuptim të dispozitave të nenit 364 të paragrafit 1 dhe nënparagrafi 1 pika 3 lirohen nga akuzat për veprat penale për të cilat janë akuzuar sipas aktakuzës së prokurorisë speciale të republikës së Kosovës sepse nuk është provuar që të akuzuarit kanë kryer vepër penale për të cilën akuzohen”, tha gjyqtari Shasivar Hoti, duke lexuar aktvendimin e Gjykatës Themelore të Prishtinës.

Avokati i ish ministrit Besim Beqaj, Besnik Berisha, tha se gjykimi që filloi si rezultat i një trysnie publike pati një përfundim të merituar.

“Nocioni “Pronto” nuk ka qenë i përdorur nga një nga këta që ishin pjesë e gjykimit, njëkohësisht diskutimet tjera që ishin lidhur me eprorët e asaj kohe qoftë të Kuvendit qoftë të qeverisë, prokuroria nuk ka pas guxim që as si dëshmitar t’i ftoj, se leje mo me provu që t’i akuzoj dhe vet ky fakt e dëshmon që kjo prokurori mund të quhet këtu e dështuar për shumë sikurse raste tjera e kapur ose e ngulfatur, si të doni”, tha avokati Berisha.

Ndaj vendimit të gjykatës reagoi deputetja e lëvizjes Vetëvendosje, Albulena Haxhiu e cila tha se aktgjykimi lirues për të akuzuarit e aferës “Pronto” është goditje e rëndë për shtetin e së drejtës. “Aktgjykimi i sotëm është vula e shtetit të kapur. Është aktgjykim që thërret për angazhim deri në ç’kapjen e shtetit andaj nuk ka kohë për të humbur sepse është nevojë urgjente krijimi i qeverisë së re”, shkroi ajo.

Drejtori i Institutit të Kosovës për Drejtësi, Ehat Miftaraj kritikoi prokurorinë e Shtetit për siç tha nisjen e këtij procesi me qëllim për të dështuar.

Ngritja e aktakuzës në prill të vitit 2018, pasoi një periudhë të gjatë hetimesh që zunë fill me hapjen e tyre më 26 gusht të vitit 2016 ndaj ish deputetit të Partisë Demokratike, Adem Grabovci.

Hetimet kundër tij atëbotë pasuan publikimin e përgjimeve të bisedave në gazetën në internet “Insajderi”, ku shfaqet ndikimi i ushtruar nga ai dhe zyrtarë të tjerë të Partisë Demokratike të Kosovës në emërimet në postet qeveritare, në drejtësi, media dhe në polici.

Përgjimet janë kryer gjatë muajve të fundvitit 2011 dhe në fillim të vitit 2012 në kuadër të hetimeve që kryheshin atëbotë në ish Ministrinë e Transportit, ku subjekt i përgjimeve, me autorizimin e prokurorit të EULEX-it, ishte edhe Adem Grabovci./VOA/

Osmani: Dështimi i marrëveshjes do të ishte “gabim historik”

Vjosa Osmani, nënkryetarja e Lidhjes Demokratike të Kosovës, e cilëson gabim historik mosarritjen e një marrëveshje për krijimin e qeverisë me Lëvizjen Vetëvendosje. Në një deklaratë për mediat në Kosovë, Osmani është shprehur se të hënën do të diskutohet në kryesinë e LDK për të parë qëndrimin rreth situatës së krijuar me krijimin e qeverisë.


 “Pas zhvillimeve të 26 dhjetorit ka qenë nevoja që organet e LDK-së të mblidhen edhe një herë. Këto takime kanë qenë të parapara për të premten por janë shtyrë për të hënën për shkak të arsyeve teknike dhe një numër i deputetëve nuk janë në Kosovë. Të hënën do të diskutojmë këto rrethana të reja për të parë se cili është qëndrimi i kryesisë dhe deputetëve të cilët kanë marrë legjitimitetin qytetar. Pasi t’i dëgjojmë qëndrimet e tyre do të shohim se si do të procedohet më tutje”, ka thënë ajo.

