Kuvendi, Markut: Lufto korrupsionin, duam rezultate deri në tetor

Kuvendi i Shqipërisë shprehet i pakënaqur në lidhje me punën e kryera nga Prokuroria e Përgjithshme në lidhje me luftën kundër korrupsionit, hetimet pasuror, ruajtjen e sekretit hetimor, luftën kundër krimit të organizuar duke hartuar një rezolutë në të cilën pret rezultate të prekshme deri në muajin tetor 2019.

Në këtë mënyrë Kuvendi kërkon rezultate të prekshme dhe të zbatueshme ndaj krimit dhe korrupsionin nga prokuroria, në një kohë kur pritet edhe hapja e negociatave të Shqipërisë me Bashkimin Europian. Vetë Rama ka deklaruar nga Kuvendi se Shqipëria duhet të japë prova konkrete me zbatimin e reformës në drejtësi që të fitojë integrimin, duke vënë para drejtësisë zyrtarë të lartë të korruptuar. Pak ditë më herët edhe shefja e ONM, Calavera ka folur hapur duke thënë: “Që të hapen negociatat ne duam të shohim njerëz në burg”.

Kjo duket se ka vënë Kuvendin në punë duke krijuar një rezoluta me 20 pika kryesore që i drejtohet Kryeprokurores së Përgjithshme Arta Marku dhe kërkon nga ana e saj të paraqesë një raport për arritjet e kryera në drejtim të tyre brenda muajit tetor 2019.

Rezoluta është hartuar nga 72 deputetë, 67 nga Partia Socialiste dhe 5 nga deputetët e opozitës.

Përveç luftimit të korrupsionit dhe krimit të organizuar, në rezolutë theksohet edhe rasti i respektimi të sekretit hetimor nga prokurorët duke ndjekjet penale ndaj atyre që thyejnë këtë ligj, sidomos pas publikimi të përgjimeve në gazetën gjermane BILD.

Rezoluta në 20 pika:

1.Forcimin e luftës kundër korrupsionit dhe krimit të organizuar, nëpërmjet zbatimit më të mirë të procedurave të hetimit proaktiv dhe përdorimit në kufijtë e ligjit të teknikave speciale të hetimit.

2.Sigurimin e zbatimit të drejtë dhe të njëllojtë të procedurave për sa u takon hetimeve pasurore, sekuestrimit dhe konfiskimit të aseteve. Brenda muajit tetor 2019, të përcjellë në Kuvendin e Shqipërisë një raport në lidhje me ecurinë e zbatimit të këtij rekomandimi.

3.Zgjerimin dhe forcimin e bashkëpunimit ndërinstitucional me agjencitë ligjzbatuese brenda dhe jashtë vendit, me qëllim rritjen cilësore, thellimin dhe intensifikimin e hetimeve në funksion të zbulimit dhe goditjes të veprimtarisë kriminale brenda vendit dhe të lidhjeve të tij jashtë vendit.

4.Rritjen e bashkëpunimit me partnerët ndërkombëtarë dhe autoritetet gjyqësore të huaja në të gjitha fushat e bashkëpunimit ndërgjyqësor, me qëllim shkëmbimin e informacionit lidhur me veprimtaritë e grupeve kriminale që shtrijnë aktivitetin me lidhjet e tyre jashtë vendit dhe nxitjen e krijimit e grupeve hetimore të përbashkëta për hetimin dhe goditjen e veprimtarisë së tyre brenda dhe jashtë vendit.

5.Bashkëpunimin me Këshillin e Lartë të Prokurorisë dhe Shkollën e Magjistraturës për identifikimit dhe planifikimin e drejtë të nevojave për magjistratë në sistemin e prokurorisë të juridiksionit të përgjithshëm. Forcimi i marrëdhënie të Prokurorit të Përgjithshëm me Këshillin e Lartë të Prokurorisë për qartësimin e marrëdhënieve të bashkëpunimit është i mirëpritur.

6.Hartimin e udhëzimeve të nevojshme për zbatimin e rekomandimeve parësore të Këshillit të Ministrave për luftimin e kriminalitetit për vitin 2019. Kopje të udhëzimeve të miratuara të përcillen në Kuvend, menjëherë pas miratimit të tyre.

7.Hartimin e një kalendari të trajnimit të oficerëve të Policisë Gjyqësore, sipas kërkesave dhe nevojave për zbatimin e reformës në drejtësi brenda muajit shtator të viti 2019, si dhe të fillojë zbatimi i tij.

