Kriza, Meta takon gjermanen e CDU-CSU, insiston te 13 tetori

Pas dhënies së sinjalit të Bashës se Gjermania mund të jetë negociatorja mes opozitës dhe qeverisë për të ulur palët në dialog duket se e kanë vënë presidentin Meta në punë duke iu rikujtuar palëve se zgjidhja e vetme nuk vjen nga jashtë, por ajo është 13 tetori, zgjidhje që e kanë pasur gjithmonë para syve. Duke mos dashur të largohet nga roli i protagonistit dhe i negociatorit “që do të sjell sërish paqen dhe qetësinë në vend” Meta vijon të këmbëngul se 13 tetori është alternativa e vetme dhe më e mira për palët, për zgjidhjen e krizës.

Këtë deklaratë ai e bëri gjatë takimit që pati me Zëvendës Kryetaren e Grupit Parlamentar të CDU/CSU, deputeten gjermane Katja Leikert. Meta bën sërish thirrje që 13 tetori të zbatohet, përndryshe kriza do të thellohet edhe më shumë në vend. “Nëse politikanët vendas e kanë të pamundur të mësojnë nga vendet me përvojë të konsoliduar demokratike se si zgjidhen krizat, kanë rastin të mësojnë nga një shtet i ri si Kosova se si u jepet mundësia qytetarëve të thonë fjalën e tyre përmes zgjedhjeve të parakohshme për të ardhmen e institucioneve qeverisëse”, – tha Meta

Zëvendës Kryetarja e Grupit Parlamentar të CDU/CSU, Katja Leikert, u takua një ditë më herët me kryedemokratin Basha dhe kryeministrin Rama, takime që lanë të kuptohet se është folur për një mënyrë për të zgjidhur krizën politike dhe palët të ulen në tryezën e dialogut. Takime që kurrsesi nuk mund të priten mirë nga Meta, i cili ka gjatë gjithë sezonit veror “që bërtet me statuse në facebook” për të treguar se ai është personi i vetëm që mund të jap zgjidhjen e krizës dhe se roli i negociatorit i takon atij, pasi është në krye të shtetit.

13 tetorit është njohur vetëm nga ish partia e tij, LSI dhe disa aleatë të vegjël të opozitës, që vendosën të regjistroheshin në këto zgjedhje, ndërsa për PD, ajo shihet si data e vetme kushtetuese për zgjedhjet vendore, por që Basha sërish vendosi të mos regjistrohet, pasi deklaroi se “nuk do të marrë pjesë në asnjë palë zgjedhje me Ramën kryeministër.”

Duke e ndjerë veten të lënë mënjanë si nga zgjidhja e krizës, të cilin e thelloi edhe më shumë e dekretin për anulimin e 30 qershorit, ashtu edhe nga vetë aleatët dhe bashkëpunëtorët e tij, Basha e Berisha, që nuk e përkrahën për13 tetorin, kanë bërë që Meta të shfrytëzojë takimet me ato pak ndërkombëtarë, të cilat më së shumit janë takime kortezie apo përfundimi të mandatit të tyre në Tiranë, për t’u bërë protagonist edhe ën sytë e ndërkombëtarëve dhe të tregojë se ai vërtet kërkon zgjidhjen e krizës në vend.

Nga Lalëzi “i ngjalave”, Meta shpreson se Rama “do zbutet”

Presidenti Ilir Meta e ka nisur të shtunën me një foto nga gjiri i Lalëzit dhe me një mesazh të koduar që tingëllon se i drejtohet kryeministrit Rama. Kjo për faktin se Gjiri i Lalëzit na sjell në mendje, darkën e famshme të ngjalave mes Ramës e Metës që solli në krijimin e koalicionit mes PS-LSI.

“Mirëmëngjes nga Lalëzi! Edhe pse deti është zgjuar nervoz sot, shpresojmë të reflektojë dhe qetësohet më vonë”, shkruan Meta.

Duket se presidenti ende ka shpresa se Rama do ta pranojë atë si kryenegociator dhe se mund të “zbutet” dhe të pranojë një marrëveshje politike; çka do të thotë se Rama do të pranonte edhe 13 tetorin e Metës por edhe sulmet e tij kundër reformës në drejtësi dhe SHBA-së.