Megjithatë, ajo shton se nëse marrëveshja dështon do të ishte një gabim historik për Kosovën. “Nuk mund të flas se cili do të jetë qëndrimi i ri. Por mendoj se do të ishte gabim historik për vendin nëse nuk do të ketë marrëveshje me Vetëvendosjen. Si bartëse e listës e LDK-së dhe përfaqësuese e votuesve, e kam për detyrë që ta dërgoj vullnetin qytetar deri në fund. Do të insistoj deri në fund”, shtoi Osmani.

Gjatë ditëve të fundvitit, përfaqësuesve të dy partive në Kosovë është shprehur Osmani. Sipas saj takimet e reja do të vijojnë pas të hënës, kur të përcaktohet qëndrimin i LDK. “Nuk janë takuar, pas takimit të të hënës pasi t’i përcaktojmë qëndrimet tona atëherë do të ketë takime të reja dhe të shohim se si do të procedohet. Nuk dua të paragjykoj e rëndësishme është që marrëveshja të arrihet dhe nuk kam mirëkuptim ndaj kujtdo qoftë që krijon pengesa ndaj vullnetit qytetar. Të krijohet besimi dhe të krijojmë një atmosferë më të mirë të komunikimit dhe bashkëpunimit që t’i hapet rrugë marrëveshjes”, tha Vjosa Osmani.

Kosovë, banorët zgjohen dhe gjejnë makinat në gropë

Banorët e Prishtinës kanë pasur një zgjim jo si gjithë të tjetër mëngjesin e të dielës. Shkak është bërë një zonë në ndërtim në të cilën është hapur një gropë e madhe për të hedhur themelet e objektit. Megjithatë për shkak të rrëshqitjeve të dherave, makinat e parkuara anës rrugës kanë përfunduar në këtë gropë.


Ngjarja ka ndodhur në rrugën “Bedri Gjini” në Prishtinë, ndërsa qytetarët shprehen të shqetësuar pasi madhësia e gropës që shkon deri në 7 metra e gjatë dhe më shumë se një metër e gjerë. Gjithashtu probleme janë shfaqur edhe me rrjetin e ujësjellësit, ku ka pasur dëmtim të tij.

Kurti: O unë kryeministër, ose zgjedhje të reja

Kryeministri i ri i dalë nga zgjedhjet e parakohshme të 6 tetorit në Kosovë, Albin Kurti tha se sheh vetëm LDK-në si pjesë të koalicionit për të formuar qeverinë dhe nëse kjo marrëveshje nuk arrihet atëherë do të ketë zgjedhje të tjera. Albin Kurti, i ftuar në emisionin “Real Story” të gazetarit Sokol Balla në News 24, tha se Kryeministër do të jetë ai dhe në qeveri Vetëvendosja, ose vendi do të hyjë sërish në zgjedhje.


Është destin i yni që ne të qeverisim bashkë me LDK. Nuk ka mundësi tjetër. Ose Vetëvendosje në Qeveri dhe unë Kryeministër i ri, ose zgjedhje të parakohshme. Unë nuk kam frikë nga zgjedhjet. ” tha Kurti, i cili shtoi se ka një bashkëpunim shumë të mirë me LDK-në, e ka pasur që në opozitë dhe shpreson që ta reflektojë edhe në qeverisje. Ai shpreson se do të bëjnë një harmonizim të programeve të tyre për të formuar një koalicion të mirë qeverisës.

Në lidhje me Vjosa Osmanin Kurti shprehu vlerësimet e tij, por tha se ende nuk është arritur një dakordësi për ndarjen e posteve qeverisëse.

Kandidatura dhe fushata e Vjosa Osmanit i ka inkurajuar shumë vajza që të merren me politikë.  E falenderoj për këtë dhe dua të bashkëpunoj me të në çdo kapacitet që ajo dëshiron. Nuk kemi ende një harmonizim të programeve për të ndarë dhe detyrat e posteve qeverisëse. Me LDK-në deri më tani kemi dakordësuar që të kemi 12 ministri, që të kemi vetëm një ministër serb dhe që të kemi 30%  gra.” tha Kurti  / Real Story

Kosovë, Kurti-Osmani arrijnë paktin për qeverinë e re

Kosova arrit marrëveshjen për të krijuar një qeveri të re mes Lëvizjes Vetëvendosje dhe LDK-së. Albin Kurti dhe Vjosa Osmani zhvilluan takimin, ku u dakordësuan të krijoni një qeveri së bashku, më të tkurrur në numër ministrash, por me produktive në punë. Nuk është bërë ende një ndarje e posteve pasi marrëveshja finale pritet të kryhet pasi të mbarojë numërimi i votave në 303 qendra votimi dhe shpallja e rezultati final nga KQZ-ja.


