Realstory: Qeveria të marrë përgjegjësitë, ose të tërhiqet

Realstory.al zbuloi ekskluzivisht të martën në mbrëmie, qëllimin e vërtetë të kërkesës që Presidenti i Repubulikës Ilir Meta i drejtoi Komisionit Qendror të Zgjedhjeve, për të ditur në rrugë zyrtare, numrin e deputetëve që ka aktualisht Parlamenti. Në fundin e javës së kaluar, kur dhe u zbardh veprimi i Ilir Metës, të gjithë krijuan përshtypje, përfshi dhe Realstory.al, se kjo lëvizje ishte hapi i parë i presidentit drejt shpërndarjes së Parlamentit. Mirëpo, arsyeja nuk ishte kjo, Ilir Meta, siç zbuloi të martën Realstory.al, po përgatitet për të mbrotjur veten, duke i bërë parapri një vendimi final të Kuvendit për shkarkimin e tij me 94 vota, çka mazhorancës do t`i duhen edhe votat e deputetëve të rinj për të plotësuar korumin e nevojshëm për të shkarkuar kreun e shtetit.

Pikërisht, tek deputetët e rinj qëndron “thembra e Akilit” për Ilir Metën. Ai, pritet të përgatisë dosjen e mbrojtjes për shkarkimin nga parlamenti, ku do të cilësojë si të paligjshëm deputetët e rinj, që morën mandatet e dorëzuar në shkurt të këtij viti nga PD dhe LSI. Meta do të kapet pikërisht te verifikimi i dorëzimit të mandateve të opozitës në shkurt, ku në disa prej formularëve të firmosur nga ish-deputetët e PD-LSI, përfshi dhe atë të Monika Kryemadhit, ka pasur parregullsi.

Ndërkohë, shkrimin e plotë të Realstory.al e lexoni këtu!

Por gjithë kjo ndodhi para se kryetarët bashkive të drejtuar nga të zgjedhurit e PD-LSI të ndërmerrnin hapa konkret për vënien në zbatim të skenarit të pengimit të zgjedhjeve, duke mësyrë në Komisionet Zonale të Administrimit të Zgjedhjeve. Tashmë situata ka kaluar përtej një tensioni normal, duke shënuar edhe të plagosur mes militantëve të PD-së apo punonjësve të policive bashkiake të kësaj force politike, të cilët po zbatojnë urdhrat e shefave të tyre për të djegur e shkatërruar materialet zgjedhore. Në fakt, nuk është as më shumë e as më pak, por ajo që zëdhënësi i Ilir Metës, Tedi Blushi, lajmëroi pak ditë më parë “se parlamenti i ‘çunave të Shijakut” do të merrte përgjigjen e merituar nga qytetarët shqiptarë”. Sot trekëndëshi Presidencë-PD-LSI, po vë në zbatim skenarin e pengimit të zgjedhjeve.

Por kujt po i shërben më shumë ky skenar? Kauzës së opozitës për zgjedhje të lira dhe të ndershme? Apo është pasojë direkte e dekretit të 8 qershorit të Metës? A është kjo beteja e kreut të shtetit, për të mos ikur me asnjë mënyrë e me çdo mjet nga Presidenca? Këtë të mërkurë në Burrel është plagosur një militant i Partisë Demokratike, Alfred Lika. Ky i fundit, sipas vetë deklaratës së PD-së “ishte duke zbatuar dekretin e Presidentit, në mbrojtje të Kushtetutës”. Cituar kjo nga një njoftim shpërndarë për mediat nga zyra e shtypit e selisë Blu.

Aktet e dhunshme të së mërkurës bien ndesh me argumentin e Presidentit. Ai argumentoi se protesta e 8 qershorit do të kishte përfunduar në akte dhune të pallogaritshme atë natë, nëse s`do dilte dekreti i tij. Por cili është rezultati sot, dhjetë ditë më vonë?

Situata është tensionuar dhe ka ndezur vatrat e para të konfliktit, pikërisht për shkak të atij dekreti, apo në “mbrojtje” të atij dekreti. Kjo situatë, e cila pritet të kalojë një të enjte “përvëluese” më 20 qershor, mund të jetë prologu i një tensioni dhe më të madh të premten më 21 qershor, ku vatrat e konfliktit për momentin vetëm nëpër bashkitë e djathta, të ndizen përballë Kryeministrisë në protestën e thirrur nga PD-LSI, në Tiranë. Por a do të kenë guximin për ti shkuar deri në fund këtij skenari?!