Pra duket disi e pamundur që kjo të arrihet. Rama e ka bërë të qartë se 13 tetori është një ditë si gjithë të tjerat duke mos e njohur dekretin e Metës, ashtu sikurse nuk njohu as të parin për anulimin e 30 qershorit. Ai e ka theksuar në shumë raste se është gati për dialog por “reforma në drejtësi nuk diskutohet, vetëm zbatohet”. Ndërsa sulmet e Metës ndaj “armiqve të huaj” i ka ironizuar.

Maxhoranca dhe kreu i saj janë të vendosur, në shtator do të shkarkojnë presidentin për shkelje të rëndë të Kushtetutës dhe presidenti Meta e di shumë mirë këtë, pavarësisht mesazheve që dërgon nga Lalëzi i “ngjalave”./Realstory.al

Zjarri në Shëngjin shumë pranë banesave, në Gjirokastër djeg pyllin

Dy vatra zjarri kanë rënë të premten në zonën e Shëngjinit të Lezhës dhe në malin e Shëndëllisë në qarkun e Gjirokastrës.

Zjarri i rënë në kodrat mbi qytetin e Shëngjinit është shumë afër qendrave të banuara duke vënë në rrezik banesat dhe qytetarët. Zjarri masiv ka shkaktuar re të dendura tymi që kanë mbuluar Shëngjinin duke alarmuar pushuesit.

Në shuarjen dhe vënien në kontroll të flakëve përveç zjarrfikëseve është përfshirë edhe policia dhe ushtria, pasi zjarri ndodhet shumë pranë portit të Shëngjinit.

Prefekti i Lezhës, Gjokë Jaku në një lidhje telefonike për mediat tha se zjarri ka rënë në kurorat e pyjeve të qytetit, por që nuk ka rrezik për banesat. Ai tha se të vetmet që rrezikojnë janë varrezat e qytetit, por që 22 efektivë të Forcave të Armatosura dhe disa zjarrfikëse po punojnë në terren për shuarjen e flakëve.

Jaku u shpreh se zjarri ka rënë në një terren të vështirë dhe favorizohet nga era. Megjithatë Mirëdita, Burreli dhe Ministria e Mbrojtjes kanë dërguar zjarrfikëse për të përballuar situatën.

Në rast për të parandaluar përhapjen e zjarrit drejt qendrës së banuar, 4 forca zjarrfikëse janë vendosur pranë banesave për çdo të papritur.

Shëngjini mbulohet nga një re tymi prej zjarrit që ka shpërthyer në faqen e kodrës
Shëngjini mbulohet nga një re tymi prej zjarrit që ka shpërthyer në faqen e kodrës
Gepostet von Gazeta TemA am Freitag, 23. August 2019

Një tjetër vatër zjarri ka rënë në malin e Shëndëllisë ka ndodhur si rezultat i shpërthimit të dy predhave të mbetura nga Lufta e Dytë Botërore. Flakët janë përhapur duke djegur zonën pyjore e kullota dhe për shkak të terrenit të vështirë, forcat zjarrfikëse thuajse e kanë të pamundur të ndërhyjnë. Zjarri ka rënë në majën e malit të Shëndëllisë , që bashkon Tepelenën me Memaliajn.

Zona në fjalë përbën rrezikshmëri, për shkak se kanë mbetur shumë predha të periudhës së Luftës së Dytë Botërore, të cilat nuk janë çmontuar.

Për zjarret në vend ka reaguar edhe presidenti Meta, i cili është shprehur i shqetësuar për përhajen masive të tyre. Meta i ka bërë thirrje Forcave të Armatosura dhe të Ministrisë së Brendshme, njësitë e Emergjencave Civile, si dhe drejtuesit e pushtetit vendor në këto qarqe, për marrjen e menjëhershme të të gjitha masave efektive të emergjencës, për të neutralizuar vatrat e zjarrit dhe për t’iu ndodhur pranë qytetarëve të cilët mund të rrezikohen nga përhapja masive e tyre.

Meta kujton viktimat e diktaturës dhe thumbon Ramën: Të mos kthehemi 30 vite pas

Presidenti Meta ka përkujtuar të premten Ditën Europiane të Viktimave të Stalinizmit dhe Nazizmit, ndërsa ka kujtuar edhe viktimat e diktaturës në Shqipëri ku dhe ka dërguar një mesazh për kryeministrin Rama, teksa shkruan se “uron që vendi të mos kthehet 30 vite pas përmes tendencës despotike të qeverisjes”.