8.Në bashkëpunim me Drejtorinë e Përgjithshme të Policisë së Shtetit dhe në konsulencë dhe me asistencë të partnerëve ndërkombëtarë, të hartohen/ose të përmirësohen manuale të mënyrës së identifikimit, evidentimit dhe ndjekjes së veprave penale të shtetasve shqiptarë, jashtë territorit të Republikës së Shqipërisë, me qëllim jo vetëm sigurimin e të dhënave për veprat penale, në të cilat shtetasit shqiptarë mund të jenë përfshirë si autorë, por edhe si viktima.

9.Përmbushjen e rekomandimeve të adresuara për Prokurorinë e Përgjithshme nga Komisioni i Pavarur për Koordinimin, Monitorimin dhe ndjekjen e zbatimit të ligjit nr. 115/2016 “Për organet e qeverisjes së sistemit të drejtësisë”.

10.Raportimin në Kuvend brenda muajit dhjetor 2019 në lidhje me zbatimin e rregullave të trajtimit të të miturve me kontakt në drejtësinë penale dhe ecurinë e zbatimit të Kodit të Drejtësisë Penale për të Mitur.

11.Marrjen e masave për mbrojtjen e të drejtave të viktimave të veprës penale dhe për të adresuar dhe rekomanduar zgjidhje për zbatimin e drejtë të rregullave për kërkesat e viktimës akuzuese.

12.Përdorimin më efektiv të instituteve procedurale të reja si: urdhri penal, marrëveshja e fajësisë, gjykimi i drejtpërdrejtë, duke hartuar dhe nxjerrje udhëzime të përgjithshme, me synim qartësimin e kuptimit dhe zbatimit në praktikë të kuadrit ligjor përkatës dhe mbikëqyrja e zbatimit tyre.

13.Mbledhjen, hedhjen dhe përpunimin, nga çdo prokurori, të statistikave të ndjekjes penale dhe të kriminalitetit, sipas standardeve ndërkombëtare, me qëllim që të mundësohet vlerësimi dhe krahasimi i kriminalitetit ndër vite dhe në raport me vendet e rajonit, në nivel evropian dhe ndërkombëtar, si dhe të mundësohet vlerësimi i politikës penale të zbatuar. Kuvendi kërkon dërgimin në Ministrinë e Drejtësisë të të dhënave statistikore të plota dhe të sakta për të gjitha veprat penale, të pandehurit, viktimat, dëmet ardhura nga vepra penale dhe në lidhje me zbatimin e politikës penale.

14.Hartimi dhe nxjerrja e rregullave standarde për organizimin dhe funksionimin e prokurorive me juridiksion të përgjithshëm që sigurojnë efikasitet në organizimin, drejtimin dhe kontrollin e punës në çdo prokurori.

15.Rritjen e pavarësisë së prokurorisë dhe forcimin e kuptimit më të mirë të përgjegjësive nga çdo prokuror. Në këtë kuadër, Kuvendi kërkon hartimin dhe nxjerrjen e rregullave për garantimin e pavarësisë së prokurorit, koordinimin e punës ndërmjet prokurorive të ndryshme, mes tyre dhe Policisë Gjyqësore të përfshira në hetime të përbashkëta.

16.Respektimin e ligjit për sekretin hetimor nga çdo prokuror dhe punonjës i prokurorisë. Në këtë kuadër, Kuvendi kërkon hartimin dhe nxjerrjen e rregullave të unifikuara për informimin e publikut dhe medias lidhur me hetimin dhe ndjekjen penale të veprave penale, në prokuroritë me juridiksion të përgjithshëm, duke respektuar parimet e parashikuara në legjislacionin në fuqi në lidhje me ruajtjen e sekretit hetimor.

17.Hartimin dhe nxjerrjen e udhëzimeve në lidhje me zbatimin e ligjit nr. 138/2015, “Për garantimin e integritetit të personave që zgjidhen, emërohen ose ushtrojnë funksione publike”, që mundësojnë përmbushjen e qëllimit të ligjit.

18.Sigurimin e bashkëpunimit, koordinimit, shkëmbimit të informacionit dhe mbikëqyrjes së veprimtarisë, me të gjitha institucionet dhe agjencitë ligjzbatuese që kanë shërbime të Policisë Gjyqësore.

19.Monitorimin e respektimit të të drejtave të njeriut në të gjitha fazat e ndjekjes penale, nëpërmjet mbikëqyrjes nga prokuroria të respektimit të të drejtave dhe lirive kushtetuese dhe në ligj të shtetasve.

