Shtohet “rrethimi” ndaj Ndojës. Pas KLP, nën hetim nga Arta Marku

Vetëm pak orë pasi Këshilli i Lartë i Prokurorisë kërkoi hetim për prokurorin Arjan Ndoja, Prokuroria e Përgjithshme është vënë në lëvizje. Me anë të një deklarate për mediat, Prokuroria e Përgjithshme Arta Marku lajmëroi se nisi “verifikimin e fakteve të bëra publike në rastin e prokurorit Arjan Ndoja. Verifikimet konsistojnë në mbledhjen e të dhënave për shkeljen e rregullave të papajtueshmërisë me funksionin e magjistratit, parashikuar në nenin 103 shkronja “a” të ligjit 96/2016 “Për statusin e gjyqtarëve dhe prokurorëve në Republikën e Shqipërisë”, thuhet në deklaratën e Prokurorisë së Përgjithshme.

Ky zhvillim erdhi pasi në makinën e prokurorit Arjan Ndoja u gjetën fashikuj të dosjeve hetimore, të cilët dyshohet se i përkasin dosjes së pronave që ishte vjedhur në Prokurorinë e Durrësit një vit më parë. Gjithashtu, dyshohet se një pjesë e fashikujve të gjetur i përkasin dojes së Skerdilajd Konomit, gjyqtarit të vrarë në atentat me tritol në vitin 2011, ku dyshohet se shkaku ishte pikërisht një pronë që ai kishte në pronësi në Durrës. Prokurori Ndoja e pranoi se në mjetin e tij ishin gjetur këto dokumenta, por ai arsyetoi se i mbante pasi i përkisnin studios së tij ligjore.

Por ky argument nuk e justifikon faktin, pasi sipas ligjit prokurorit nuk i lejohet që ndërkohë që ushtron funksionin publik shtetëror, të ketë dhe aktivitetin privat me studio ligjore. Kujtojmë se gjatë të mërkurës, Realstory.al publikoi fakte se prokurori Ndoja e kishte aktive studion ligjore deri në vitin 2009, kohë në të cilën ai ushtronte dhe detyrën si prokuror.

Gjithashtu, edhe në rastin tjetër, nëse fashikujt e gjetur në makinën e prokurorit vërtetohet se i përkasin dosjes së vjedhur në prokurori dhe dosjes Konomi, përsëri prokurori ndodhet në telashe. Po sipas ligjit, prokurorit nuk i lejohet kurrësesi të mbajë me vete dosje hetimore. Për të dyja rastet do të jetë Prokuroria e Përgjitshme që do të duhet të vërtetojë se cilat ishin arsyet që fashikujt hetimor ndodheshin në mjetin e prokurorit.

KLP, KËRKESË ARTA MARKUT: NISNI HETIMIN DISIPLINOR PËR ARIAN NDOJËN

SI FAMILJA NDOJA MPLEKSET ME LALZIN DHE PRONAT E LIBANEZIT MITRI

BASHKËSHORTES SË PROKURORIT NDOJA, I DHURUAN 196 MIJË M2 TOKË NË DURRËS

“Dosja Konomi në makinën e Ndojës”: I vjedhur nga posta e Prokurorisë. Zbulohet më shumë oktapodi kriminal

Detaje të tjera dalin në dritë nga hetimet për atentatin ndaj prokurorit Arjan Ndoja. Sipas Top Channel, në makinën e prokurorit, që iu bë atentat të premten e javës së kaluar, janë gjetur disa dosje. Ato dyshohet se janë dosje që lidhen me pronat në Gjirin e Lalzit. Ndër dokumentat e gjetura është dhe dosja e vjedhur nga kasaforta e Prokurorisë së Durrësit një vit më parë, si dhe dosja e gjykatësit të vrarë disa vite më parë në Vlorë, Skerdilajd Konomi.

Referuar këtij lajmi, “burimet thonë se pista kryesore e hetimit është pikërisht një konflikt për tokat e pretenduar nga familja e viktimës, ku disa kohë më parë është bërë një transaksion i dyshimtë në hipotekën e Durërsit në favor të një organizate kriminale, çka mendohet se ka çuar edhe në konfliktin mes prokurorit dhe drejtuesit të ri të hipotekës që kishte rënë në gjurmët e këtij transaksioni”.