Meta ka publikuar disa foto nga vizita e tij në Kampin e Tepelenës dhe në Burgun e Spaçit. Ai shkruan se ka ardhur koha që Shqipëria të çlirohet nga makthi i rikthimit të çdo forme të diktaturës.

“Sot ne përkujtojmë Ditën Europiane të Kujtimit të Viktimave të Stalinizmit dhe Nazizmit, dy ideologjive shkatërrimtare të shekullit të kaluar, që shkaktuan mijra viktima të pafajshme edhe në vendin tonë.

Për 45-vite me rradhë, Shqipëria u shndërrua në Korenë e Veriut të Europës. Me mijëra shqiptarë u vranë, u burgosën dhe u internuan. Liria, të drejtat e njeriut, demokracia e pluralizmi ishin vlerat tek të cilat ata besonin dhe për të cilat sakrifikuan edhe jetën e tyre.

Është detyra jonë t’u mësojmë gjeneratave të reja të vërtetën e të kaluarës tonë të afërt, me qëllim që ajo të mos përsëritet më.

Për të mos i vrarë edhe për një herë të dytë ata që sakrifikuan jetën dhe rininë e tyre, që ne dhe brezat e ardhshëm të jetonim të lirë në një vend tërësisht demokratik.

Kujtimi i së shkuarës, të vërtetat e dhimbshme të mizorisë dhe shëmtisë së diktaturës komuniste janë një barë ndërgjegje e madhe për të gjithë ne.

Disidenca shqiptare meriton jo vetëm të kujtohet, të shkruhet e të plotësohet, por edhe të nderohet me të gjithë respektin që meriton.

Përballja serioze me të kaluarën, trajtimi i saj me transparencë e drejtësi, uniteti shoqëror, paqja dhe mirëkuptimi social, do të na ndihmojnë, jo vetëm për të mos harruar tragjeditë e së shkuarës por edhe për t’u çliruar nga makthi i rikthimit të çdo forme diktature apo tendence despotike të qeverisjes.

Për të bërë atë që është më mira që çdo shqiptar të gëzojë jetën, lumturinë, të drejtat dhe liritë e tij si çdo qytetar europian, i pashantazhuar nga kontrolli politik, frika e varfëria.

Për të mos u kthyer më kurrë 30 vite pas!”, shkruan Meta.

Një tjetër përpjekje e tij për t’iu kundërvënë Ramës dhe qeverisë së tij, ndërkohë që kërkon mbështetje tek ajo shtresë e popullsisë që e lidh Ramën me të kaluarën komuniste. Kjo është një tezë e vjetër e përdorur prej vitesh nga PD dhe veçanërisht nga Berisha që herë pas herë i kujton Ramës të atin dhe postin që ai ka mbajtur në qeveri në kohën e Enver Hoxhës. Megjithëse Rama ka qenë ndër të parët që i është bashkuar lëvizjes demokratike për rrëzimin e regjimit diktatorial në Shqipëri.

Dorëheqja e Valdrin Pjetrit në tavolinën e Metës, a do i jap fund krizës?

Prefekti i Qarkut të Shkodrës, Çesk Millja i ka dërguar presidentit Ilir Meta dokumentin e dorëheqjes së Valdrin Pjetrit duke e lajmëruar atë zyrtarisht se kjo bashki është pa kryetar.

Në letrën dërguar Metës cilësohet se sipas ligjit për ‘pushtetin vendor” këshilli i ri bashkiak me 51 anëtarë është konstituuar, por Bashkia Shkodër ka një vend vakant atë të kryetarit të saj. Këshilli Bashkiak gjatë mbledhjes së 19 gushtit pranoi dorëheqjen e Pjetrit dhe njoftoi me shkrim institucionet përkatëse.

Dorëheqja e Valdrin Pjetrit i hap rrugë zgjedhjeve të pjesshme në Shkodër, duke e futur atë në një ngërç të ri. Por a do ta thellojë Meta më shumë këtë krizë politike? Pas bërjes publike të dorëheqjes së Pjetrit, presidenti Meta nuk pranoi të dekretojë një datë të re për zgjedhjet e pjesshme në Shkodër, pasi për atë zgjedhjet e 30 qershorit janë të paligjshme dhe këmbëngul që zgjedhjet në mbarë vendin të zhvillohen më 13 tetor.

