Kryemadhi takon emigrantët në Itali: Shqipëria ka nevojë për sistem që mbron qytetarët!

Në vijmim të vizitave jashtë vendit, Kryetarja e LSI-së, Monika Kryemadhi është ndalur në shtetin fqinj, Itali. Kryemadhi, sipas një njoftimi shpërndarë nga zyra e shtypit të Lëvizjes Socialiste për Integrim, ka zhvilluar një takim me komunitetin shqiptar që jeton në rajonin e Bolzanos. E shoqëruar nga ish-deputetët e LSI-së, Përparim Spahiu e Viktor Tusha si dhe nga Artan Mullaymeri, Anëtar i Këshillit Territorial për emigracionin të Alto Adige pranë prefektit, Kryemadhi ka thënë në takim me komunutetin shqiptar se shqiptarët po kërkojnë të largohen nga vendi. Ndaj, sipas Monika Kryemadhit, Shqipëria ka nevojë jo për një lider të fortë, por për një sistem që mbron qytetarin.

“Bashkë me Përparimin, Viktorin dhe me shumë ish-deputetë kemi lëvizur në të gjithë Shqipërinë. Po flas për zonën e Dibrës, ishim në zonën e Kalasë së Dodës, ishim në shumë fshatra të braktisura, kishin vetëm pleq dhe plaka dhe nuk gjeje dot një djalë apo një vajzë të re. Mos flasim më për shërbimet e tjera, mungesa e infermierëve dhe mjekeve që të gjithë po na ikin në Gjermani. 82% e gjimnazistëve të Shqipërisë duan të ikin nga Shqipëria. 70% e fëmijëve në shkollat fillore nuk duan të jetojnë në Shqipëri”.

“Që do të thotë që në Shqipëri nuk do të ketë më mësues, nuk do të ketë më mjek, inxhinier, hidraulik, elektriçist, nuk do të ketë më shofer taksish, nuk do të ketë më njerëz që do të punojnë në administratë. Flisni çdo ditë me familjarët tuaj në Shqipëri, por asnjëri nga ju nuk dëshiron të kthehet. Unë mendoj që Shqipëria nuk ka më nevojë për lider të fortë. Ne kemi nevojë për një sistem, i cili u del garant qytetarëve të tij. Përderisa ne të gjithë paguajmë taksa, si nga i pari deri tek i fundit, nuk ka përse sistemi të mos u përgjigjet qytetarëve të tij ”, tha Kryemadhi.

Kryetarja e LSI-së theksoi se ajo ka nisur një tur takimesh për të dëgjuar qytetarët, sepse për LSI-në ka një rëndësi shumë të madhe dëgjimi i zërit të tyre. “Prandaj ne kemi nisur një tur, jo për të dhënë mendimet tona, po më shumë për të dëgjuar. Sepse mendojmë se është shumë e rëndësishme për t’i dëgjuar njerëzit”, tha Kryemadhi.

Kryemadhi: Me hir a me pahir “sulltani i krimit” do largohet

Lëvizja Socialiste për Integrim zhvilloi ditën e sotme Konventën Kombëtare, ku ishin të pranishëm delegatë, përfaqësues politikë dhe simpatizantë të saj. Gjatë fjalës në Konventë, kryetarja e LSI-së, Monika Kryemadhi tha se ka arritur të shoh të ardhmen e Shqipërisë, duke iu drejtuar me ironi fjalëve “doktoreshë” dhe “fallxhore” që përdor kryeministri Rama.

“Jemi mbledhur këtu për të ardhmen sa më të mirë të vendit tonë. Si një doktoreshë dhe fallxhore, e parashikoj të ardhmen e Shqipërisë të ndritur pa Edi Ramën kryeministër. Shqipëria është më e mirë pa Edi Ramën.” – tha Kryemadhi

Kryemadhi tha se mosbindja civile do të vazhdojë deri në rrëzimin e Ramës në mënyrë që të zhvillohen zgjedhje të lira dhe Shqipëria të integrohen në familjen europiane.