Vjosa Osmani tha se të dy partitë treguan një vullnet të mirë për të krijuar një qeveri së bashku, por po presim numërimin e të gjithë votave për të arritur marrëveshjen finale.

“Ne sapo zhvilluam takimin për diskutuar bashkëpunimin pas një procesi të mirë. Kemi diskutuar në nivel parimeve. Të dy partitë treguan vullnetin e mirë për të qeverisur bashkë. Ka disa gjëra me të cilat filluam diskutimeve, sa i përket një qeverie që do të reduktohet sa i përket numrit të ministrive, por do të rritet sa i përket punës së mirë që do të bëhet. Iu mbetet partive që diskutohen për detajet. Po presim edhe numërimin e të gjitha votave, para se ta arrijmë marrëveshjen finale. Ka vullnet të mirë në të dy partitë”, ka thënë Osmani.

Albin Kurti tha se dy partitë Vetëvendosja dhe LDK-ja do të ulen për të harmonizuar programet. Ai theksoi se qeveria e re do të jetë më e vogël dhe se 30 % e saj do të jetë nga femrat.

“Pazare politike keni parë me PAN-in. Transparencë do të ketë qeveria e re. Natyrisht që Kosova ka humbur shumë kohë, dhe pritjet e qytetarëve janë shumë të larta. Dhe pa humbur kohë në filluam bisedimet duke u nisur me idenë e përbashkët për Qeveri sa më efikase dhe shtet sa më të fuqishëm. Ne duam që ti dalim zot nevojave të qytetarëve dhe ta orientojmë shtetin nga zhvillimi e demokracia.

U dakordësua, që të kemi një qeveri prej 30 për qind të përfaqësimit gjinor minimalisht do të jenë 30 për qind gra edhe në mesin e ministrave dhe zëvendësministrave. Do të kemi shumë më pak ministri e shumë më pak zëvendësministra. Ekipet tona do të takohen për të harmonizuar programet e projektet tona. Ne kemi diskutuar se si do t’i zvogëlojmë bashkojmë përgjegjësitë në kabinetin qeveritar. Porsa ta kemi rezultatin konkret  ne do të ju njoftojmë për emrat e përveçqë në qeverinë e ardhshme” tha Kurti

Mero Baze: Leksionet Kosovare, që s’vlejnë për ne

Nga Mero Baze


Ka një entuziazëm fals për disa aspekte të zgjedhjeve në Kosovë, siç është numërimi i shpejtë i votave, (në fakt jo dhe aq i shpejtë se akoma s’kanë mbaruar), pranimi i humbjes nga partia në pushtet,  mungesa e incidenteve, apo sistemi elektoral.

Krahasuar me zgjedhjet e fundit në Shqipëri, numërimi i shpejtë i votave bie vërtetë në sy për mirë, por problemi nuk është as te KQZ e Shqipërisë, as te ndonjë mekanizëm vjedhjeje, por te një ndryshim dramatik i ligjit elektoral në zgjedhjet e vitit 2003, i cili imponon numërimin në qendër të KZAZ, të gjithë qendrave të votimit.

Ndryshimi u bë pas këmbënguljes dhe vetos së Sali Berishës në reformën e atëhershme zgjedhore, pasi kishte pretendimin, se votat që numërohen në qendrën e votimit, siç numërohen në gjithë botën, janë nën presion dhe mund të vidhen.

Në rrethant e zgjedhjeve të Ilir Metës të vitit 2001, që ishin të dhunshme dhe ku u përdorën policë e banditë për t’i vjedhur votat, kërkesa kishte kuptim.

Në vitin 2019 është një situatë krejt tjetër. Votat mund të  numërohen lirshëm në çdo qendër votimi dhe Shqipëria në orën 20:30 ka rezultatin e votimit në gjithë vendin. Nuk ka nevojë për numërues, nuk ka nevojë për para shtesë, por për pak komisionerë dhe nga një smartphone në çdo qendër votimi që raporton.

