Përvoja nga Tanzania në Irlandë, ambasadori i ri gjerman vjen në kulmin e krizës në Tiranë

Këtë të martë, Peter Zingraf ka dorëzuar letrat kredenciale te Presidenti Ilir Meta, duke marrë zyrtarisht detyrën si Ambasador i Gjermanisë në Shqipëri. Zingraf vjen në këtë detyrë për të zëvendësuar Susanne Schütz, që la detyrën pasi i mbaroi mandati në muajin korrik. Po kush është Peter Zingraf? Ambasada e Gjermanisë në Tiranë, ka publikuar të martën në faqen zyrtare në internet, një përshkrim të shkurtër të Peter Zingraf. Ambasadori Zingraf, ka studiuar për romanistikë, histori letërsie frënge dhe italiane në Agjen, Poiteiers në Francë dhe në Firence në Itali.

Ai ka punuar për disa kohë si bashkëpunëtor në universitetin e Aachen dhe Freiburg im Breisgau. Peter Zingraf është i martuar dhe ka dy vajza. Pjesë e politikës dhe diplomacisë, ai është bërë në vitin 1993 kur u bashkua me Shërbimin e Jashtëm, në Bonn, ku ndenji deri në vitin 1994. Në vitin 1995 ai ishte nëpunës i deleguar pranë Ministrisë së Jashtme në Itali, ndërs në vitin 1996 ai emërohet ambasador i Gjermanisë në Varshavë.

Në vitin 1999 ai rikthehet pranë Ministrisë së Jashtme Gjermane, duke u bërë pjesë Departamentit të Kulturës. Në vitin 2002 Peter Zingraf merr drejtimin e amabasdës gjermane në Daressalam në Tanzani. Në vitin 2005 ai rikthehet përsëri si i punësuar pranë Ministrisë së Jashtme Gjermane, ndërsa në vitin 2010, ai emërohet ambasador në Dublin të Irlandës. Në vitin 2013 rikthehet si këshilltar i Presidentit Federal, në departamentin e politikës së jashtme, ndërsa në 2016 rikthehet përsëri në Ministrinë e Jashme, detyrë që ka mbajtur deri në momentin që është emëruar amabasdor i Gjermanisë në Tiranë.

Duke u nisur nga CV e pasur, Gjermania duket se ka zgjedhur një personalitet në fushën e diplomacisë, për të bërë politikat e saj në Shqipëri. Vendi ynë është prej më shumë se gjysmë viti në një krizë të paprecedent politike, me Gjermaninë dhe vendet e tjera të Quintit, që kanë kërkuar vazhdimisht zgjidhjen e saj brenda kornizës ligjore.

Peter Zingraf vjen me një mision të vështirë, por të qartë në vendin tonë, mbështetjen për thellimin e reformave, dhe padyshim futjen e politikës në rrugën e zgjidhjes së krizës. Tashmë pritet që pas Gjermanisë, Senati në SHBA të miratojë kandidaturën e Yuri Kim, e përzgjedhur nga Donald Trump, (lexo këtu) si ambasadore e SHBA-së në Tiranë.

Kriza tutje, Basha “tëhu”

Në një kohë kur të gjithë ishin në pritje të kryetarit të PD-së Lulzim Basha për të folur rreth krizës politike që ka paralizuar vendin prej më shumë se 7 muajsh, ndodh krejt e kundërta. Asnjë fjalë për krizën, asnjë fjalë për dialogun dhe dhënien e ndonjë sinjali se mund të ketë një rrugë zgjidhje për ngërçin politik. Basha, i qetë në pamje dhe tonin e zërit të tij, doli në një deklaratë për mediat, duke folur me një gjuhë si të ishte Kryeministri i vendit, prezantoi ligje e programe që Partia Demokratike do të ndiqte sapo të vinte në pushtet (duke lënë të kuptohej se kjo do të ndodhte shumë shpejt).