Zgjidhja duket se vjen përmes Kodit Zgjedhor. Kryetarja e re e Këshillit Bashkiak të Shkodrës, Brisela Kadia deklaroi më herët se ky ngërç do të zgjidhet sipas Kodit Zgjedhor, i cili përmes nenit 161 mund ta nxjerrë jashtë loje presidentin Meta. Ky nen në pikën 6 të tij thuhet se “është KQZ ajo që vendos të përsërisë zgjedhjet dhe të vendosë për datën e zhvillimit të tyre jo më vonë se 4 javë nga marrja e vendimit të përsëritjes së tyre.”

Madje zgjedhjet e pjesshme në Shkodër mund ta fusin sërish PD-në në jetën politike duke e shpëtuar nga izolimi që i bëri vetes.

Megjithatë fillimisht duhet që presidenti Meta të jap deklaratën e tij zyrtare se çfarë qëndrimi do të mbajë në këtë situatë të re politike, do jap një zgjidhje për krizën apo do e thellojë më shumë atë?

Dekorimi i ambasadores greke, Çamët-Metës: Bëj dallimin mes Mic Sokolit dhe Esat Toptanit

Çamët i janë kundërvënë ashpër presidentit Meta, i cili dekoroi të mërkurën ambasadoren greke Eleni Sourani me Titullin “Kalorës i Urdhrit të Skënderbeut”. Shoqata Çamëria ka akuzuar presidentin Meta duke i treguar se duhet të mësojë të bëj diferencën mes patrioti e atdhedashësit në mbrojtje të interesave të shtetit shqiptar si Mic Sokoli, (figurë historike që Meta e krahason veten), dhe tradhëtarit si Esat Toptanit, i cili punoi kundër interesave të Shqipërisë. Me dhënien e këtij urdhri, Shoqata Çamëria e cilëson njësoj si tradhti ndaj komunitetit çam por dhe vetë vendit të Skënderbeut. Madje çamët nuk i lënë edhe pa përmendur edhe pushimet e tij verore, gjatë të cilave nuk la maj mali pa eksploruar dhe vlerësuar për bukurinë, por harron se fillimisht duhet të respektojë shqiptarët.

“Presidenti i cili shpesh i referohet figurave historike, duhet të dijë mirë të bëjë dallimin mes Mic Sokolit e Esat Toptanit, e të tërheqë me urgjencë një titull i cili po shpërdorohet, sepse nuk ka asnjë arsye ti jepet këtij individi. Si përfaqësues i Unitetit të Kombit, do ti duhej që përpara se të shpërndante titujt te kjo kategori individësh, ti referohej historisë shqiptare e të kishte ndjeshmërinë e vuajtjeve dhe persekutimit të komunitetit të shqiptarëve të Çamërisë, sepse nuk vlen të duash veç malet e pyjet, po mbi të gjitha lipset të respektosh shqiptarët e të sillesh me dinjitet e reciprocitet në raport me fqinjin.” – shkruan në reagimin e saj Shoqata Çamëria, e cila i ka kujtuar presidenti Meta të gjitha rastet e përdhosjes së vuajtjeve të komuniteti çam nga ambasadorja greke Sourani dhe minimin që ajo i ka bërë bashkëjetesës mes dy vendeve, duke u shprehet e habitur se si ishte i mundur të ndodhte ky dekorim nga ana e presidentit Meta.

“Ndoqëm sot me habi dhe zemërim të ligjshëm ceremoninë e dekorimit të ambasadores greke në Tiranë, Eleni Sourani, me titullin “Kalorës i Urdhrit të Skënderbeut” Është për tu vajtuar se si Kalorësja e Urdhrit të Skënderbeut, do luftojë kundër Ligjit të Luftës që vendi i saj Greqia, mban paturpësisht me vendin e Skënderbeut. Nuk dimë për cilat merita të veçanta dekorohet një individ i cili ka bërë të pamundurën të minojë bashkëjetesën midis shqiptarëve dhe minoritarëve, siç ishte rasti i Kacifas. Kur ka kërkuar heqjen e pllakës së Çamërisë nga sheshi Skënderbej, kur ka mohuar e përdhosur vuajtjet e këtij komuniteti duke i njehsuar si palë me nazizmin gjerman, e në të gjitha rastet e tjera kur ka pasur rol thjesht luftënxitës në problemet delikate e ende të pazgjidhura mes dy vendeve?