E ka pasur këtë më 91, 92, 94 , 96, 97, 2000 e 2001. Prandaj këta të habiturit nga përfundimi i shpejtë i zgjedhjeve në Kosovë, që në fakt akoma s’kanë mbaruar, duhet të shikojnë arsyen pse ndodh kjo, dhe jo të bëjnë hartime patetike duke krahasuar dy sisteme, që nuk janë të njëjta.

Mungesa e incidenteve në këto zgjedhje në Kosovë ishte vërtetë arritje dhe kjo ka ardhur nga fakti, se gara ishte e copëzuar, kishte shumë parti që garuan vetëm dhe nuk kishte protagonizëm blloqesh të sigurta.

Në zgjedhjet e mëparshme në Kosovë ka pasur “vjedhje industriale” votash, siç i ka përshkruar ambasadori amerikan zgjedhjet e vitit 2012, apo incidente pa fund më 2017, pasi blloqet politike ishin të pozicionuara mes tre palëve. Në këto zgjedhje Vetëvendosja ishte vetëm, LDK vetëm, dhe ish-partitë në pushtet në tre pjesë.

Nëse do të kishim koalicionet parazgjedhore të vitit 2017, siç ishte PAN, zgjedhjet do kishin tjetër rezultat. Me aq vota sa kanë marrë partitë e ish PAN, sot do kishin marrë 37 për qind dhe do ishin fituese të zgjedhjeve. Ndarja e tyre në tre pjesë ka ulur PDK në 22 për qind dhe ka lënë parti të parë Vetëvendosjen, e cila po ashtu ka rënë me 2 për qind nga 2017. E vetmja parti që është rritur në këto zgjedhje është LDK, falë Vjosa Osmanit.

Mungesa e përballjes së koalicioneve të forta e ka bërë më qytetare fushatën, pasi dhe protagonizmi ka qenë shumë i shpërndarë në disa parti.

Lidhur me pranimin e rezultatit e vetmja shenjë ishte deklarata e Kadri Veselit dhe Haradinajt për pranimin e humbjes, por nuk është se kanë pasur ndonjë mundësi tjetër. Në rastin e Haradinajt, kur merr 10 për qind, nuk ke çfarë pret të kontestosh.

Në rastin e Veselit deklarata ishte një shenjë ç’tensionuese, por ishte personale dhe jo e PDK. Partia e tij PDK, nuk e pranoi rezultatin dhe kërkoi rinumërim kombëtar të votave, pasi diferenca 3 për qind me fituesin, i ka futur në dyshime për manipulime. Kërkesa i është hedhur poshtë nga Paneli zgjedhor për ankesa.

Pra dhe në këtë rast nuk është se kemi ndonjë pranim të rezultatit me aq dëshirë.

Në Shqipëri kultura e mospranimit të rezultatit është kulturë e Sali Berishës. Ai nuk ka njohur asnjë palë zgjedhje që ka humbur, ndërsa Edi Rama ka njhur dhe zgjedhjet që ia vodhën live në TV me dhjetë vota. Sali Berisha nuk ka njohur as referendumin për kushtetutën e vitit 1998, që më vonë e “mbronte”. Por dhe ky nuk është se ka shqetësuar njeri me këtë zakon, pasi është shumë i llogaritur në këtë pikë. Të gjithë e dinë që nuk e pranon humbjen dhe aq. Ai ka pas qenë zemëruar keq me Besnik Mustafaj dhe Sokol Olldashin që pranuan me mendje të tyre humbjen me Ramën dhe u ka mbajtur qëndrim për këtë. Biles tani siç e shikoni nuk pranon as humbjen e Lulit me mandatet që dogji dhe e ka shpallur fitore, shkatërrimin e PD.

E vetmja gjë që duhet diskutuar me përgjegjshmëri nga përvoja e Kosovës, është sistemi zgjedhor.

Kosova ka propocional kombëtar, me preferencë për 5 kandidatë. Pra nuk janë lista të hapura, por preferenciale. Ti ke të drejtë të zgjedhësh pesë më të mirët, nga 100 që ka lista.