20.Rritjen e angazhimit të prokurorisë për zbatimin e rekomandimeve të Progres-raportit të Bashkimit Europian në lidhje me ndjekjen penale dhe luftimin e kriminalitetit.

Nis seanca për shkarkimin e Metës, Manja: Refuzoi Komisionin me gjuhë fyese, shkeli rëndë Kushtetutën

Ulsi Manja, ka lexuar raportin përfundimtar përpara deputetëve në seancën e posaçme, miratuar disa ditë më parë në Komisionin e Ligjeve, ku kërkohet ngritja e Komisionit Hetimor për shkarkimin e Presidentit të Republikës Ilir Meta. Manja u shpreh se Ilir Meta ka bërë shkelje të rënda kushtetuese. “Duke vlerësuar se me anulimin e datës së zgjedhjeve, Presidenti ka bërë shkelje të rëndë kushtetuese, 55 deputetë kërkuan shkarkimin e tij. Ky akt i Presidentit është në kundërshtim me parimet kushtetuese. Presidenti ka bërë disa shkelje kushtetuese. Komisioni i Ligjeve shqyrtoi këtë kërkesë, dhe vlerësoi se ajo është në përputhje me rregulloren e Kuvendit. Nga pikëpamja substanciale përmban shkaqe nga ato që përcaktohen në kushtetutë për të legjitimuar ngritjen e Komisionit Hetimor”, tha ndër të tjera Ulsi Manja.

Gjithashtu, Ulsi Manja u shpreh se Presidenti ishte vënë në dijeni për të folur në Komisionin e Ligjeve, por ai ktheu përgjigje me një shkresë denigruese dhe fyese. “Kam vënë në dijeni Presidentin e Republikës Ilir Meta në lidhje me datën për mbledhjen e Komisionit të Ligjeve, për të respektuar të drejtën e tij për tu përgjigjur. Shkresat së tij i është përgjigjur sekretarja, me gjuhë fyese, jo etike, me këtë shkresë Presidenti i Republikës dëshmoi qartazi se presidenti nuk kishte inters për të folur në Komisionin e Ligjeve. Komisioni ka konstatuar se: Presidenti ka nxjerr dekretin për miratimin e datës 30 qershor për mbajtjen e zgjedhjeve”, tha Manja.

Më tej, Ulsi manja u shpreh se dekreti i 10 qershorit, që anulonte zgjedhjet e datës 30 qershor, ishte i pavlerë dhe i paligjshëm, i rrëzuar nga KQZ dhe nga Kolegji Zgjedhor. “Ky akt i presidentit të republikës është i pavlerë. Sipas Kushtetutës presidenti nuk mund të zhvillojë kompetenca të tjera veç atyre që janë të përcaktuara në Kushtetutë. Në respektim të parashikimit kushtetues, se Shqipëria është Republikë Parlamentare, parlamenti mbështeti vijimin e procesit zgjedhor në datën 30 qershor, duke njohur si aktin e vetëm të ligjshëm dekretin e parë të presidentin. Në këtë rezolutë Kuvendi i Shqipërisë i bëri thirrje të zbatonin ligjin dhe Kodit Zgjedhor për të garantuar të drejtën kushtetuese për të zgjedhur strukturat e tyre drejtuese nëpërmjet zgjedhjeve”.

9 akuza kundër Metës, caktohen deputetët që do shkarkojnë Presidentin

Ndërkohë që parlamenti do të mblidhet pasditen e së hënës për të miratuar ngritjen e Komisionit Hetimor për shkarkimin e Presidentit Meta, kryeministri Rama ka mbledhur mëngjesin e së hënës deputetët e Grupit Parlamentar të PS-së.

Në këtë mbledhje u caktua që Komisioni Hetimor Parlamentar për shkarkimin e Metës të përbëhet nga 9 anëtarë, 5 nga PS dhe 4 nga opozita parlamentare.

Nga PS janë caktuar anëtarë: Vasilika Hysi, Klodi Ferhati, Bashkim Fino, dhe Alket Hyseni. Nga opozita pritet edne që të përcaktohen emrat e anëtarëve. Më herët Rudina Hajdari nuk ka qenë dakord me ngritjen kaq shpejt të komisionit hetimor. Ajo ka thënë se ky komision duhet të shtyhet deri në ngritjen e Gjykatës Kushtetuese, që të shmanget sipas saj pështjellimi i krizës politike.