Duke dënuar koncesionet e qeverisë me PPP-të, të cilat Basha i cilëson si afera korruptive, ai lajmëroi se do të kalojnë të gjitha në një proces auditimi dhe kontrolli. Madje Basha paralajmëroi se gjatë muajit shtator do të prezantohej edhe ligji që lufton krimin dhe pastrimin e parave. Ai tha se PD po punon me ekspertë të huaj për hartimin e një plani kombëtar për zhvillimin ekonomik dhe se do të organizojë një operacion dhe grup pune të posaçme për të gjurmuar paratë e vjedhura dhe të krimit.

“Në muajin shtator do të bëj të ditur në detaje planin tonë kombëtar kundër krimit dhe pastrimit të parave, i cili parashikon si hap të parë auditimin dhe hetimin e menjëhershëm pa asnjë përjashtim të të gjitha ndërtimeve dhe veprave publike të mbaruara, në proces apo të planifikuara. Ndërkohë, ka nisur hartimi i disa ligjeve për luftën kundër krimit dhe pastrimit të parave të krimit. Një paketë të tërë ligjore për deklarimin dhe kontrollin e aseteve të politikanëve dhe punonjësve publikë, e cila do të forcojë rregullat e deritanishme, e cila synon të pamundësojë investimin e të ardhurave nga krimi dhe korrupsioni në Shqipëri dhe jashtë Shqipërisë pa u hyrë gjemb në këmbë. Hetimi dhe auditimi do të ndjekë origjinën e parave të investuara si për ndërtimin e objekteve private, ashtu edhe për PPP-të apo koncesionet korruptive apo për blerjen e pasurive brenda dhe jashtë Shqipërisë. Ky hetim do të bëhet në bashkëpunim me shërbimet e specializuara ndërkomëbtare. Në këtë kuadër, Partia Demokratike ka marrë ekspertizë të huaj, të specializuar për hartimin e një programi të posaçëm për hetimin dhe rikuperimin e pasurive të tjerërsuara dhe të vjedhura te shqiptarëve. “- tha Basha

Në fakt një deklaratë e habitshme prej kreut të PD-së, të flasë për miratime ligjesh apo programe ekonomike, kur as nuk është më në parlament për t’i propozuar dhe votuar dhe as nuk ka asnjë lloj pushteti për t’i paraqitur ato për qytetarët. Madje këto programe nuk mundet dot t’i paraqes as si programe elektorale, pasi ai nuk është regjistruar në asnjë zgjedhje, as ato të 13 tetorit që presidenti Meta ia bëri si favor opozitës për të hyrë sërish në lojën politike dhe të shpëtonte PD nga vetasgjësimi (edhe pse kjo datë u rrëzua nga Kolegji Zgjedhor). Basha vijon të flasë për luftimin e krimit dhe zhvillimin ekonomik, por ende nuk ka në plan të zgjidhë çështjen kryesore për vendin, krizën politike dhe ofrimit të qytetarëve shqiptarë një stabilitet politik, ekonomik dhe mundësi zgjedhje në zgjedhjet e ardhshme. /realstory.al

Përçahet opozita? Vasili: Gati të ulemi me Ramën në tavolinë

Nënkryetar i Lëvizjes Socialiste për Integrim, Petrit Vasili ka deklaruar e është i gatshëm të ulet të diskutojë me Ramën për zgjidhjen e krizës pasi pasojat e saj po i vuan Shqipëria. Vasili tha se Rama është kryetar i PS dhe zgjidhja e krizës duhet të bëhet mes opozitës dhe PS. Vasili nuk përmendi se ky dialog do të zhvillohet me Ramën kryeministër apo jo, por thjeshtë e cilësoi atë si kryetarin e PS, postë të cilin ai e gëzon së bashku me atë të Kryeministrit.

“Edi Rama është kryetar i Partisë Socialiste dhe kriza do të zgjidhet mes opozitës dhe PS-së. Unë shpreh vullnetin tim që zgjidhja të marrë fund sepse pasojat e krizës i vuan Shqipëria dhe ekonomia e saj. Duhet rikthim i shtetit ligjor. Kriza e zgjatur del jashtë kontrollit dhe të dëmtuarit janë gjithmonë qytetarët”. – tha Vasili për A2 CNN.