Nuk i dimë meritat e kësaj kalorëseje të Skënderbeut, kur dhjetëra pleq Çam kthehen në kufi e u grisen pasaportat Shqiptare, sepse kanë të shënuar vendlindjen e tyre Filat, Margëlliç, Paramithi, Arpic, Volë , Pargë, Artë, Gumenic, Janinë, Prevezë, etj”- shkruhet në reagimin e Shoqatës Çamëria.

SULMET NDAJ NDËRKOMBËTARËVE, META “BËN MIQ” NË GREQI, DEKORON AMBASADOREN GREKE

Përçahet opozita, LSI sulmon Bashën me gjuhën e Metës

Postimi i fundit i Petrit Vasilit konfirmon përçarjen e opozitës. PD dhe LSI kanë qëndrime krejt të ndryshme në lidhje me gjetjen e zgjidhjes së krizës. Ndërsa Lulzim Basha ka deklaruar se nuk do të hyjë në zgjedhjet e 13 tetorit të dekretuar nga Meta, LSI e shikon këtë datë si zgjidhjen e krizës. Petrit Vasili shkruan të mërkurën se nëse drejtuesit e opozitës nuk e pranojnë këtë zgjidhje atëherë ata janë bashkëfajtorë njëlloj si Rama. Madje Vasili, përdor dhe shprehje të ish shefit të tij, presidentit Ilir Meta, teksa shkruan se “asnjë alibi nuk mund të ketë për askënd në rast se nuk e ndalin krizën sot”, mesazh ky drejtuar Bashës.

“Sot dhe vetëm sot të gjithë shqiptarët, që duan të shpëtojnë vendin, por veçanërisht të gjithë ata, që kanë përgjegjësinë të udhëheqin opozitën politike janë përpara një prove për ndershmërinë tyre edhe individuale ndaj interesave të vendit. Asnjë alibi nuk mund të ketë për askënd në rast se nuk e ndalin krizën sot.

Qeverisja e nesërme nuk mund të ndërtohet mbi një shkatërrim pa kthim sot, sepse do bënte të pavlere e paefekt edhe qeverisjen që do të kishte qëllimet më të mira. Shqipëria është sot si një i sëmure në agoni dhe opozita ka detyrën që sot, menjëherë dhe me çdo çmim ta shpëtojë nga vdekja dhe jo të qajë e vajtojë mbi kufomën e saj. Ka vetëm një ilaç, ka vetëm një kurë, ka vetëm një mjekim; ai është zgjedhjet e lira dhe të ndershme sa më parë. Shmangia nga ky mjekim i vetëm shpëtimtar, që janë zgjedhjet, do ta bënte bashkëfajtorë të gjithë”, shkruan Vasili.

Realstory ka shkruar më herët rreth përplasjeve brenda koalicionit opozitar, që kanë nisur që pas shpalljes së dekretit të Metës për zgjedhje në 13 tetor. Megjithëse Basha në një konferencë të fundit për gazetarët kur u pyet për marrëdhëniet me LSI-në, u përpoq t’i sfumonte fjalët për një përçarje duke thënë se opozita është e bashkuar; deklarata e së mërkurës e Vasilit e konfirmon një fakt të tillë.

Që pas zgjedhjeve të 30 qershorit, Kryemadhi u distancua nga qëndrimet e Bashës. Për më shumë se 1 muaj ajo nuk bëri asnjë dalje për mediat dhe asnjë deklaratë politike. Kryemadhi u shfaq javën e fundit ku pas pushimeve në Prevallë zhvilloi një takim 30 minutësh me Bashën, pas të cilit asnjë nga ata nuk dhanë asnjë deklaratë për mediat por u siguruan të tregoheshin shumë miqësorë me njëri-tjetrin teksa u puthën dhe u përqafuan në sy të kamerave si për të treguar se gjithçka shkon mirë mes tyre. Por ja që kjo nuk qenka dhe aq e vërtetë. Petrit Vasili në postimin e tij ka fjali identike me ato të Metës pak kohë më herët kur postonte nga Prevalla mesazhe të koduara drejtuar Bashës dhe një ndër to fliste për mungesën e alibisë për liderin e opozitës që refuzon 13 tetorin, datë kjo antikushtetuese, por që presidenti pretendon se do të zgjidhë krizën në vend./Realstory.al