Më herët Realstory.al ka publikuar raportin e plotë të hartuar nga Komisioni Parlamentar i Ligjeve, raport i cili do të miratohet në seancën e pasdites që do të mblidhet në orën 17.00.

Në raport shkruhet se presidenti Meta ka cenuar rëndë parimin e ushtrimit të sovranitetit nga ana e popullit, ka shkelur Kushtetutën e ka marrë njëkohësisht tagra të sovranit dhe Kuvendit, është sjellë arbitrarisht me pushtetin, ka anuluar arbitrarisht datën e zgjedhjeve, ka cenuar parimin e periodicitetit të zgjedhjeve, ka cenuar parimin e ushtrimit të pushtetit në shtet nga një qeverisje e dalë nga zgjedhje të lira, ka cenuar parimin e kushtetutshmërisë dhe ligjshmërisë, ka nxjerrë një akt në kundërshtim të hapur me ligjet si dhe ka cenuar parimin e të drejtës së qytetarëve si sovranë për të zgjedhur dhe për t’u zgjedhur.

Pjesë e hetimit do të jetë edhe shkresa e Komisionit të Ligjeve drejtuar presidenti të cilin e ftonte të merrte pjesë në një seancë dëgjimore në komision për të argumentuar vendimin e tij, ftesë kjo që mori përgjigje negative nga institucioni i Presidencës, përmes një letre të dërguar nga sekretarja e përgjithshme e Institucionit të Presidencës. Komisioni i Ligjeve shkruan në raport se ko letër e titullares së presidencës përmban një gjuhë joetike, ironike, fyese dhe tejet ofenduese dhe aspak të denjë për institucionin që përfaqëson kreun e shtetit, ndaj deputetëve.

9 akuzat e Kuvendit për shkarkimin e Ilir Metës

Ka cenuar rëndë parimin e ushtrimit të sovranitetit nga ana e popullit (në kundërshtim me nenin 2, pika 1 të Kushtetutës);

Ka shkelur Kushtetutën e ka marrë njëkohësisht tagra të sovranit dhe Kuvendit;

Është sjellë arbitrarisht me pushtetin, përkundër natyrës së Republikës Parlamentare (në kundërshtim me nenin 1, pika 1, të Kushtetutës);

Ka anuluar arbitrarisht datën e zgjedhjeve (në kundërshtim me nenin 92, germa “gj”, të Kushtetutës dhe nenin 8, 9 dhe 10 të Kodit Zgjedhor);

Ka cenuar parimin e periodicitetit të zgjedhjeve (në kundërshtim me nenin 1, pika 3 dhe nenin 109 të Kushtetutës);

Ka cenuar parimin e ushtrimit të pushtetit në shtet nga një qeverisje e dalë nga zgjedhje të lira (në kundërshtim me nenin 1, pika 3, të Kushtetutës);

Ka cenuar parimin e kushtetueshmërisë dhe ligjshmërisë (në kundërshtim me nenin 4 paragrafi i dytë i Kushtetutës dhe nenin 4 të K. Pr. Administrative);

Ka nxjerrë një akt në kundërshtim të hapur dhe flagrant me ligjet;

Ka cenuar parimin e të drejtës së qytetarëve si sovranë për të zgjedhur dhe për t’u zgjedhur (në kundërshtim me nenin 45, pika 1, të Kushtetutës).

Kuvendi në seancë, Basha thërret me urgjencë Këshillin Kombëtar

Ndërsa Kuvendi dhe deputetët do të mblidhen të enjten paradite (sot ora 10:00) në një seancë parlamentare, kryetari i PD-së, Lulzim Basha ka thirrur me urgjencë një mbledhje të Këshillit Kombëtar të PD-së.

Mësohet se anëtarët e Këshillit Kombëtar të PD-së, janë njoftuar mbrëmjen e së mërkurës përmes një mesazhi në telefon ku i kërkohej që të enjten të ishin të pranishëm në mbledhje.

Mbledhja do të zhvillohet në orën 11:45 në selinë e PD-së, ndërsa më herët gjatë ditës në orën 10:00 është njoftuar mbledhja e Kryesisë së PD dhe e ish grupit të deputetëve.

Mendohet se pjesë e diskutimeve do të jetë zhvillimi i protestës së opozitës ditën e hënë në datën 8 korrik si dhe hapat në vijim të PD-së.

Demokratët vendosën të mërkurën që të zhvillojnë një tjetër protestë, pikërisht në datën 8, ditë kur parlamenti do të votojë pro shkarkimit të presidentit Meta dhe ngritjes së një komisioni hetimor parlamentar për të, si pjesë e procedurave parlamentare. PD ka mbështetur vendimet e Presidentit dhe shpeshherë kanë përdorur të njejtën retorikë çka tregon për qëndrime të koordinuara.