Të mërkurën pasdite presidenca nxitoi të shpërndante një letër qe Meta ja ka dërguar OSBE dhe kreut të saj Lajçak, të cilin së bashku me disa të tjerë i quajti para disa ditësh ngatërrestarë. A është kjo shenjë se skenari i ditëve të fundit, që mund të kulmojë në 21 qershor, është një mjet final presioni për të bërë që ndërkombëtarët të ndryshojnë mendje për 30 qershorin? A është kjo përpjekja finale për të legalizuar një dekret, që sot është shkaku kushtetues për shkarkimin e Metës? A është fakti më i fundit i asaj që paralajmëruam një ditë më parë, se e gjithë kjo nxitje e rrëmujës, është në fakt vetëm një përpjekje e Ilir Metës për të shpëtuar jo vetëm Presidencën, por veten e tij, pas dekretit të diskutueshëm të 8 qershorit, që amerikanët e quajnë vetëm “njoftim”?

Ndërkohë përballë, Komandant Iliri dhe të tijët, kanë përballë maxhorancën, e cila nuk është e qartë në qëndrime sesa është në fjalë. Duket se kur ndërkombëtarët thonë se “zgjidhjen ta gjejnë vetë shqiptarët”, nënkuptojnë edhe përgjegjësinë dhe vendosmërinë e qeverisë për të mbajtur zgjedhjet në 30 qershor. Për këtë mbështetja e tyre nuk ka munguar për kryeministrin Rama. Por të mërkurën mesazhet e maxhorancës kanë qënë kontradiktore. Kryeministri Edi Rama dhe Ministri i Brendshëm Sandër Lleshaj, ashtu si dhe Policia e Shtetit, kanë bërë thirrje për distancim nga aktet e dhunës dhe pengimi i zgjedhjeve, pasi urdhëruesit e këtyre akteve do të përballen me ligjin. Por ndërsa kemi patur deklarime direkte të bashkiakëve demokratë, nga Voltana e Molotovëve e deri te Frani i tokave të Lezhës, ndërsa kreu i Kavajës jep ultimatume si Berisha në 9 mars 1997, ndërsa në Kukës policët sulmohen si kafshët nga disa mbështetës të PD, qeveria (ajo e llafeve të Lleshit dhe e nje ligji që gjoja nesër kalon në kuvend kundër krimit zgjedhor, por që s’do ketë asnjë efekt për dhunuesit e para 30 qershorit), “Policia ka vepruar me profesionalizëm për të shmangur përshkallëzimin e situatës”.

Të paktën, kështu u shpreh zëvendës ministrja e Brendshme Rovena Voda për të justifikuar tërheqjen përballë njerëzve në Kukës. Por a është Kukësi pjesë e Shqipërisë, që drejton Edi Rama? A është kjo shenjë e një paqartësie, pasigurie dhe tërheqjeje e maxhorancës përballë dhunës politike të paralajmëruar nga Meta, Berisha dhe Basha? Sot është momenti që maxhoranca të marrë përgjegjësitë e qeverisjes së vendit. Ajo nuk mund të presë me kompjuterin hapur, në pritje të ndonjë emaili nga Uashingtoni ose Lajçak. Ja dhe deklarata nga Lajçak erdhi. Po sa e ndryshon kjo situatën? Sa e forcon kjo deklaratë veprimin e qeverisë? Dhuna vazhdon. Nga Shkodra e Voltanës, e deri tek Delvina e Balilëve. Ajo ose duhet të vendose ruajtjen e ligjit dhe të rendit publik, ose të tërhiqet tani, siç thotë zëvendësministrja Voda. Nëse si Voda, mendon dhe kryeministri, se skenari do ketë viktima, dhe ata nuk e ndalkan dot, vecse duke u tërhequr, atëherë më mirë të tërhiqen tani sesa kur të vriten njerëz në 30 qershor. Këtë e ka paralajmëruar Meta, Berisha dhe tani po e thonë edhe grekët. Tërheqja sigurisht do kishte siklet dhe turp brenda pasi prej 5 muajsh, Rama i thotë njerëzve se ka zgjedhje në 30 qershor. Por nëse këtë është i paaftë ta sigurojë, atëherë më mirë të tërhiqet.