“Ne sot Shqipëria na ka caktuar një detyrë shkurt dhe shqip, të mbrojmë demokracinë. Ne nuk kthehemi më mbrapsht. Tashmë nuk është më sekret me sondazhe dhe pa sondazhe ne jemi shumicë, sepse në njërën anë është një njeri me grusht kriminelësh dhe oligarkësh dhe disa kërpudha që janë kthyer në fasada të tij, dhe anën tjetër janë shumica e shqiptarëve që duan integrimin e Shqipërisë. Në këtë vend fatmirësisht ata që nuk pranuan të bëhen fasadë e Edi Ramës janë sot shumica dhe sot shumica është opozita e bashkuar dhe jo vetëm po me të gjithë ata shqiptarë të cilët duhet të bashkohen dhe të rrëzojnë këtë regjim kriminal, protestat tona dhe mosbindja civile do të vazhdojnë derisa “Sulltani i krimit” të bindet me hir a me pahir do apo nuk do ai, në Shqipëri do të ketë zgjedhje të lira dhe të ndershme. Koha e tij dhe e etërve të tij ka mbaruar ne Shqipëri.” – u shpreh Kryemadhi

Konventa është mbyllur me votimin e një rezolute ku shënohet të gjitha pikat dhe ndryshimet që kjo forcë politike premton të ndryshojë në ekonomi, reforma, zgjedhje, punësim etj.

REZOLUTA E PLOTË
Lëvizja Socialiste për Integrim, duke vlerësuar se situata politike, ekonomike e sociale në vend është nga më të vështirat e gjithë periudhës së tranzicionit;
Se mazhoranca sot është tërësisht e paaftë për të qeverisur vendin dhe për të çuar përpara procesin e integrimit në Europë.
Se ajo ka zgjedhur arrogancën dhe paligjshmërinë në gjithë veprimtarinë e saj, duke rrënuar tërësisht respektin e saj për Kushtetutën, ligjin dhe ligjshmërinë;
Duke provuar se mazhoranca ka shkatërruar ne themel institucionin e zgjedhjeve, duke u lidhur me krimin dhe duke u rënë peng i tij;
Në kushtet kur Ekonomia e Shqipërisë është e marrë peng nga pak oligarkë, të cilët janë përfituesit kryesorë të parave publike dhe pasurive kombëtare duke thelluar polarizimin ekonomik e social të shoqërisë;
Dhe shoqëria shqiptare, kryesisht rinia, gjendet sot përpara një krize të thellë të besimit dhe po përjeton një emigrim masiv;
Lëvizja Socialiste për Integrim, me përgjegjësi kombëtare e politike, shpall si objektiv madhor kthimin e besimit të qytetarëve te shteti, te Shqipëria, si shtëpia jonë e përbashkët!
Për këtë LSI-ja synon të garantojë:

Vendosjen e shtetit në themelet ligjore dhe kushtetuese nëpërmjet:
Realizimit të zgjedhje të lira e të ndershme, duke eliminuar dhe ndëshkuar rëndë tjetërsimin e vullnetit të qytetarëve nëpërmjet parasë, intimidimit dhe forcës, procesit të manipuluar zgjedhor. Qytetari është sovran nëpërmjet votës së tij.
Ndalimit të trafikut parlamentar, me sanksionimin në Kodin Zgjedhor të rregullave të qarta të zgjedhjes dhe veprimtarisë së përfaqësuesve të zgjedhur.
Përfundimit të reformës në drejtësi, duke evituar kapjen e sistemit nga mazhoranca aktuale dhe duke vendosur ligjshmërinë, integritetin dhe paanshmërinë e tij.
Forcimit të sistemit të llogaridhënies përpara ligjit dhe qytetarëve të veprimtarisë së përfaqësuesve të zgjedhur si dhe funksionarëve publikë në qeverisje.
Plotësimit sipas ligjit të institucioneve kushtetuese dhe forcimit të sistemit të kontrollit dhe balancës mes pushteteve.
Forcimit të rendit publik dhe rritjes së sigurisë së jetës së qytetarëve.
Realizimin e reformave të integrimit me përqasje gjithëpërfshirëse. Mobilizimin e gjithë kapaciteteve kombëtare politike, të shoqërisë civile dhe akademisë, në procesin e negociatave për anëtarësim në BE.
Rritjen ekonomike dhe punësimin, nëpërmjet:
Çlirimit të ekonomisë nga oligarkët dhe monopolet dhe nxitjes së veprimtarisë ekonomike duke ulur taksat dhe duke respektuar rregullat e tregut të lirë.
Thjeshtimit të pagesës së detyrimeve fiskale duke evituar korrupsionin. Shpërndarje më të drejtë dhe të prekshme tek pagat dhe pensionet.
Forcimit të ndërmarrjeve të vogla e të mesme, me mbështetje për start-up-et, veçanërisht në fushën e IT dhe inovacionit.
Nxitjes së punësimit që në bankat e shkollave të mesme e profesionale. Lidhje të drejtpërdrejtë të veprimtarisë ekonomike me sistemin arsimor, veçanërisht me shkollat teknike, profesionale dhe shkollat e larta për shkencat e aplikuara.
Rritje te produktivitetit dhe eksporteve. Mbështetje për inovacionin.
Mbështetje parësore për bujqësinë si sektor kryesor ekonomik. Zhvillimi të industrisë së agropërpunimit.
Krijimi i një klime dhe hapësire miqësore për biznes, mbështetje për investimet e vendit dhe të huaja.
Kthimin e besimit te rinia dhe mbështetje për familjet e reja.
Kthimi i besimit nëpërmjet ofrimit të mundësive konkrete dhe të barabarta për arsimim dhe punësim.
Ndalje e tkurrjes së popullsisë.
Mbështetje për strehim për familjet e reja dhe rritje të lindshmërisë.
PËR REALIZIMIN E OBJEKTIVAVE TE SAJ, LSI-ja PROPOZON MASA DHE POLITIKA KONKRETE
Ulje e barrës fiskale mbi biznesin dhe individin:

Thjeshtëzim i sistemit fiskal dhe ulje e barrës fiskale, përmes një takse të sheshtë prej 10% për tatim fitimin dhe të ardhurat personale.
TVSH 0% për prodhimin bujqësor
TVSh 6 % për produktet e shportës;
Heqja e pagesës së TVSh-së në doganë.
Pagesë fikse tatimi prej 30 mijë lekësh në vit për gjithë bizneset me xhiro vjetore nga 2 deri 8 milionë lekë në vit.
Heqja e tatimit të transferimit të pronësisë së pasurive të paluajtshme.
Pagesa vetëm 1% takse mbi shumën e transaksionit. Për blerjen e shtëpisë së parë pagesa është 0.
Ulje e tavanit të taksave vendore për t’i dhënë fund abuzimit me to.
Mbështetje me grant 20000 euro për start-up-et.

Sektor kryesor ekonomik – Bujqësia
Subvencionim i prodhimit bujqësor për njësi të prodhimit, të sipërfaqes dhe për numër krerësh. (100 milionë Euro në vit);
Subvencionim i vlerës së interesit bankar për çdo kredi të dhënë për infrastrukturë, serra, stalla, për industrinë agropërpunuese. Ofrim i tokës shtetërore për aktivitetet agropërpunuese.
Ndërtimi i sistemit të Kartës së Fermerit me zbatimin e së cilës bëhet zbritja automatike e pagesës së TVSh-së për imputet bujqësore, plehra kimike, fidanë, fara, naftë.
Konsolidim i rajonalizimit të prodhimit bujqësor.
Dhënie e çertifikatave të pronësisë mbi tokën brenda dy viteve të para të qeverisjes.
Targetim i zëvendësimit me përparësi të importeve të produkteve të përpunuara me prodhime vendi.
Forcim i sigurisë ushqimore. Inpute të sigurta dhe proces prodhimi i sigurt. Ndërtimi i një laboratori të kontrollit ushqimor për çdo qark.
Mbështetje parësore për arsimin –
Dyfishim buxheti për përmirësimin e infrastrukturës arsimore dhe paga mësuesish. Rritje pagash për mësuesit 50 % në 4 vite;
Rritje e cilësisë së mësimdhënies.
Rritje e autonomisë universitare që u garanton studentëve dhe pedagogëve rritje të cilësisë së mësim-dhënies dhe lidhje me tregun e punës.
Orientim i 50% të temave studimore në Programet Master dhe PHD në çështje konkrete të zhvillimit të ekonomisë.
Realizimi i Programit “Mëso dhe fito” për shkollat profesionale (punësim me pagë dhe mësim) dhe për shkencat e aplikuara;
Mbështetje e Familjes së re
Krijimi i fondit të shtëpive për familjet e reja.
Punësim parësor për të paktën një nga prindërit e një familje me fëmijë.