Ndërsa parlamenti do të mblidhet në seancë ku në rendin e ditës janë dy pika të rëndësishme:

Dekreti i Presidentit të Republikës nr. 11195, datë 31.05.2019, “Për kthimin për rishqyrtim në Kuvend të ligjit nr. 26/2019, ‘Për Shërbimin Përmbarimor Gjyqësor Privat’.

Gjithashtu një tjetër pikë e rëndësishme që do të diskutohet dhe votohet në Kuvend është Projektvendimi ‘Për lirimin nga detyra të anëtarit të Autoritetit të Mediave Audiovizive, z. Zylyftar Bregu.

Kuvendi seancë të posaçme më 8 korrik, fillon zyrtarisht shkarkimi i Metës

Deklarata e bërë të martën nga Ilir Meta, ku jepte versionin e tij për zgjidhjen e krizës, njëherazi sulmonte SHBA dhe partnerët e tjerë ndërkombëtar, ka bërë që mazhoranca të përshpejtojë procedurat për shkarkimin e tij. Pasditen e të martës, vetëm disa orë pas deklaratës së Ilir Metës, mësohet se Kuvendi do të mblidhet në një seancë të posaçme ditën e hënë më 8 korrik, për të diskutuar çështjen e shkarkimit të Ilir Metës. Gjatë seancës do të votohet ngrija ose jo e Komisionit Hetimor, i cili do të hetojë nëse është shkelur Kushtetuta, pas dekretit të 10 qershorit, ku Ilir Meta anulonte datën e zgjedhjeve më 30 qershor, mëson Realstory.al nga burime të larta pranë grupit parlamentar të PS.

Katër ditë para mbajtjes së zgjedhjeve të 30 qershorit, Komisioni i Ligjeve miratoi kërkesën për ti paraqitur Kuvendit ngritjen e Komisionit Hetimor sipas procedurave ligjore. Në fakt, më herët ishte parashikuar që kërkesa për ngritjen e Komisionit Hetimor nga Kuvendit, të bëhej të enjten më 4 korrik, ditë që korenspodon me datën e lindjes së Kryeminisrtit Edi Rama. Por vetë kreu i qeverisë nuk do të ketë mundësi për të qenë të enjten në seancë plenare, me shumë gjasa edhe disa ministra apo deputetë, pasi në axhendën e tij, shefi i qeverisë, ka një vizitë jashtë vendin.

Për këtë arsye, Kryeministri Edi Rama ka dashur që të jetë vetë prezent në momentin që do të votohet kresa për ngritjen e Komisionit Hetimor Parlamentar për shkarkimin e Ilir Metës. Pas miratimit në Kuvend të kërkesës për ngritjen e këtij komisioni, sipas procedurës ai krijohet brenda 2 ditëve. Më pas Komisioni Hetimor, që praktikisht ka pothuajse çdo gjë gati, do ti duhet vetëm të thërrasë Presidentin Ilir Meta për të raportuar para tij. Në fund, konkluzionet e Komisionit Hetimor do i paraqiten Kuvendit, që më pas do ë miratojë përfundimisht shkarkimin ose jo të Presidentit.

Seanca për shkarkimin e Metës, Kuvendi rrethohet me gardh metalik. 250 policë në shërbim

Teksa pritet të nisë seanca me 5 orë debat për shkarkimin e presidentit Meta, policia ka marrë masa për sigurinë e deputetëve duke rrethuar Kuvendin me gardh metalik, ndërkohë që 250 efektivë të policisë do të jenë në shërbim.

Megjithëse nga opozita deri tani nuk ka pasur ndonjë vendim për të zhvilluar protesta, gjithsesi masat janë marrë për t’i paraprirë ndonjë skenari të papritur të saj.

Kujtojmë se ditën e sotme në Kuvend do të zhvillohet një debat që është parashikuar të zgjasë 5 orë, në të cilin deputetët do të debatojnë për aktin e presidentit Meta për të çdekretuar datën e zgjedhjeve të 30 qershorit, ndërkohë që kryeministri Rama njoftoi se fjalën e tij do ta mbajë në orën 12:00.

Mocioni me debat për Metën, mblidhet Konferenca e Kryetarëve

Kryetari i Grupit Parlamentar të PS-së, Taulant Balla ka depozituar në Kuvend kërkesën për të zhvilluar një seancë mocion me debat për shkarkimin e Presidentit të Republikës.