Mund të humbasë “betejën” bulliste përballë një opozite të dhunshme drejtuar nga një President i papërgjegjshëm, mund të humbasë besimin e ndërkombëtarëve tek Edi Rama si një lider i qendrueshëm, por të paktën nuk bëhet pjesë qoftë dhe padashje e skenarëve të përgjakshme të kokave të nxehta të Tiranës. E rëndësishme është të mos tërhiqet, si pasojë e një pazari. Edi Rama e di mirë përse ndërkombëtarët këmbëngulin që ai të mbajë zgjedhjet në 30 qershor. Se beteja e vërtetë fillon më pas: ajo Për SPAK.

Shqipëria nuk do ta humbasw luftën përballë të shkuarës dhe të keqes. Thjesht dikush e shtyn atë në kohë. E shtyn. Ky është suksesi i vetëm i dekretit personal të Ilir Metës, njëlloj si ato të Berishës në 1997: Që shtyn udhëtimin pa biletë kthyese të së shkuarës. Kemi pritur 30 vjet. Mund të presim edhe tre muaj.

Zaloshnja: Revolucionet kalojnë nga xhepi, jo nga zyrat e partisë

Nga Eduard Zaloshnja

Në secilën palë zgjedhje të çerek shekullit të fundit, ka patur incidente apo kontestime. Përjashim bëjnë vetëm ato të tetorit 1996. Sjellja e elektoratit në ato zgjerdhje është kyçi për të kuptuar se sa e vlerësojnë shqiptarët votën.

Zgjedhjet lokale të tetorit 1996 u zhvilluan vetëm pesë muaj pas zgjedhjeve famëkeqe të majit 1996, të cilat u konsideruan jo të lira e jo të ndershme nga OSBE/ODHIR, si dhe u kritikuan rëndë nga Uashingtoni e kanceleri të rëndësishme europiane. “Populli opozitar” ishte shumë i zemëruar pas zgjedhjeve të majit, ndërkohë që politikanët protestues opozitarë u rrahën keqazi nga policia e Berishës, në sytë e kamerave të televizioneve ndërkombëtare.

Ta donte mendja se, kur të zhvilloheshin zgjedhjet lokale (pas vetëm 5 muajsh), “populli opozitar” do të vazhdonte të ishte i zemëruar me brutalitetin e Berishës para, gjatë e pas zgjdhjeve parlamentare të majit. Por jo, asnjë incident nuk u shënua në zgjedhjet lokale të tetorit, asnjë parregullsi u vërejt nga vëzhguesit e OSBE/ODHIR, ndërkohë që kandidatët e Berishës për kryebashkiakë fituan në 80% të bashkive e komunave…

Çfarë magjie kishte bërë Berisha në pesë muaj? Në ata muaj, firmat piramidale shënuan lulëzimin më të madh, me reklama në Formula 1 dhe me Mario Kempesin trajner të Lushnjës, ndër të tjera. Ndërkohë, populli ende nuk e dinte se ato ishin thjesht skema piramidale, sepse Berisha e garantonte që ishin të pastra. Të pështjellë në histerinë e fitimeve të papara mujore (si dikur hollandezët në histerinë e tulipanëve në shekullin XVII), shqipëtarët iu përgjigjën me votë masive sloganit “Me ne fitojnë të gjithë”, të cilin Berisha e përdorte në tribuna elektorale, i shoqëruar nga bosat piramidalë.

Zhvendosemi disa muaj në kohë. Firmat piramidale falimentuan dhe dhjetra, në mos qindra, mijra shqiptarë u ngritën në revoltë për paratë (disa edhe për shtëpitë) e humbura në ato firma. Pas 4 mijë të vrarëve dhe 4 muajve të tjerë, u zhvilluan zgjedhje të parakohëshme. Dhe populli jo vetëm që nuk votoi për kandidatët e Berishës, por nuk i la as të bënin fushatë poshtë Shkumbinit…

Me pak fjalë, kur shqiptarëve të thjeshtë iu dhunua vota e lirë nga Berisha, reaguan vetëm militantët opozitarë. Ama kur iu prek xhepi i tyre, nuk e falën Berishën…

Zhvendosemi 12 vjet në kohë. “Populli opozitar” u zemërua në 2009-ën, sepse Berisha nuk pranoi të hapte kutitë në disa qarqe, ku Edi Rama pretendonte se PS-së i ishin vjedhur mandate. Por pas shumë protestave dhe 4 të vrarëve me duar në xhepa në bulevard, “populli opozitar” u qetësua. Dhe kur Basha i mori bashkinë Ramës me votat e peshkuara në “kutitë e gabuara”, militantët opozitarë vetëm dogjën disa goma në rrugët kryesore. Me fjalë të tjera, 1997-ta nuk u përsërit…

Dhe vijmë tani në ditët e sotme.