Greqia ka sistem më afër natyrës sonë, pra një sistem propocional rajonal, me preferencë, por me një “primë” për partinë fituese, që merr mbi 29 për qind, duke e çuar në 50 për qind. Sistemi grek është sistem antikrizë, që nuk të lë në duar të partive gjobvënëse, dhe që respekton fituesin. Ai është më afër realitetit shqiptar dhe ka funksionuar prej tre dekadash. Listat tërësisht të hapura, në një sistem propocional kombëtar, siç kërkojnë disa parti të vogla, është derë e hapur për çdo biznesmen apo bandit që mund të sigurojë aq vota, sa për vete duke u kthyer pastaj në faktorë politikë.

Nëse ka sistem kombëtar propocional, duhet deomos të ketë një “primë” për të çliruar fituesin nga gjobvënësit e vegjël. Në të kundërt, ky sistem që është, me preferencë deri në pesë përqind të listës  për çdo qark, do ishte i mjaftueshëm.

Për mua më rëndësi ka aspeti teknik i reformës, numërimi i shpejtë në qendër votimi, depolitizimi i komisioneve duke vendosur nëpunës publikë, si për shembull 3 mësues në çdo KZV dhe tre gjyqtarë në KZAZ dhe kështu partitë shpëtojnë nga shpenzime dhe stresi i komisionerëve. Një përpjekje për numërim elektronik do të ishte dhe më e mirëpritur, por dhe numërimi me dorë në qendra votimi e zgjidh situatën.

Shqipëria i ka pasur të gjitha sistemet zgjedhore. Më 31 Mars të 1991, e kemi nisur me mazhoritar të pastër, kemi vazhduar me mazhoritar me korrektim propocional, pastaj me korektim mazhoritar, e në fund me sistem propocional rajonal. I kemi provuar të gjithë leksionet e sistemeve dhe nuk na e ka fajin sistemi, por kultura politike brenda partive, mungesa e demokracisë brenda tyre, dhe pamundësia për të reformuar partitë që janë teknikisht të gjitha të paligjshme pasi në fillim kanë vjedhur zgjedhjet e tyre, pastaj votat e popullit. E para gjë që duhet bërë këtu, është që zgjedhjet brenda partive t’i bëjë KQZ dhe t’i certifikojë gjykata.

Nga këtu mund të fillojë një revolucion i ri, pasi do të zgjohet gara e vërtetë brenda partive dhe nuk mund të bëhen zgjedhje si ato Basha-Olldashi, ku fletët ishin me numër rendor për të identfikuar votën, listat në dorë të Bashës, dhe numëruesit badigardë të Berishës. Nuk mund të ketë demokraci dhe zgjedhje të lira në Shqipëri, pa demokraci dhe zgjedhje të lira në partitë shqiptare, ku kryetarët nuk humbasin prej 30 vitesh dhe ankohen pastaj për sistemet zgjedhore.

Mediat e huaja: Politikanët e rinj mundën gjeneratën e vjetër

Zgjedhjet në Kosovë tërhoqën vëmendjen edhe të mediave të huaja, duke pasqyruar rokadën që krijoi opozita, e cila doli fituese, ndërsa politika e vjetër për herë të parë doli në opozitë pas më shumë se një dekadë.


“Partitë e opozitës pretendojnë numrin më të madh të votave në zgjedhjet e përgjithshme të Kosovës. Vetëvendosja parti e qendrës së majtë dhe Lidhja Demokratike parti e qendrës së djathtë (LDK) pritet që secili të fitojë rreth 25% të votave. Të dy palët premtojnë të trajtojnë papunësinë dhe të luftojnë krimin dhe korrupsionin. Kreu i Vetëvendosjes, Albin Kurti tha se do të “trokiste në derën e LDK” të hënën për të filluar negociatat.” shkruan ndër të tjera BBC në artikullin e saj.

Ndërsa Deutche Welle, në edicionin e saj në gjuhën serbe, në një artikull me titull “Zotërinjtë e Luftës mposhten bindshëm”, i bën jehonë suksesit paraprak të opozitës në Prishtinë. DW thotë se kjo është hera e parë që qeveria e re do të mund të projektohet pa politikanët që kanë qenë pjesë e UÇK-së.