Bazuar në kërkesën e tij, sot janë njoftuar të gjithë anëtarët e Konferencës së Kryetareve që të zhvillojnë një mbledhje.

Konferenca e kryetareve është njoftuar për t’u zhvilluar në orën 9.00 të mëngjesit të kësaj të marte.

Kuvendi i Maqedonisë së Veriut “flet” edhe në gjuhën shqipe

Kuvendi i Maqedonisë së Veriut do të shkruaj edhe në gjuhën shqipe mbishkrimet zyrtare të saj. Lajmin e ka bërë të ditur vete kryetar i Kuvendit, Talat Xhaferri me një postim në mediat sociale.

“Kuvendi i Republikës së Maqedonisë së Veriut me mbishkrim në tri gjuhë” ka shkruar Xhaferi mbi fotot e tabelave ku përveçse shfaqet emri i ri i shtetit, jepet edhe në gjuhën shqipe së bashku me atë maqedonase dhe angleze.

Kuvendi i Republikës së Maqedonisë së Veriut me mbishkrim në tre gjuhë.Собранието на Република Северна Македонија со натпис на три јазици.
Gepostet von Talat Xhaferi am Montag, 27. Mai 2019

Kuvendi rrëzon dekretin e Metës për vettingun në polici

Me 79 vota parlamenti ka rrëzuar dekretin e presidentit Ilir Meta për ligjin e Vetting-ut në Polici.

Presidenti Meta ktheu për rishqyrtim në Kuvend ligjin për vettingun me argumentin se cënon parimet dhe standardet e vendosura në Policinë e Shtetit. Sipas tij, me ndryshimet e bëra nga ministri i Brendshëm Sandër Lleshaj, qeveria kërkon që të kontrollojë procesin e vettingut në Policinë e Shtetit.

Por kjo është hedhur poshtë nga Lleshaj, i cili në fjalën e tij tha se ligji i ri nuk ka ndryshim nga ai i vjetri, por disa rregullime të vogla në të mirë të këtij procesi.

“Ligji nuk ndryshon në substancë nga i pari, janë ndryshime kozmetike, që nuk prekim thelbin e ligjit të vjetër. Ligji i vjetër parashikonte që vettingu të bëhej për të gjithë policët dhe drejtuesit, kështu është edhe në ligjin e ri. Nuk ka asnjë ndryshim ligji i ri me të vjetrin. Vettingu sipas ligjit të vjetër duhet të mbyllet në mars të 2020, sot jemi në maj dhe ende nuk ka nisur dosja e parë. A mund të mbyllet Vettingu i 14 mijë vetave në një kohë kaq të shkurtër? Kush do që është në favor të Vettingut duhet të jetë në favor të rrëzimit të dekretit të presidenti. Në duhet të rrijmë në një proces Vettingu pa fund. Një punonjës policie që e kalon Vettingun sot, mund të merret nesër me vepra kriminale. Ka nevojë që të rregullojmë SHÇBA-në, e jo të krijojmë një strukturë ekstra, se s’kemi besim te strukturat që kemi krijuar vetë. Policia ju ka mbrojtur që deputetët e rinjëtë mbërrijnë në parlament shëndoshë e mirë. Demokracia nuk ka asnjë lidhje me atë që po ndodh ditën e sotme.” – tha Lleshaj

Arsyeja pse PD refuzon të marrë pjesë në Komisionin e Reformës Zgjedhore

Sekretari i Përgjithshëm i Kuvendit në emër të kryetarit Gramoz Ruçi i dërgoi një shkresë zyrtare Partisë Demokratike, përmes të cilës e ftonte të merrte pjesë në mbledhjet e Komisionit të Posaçëm për Reformën Zgjedhore. Partia Demokratike i ka kthyer përgjigje negative ftesës së Kuvendit duke dhënë edhe arsyet pse PD refuzon të marrë pjesë në këtë komision.

Në shkresën zyrtare Sekretari i Përgjithshëm i PD-së, Gazment Bardhi shkruan se “asnjë Komision që ka në përbërje dhe drejtim individë që duhet të ishin në burg për krime elektorale, nuk gëzon legjitimitetin për realizimin e Reformës Zgjedhore. Asnjë Komision që ka në përbërje dhe drejtim individë që nuk përfaqësojnë opozitën, nuk mund të përcaktojë rregullat për pjesëmarrje në zgjedhje të partive politike opozitare”.