Pas publikimit në media të disa përgjimeve që linin të kuptohej se Vangjush Dako kishte bashkëpunuar me pjestarë të një bande kriminale në Shijak (për të shtuar vota për PS-në në 2017-ën), opozita i dogji mandatet e veta parlamentare dhe organizoi protesta me militantë të sjellë me autobuzë e furgonë në Tiranë. Tek nuk ka regjistruar kandidatë për 30 qershorin, ajo ka kërcënuar se do të bllokojë zhvillimin e zgjedhjeve në Shqipëri, për sa kohë Rama nuk ka dhënë dorëheqjen nga posti i kryeministrit. Dhe kërcënimin e bazon tek revolta e pritshme e shqiptarëve, të cilët, sipas saj, do të ngrihen në masë në çdo qytet, për të mos lejuar Ramën të zhvillojë zgjedhje.

Analiza e mësipërme na tregon se nuk ka gjasa për revoltë masive në lidhje me votën, për sa kohë nuk janë prekur drejtpërdrejt xhepat e shqiptarëve të thjeshtë. (Prekja e tërthortë e xhepave të shqiptarëve ka dekada që ndodh përmes taksave të shpenzuara për rrugë të tipit Rrëshen-Kalimash, që kanë kushtuar 220 milionë euro më shumë se ç’duhej, etj. etj.)

Kuksianët u ngritën masivisht kundër pagesës 5 euro në tunelin e Kalimashit, spese u prek drejtpërdrejt xhepi i tyre. Studentët u ngritën masivisht kundër pagesës për provimet e mbartura, sepse u prek drejtpërdrejt xhepi i tyre. Tiranasit u ngritën masivisht kundër sjelljes së lëndëve kimike siriane, sepse menduan se do të rrezikohej jeta e tyre. Ndërsa për bllokimin e zgjedhjeve në 30 qershor, mendja ta do se do të dalin në rrugë vetëm militantët e përhershëm të partive…

Kriza, ja axhenda politike sot

Një ditë pas firmosje së dekretit për anulimin e datës së zgjedhjeve, kjo e martë pritet të jetë e mbushur me të tjera zhvillime politike në vend. Kështu, Partia Socialiste tashmë e ka bërë fakt të kryer nismën për shkarkimin e presidentit Ilir Meta, teksa të hënën Taulant Balla depozitoi kërkesën për zhvillimin e një debati të gjatë në seancën parlamentare të së enjtes, ku do të diskutohet shkarkimi i Metës.

Për këtë arsye, gjatë paradites së sotme, në orën 09:00, do të mblidhet Konferenca e Kryetarëve në Kuvend, ku do të caktohet data e zhvillimit të mocionit të debatit dhe ora e tij, për shkarkimin e Ilir Metës.

Sakaq, Kryeministri Edi Rama do të jetë në një seri takimesh në Bruksel këtë të martë, ku sigurisht fokus i takimeve të tij do të jetë kriza politike në vend. Një ditë më parë, saktësisht mbrëmjen e së hënës, opozita dhe presidenti Ilir Meta, morën një tjetër goditje nga partnerët ndërkombëtar.

Ishte kreu i OSBE Miroslav Lajçak, që u shpreh se lëvizja e Ilir Metës ishte një akt që mund të thellonte krizën në Shqipëri, duke kërkuar që kreu i shtetit të respektojë të drejtën e qytetarëve për të votuar.

Ky reagim erdhi pas takimit që Kryeministri Edi Rama pati me ambasadorët e vendeve të BE në mesditën e të hënës, të cilët, siç i tha një burim Realstory.al, i kanë shprehur mbështetjen kreut të qeverisë.

Mbrëmjen e të hënës, edhe Bashkimi Europian i kërkoi presidentit që të respektonte të drejtën e qytetarëve shqiptarë për të votuar. Ishte zëdhënësja e shefes për Politikën e Jashtme të BE-së, Maja Kocijançiç, e cila në emër të Federica Mogherinit, ka deklaruar të hënën se qytetarëve shqiptarë duhet t’u jepet e drejta për të votuar për të siguruar vazhdimësinë e qeverisjes lokale.