Ndërkohë, “Euronews” ka shkruar se mes shqetësimeve më të mëdha të vendit janë korrupsioni i rrënjosur thellë dhe një marrëveshje paqeje me Serbinë që mund të shtrojë rrugën për një anëtarësim të Kosovës në OKB. “Sipas sondazheve, pakënaqësia publike me arritjet e Haradinajt në krye të koalicionit trepalësh ka rritur mbështetjen për partitë opozitare”.

“Vetëvendosja” fiton! Albin Kurti kryeministër, ftesë LDK-së për koalicion

Lëvizja Vetëvendosja me në krye Albin Kurtin kryeson zgjedhjet në Kosovë duke u bërë kështu kryeministri i ardhshëm i vendit. KQZ njofton se janë numëruar 95,79 % të votave, apo 2442 vendvotime nga 2547 që janë gjithsej.


Nga votat e numëruara kryeson LVV me 25,05%  ose 197,966 vota dhe më pas vjen LDK, me një rezultat të ngushtë 25,05%, apo 192,300 vota.

Në vend të tretë është renduar partia e Kadri Veselit PDK me 21.15 %  ose 162,342 vota. Ndërsa Ramush Haradinaj pësoi një humbje të thellë duke u rendur në vend të katër me 11,63% ose 89,287 vota nga koalicioni i AAK dhe PSD.

Kreu i Vetëvendosjes Albin Kurti ka pranuar rolin e tij si kryeministër i Kosovës, ndërsa deklaroi se do i bëj ftesë LDK-së për të krijuar koalicionin qeverisës. Gjatë fjalës së tij para mbështetëse dhe qytetarëve në sheshin e Prishtinës, Kurti premtoi se do krijoj një qeveri të qëndrueshme dhe do të mbajë të gjitha premtimet e dhëna. Kurti përgëzoi edhe rivalen  e tij, kandidaten e LDK-së, Vjosa Osmani për fushatën që ka bërë, dhe shtoi se ajo dha një model për shumë gra dhe vajza shqiptar.

Sigurisht se ne gjithmonë i kemi konsideruar LDK-në si partnerë në opozitë. Kemi bërë hapa të bashkërenduar. Fatkeqësisht nuk arritëm ta shndërrojmë në projekt të përbashkët si deshëm. Së bashku do t’i kemi 60 deputetë. Unë si kryeministër i ardhshëm i Republikës së Kosovës preferoj një qeveri stabile dhe patjetër e shoh si partnerë LDK-në. Nesër do ta ftoj LDK-në për të krijuar koalicionin.”- tha Kurti.

Partië e tjera PDK dhe AAK pranuan humbjen dhe daljen e tyre në opozitë duke vlerësuar procesin e zgjedhjeve për frymën demokratike që mbajti.

Veseli pranoi humbjen dhe tha se “PDK ka një rol të ri pas 12-vjetësh atë të opozitës”, ndërsa Ramush Haradinaj u shpreh se “bëri mirë që dha dorëheqjen  dhe se vendimi i tij për t’ia kthyer sovranit vendimmarrjen, u vërtetua që ishte veprim i drejtë.”

Zgjedhjet demokratike në vend u vlerësuan si nga politikanët e Kosovës, duke e njohur si meritë të të gjithë partive, ashtu edhe nga ndërkombëtarët për mbarëvajtjen e një procesi të rregullt, të lirë dhe demokratik.

Kosovë, votuesja e veçantë

109 vjeçe dhe kërkon që të shpreh fjalën e saj përmes votës. Kjo është Xhemile Susuri, me origjinë nga Shqipëria. 109-vjeçarja është shfaqur e shoqëruar nga nipi në qendrat e votimit për të hedhur votën e saj.


Edhe pse e moshuar, Susuri nuk ka nguruar që në 6 tetor të japë kontributin e saj në këtë historik për vendin e Kosovës dhe të ardhmes së tij.

Prania e saj në votime, është mesazhi më i mirë që mund t’i jepet të gjithë qytetarëve dhe rinisë, që duhet të shkojnë të thonë fjalën e tyre përmes votës dhe të ndihmojnë në një të ardhme sa më të mirë të vendit.