Nëse këto vërtetohen zyrtarisht, atëherë provohet faktin i lidhjes së prokurorit me personin me rekorde kriminale që gjendje në makinë me të, i cili figuron pjesëtar i asaj organizate. Ndërkohë, në vitin 2018 në Prokurorinë e Durrësit ndodhi një grabitje e dokumenteve nga persona të paidentifikuar, të cilët morën serverin ku dyshohet se ishin dokumente që lidheshin me problemin e pronave në Gjirin e Lalzit.

Mbrëmjen e të hënës, në studion e “Real Story”, gazetarja Klodiana Lala u shpreh se drejtori i Postës në Durrës është vëllai i personit Pëllumb Muharremit apo njohur ndryshe si “Rrumi”, personi që ndodhej në makinë me prokurorin Ndoja gjatë atentatit të së premtes. Kujtojmë se një vit më parë, veç serverit të prokurorisë së Durrësit, u vodh dhe posta e prokurorisë, ku dyshohej se dokumentet që ndodheshin aty lidheshin pikërisht me dosjen e pronave. Por ishte ish prokurori Shkëlqim Hajdari, i cili paralajmëroi të hënën se në dosjen e atentatit do të dalin të lidhura edhe çështje te tjera, perfshire edhe vrasjen e gjykatesit Konomi.

Dritëhijet në 15 vjet të një prokurori, që priste vettingun

Arjan Ndoja, prokurori që mbeti i plagosur gjatë atentatit të së premtes, nuk është një emër që lindi rishtazi pas deklaratës së kryeministrit Rama për KÇK, i cili për hir të së vërtetës, nuk ia përmendi emrin, por që një ditë më vonë, ia publikoi zëvendëskryeministri Braçe. Historia e prokurorit Ndoja dhe dritëhijet për të nisin shumë më herët, rreth 15 vjet më parë.

Arjan Ndoja ka punuar nga viti 2001 deri në vitin 2004 si prokuror. Në vitin 2004, prokurori Arjan Ndoja u shkarkua nga detyra nga Dhori Sollaku dhe në atë kohë, sipas deklarimit të pasurisë, ka deklaruar vetëm pagën e tij prej 75 mijë lekësh dhe të bashkëshortes së tij prej 20 mijë lekësh dhe asnjë lloj biznesi apo të ardhure tjetër, ndërkohë që në vitin 2008 ai zotëron një pasuri prej 780 mijë eurosh, një pjesë e të cilave e shndërruar në suita banimi në Tiranë dhe në Lezhë, lokale në zonën turistike të Shëngjinit dhe në makina luksoze.

Një shumëfishim i tillë i pasurisë brenda një kohe kaq të shkurtër, është i pabesueshëm edhe sikur prokurori Ndoja të ketë fituar ndonjë lotari. Është më tepër se qesharak fakti që ai deklaron se ka mundur të vendosë këtë pasuri duke punuar si avokat, ndërsa rezulton se një punë të tillë e ka deklaruar pranë organeve tatimore vetëm për një periudhë 3 mujore.

Por le t’i marrim faktet me radhë. Pas shkarkimit në 2004, Ndoja hap një betejë ligjore për t’u rikthyer në detyrë, betejë që e fiton në vitin 2007 dhe në vitin 2008 riemërohet prokuror në Durrës, ku vazhdon detyrën edhe sot. Por me marrjen e detyrës, atij iu desh të deklaronte dhe një herë pasurinë. Pas katër vitesh, ai deklaron një pasuri që arrinte në total 780 mijë euro, ndërkohë që kolegët e tij dhe të gjithë shqiptarët janë të vetëdijshëm se një gjë e tillë është krejtësisht e pamundur. Edhe në vitin 2008, të ardhurat e të gjithë anëtarëve të familjes së prokurorit me një matematikë të thjeshtë nuk do ta justifikonin shumën e konsiderueshme prej 750 mijë eurosh që ai zotëron, edhe nëse do të mblidheshin për një periudhë njëshekullore. Por, përveç kësaj, rezulton se Ndoja ka punuar si avokat në punë të zezë ose i paregjistruar që nga viti 2004 kur u shkarkua nga detyra, deri në vitin 2006 kur është regjistruar si subjekt.