Ky qëndrim është i ndryshëm nga ai i PD, ku Basha deklaron me forcë se nuk dialog me Ramën si Kryeministër. Megjithatë Vasili shtoi se kjo ulje në tryezë nuk do të thotë se LSI ka pikëpamje të ndryshme nga PD, pasi opozita kërkon zgjidhjen e krizës dhe mirëpret ndërmjetësimin e ndërkombëtarëve..

“Me PD-në nuk kemi pasur asnjë ndarje për çështje të mëdha të karakterit parimor. Mendojmë njëlloj që kriza duhet zgjidhur, ndërmjetësimi ndërkombëtar është i mirëpritur dhe në 13 tetor të shkojmë të mbajmë zgjedhje dhe t’i heqim damkën e votimeve vendit tonë”. – tha Vasili

Në fakt pas damkës së keqe që opozita mori me protesta e saj të dhunshme tek faktori ndërkombëtar, pas 30 qershorit është parë një ndryshimin i qëndrimit të saj në përpjeke për të rregulluar sërish marrëdhëniet. Edhe pse vazhdimisht kanë zhvilluar takime dhe kanë kërkuar ndërmjetësimin e tyre për të zhvilluar tryezën e dialogut në vend, duket se këtë herë i gjithë faktori ndërkombëtar është i vendosur dhe shprehet në një zë: Krizën zgjidheni brenda jush.

Kriza politike, FMN: Ngadalësoi ekonominë e Shqipërisë

Shefi i misionit të Fondit Monetar Ndërkombëtar për Shqipërinë është shprehur se kriza politike në Shqipëri në gjashtë mujorin e parë të këtij viti, ka ngadlësuar ritmin e ekonomisë në vend. Në një intervistë për “Zërin e Amerikës”, Jan Kees Martijn është shprehur se në kushtet që po kalon vendi, qytetarët dhe bizneset janë të prirur të redutojnë shpenzimet apo investimet.

“Në raportin tonë ne theksuam se Shqipëria po kalon një periudhë paqëndrueshmërie të lartë politike dhe jam i sigurtë që audienca juaj është në dijeni të ngjarjeve. Paqëndrueshmëria politike sjell ngadalësim të rritjes ekonomike. Familjet mund të shtyjnë shpenzimet e tyre pasi duan të kursejnë për një të ardhme të pasigurtë. Kompanitë mund të shtyjnë investimet e tyre derisa ta dinë çfarë do të ndodhë. Këto sjellin ngadalësimin e ekonomisë. Në këtë pikë nuk shohim në të dhënat që kemi se kjo ka ndodhur por ka padyshim rrezik”, është shprehur shefi i FMN-së.

Ndërkohë, për Jan Kees Martijn, qeveria shqiptare është vazhdimi i reformave ekonomike dhe zbatimin e masave kundër korrupsionit. “Këshilla jonë për qeverinë është të vazhdojë reformat ekonomike, veçanërisht reformat për forcimin e institucioneve, forcimin zbatimit të ligjit, reforma në drejtësi, zbatimin e fuqishëm të masave kundër korrupsionit dhe të gjitha këto do të sjellin minimizimin e efekteve të kësaj paqëndrueshmërie politike”.

Lidhur me një nga akuzat e shpeshta të opozitës, se PPP-të, apo investimet me Partneritet Publik-Privat, sipas Jan Kees Martijn, janë një mundësi e mirë për zhvillimin e infrastrukturës, por duhet që më parë të bëhet një analizë e kujdesshme. Shefi i FMN-së për Shqipërinë ka theksuar se aktualisht qeveria shqiptare po përmirëson kuadrin ligjor të PPP-ve. “Është e rëndësishme të pranojmë se Shqipëria ka nevojë për infrastrukturë dhe qeveria ka të drejtë të kërkojë mënyra për të rritur shpenzimet për rrugë, porte dhe aeroporte. Është e arsyeshme ta realizojë këtë përmes PPP-ve”.