KRYEMADHI TRADHTON BASHËN, BESNIKE NDAJ METËS. KËRKESË KQZ PËR T’U REGJISTRUAR NË ZGJEDHJE

DISTANCIMI I KRYEMADHIT, LSI I TREMBET NJË 17 MAJI TË DYTË

Ambasadori i ri gjerman kthen Metën nga pushimet: Do mbështesim reformat

Ambasadori i ri gjerman Peter Zingraf ka nisur ditën e martë zyrtarisht detyrën e tij në Shqipëri, duke zëvendësuar ambasadoren Susanne Schütz, të cilës i përfundoi mandati në vendin tonë. Ardhja e tij ka detyruar edhe presidentin Meta të braktis pushimet në Prevall dhe në ngjitjen e majave të larta si sfidë të re që i ka vendosur vetes.

Zingraf u takua me Presidenti Meta, të cili i dorëzoi Letrat Kredenciale dhe u shpreh mjaft i lumtur që fillon detyrën si Ambasador i Gjermanisë në Shqipëri. Në faqen zyrtare të Ambasadës Gjermane, Zingraf shprehet se do të vijojë mbështetjen e reformave të rëndësishme në Shqipëri dhe integrimin e saj duke shprehur qëndrimin e përsëritur të kancerales Merkel, e cila vetëm një ditë më parë tha se “europa është e bashkuar kur Ballkani Perëndimor të jetë pjesë e saj.” (lexo këtu)

“Marrëdhëniet gjermano-shqiptare janë të ngushta dhe të larmishme. Pres me padurim të njoh njerëz nga fusha të shumta të jetës dhe së bashku të gjejmë mënyra për të thelluar shkëmbimin tonë si dhe mbështetur kursin e reformave në Shqipëri.”- citon Zingraf

Gjatë takimit, presidenti Meta vlerësoi marrëdhëniet e shkëlqyera midis dy vendeve dhe shprehu mirënjohjen e thellë për mbështetjen 30-vjeçare të Gjermanisë për zhvillimin e Shqipërisë dhe integrimin e saj në strukturat euro-atlantike.

“Shqipëria do vijojë të mbështetet me besim dhe bashkëpunim gjithnjë e më të ngushtë tek Gjermania mike dhe partnere strategjike. Ne mirëpresim angazhimin e sinqertë dhe vendimtar të Bundestagut për të ndihmuar Shqipërinë në rrugën drejt çeljes së negociatave të anëtarësimit me Bashkimin Europian dhe për përparimin e vendit tonë drejt standardeve demokratike evropiane.” – tha Meta

Ambasadori i ri gjerman Zingraf do të mbështesë Reformën në Drejtësi dhe vënien sa më shpejt në zbatim e saj në mënyrë që të ecet përpara me integrimin e vendit. Presidenti Meta ka qenë shpesh herë sulmues ndaj kësaj reforme, ku nuk ka kursyer as akuzat ndaj ndërkombëtarëve. Le të shpresojmë që ambasador i ri gjerman të mos bëhet pjesë e sulmeve të Metës, i cili duket se e ka kthyer në një hobi të tij kohët e fundit.

Ngjela: Meta shkaktoi përplasje shoqërore. Goditja e tij, kusht për negociatat

Nga Spartak Ngjela

Meta është në hall, por nuk ka intelekt për t’i shpëtuar drejtësisë.

Naiviteti për t’i shpëtuar Reformës në Drejtësi, e çoi Metën të nxirrte dy dekrete fantazmë të paligjshëm, sepse mendoi që me to mund të sillte destabilizimin e shoqërisë shqiptare me anë të “elokuencës Basha”.

Por ajo elokuencë, sallatë fjalësh, e degdisi Metën drejt akuzës penale dhe shkarkimit. Kurse tani, ai po vërtitet e vjen vërdallë në Kosovë e nëpër Shqipëri…

Në fillim të shtatorit vjen në Tiranë delegacioni i Venecias, i thirrur për krimin e Metës nga Komisioni Parlamentar i Hetimit të Ilir Metës.

Delegacioni ka kërkuar dokumentacion se çfarë ka sjellë realisht në shoqërinë shqiptare dekreti Meta.

“Ka sjellë përplasje shoqërore”, thonë dokumentet që i paraqiti komisionit hetimor Drejtoria e Përgjithshme e Policisë.