Megjithatë, të martën pasdite, opozita ka lajmëruar se do të thërrasë mbledhjen e Këshillit Kombëtar për të vendosur se si do të jetë aksioni opozitar në vijim. Një ditë më parë, në mbledhjen e kryesisë, opozita vendosi ngritjen e strukturave të posaçme për atë që ajo e quan “parandalimin e rrezikut që i kanoset demokracisë”.

Por, po sot, priten të tjera reagime ndërkombëtare, duke pasur parasysh vizitën e Kreyministrit Edi Rama, që është angazhuar për të gjetur mbështetjen e ndërkombëtarëve, me qëllim që zgjedhjet të mbahen në afatin e caktuar, ndërsa pas tyre, ashtu siç ai vetë është shprehur një javë më parë në “Real Story”, të shihet mundësia për dialog.

OSBE “masakron” Metën: Dekreti thellon krizën, zgjedhje në 30 qershor

OSBE i ka dhënë një godite të fortë Presidentit Meta për dekretin e anulimit të zgjedhjeve më 30 qershor, ku kreu i OSBE, Miroslav Lajçak ka deklaruar se vendimi i Metës thellon më tej krizën politike, duke shkaktuar ndalim të funksionimit të institucioneve shtetërore. Madje, ai nuk është ndalur vetëm me qëndrimin për veprimin e Presidentit Meta, por ka shkuar më tej, kur ka kërkuar që institucionet shqiptare të zhvillojnë zgjedhjet brenda datës 30 qershor.

Në njoftimin zyrtar, deklarohet qartazi se Kryetari i Radhës i OSBE-së, njëkohësisht Ministër i Jashtëm dhe për Çështjet Evropiane i Sllovakisë, Miroslav Lajčák, “shprehu sot shqetësimin e tij lidhur me zhvillimet më të fundit në Shqipëri, të cilat mund të thellojnë më tej krizën politike dhe të çojnë në ndalimin e funksionimit të institucioneve shtetërore”.

Kryetari i Radhës u bëri thirrje udhëheqësve politikë të tregojnë vetëpërmbajtje dhe të respektojnë legjislacionin në fuqi, si edhe rolet kushtetuese të institucioneve demokratike përkatëse. Pritshmëria jonë është që udhëheqësit do të veprojnë në përputhje me parimet demokratike dhe do të respektojnë të drejtën e qytetarëve për të votuar për përfaqësuesit e tyre, brenda kufijve kohorë të vendosur nga kuadri ligjor shqiptar”, tha Lajçak, në një kohë që sipas Kushtetutës dhe Kodit Zgjedhor 30 qershori është afati i fundit ligjor për zhvillimin e zgjedhjeve. Gjithashtu, ai shprehu besimin e tij se Shqipëria është e aftë ta trajtojë vetë situatën, brenda kornizës së saj kushtetuese dhe ligjore, dhe se do të gjejë një zgjidhje, e cila do t’i mundësojë vendit të përqendrohet në sfidat e rëndësishme për qytetarët e Shqipërisë.

Më këtë deklaratë, Lajçak konfirmoi edhe qëndrimin e ambasadorëve të huaj në takimin me kryeministrin Rama, ku burimet kishin shpjeguar për realstory.al, se ata kanë mbështetur maxhorancën për këmbënguljen e saj për të ecur përpara me zgjedhjet, pavarësisht lëvizjes së Presidentit.

Borchardt: Lufta kundër korrupsionit, Shqipëria është përkeqësuar

Ambasadori i OSBE në tiranë Bernd Borchardt ka deklaruar se lufta ndaj korrupsion është përkeqësuar në këto dy vitet e fundit në Shqipëri duke shënuar një rënie në Indeksin e Transparency International që prej 2016.

Borchardt vlerësoi përpjekjet e policisë dhe prokurorisë për t’i vënë njerëzit përpara drejtësisë gjatë viti të fundit, por kërkoi një qasje të shumanshme në këtë drejtim.

“Korrupsioni është një nga pikat kryesore të punës të Prezencës së OSBE-së. Shohim me keqardhje që Shqipëria ka pasur përkeqësim në këtë fushë gjatë dy viteve të shkuara. Shqipëria ka shënuar rënie në Indeksin e Transparency International që prej vitit 2016. Dimë që këtë vit janë bërë më shumë përpjekje nga policia, inspektimet dhe nga prokuroria për t’i vënë njerëzit përpara drejtësisë, por kjo është një çështje që kërkon një qasje të shumanshme.” tha Borchardt.