“Ne kemi theksuar se PPP-të sjellin rreziqe për buxhetin. Pra është shumë e rëndësishme të sigurohemi që kur merren në shqyrtim këto projekte të ketë një analizë të kujdesshme, të vlerës së investimit, të rrezikut që po ndërmerr dhe e monitoron nga afër situatën nëse këto rreziqe materializohen. Kemi vënë re se këto masa nuk janë zbatuar gjithmonë. Autoritetet po punojnë për ta përmirësuar këtë, për të ndryshuar kuadrin ligjor të PPP-ve për t’i dhënë ministrisë së Financave një rol qëndror në monitorimin e projekteve, por edhe për të qënë e përfshirë në përgatitjen e projekteve para se ato të nënshkruhen”.

Si do të zgjidhet kriza politike? Ambasadori Cutillo i ftuar në “Real Story”, sonte në orën 21:00

Kriza politike në vend mbetet ende një temë e rëndësishme diskutimi për çdo shqiptar. Ndonëse palët kanë ulur tonet e rënduar të retorikës, që na ka shoqëruar prej shkurtit deri më 8 korrik, kur u mbajt protesta e fundit e opozitës, përsëri, problemi mbetet aty. Kriza nuk është zgjidhur, dhe në këtë rast, në dështimin e politikës për t`i dhënë fund këtij ngërçi, janë miqtë ndërkombëtar të cilët na vijnë në ndihmë.

Për këtë arsye, në studion e “Real Styry”, të gazetarit Sokol Balla, mbrëmjen e sotme në Vizion Plus, i ftuar do të jetë ambasadori i Italisë në Shqipëri, Alberto Cutillo. Kriza politike në vend, përgjegjësit për nisjen e saj, përgjegjësia e opozitës, qeverisë, presidentit dhe si mund të dilet prej krizës? Cilat janë opsionet që duhet të jenë mbi tavolinë? A ka një misionar ndërkombëtar për të zgjidhur këtë krizë?

Ndërkohë, në pjesën e dytë të emisionit, do të transmetohet një intervistë e filantropit George Soros, intervistë dhënë gazetarit Sokol Balla 14 vjet më parë, e cila do të ritransmetohet mbrëmjen e së hënës në “Real Story”. Në këtë intervistë, do të rikthehen dhe njëherë mesazhet e dhëna 14 vjet më parë, të cilat janë aktuale për Berishën, për Edi Ramën, për përfshirjen e tij në zhvillimet politike në vend. Të gjitha, këto, i ndiqni në orën 21:00 në “Real Story” në dhe në Realstory.al.

Moikom Zeqo: Kriza e gjatë do sjellë vdekjen e partive të mëdha si PD e LSI

Moikom Zeqo, ka bërë një deklaratë të fortë duke thënë se kriza e zgjatur politike mund të çojë në shkrirjen e partive të mëdha duke iu referuar PD dhe LSI. Zeqo tha se do të këtë vdekje të partive të vogla, por me shumë mundësi edhe atyre të mëdha duke u pasuar nga një klasë e re politike.

Djegien e mandateve, analisti Zeqo e cilësoi një akt ekstrem nga opozita duke shtuar se kriza nuk ka gjasa të zgjidhet shpejt dhe pa ndërhyrjen e ndërkombëtarëve.

“Mendoj se do të jetë një krizë e zgjatur. Nuk është aq shpejt e zgjidhshme, duhet të ketë një ndërhyrje ndërkombëtarësh. Ne jeni përball një kolapsi politik. Këtu nuk funksionon opozita dhe vetvetiu as qeveria. Filloi me ekstremin e djegies së mandatave…do të kemi një vdekje partish, Mediu, Dash Shehu. Do të ketë një vdekje të partive edhe më të mëdha ndoshta edhe LSI edhe PD por do të dëmtojë edhe PS. Do të pasohet nga një klasë e re”. – tha Zeqo në një interviste televizive.

