Deputeti demokrat në Kuvend, Myslim Murrizi reagoi të mërkurën në lidhje me ndryshimet e Kodit Zgjedhor. Murrizi, duke shpërndarë një foto të Grida Dumës që kërkon sistem me lista të hapura, shprehet se vetëm në këtë mënyrë do të pastrohet parlamenti nga “parazitët”.
“Listat e hapura qerojnë nga politika dhe parlamenti vemjet, parazitët, skuthët dhe çdo lloj kategorie të pistë që fshihet nga vota e qytetarëve duke hyrë në mendere të kryetarëve. Më vjen shumë mirë që shtohen zëra për zgjedhjen e deputetëve nga qytetarët dhe jo emërimin e tyre nga kryetarët. Populli thotë: më mirë vonë sesa kurrë”, shkruan Murrizi.
Sipas Myslim Murrizit, listat e hapura rrisin demokracinë në parti, në parlament dhe në qeveri. “Listat e hapura rrisin demokracinë në parti, në parlament dhe në qeveri. Listat e hapura zhdukin përfundimisht minjtë politik nga skena politike bajate e Shqipërisë”, shkruan Murrizi. Ai gjithashtu sulmon edhe ata që janë kundër sistemit me lista të hapura. Sipas deputeti demokrat, listat e hapura do t`i nxjerrin jashtë sistemit këta politikanë.
“E për këtë kategori të ndyrë politikanes, që po i shoh të qajnë e qurraviten nëpër ekrane e port-hale se nuk ka problem sistemi për rustemi, se listat e hapura nuk sjellin në parlament “profesor”, “shkencëtar” apo “intelektual”, me lista të hapur nuk do t`ua shoh më kurrë njeri surratin apatik, sepse nuk ju voton askush”, shprehet Murrizi.