Këto komente ambasadori Borchardt i bëri gjatë çeljes së një ekspozite me teme korrupsioni në galerinë e Liceut Artistik “Jordan Misja” në Tiranë.

Meta takon Lajçak: Urgjente zgjidhja e krizës politike dhe institucionale

Presidenti i Republikës Ilir Meta priti në takim Kryesuesin e OSBE-së, Miroslav Lajçak, njëherësh edhe Ministri për Europën dhe Punët e Jashtme të Sllovakisë. Meta vlerësoi vëmendjen që Kryesia sllovake i ka kushtuar rajonit të Ballkanit Perëndimor dhe mbështetjes së kandidaturës shqiptare për kryesimin e Organizatës gjatë 2020-s.

“Në këtë sipërmarrje, Shqipëria do të mbështetet në ekspertizën e Sekretariatit të OSBE-së dhe të vendeve partnere, duke siguruar vazhdimësinë e prioriteteve me kryesitë e mëparshme, përfshirë dhe Sllovakinë”, – u shpreh Presidenti Meta.

Kreu i Shtetit inkurajoi gjithashtu forcimin e marrëdhënieve dypalëshe mes Shqipërisë dhe Sllovakisë, përfshirë bashkëpunimin edhe më të madh në kuadër të Grupit të Vishegradit.

Duke u ndalur në Kryesinë shqiptare të OSBE për vitin e ardhshëm, Presidenti Meta theksoi se kjo është një përgjegjësi shumë e madhe që kërkon përkushtim tejet serioz edhe për vetë ndikimin që ka për imazhin e vendit.

“Është e domosdoshme që gjatë kryesisë së OSBE-së, Shqipëria të reflektojë vlerat e mirëfillta të demokracisë, të shtetit ligjor dhe të respektimit të lirive themelore, duke mishëruar denjësisht imazhin e Organizatës”, – theksoi Presidenti Meta.

Në këtë kontekst, Kreu i Shtetit evidentoi domosdoshmërinë e zgjidhjes urgjente të krizës së thellë kushtetuese, institucionale, politike dhe përfaqësuese ku ndodhet vendi, përmes reflektimit dhe dialogut.

Presidenti i OSBE Lajçak refuzon të takojë opozitën jashtë Kuvendit: Dhuna, e keqe dhe… e mërzitshme

Presidenti i radhës i OSBE-së, Miroslav Lajcak ka refuzuar të takohet me përfaqësues të opozitës jo parlamentare, ndërkohë që është takuar me opozitën e re parlamentare, konkretisht me Rudina Hajdarin.

Gjatë qëndrimit të tij në Tiranë, Lajcak nuk është takuar as me Bashën, as me Kryemadhin dhe me asnjë përfaqësues tjetër të opozitës, ndërsa e ka cilësuar të gabuar rrugën e protestave.

Duke folur ashpër kundër qëndrimit bojkotues të opozitës, Lajcak tha se protestat e dhunshme janë bërë të mërzitshme dhe se ato nuk zëvendësojnë procesin parlamentar.

Kete deklarate Lajcak e beri një konferencë të përbashkët për shtyp me ministrin Cakaj, ku foli për protestat e opozitës dhe për djegien e mandatave. Sipas tij, djegia pengon e mandateve nga opozita është një vendim për të ardhur keq.

“Dëshiroj të theksoj se institucionet e forta me një parlament efikas janë gurët themelorë të demokracisë dhe janë të qenësishëm për stabilitetin e shtetit ligjor. Nxis aktorët politikë të angazhohen në forcimin e këtyre institucioneve. Protestat paqësore janë një e drejtë themelore që duhen respektuar. Dallimet duhet të debatohen në Parlament nga të gjithë përfaqësuesit përfshirë dhe opozitën. Përshkallëzimi i dhunës gjatë disa protestave të drejtuar nga opozita është bërë është bërë e mërzitshme. Trazirat nuk duhet të zëvendësojnë angazhimin demokratik, përkundrazi ato heqin çdo shans për dialog dhe çdo shans për të gjetur një terren të përbashkët. Dua të them hapur se vazhdimi i protestave të dhunshme do të dëmtojë përpjekjet e Shqipërisë për reforma dhe padyshim do të pengojë për realizimin e përparësive të brendshme dhe ndërkombëtare” deklaroi Lajçak.