Në lidhje me shkarkimin e presidentit Meta, Zeqo tha se nuk do jetë e thjeshtë pasi proceduarat janë tepër të gjata. “E vetmja gjë që mund të përshpejtojë procesin është Gjykata Kushtetuese.’

Basha flet për “ndryshim”, por harron aksionin e opozitës

Lulzim Basha ka reaguar duke publikuar një video të shkurtër nga protesta e të hënës, mbajtur përballë godinës së Kryeministrisë. Kreu i PD e ka shoqëruar videon e publikur me një tekst, ku përmend disa herë fjalën “ndryshim”.

“Sot shqiptarët janë të etur për ndryshim. Sot shqiptarët duan ndryshim të vërtetë, jo të përkohshëm, jo fals, jo fasadë, por ndryshim që do t’u japë fund krizave dhe traumave të tranzicionit. Një ndryshim që do të na fusë në rrugën e sigurt drejt Bashkimit Europian dhe vlerave perëndimore. Zgjedhjet e lira e të ndershme do t’i hapin rrugën transformimit politik dhe ekonomik që ka nevojë Shqipëria, do ti hapin rrugë ndryshimit të vërtetë. Ky ndryshim është tani, qëllimi ynë kryesor, përparësia ime absolute ndaj çdo shqiptari”, shkruan Lulzim Basha.

Protesta e të hënës, e 10 kombëtare për nga numri prej 16 shkurtit, ishte ndoshta protesta e fundit kombëtare për muajin e verës. Burime nga PD u shprehën për Realstory.al, se tubimi i 8 korrikut ishte si shenjë falënderimi ndaj qytetarëve, të cilët kanë ndjekur aksionin opozitar prej djegies së mandateve parlamentare.

Megjithatë, protesta, ishte dhe shenj falënderimi ndaj Ilir Metës, i cili me një mesazh para nisjes së protestës, konfirmoi zyrtarisht se ishte pjesë e opozitës, duke u bërë thirrje qytetarëve që të dilnin në protestë ndaj qeverisë. Aksioni opozitar është pa një axhendë, të paktën pas protestës së të hënës.

Ndonëse përfaqësues të opozitës kanë lënë të kuptohet se do të ketë tubime dhe gjatë verës, liderët kryesor të PD dhe LSI, ende nuk kanë konfirmuar se cili do të jetë hapi i radhës i tyre. Megjithatë, kulmi i aksionit opozitar gjatë korrikut dhe ditëve të para të gushtit, duket se do të jetë pengsa e të zgjedhurve të PS për të futur në zyrat e bashkive, që aktualisht drejtohen nga PD-LSI.

Sot shqiptarët janë të etur për ndryshim.Sot shqiptarët duan ndryshim të vërtetë, jo të përkohshëm, jo fals, jo fasadë, por ndryshim që do t’u japë fund krizave dhe traumave të tranzicionit. Një ndryshim që do të na fusë në rrugën e sigurt drejt Bashkimit Europian dhe vlerave perëndimore.Zgjedhjet e lira e të ndershme do t’i hapin rrugën transformimit politik dhe ekonomik që ka nevojë Shqipëria, do ti hapin rrugë ndryshimit të vërtetë. Ky ndryshim është tani, qëllimi ynë kryesor, përparësia ime absolute ndaj çdo shqiptari.
Gepostet von Lulzim Basha am Dienstag, 9. Juli 2019

Pas videos ne “Real Story” Rusia mbron Ilir Metën

Ambasada e Rusisë në Tiranë merr në mbrojtje Ilir Metën. Me një deklaratë zyrtare, bërë në faqen në Facebook, ambasada e Rusisë në Tiranë, ka reaguar pas shkrimit që ka botuar gazeta Sot (lexo artikullin këtu), e cila të premten ka publikuar një shkrim lidhur me intervistën që Ilir Meta kishte dhënë disa kohë më parë në një televizion rus, intervistë që u transmetua në “Real Story” të enjten në mbrëmje.