Kurse Meta nuk kupton dot asgjë.

Dhe po i drejtohet Bashës, domethënë Saliut, që ata të vijojnë protestat e dhunshme në shtator.

Indirekt Meta iu thotë: “unë dekretet për ju i bëra “, dhe indirekt iu shpreh hidhur faktin që ai po shkon drejt burgut për ata.

“Po, a kam ndonjë rrugë shpëtimi?” – pyet Meta.

Dhe mendja i shkon drejt e te Saliu. Kur i thotë “dua përplasje shoqërore me gjak, që të shpëtoj nga burgu”.

Po Saliu? Eh, mor Metë, nuk e di ti që Saliu është i kërcënuar ndërkombëtarisht!

Por Meta vazhdon rrugën e tij të shëtitjeve të egra. Dhe ka shpresë në shtator për një përplasje të përgjakshme në Tiranë e kudo

Po Basha, a do ta këndojë sërish Himnin Kombëtar? Të vështirë e ka. Kurse Meta e pret. Por, a e di Meta që edhe Basha është i kërcënuar ndërkombëtarisht?

Jemi përpara komedisë Meta tani, sepse Meta po kërkon gjak nëpër rrugë, kurse Ambasada Amerikane sot shpjegonte goditjen penale të rangut Meta me skemën e SPAK-ut.

“Do këtë gjak në shtator”, tha Meta dje.

“SPAK- u jemi ne”, thanë sot amerikanët, flakë për flakë, me anë të ambasadës së tyre në Tiranë.

Kjo tregon se lufta antikorrupsion ka filluar. Po goditja penale e Metës kur vjen?

Është e afërt kjo goditje, sepse, menjëherë pas goditjes që duhet t’i vijë Metës në shtator, hapen negociatat e Shqipërisë me Bashkimin Europian në muajin tetor të këtij viti. Domethënë, Meta është kushti i çeljes së negociatave me Bashkimin Europian? Po, kjo po kuptohet qartë: Meta tani është kushti: penalizimi i Metës hap negociatat.

Sulmet e Metës, SHBA reagon me SPAK: Të paprekshmit nën hetim

Amerikanët janë të angazhuar drejtpërsëdrejti në realizimin e Reformës në Drejtësi dhe përmes videos më të fundit të publikuar të martën, shpjegojnë sesi do të funksionojë SPAK dhe sesi do të vihen në hetim dhe para ligjit politikanët e paprekshëm në Shqipëri. Kjo është përgjigja më e mirë që SPAK i jep të gjitha sulmeve dhe kritikave që i drejtohen Reformës në Drejtësi, ku spikat presidenti Ilir Meta, por edhe përfaqësuesit e opozitës.

Presidenti Meta në shumë raste ka sulmuar hapur ecurinë e Reformës në Drejtësi ku ka shigjetuar edhe ndërkombëtarët që janë të angazhuar në hartimin dhe në realizimin e saj. Por siç thonë SHBA-të, shkak për këto sulme janë heqja e të drejtës së politikanëve për të kontrolluar sistemin e drejtësisë.

Deri më sot me drejtësinë e vjetër gjyqtarët dhe prokurorët ishin të korruptuar dhe të ndikuar nga politika dhe bosët e krimit, por me ngritjen e SPAK, këto lidhje do të priten.

Kjo për faktin se SPAK është një strukturë kushtetuese, të cilën politikanët e paprekshëm të Shqipërisë nuk e ndryshojnë dot dhe për më tepër prokurorët e SPAK do të jenë gjatë gjithë kohës nën monitorim dhe përgjim të telefonatave. Ndaj ata nuk mund të blihen dot nga politikanët. Pikërisht ky është thelbi se pse Meta dhe opozita e kundërshtojnë reformën në drejtësi.

Ja si e shpjegojnë amerikanët SPAK-un dhe funksionimin e tij.

“Çfarë është SPAK? Struktura e posaçme anti-korrupsion dhe anti-krim i organizuar është një institucion i ri kushtetues, detyra e të cilit është të hetojë dhe të ndjekë penalisht korrupsionin e kryer nga zyrtarë të nivelit të lartë.

SPAK përbëhet nga dy pjesë, prokuroria e posaçme e cila përbëhet nga prokurorë dhe Byroja Kombëtare e Hetimit, BKH e cila përbëhet nga hetues. (Për këtë do të flasim më gjatë në videon e ardhshme).