Gjatë gjithë kësaj kohe për të cilin ai pretendon se ka mundur të grumbullojë shumën prej 750 mijë eurosh, ai ka shmangur taksat, duke konsumuar në këtë mënyrë veprën penale të evazionit fiskal. Për këtë në vitin 2008, pati edhe një hetim, i cili nisi pas një ankese të bërë nga një qytetar, i cili quhet Kadri Voga dhe rezulton se është babai i Edmond Vogës. Ky i fundit për disa vite ka punuar si shofer i prokurorit Ndoja, ndërsa i ati pretendonte se para se Ndoja të rikthehej në prokurori, kishte kërkuar që i biri të firmoste me të një kontratë fiktive për një borxh rreth 70 mijë euro. Megjithatë, kjo kontratë fiktive solli një sherr të madh në familje dhe babai me të birin nuk folën për disa vite. Kadri Voga vijoi betejën gjyqësore që ta rrëzonte këtë kontratë fiktive, sipas të cilës nëse nuk kthente borxhin i biri, Ndoja do të përfitonte gjysmën e një lokali, që ndodhet në zonën e Krujës.

Voga e humbi betejën ligjore për kontratën, por me disa lëvizje, prokurori kaloi në pronësi, jo vetëm gjysmën e lokalit, por të gjithin. Këtu nisi një tjetër betejë ligjore, e cila ka vijuar deri në fund të vitit 2018, kur prokurori Ndoja ndjeu aromën e vettingut. Në fund të këtij viti, pas disa vitesh gjyqe, ai vendos që lokalin, për të cilin kishte luftuar me vite të tëra, t’ia dhuronte djalit të Kadri Vogës, i cili llogaritet në një vlerë 150 mijë euro në total.

Megjithatë, sërish duket se llogaritë e tij nuk dalin për të kaluar vettingun, veç denoncimeve të bëra për evazion fiskal, ai pati edhe një konflikt me avokatin Ilia Ilia, për të cilin ka përfunduar në gjyq Edmond Voga, ish shoferi i prokurorit dhe tashmë pronari i lokalit, ndërsa prokurori vazhdon të jetë nën hetim. Mosdeklarimi dhe mosjustifikimi i të ardhurave, që sipas hetimeve të mbyllura në vitin 2008, nuk përbënin vepër penale, me reformën në drejtësi dhe me procesin e vettingut përbëjnë një provë të pakontestueshme për shkarkimin e tij.

Ndërkaq, sikur të mos kishin mjaftuar këto probleme me pasurinë, tashmë atij i është shtuar edhe problemi me pastërtinë e figurës, duke pasur parasysh se me kë shoqërohej pikërisht të premten, kur iu bë atentat, me një person me precedentë penalë.

Dhe pikërisht duke parë këtë të shkuar vetëm me disa fakte që tashmë dihen edhe nga kolegët e Ndojës, lind natyrshëm pyetja, a ishte atentat ndaj një prokurori?

Atentati ndaj prokurorit, dinamika, pistat e hetimit dhe detajet e sulmit

Atentati me kallashnikov ndaj prokurorit të Durrësit Arjan Ndoja zgjati jo më shumë se 60 sekonda në zonën e mbikalimit të Shkozetit. Në fuoristradën e prokurorit ndodhej shoferi i tij Andi Maloku dhe i “forti” i Sukthit, Landi Muharremi, ku të tre mbetën të plagosur gjatë sulmit me armë. Gjendja e Malokut është e rëndë dhe ndodhet në Tiranë për trajtim të specializuar, ndërsa prokurori Ndoja dhe personi me precedent penal i njohur si “i forti” i Sukthit Muharremi ndodhen jashtë rreziku për jetën.

Dy prokurorët, Anton Martini dhe Besim Hajdarmataj nga Krimet e Rënda, po hetojnë atentatin në 4 pista të ndryshme. Ata e kanë përqendruar hetimin në pistën e konflikteve personale të personave si Ndoja, Muharremi apo Maloku; atentat për shkak të detyrës së prokurorit; përplasje të grupeve kriminale; konfliktet për pronat.

Vetë Ndoja ka dëshmuar se nuk është ai objektiv i sulmit, pasi nuk ka asnjë konflikt dhe ka refuzuar kategorikisht që të lidhë atentatin për shkak të detyrës së tij. Ndoja ka thënë se ka qenë duke drekuar në një restorant në Durrës kur në tryezë më pas janë ulur edhe Maloku dhe Muharremi.