Ilir Meta deklaronte në atë intervistë se “jam rritur si edhe shumë moshatarë të mi në fëmijëri apo në rininë e hershme me letërsinë sovjetike. Madje një nga arsyet pse jam ndeshur me shumë vështirësi në jetën politike dhe mendoj që kam arritur t’i përballoj ato është sidomos sepse kam qenë shumë i ndikuar nga letërsia revolucionare sovjetike nga shkrimtarët tuaj, dhe sot mund t’ju recitoj fjalën e Oleg Koshevojit, të Fadejevit tek ‘Rojet e Rinj”.

INTERVISTA E ILIR METES DHENE PER NJE TV NE RUSI TRANSMETUAR TE ENJTEN NGA REAL STORY

Gazeta “Sot” i ka kushtuar një artikull kësaj deklarate të Ilir Metës, duke u shprehur se Presidenti i vendit ishte nën influencën e Rusisë. Për këtë arsye, Ambasada Ruse, ka reaguar duke akuzuar se “gazetarët e kësaj gazete vazhdojnë të bëjnë sulme të porositur ndaj Rusisë, duke prodhuar produkte të imagjinatës së tyre të sëmurë”, shkruhet fillimisht në deklaratën e Ambasadës Ruse.

Më tej, indirekt, ambasada del në mbrojte të Ilir Metës, duke shkruar se “në fakt, kjo intervistë shumë “e fshehtë” u shfaq dy herë gjatë “prime-time” të një prej kanaleve televizive më popullore rusishtfolëse në botë me një auditor teleshikuesish prej më shumë se 200 milionë njerëz. Kjo intervistë është, në të vërtetë, e vetmja përpjekje e një prej udhëheqësve shqiptarë për t’u përcjellë qytetarëve rusë një informacioni pozitiv për Shqipërinë, për t’i bindur ata të vizitojnë këtë vend dhe të shpenzojnë këtu paratë e tyre. E theksojmë, është e vetmja përpjekje. Ju kujtojmë se turizmi është një nga sektorët kryesorë të ekonomisë shqiptare”.

Çupi: 30 qershori thelloi më shumë krizën, jo dialog me Ramën Kryeministër

Ish-deputetja e Partisë Demokratike, Dhurata Çupi tha se vendi është në një krizë të thellë politike dhe se 30 qershori nuk ndryshoi asgjë në lidhje me këtë. Sipas Çupit, në fakt, 30 qershori forcoi edhe më shumë perceptimin e opozitës se shqiptarët nuk e meritojnë këtë qeveri. Në lidhje me një dialog të mundshëm mes palëve për zgjidhjen e krizës në vend, Çupi tha se kjo nuk do të ndodh për aq kohë sa Rama është kryeministër.

“Janë zgjedhje të paligjshme, jo të ndershme. Për këtë arsye themi që janë thjesht votime brenda PS. Ajo çka i jep të drejtë të gjithë kauzës, djegies së mandateve, aksionit opozitar nga shkurti deri më sot me mbi 10 protesta kombëtare dhe lokale, është se jemi në një krizë të thellë dhe asgjë s’ka ndryshuar në datë 30. Vetëm është shtuar perceptimi që kemi një qeveri që nuk e meritojnë shqiptarët. Ne kemi kauzën e zgjedhjeve të lira dhe të ndershme. E duam pa këtë qeveri dhe pa këtë kryeministër. Në 30 qershor u pa që vetë votuan, vetë numëruan dhe vetë i kthyen në këtë farë derexheje. S’mund të ketë dialog me Ramën kryeministër. Janë 85% e shqiptarëve që kanë mbështetur kauzën tonë.” – tha Çupi në News 24

Zgjedhjet dhe kriza, në “Real Story”: SHBA ruajti stabilitetin, tani dialog!