Kriza politike, Basha troket në zyrën e Kryemadhit

Kryetari i Partisë Demokratike, Lulzim Basha ka mbërritur mëngjesin e sotëm në zyrën e Monika Kryemadhit në selinë e LSI-së, ku po zhvillojnë një takim.

Ky takim vjen vetëm një ditë pasi partitë e vogla aleate të PD-së zhvilluan një takim me presidentin e Republikës të cilit i parashtruan një listë me 12 kërkesa që vendi të dalë nga kriza politike. Por në këtë takim mungonte kryetarja e LSI-së, Monika Kryemadhi.

Nuk dihet se çfarë janë duke biseduar dy krerët e Koalicionit Opozitar në këto momente, por sigurisht që kriza politike dhe hapat që do të ndjekë më tej koalicioni, mendohet se janë temat kryesore.

Deri tani PD dhe LSI kanë pasur një qëndrim të përbashkët dhe çdo vendim e kanë marrë në unison në lidhje me djegien e mandateve apo me zhvillimin e protestave në mbarë vendin, që përfshijnë edhe bllokim të akseve të ndryshme rrugore.

“Nuk ka më qetësi e dashuri si në kohën e Metës, por revoltë”

Kryetarja e Lëvizjes Socialiste për Integrim, Monika Kryemadhi e ka bërë të qartë qëndrimin e LSI-së në mbështetje të revoltave për përmbysjen e qeverisë. Në fjalën e mbajtur sot në mbledhjen e Kuvendit Kombëtar të LSI-së, Kryemadhi tha se iku koha kur LSI drejtohej nga Ilir Meta që bënte thirrje për qetësi e dashuri, tani është koha për revolta.

Ajo theksoi se LSI kërkon, së bashku me partitë e tjera të Koalicionit Opozitar, një qeveri tranzicioni që të garantojë zgjedhje të lira dhe të ndershme.

“Marrëveshja jonë me opozitën dhe partitë e tjera është shumë e qartë. Qeveri tranzitore që garanton zgjedhje të lira dhe të ndershme, jo parti politike, që garanton qytetarët që të zgjedhin atë politikan që duan. kjo marrëveshje, ku bëhen bashkë mbi 60% e votuesve shqiptarë do të thotë që është shumica e shqiptarëve , pa llogaritur ata socialist të zhgënjyer. Sa i përket faktorit ndërkombëtare, ia kemi bërë shumë të qartë dhe jemi të palëkundur: Zgjedhje të lira dhe të ndershme. Çështja e precedentit: jemi i vetmi vend në botë pa gjykatë të lartë dhe kushtetuese, ku pronar i shtetit është kryeministrit, rast i paprecedentë. Do jemi në kontakt të vazhdueshëm, do jetë e pandalshme, për t’u takuar me njerëzit dhe për t’u sqaruar. Njerëzit e LSI duhet të zgjohen dhe të takojnë njerëzit që kanë qenë viktima të propagandës së Ramës. Ne duhet t’iu bëjmë të qartë që roli i LSI me PS ka qenë domethënës që Shqipëria të marrë statusin e vendit kandidat, ka qenë vendimtar për frenimin e korrupsionit, për gjobat dhe tmerret që ka bërë për gjobat e biznesit, për lirinë e mediave.