Lajçak tha se e vetmja mënyrë për të gjetur zgjidhje për krizën politikë është dialogu konstruktiv. Ndërsa dënoi sulmin që iu bë ambasadorit të OSBE, Bernd Borchardt. “E vetmja mënyrë për të arritur përparim dhe për të gjetur zgjidhje është përmes dialogut konstruktiv me të gjithë palët e interesuara, përfshirë shoqërinë civile dhe botën akademike, për të kaluar këto dallime dhe për të punuar në interes të vendit tuaj. Vendimi i opozitës për të hequr dorë nga mandatet e tyre është për të ardhur keq. Demokracia kërkon kontroll dhe balancë dhe opozita ka një rol të rëndësishme. Pjesëmarrja në institucionet demokratike është e vetmja rrugë drejt pushtetit politik. Dhuna dhe frikësimi i zyrtarëve të organizatave ndërkombëtare është e papranueshme. Ne e përbuzim fuqimisht përpjekjet e bëra ndaj misionit të OSBE. Ndaj falënderojmë qeverinë për ndërmarrjen e veprimeve të duhura në këtë drejtim”, u shpreh Presidenti i OSBE.

Ndërsa ministri Cakaj deklaroi se zgjedhjet do të mbahen më 30 qershor dhe nuk ka forcë që i ndalon. “Dhuna e opozitës është e papranueshme për imazhin që ka Shqipëria aktualisht dhe nuk i kontribuon cilësisë së reformave”, tha Cakaj në konferencën e përbashkët për shtyp.

Të njëjtin qëndrim Presidenti i OSBE-së, Miroslav Lajcak shpehu dhe në takimin që zhvilloi sot me kryetarin e Kuvendit Gramoz Ruçi.

“Protestat janë një mjet demokratik, por ato nuk mund të zëvëndësojnë procesin parlamentar dhe debatin në Parlament. Opozita është zgjedhur për të ushtruar përgjegjësitë e saj parlamentare. Reformat duhet t’i vazhdoni në mënyrë të pakthyeshme dhe duke bërë kujdes të mos dëmtoni rezultatet e deritanishme. Parlamenti është funksional, ka kuorumin kushtetues dhe shumicat e nevojshme për të punuar normalisht dhe për të marrë vendimet e duhura në të mirë të vendit. Shqipëria nuk është një ishull i izoluar, por pjesë e organizatave ndërkombëtare dhe të gjithë partnerët ndërkombëtare e kanë bërë të qartë se askush nuk ka miratuar e nuk miraton veprimet e opozitës kundër sistemit. Asnjë arsye që ngre opozita nuk është argument për të braktisur mandatet dhe detyrimet parlamentare. Të gjithë ju inkurajojmë të ecni përpara dhe do të vazhdoni të kini mbështetjen e partnerëve ndërkombëtarë”, u shpreh Lajcak.

Përfaqësuesi special i OSBE: Turbulencat politike zgjidhen vetëm me dialog

“Turbulencat politike në Shqipëri mund të zgjidhen vetëm me dialog dhe në mënyrë paqësore, duke përjashtuar kategorikisht përdorimin e dhunës”. Kështu është shprehur Përfaqësuesi Special i OSBE, Ambasadori Andreas Nothelle gjatë një takimi që zhvilloi të mërkurën me kryetarin e Kuvendit, Gramoz Ruçi.

Në këtë takim Nothelle ishte i shoqëruar nga Ambasadori Bernd Borchardt, Kryetar i Prezencës së OSBE-së në Shqipëri.

Ambasadori Nothelle ka ardhur në Shqipëri për të ndihmuar shërbimet e Kuvendit dhe Ministrisë për Europën dhe Punët e Jashtme për kryerjen me sukses të misionit të Shqipërisë si Presidente e OSBE-së në vitin 2020. Ai tha se komuniteti ndërkombëtar ka besim të plotë te Shqipëria dhe se një vend i vogël mund të tregojë një lidership të madh.

“Komuniteti ndërkombëtar ka besim të plotë se Shqipëria do ta përmbushë me sukses të plotë këtë mision të rëndësishëm në nivel global. Asambleja Parlamentare dhe Sekretariati i OSBE-së janë krenarë për Presidencën shqiptare, angazhimin tuaj dhe pritshmëritë e mëdha që kemi nga kjo Presidencë. Shqipëria do të tregojë se si një vend i vogël mund të bëhet një lidership i madh”, theksoi ambasadori Nothelle.

Ndërsa kryetari i Kuvendit Ruçi tha se Shqipëria do ta marrë seriozisht rolin e sja si kryesuese e presidencës së OSBE-së në vitin 2020.