Situata politike në vend, qasja e re e palëve për dialogun dhe zgjidhja e krizës, ishin temat e debatit në studion “Real Story” të gazetarit Sokol Balla në Vizion Plus. Analistët e ftuar në mbrëmjen e së hënës, Skënder Minxhozi, Arjon Sulo, Alfred Lela dhe Aleksandër Furxhi, kanë diskutuar rreth rrugëve, ku Lulzim Basha dhe Edi Rama mund të kalojnë për të gjetur zgjidhjen e krizës. Fillimisht, drejtuesi i emisionit, Sokol Balla, deklaroi se “paqja” në 30 qershor ishte falë presionit amerikan, të cilët u kanë shprehur palëve se duhet të ruajnë pozicionet e tyre, për të mbajtur dhe për të mos prishur zgjedhjet.

“U është thënë qartë palëve; ti do rrish urtë dhe nuk do prishësh zgjedhjet, ndërsa ti tjetri do rrish këtu dhe do bësh zgjedhje! Ka disa mënyra për të zgjidhur krizën. Për mua PD, duhet të tërhiqet, jo nga kauza, por nga gjuha e kasapëve, me koka. Basha dhe Rama duhet të dalin dhe të thonë se drejtësia duhet të vazhdojë”, u shpreh Sokol Balla.

Për analistin Alfred Lela, ka një tentativë për të “vrarë” Lulzim Bashën në ekranet televizive, ndërsa shtoi se Basha as nuk ka fituar e as nuk ka humbur nga zgjedhjet e 30 qershorit. “Ka një përpjekje për ta vrarë Lulzim Bashën nga ekrani. Basha është gjallë, kur se kanë vrarë shqiptarët, s`mund ta vrasin nga ekrani. Basha sido që ta shohim nuk ka dalë i vrarë nga zgjedhjet, por nuk ka dalë as fitues. Nuk ka fituar askush. Jane dy gjysma qe po zihen me njera-tjetren se jane trecerekeshe. Nuk jane, as njera e as tjetra. Basha është duke kërkuar një “fli”, pra do drejtësi”.

Skënder Minxhozi gjithashtu u shpreh se zgjedhjet ishin të Zëvendës Ndihmës Sekretarit Amerikan të Shtetit, Matheë Palmer, jo të Ramës. “Zgjedhjet ishin të Matheë Palmer, jo të Ramës. Ndodhemi përballë një realiteti shumë agresiv. Kemi qeverinë që është ngujuara në kullën e mermerit, ndërsa opozita thotë pa ikur ti nuk dialogojmë… Çfarë do të vazhdojë të mbrojë Edi Rama pas zgjedhjeve? Çfarë aksioni do të vazhdojë opozita? Nuk është momenti i polemikës, por është momenti i politikës. Duhet lexuar në mënyrë që të ndahen paragjykimet që dy të mëdhenjtë nuk duan të flasin”, tha Minxhozi.

Për analistin Arjon Sulo, më i intersuar për zgjidhjen e krizës është kryeministri Edi Rama. “Gjendja politike nuk mban më kështu. Kriza është aty. Kryeministri është sot njeriu më i interesuar për të zgjidhur krizën. Opozita e ka hequr barrën e saj, e kaloi 30 qershorin. Një nga instrumentatat e aksionit të opozitës janë protestat. Nëse nuk ka përgjegjësi juridike për kauzën e saj të drejtë, protestat janë një nga instrumentat”.

Ndërsa, gazetari Aleksandër Furxhi tha se nisja e hetimit për zgjedhjet e Dibrës dhe Durrësit, si dhe ndëshkimi i disa personave, do të lehtësonte klimën për dialogun mes Bashës dhe Ramës. “Deklarata e Bashës për të cilën po diskutojmë e ka brenda zgjidhjen. Është lënë rruga e hapur që nëse nuk futen brenda ata që kanë vjedhur votën, nuk ka zgjidhje. Prokuroria mund të hap një proces. Hapja e një procesi hetimi i shpëton fytyrën edhe Lulzim Bashës. Unë se kështu do të jetë më e lehtë”.