LSI nuk është më e kohës kur kishte Ilir Metën që donte stabilitetin e vendit, që kishte hallin e qeverisë dhe qetësisë. Dashuri dhe qetësi me kriminalin nuk ka. Ta ketë të qarta Rama, të mos guxojë të cenojë asnjë gjë të shqiptarëve se s’do jetë përballja ligjore, por do jetë personale se s’ka për ta falur asnjëri kudo që është. I bëj të qartë Ramës që të ketë kujdes, se 4 bandat e tij janë shumë të vogla. Rama ta dijë se çdo shtëpi e ka një luftëtar që të marrë shenjë at ku duhet, revolta e shqiptarëve akoma nuk ka filluar. Kandidatët do të dalin nga strukturat partiake, do të futen në një proces një anëtar një votë. Jo vetëm kandidatë për deputet, por edhe për kryetar bashkie dhe këshilltar bashkia”, tha Kryemadhi.

LIVE- Mbledhja e KDK
LIVE- Mbledhja e KDK
Publiée par Monika Kryemadhi sur Vendredi 26 avril 2019

Mesazhet e protestës, Basha nga Miloti, Kryemadhi në Durrës

Gjatë protestës së opozitës së bashkuar edhe liderët e partive pjesëmarrëse ishin përqendruar në qytete të ndryshme të vendit. Kreu i PD-së Lulzim Basha ishte i vendosur në Milot, ku protestohej tek karburanti në autostradë, ndërsa kryetarja e LSI-së, Monika Kryemadhi ndodhej në Durrës në zonën e Plepave.

Gjatë fjalës së tij Basha tha se këto protesta janë nisja e mosbindjes civile, që do të vijojnë të përshkallëzohen deri sa të çojnë në fund betejën e nisur.

“Miloti, Elbasani, Tirana, Durrësi dhe Fieri, nisin sot aktin e mosbindjes civile si shembulli i pathyeshmërisë së popullit shqiptar për ta çuar deri në fund betejën që kemi nisur. Vendi ynë është në udhëkryq dhe këtu e ka sjellë njeriu me i paaftë, më i dështuar dhe më i kriminalizuar që njeh pluralizmi. Brenda 6 vitesh shkatërroi, drejtësinë dhe ekonominë, solli krimin në sofër dhe vuri oligarkët në krye të pasurisë së shqiptarëve dhe vrau shpresën ku 500 mijë shqiptarë e braktisin vendin.” – tha Basha

Nga Miloti, Basha tha edhe një herë se zgjedhje nuk do të ketë më 30 qershor dhe se opozita e vetme është ajo që ndodhet sot në rrugë duke protestuar për zgjedhje të lira.

“Pa vota të lira nuk iu jep qeveria llogari popullit, por krimit. Pa zgjedhje të lira nuk hapen dyert e Europës. PD dhe opozita e bashkuar është sot koalicioni më i madh numerik dhe moral. Edi Rama e lidhi fatin me hajdutët. Në 30 qershor nuk ka për të patur zgjedhje në Shqipëri. Dhe këtë e di Bufi dhe vëllai i Bufit o Edi Rama. Nuk ka zgjedhje. Opozita nuk klonohet dhe as nuk krijohet nga mercenarët që i shërbejnë pushtetit. Ka vetëm një opozitë, ajo jemi ne. Nuk ka zgjedhje me 30 qershor, sepse ne jemi të vendosur të mos lejojmë krimin elektoral. ” – tha Basha

Kryedemokrati Basha e mbylli fjalën e tij duke thënë se protestat nuk do të ndalen deri sa të ketë zgjedhje të lira dhe të shkojnë në burg të gjithë bashkëpunëtorët politik të Ramës të kapur duke trafikuar votat.

“Zgjedhje më 30 qershor nuk do të ketë”, kështu deklaroi edhe Kryemadhi nga Durrësi. Ajo tha se këto protestat do të përhapen në të gjithë Shqipërinë dhe nuk janë më të opozitës, por të shqiptarëve.