“Shqipëria po përgatitet seriozisht për të përmbushur me sukses të gjitha detyrat në kuadrin e Presidencës së OSBE-së, për të kontribuar për sigurinë dhe stabilitetin në të gjitha rajonet ku OSBE është prezente, por edhe në rajonin tonë. Presidenca e OSBE-së është një mundësi që Shqipëria të konfirmohet si një faktor kyç për garantimin e sigurisë dhe paqes në botë dhe si një kampion i vlerave evropiane e perëndimore. Kuvendi i Shqipërisë do të mbështesë maksimalisht Qeverinë dhe institucionet shqiptare të angazhuara në këtë lidership”,-tha Ruçi.

**Ambasadori Andreas Nothelle gjate takimit me Kryetarin e Kuvendit, Gramoz Ruçi**

Borschardt nuk “zë mend”. Paralajmëron sërish opozitën

Pak orë para protestës së opozitës, ka reaguar prezenca e OSBE-së në Tiranë, e cila i bën thirrje opozitës për të mos lejuar aktet e dhunës. Në reagimin e saj, OSBE thekson se është i papranueshëm dhe i paligjshme përdorimi i kokjeteve të molotovit, të shashkave dhe gurëve ndaj policisë, sikurse bën thirrje që edhe policia të jetë e kujdeshme dhe të mos tekalojë me përdorimin e forcës.

“E tërë familja e OSBE-së – Prezenca e OSBE-së në Shqipëri, Kryetari i Radhës i OSBE-së dhe ministri i Jashtëm e për Evropën i Sllovakisë, Miroslav Lajčak, Sekretari i Përgjithshëm i OSBE-së, Thomas Greminger, Presidenti i Asamblesë Parlamentare të OSBE-së, George Tsereteli dhe Sekretari i Përgjithshëm i Asamblesë Parlamentare të OSBE-së, Roberto Montella — e dënuan fuqishëm përdorimin e dhunës, nga ana e protestuesve, në kryeqytetin e Shqipërisë, Tiranë, më 11 maj 2019. Ata theksuan të drejtën për t’u tubuar dhe për të protestuar në mënyrë paqësore, por nënvizuan se dhuna është e papranueshme dhe se trazirat nuk mund të zëvendësojnë angazhimin politik demokratik. E sjellim në vëmendje këtë deklaratë përpara protestës së 25 majit 2019. Deklarata mbetet po aq e vlefshme sa edhe dy javë më parë. Koktejet e molotovit, hedhja e gurëve dhe e shashkave janë të paligjshme; reagimi i tepruar i forcave të rendit nuk mund të pranohet. I nxitim pjesëmarrësit dhe drejtuesit e protestës së sotme të jenë të përmbajtur”, shkruhet në reagimin e OSBE-së.

Ajo thekson më tej se “përmendja e derdhjes së gjakut, pak ditë përpara një proteste publike, është e papërputhshme me demokracinë moderne dhe me protestat demokratike”.

OSBE bëhet gati për zgjedhjet. Glover, sot konferencë në Tiranë

Pavarësisht vendimit të opozitës për të mos marrë pjesë në zgjedhjet e 30 qershorit, zyra e OSBE/ODIHR-it po bën përgatitjet e fundit për monitorimin e procesit zgjedhor në Shqipëri. Sot në Tiranë, ambasadorja Audrey Glover që është edhe drejtuesja e misionit të vëzhgimit të zgjedhjeve do të zhvillojë një konferencë për shtyp. Ajo do t’i përgjigjet interesit të mediave për hapjen zyrtare të misionit të vëzhgimit të zgjedhjeve vendore të 30 qershorit në Shqipëri.

“Misioni i OSBE/ODIHR-it për vëzhgimin e zgjedhjeve do të jetë në partneritet me një delegacion nga Kongresi i Autoriteteve Vendore dhe Rajonale të Këshillit të Evropës për vëzhgimin dhe lëshimin e një deklarate paraprake mbi gjetjet dhe përfundimet, në ditën pas zgjedhjeve.

Ardhja e misionit të OSBE/ODIHR-it për vëzhgimin e zgjedhjeve bëhet në bazë të një ftese nga qeveria shqiptare.

Misioni i OSBE/ODIHR-it për vëzhgimin e zgjedhjeve dhe Prezenca e OSBE-së në Shqipëri veprojnë në mënyrë të ndarë dhe të pavarur, sipas mandateve të tyre”, njofton zyra e shtypit e OSBE-së.