Pse nevojitet SPAK?

Në sistemin e vjetër gjyqësor, gjyqtarët e korruptuar dhe bosët e krimit të organizuar ishin të paprekshëm, sepse gjyqtarët dhe prokurorët e korruptuar ose të kërcënuar nuk i nxirrnin përpara drejtësisë.

Me anë të parave, lidhjeve dhe përkatësisë politike dhe kanosjeve këta gjyqtarë dhe prokurorë ishin të prekshëm nga ndikimi politik dhe korrupsioni. Kjo e bënte pothuajse të pamundur ndjekjen e korrupsionit në nivelet e larta. Çmimin e paguante gjithë vendi.

Si e korrigjon këtë problem SPAK?

SPAK do të jetë një organ i pavarur, jo i politizuar i cili do të hetojë dhe do të ndjekë penalisht të paprekshmit, të Shqipërisë. Këtu përfshihen zyrtarë të tanishëm dhe ish zyrtarët e lartë. Anëtarët e SPAK emërohen nga KLP dhe jo nga politikanë dhe zyrtarë të korruptuar. Po ashtu të gjithë anëtarët e SPAK do të duhet të kalojnë procesin e rivlerësimit (vetting-un). Prokurorët e posaçëm do t’i nënshtrohen monitorimit të vazhdueshëm të financave dhe telefonatave të tyre për të parandaluar korrupsionin apo kanosjen e tyre.

Kjo bazohet në modele që janë zbatuar në vende të tjera, të tilla si Kroacia dhe Rumania.

Kushtetuta i jep SPAK fuqinë dhe pavarësinë për t’iu kundërvënë korrupsionit në nivel të lartë. Duke qenë se është në kushtetutë kjo do të thotë se të paprekshmit nuk mund ta ndryshojnë atë. Me pak fjalë SPAK do t’i kundërvihet niveleve të larta të korrupsionit. Me SPAK askush nuk do të jetë mbi ligjin. Askush nuk do të jetë i paprekshëm dhe i gjithë vendi do të përfitojë nga kjo”, njofton SHBA përmes videos ilustrative.

SHBA edhe më herët ka folur qartë përmes videove të ngjashme ku ka shpjeguar ngritjen e Gjykatës Kushtetuese dhe procesin e vettingut. Edhe njëherë SHBA tregojnë se Reforma në Drejtësi mban vulën e saj dhe të gjitha akuzat e Metës dhe të opozitës kundër qeverisë dhe të ashtuquajturës “Ramareformë”, nuk janë gjë tjetër, veçse një përpjekje e fundit e tyre për ta shtyrë sa më gjatë realizimin e kësaj reforme./Realstory.al

Çfarë është Reforma në Drejtësi – SPAK
🇦🇱️ | Në videon e kaluar, mësuat mbi Gjykatën Kushtetuese. Këtë javë, do të flasim për Strukturën e Posaçme Anti-Korrupsion dhe Anti-Krim i Organizuar, ose shkurt SPAK. Pse nevojitet SPAK dhe si do t’i ndjekë penalisht ky institucion rastet e korrupsionit në nivelet më të larta? Mësoni se si SPAK do të jetë një organ i pavarur, jo i politizuar, i cili do të hetojë dhe ndjekë penalisht “të paprekshmit” e Shqipërisë, duke përfshirë zyrtarë të tanishëm dhe ish-zyrtarë të lartë. #CfareEshteReformaNeDrejtesi #NdalKorrupsionit🇺🇸️ | In our previous video, you learned about the Constitutional Court. This week, we will talk about the Special Structure Against Corruption and Organized Crime, or SPAK for short. Why do we need the SPAK and how will this institution prosecute cases of corruption at the highest levels? Learn how SPAK will be an independent, non-politicized body that will investigate and prosecute all the “untouchables” of Albania, including current and former high-level officials. #WhatisJusticeReform #StopCorruption
Gepostet von U.S. Embassy-Tirana am Montag, 19. August 2019

SULMET NDAJ REFORMËS, SHBA: VETTINGUN E BËJMË NE, TË GJITHË TË BARABARTË PARA LIGJIT

KUSHTETUESJA, SHBA: GJYKATË APOLITIKE QË VENDOS EDHE KUNDËR…METËS