“Tashmë do të shpërndahemi në të gjithë Shqipërinë. Nuk do të ndalemi. Këto nuk janë më protestat e opozitës, këto janë protestat e shqiptarëve. Sot nuk ka rrugë tjetër, o do të jesh me qytetarët, o do të jesh me krimin e organizuar. Zgjedhje më 30 qershor nuk do të ketë. Rama do shohë revoltën e shqiptarëve.”- tha Kryemadhi

Rikthimi i vizave, Kryemadhi: Jo prej protestave të opozitës, por keqqeverisjes së Ramës

Kryetarja e Lëvizjes Socialiste për Integrim, Monika Kryemadhi ka reaguar ditën e sotme lidhur me mocionin që Holanda do të dërgojë në KE për pezullimin e përkohshëm të lëvizjes pa viza të shqiptarëve. Kryemadhi e cilësoi këtë vendim një goditje të rëndë për procesin e integrimit të vendit dhe akoma më të rëndë arsyet që e çuan shtetin e Holandës të ndërmerrte këtë veprim.

“Debati dhe vendimmarrja e djeshme e Parlamentit Holandez për t’i propozuar Komisionit Europian kthimin e regjimit te vizave për shtetasit shqiptarë është një goditje e rëndë për rrugëtimin europian të Shqipërisë dhe për mundësinë e mohimit të një të drejtë të fituar me shumë sakrifica 10 vite më parë, siç është e drejta e lëvizjes së lirë pa viza drejt hapësirës Shengen. Motivacioni i këtij mocioni është edhe më i rëndë. Pasi ai ka të bëjë me cënimin e sigurisë kombëtare të Holandës, nëpërmjet shtimit të grupeve kriminale me origjinë shqiptare dhe veprimtarisë së tyre në atë vend.” – tha Kryemadhi në një deklaratë për mediat.

Kryemadhi cilësoi gjithashtu se nuk është opozita ajo që po pengon procesin e Integrimit, por rritja e kriminalitetit në vend dhe lidhja e ngushtë e qeverisë me këto grupe kriminale.

“Parlamenti Holandez konfirmon plotësisht faktin se nuk janë protestat e opozitës dhe djegia e mandateve arsyet e mos çeljes së negociatave, por ajo për të cilën ulëret më shumë se kushdo tjetër është kapja e shtetit, keqqeverisja dhe kapja e gjithë institucioneve nga krimi i organizuar. Jo djegia e mandateve, apo protestat e opozitës krijojnë këtë problem, por janë kriteret e paplotësuara nga keqqeverisja e Edi Ramës, nga keqqeverisja e tij.” – tha Kryemadhi

Ende asnjë zgjidhje për krizën, Palmen mbyll takimet me opozitën

Zv/ndihmës Sekretari Amerikan i Shtetit, Matthew Palmer ka përfunduar takimet e tij të veçanta me krerët e partive opozitare në vend, atë të PD-së, Lulzim Basha dhe atë të LSI-së, Monika Kryemadhi.

Pas përfundimit të takimit me Bashën, kreu i demokratëve reagoi me një status në Twitter duke e cilësuar takimin si tepër konstruktiv.

“Bisedë e hapur dhe konstruktive me Matthew Palmer mbi situatën: mungesën e Gjykatës Kushtetuese dhe Gjykatës se Larte, pandëshkueshmëria, krimi, korrupsioni dhe kriza politike. Përkushtim i përbashkët për demokraci, shtetin e se drejtës dhe mirëqeverisjen si rruga e vetme për stabilitet dhe Shqipërinë në BE.”- shkruan Basha.

Ndërsa pas takimit me Palmer, Kryetarja e LSI-së, Kryemadhi i është përgjigjur interesimi të gazetarëve se në takim “u shprehen këndvështrimet tona, që sigurisht përputhen për sa i përket raportit të Departamentit Amerikan të Shtetit për luftën kundër korrupsionit, për kapjen e shtetit, për të gjithë problemet e tjera. Është shumë e rëndësishme vazhdimi i mëtejshëm për zgjidhjen përfundimtare dhe për t’i dhënë fund tranzicionit shqiptar.”

Ndërsa për zgjidhjen e krizës politike në vend, Kryemadhi tha se “kjo nuk zgjidhet nga Palmer, por do t’i zgjidhin shqiptarët vetëm me njëri-tjetrin”.