“Kam qenë duke drekuar në një restorant. Erdhi Maloku e Muharremi e një tjetër dhe janë ulur në restorant. Më pas u nisëm drejt Tiranës. Nëse do të më adresoheshin mua, nuk kishin arsye të më vrisnin në autostradë. Mua mund të më vrisnin në derë të shtëpisë, në prokurori. Nuk ka arsyeje që të më sulmonin në autostradë”, ka dëshmuar Ndoja para kolegëve të tij që po hetojnë çështjen. Ndërsa Landi Muharremi nuk ka dhënë ende dëshminë e tij pasi plumbi e ka prekur në zonën e nofullës.

Autorët e atentatit patën nën vëzhgim shënjestrën e tyre gjatë gjithë paradites së të premtes dhe ndoqën çdo lëvizje të prokurorit derisa hapën zjarr me breshëri plumbash ndaj makinës së tij. Pamjet filmike në zonë tregojnë se në atentat ishin dy makina, ku njëra i preu rrugën makinës së Ndojës dhe tjetra hapi zjarr me breshëri kallashnikovi. Pamjet filmike fiksuan automjetin që ndjek nga pas në një distancë të shkurtër fuoristradën e prokurorit dhe më pas ecën paralelisht me makinën e Ndojës , e parakalon në anën e kundërt dhe hap zjarr. Ishin manovrat e shoferit Andi Maloku, që iu shpëtuan jetën Ndojës dhe Lahos, i cili spostoi makinë drejt një kanali, 20 metra larg vendit të sulmit. Në vendin e ngjarjes u gjetën 20 plumba, 6 prej të cilëve depërtuan makinë, duke plagosur 3 personat brenda.

Autorët, të pajisur me maska dhe armë, u larguan nga rruga e Ishmit, duke shmangur rrugët që monitorohen nga kamera sigurie apo bizneseve rrotull. Një nga makinat e autorëve tip “Benz”, ngjyrë gri me targa AA342 LM u gjet në Ishëm e pa djegur. Kjo ndodhi pasi një banorë i zonës aty iu foli autorëve duke thënë ‘se çfarë po bëjnë’. Kjo bëri që autorët të largohen me shpejtësi dhe të lënë brenda makinës gjurmë të shumta që do të ndihmojnë prokurorët të zbardhin autorët dhe ngjarjen e rëndë. Targa e makinës së autorëve, AA342 LM është e vjedhur në një qytet tjetër të Shqipërisë. Brenda automjetit të autorëve, u gjetën 9 gëzhoja, dy automatikë kallashnikov dhe një pistoletë 9 mm, 2 maska dhe 2 shishe benzinë. Këto prova janë dhe shpresa më e madhe e prokurorisë për zbardhjen e plotë të ngjarjes.

Prokuroria thotë se atentati ka qenë i porositur dhe autorët dyshohet se janë vrasës me pagesë, nga veriu i vendit ose nga Kosova. Mbi 20 persona u shoqëruan në lidhje me zbulimin e detajeve mbi atentatin, mes tyre dhe anëtari i bandës së Lul Berishës, Julian Meçe, i cili u përfshi në një atentat në muajin qershor. Meçe u pyet nga grupi hetimor, si person që mund të ketë dijeni për rrethanat e ngjarjes dhe më pas u la i lirë.

Atentati ndaj prokurorit, Krimet e Rënda marrin në dorë hetimet

Prokuroria e Krimeve të Rënda mori në dorë dosjen hetimore për atentatin ndaj Prokurorit të Durrësit Arjan Ndoja. Kryesimi i hetimeve do të bëhet nga prokurori Anton Martini, i cili së bashku me grupin hetimor shkuan në vendin e ngjarjes. Pista kryesore hetimore pritet të jetë ajo për shkak të detyrës së prokurorit Arjan Ndoja.

Ai ishte prokuror i dosjes së skandalit të pronave në Durrës. Gjithashtu, në vendin e ngjarjes së atentatit ndaj prokurorit Arjan Ndoja, ku mbeti i plagosur ai së bashku me shoferin e tij dhe një person tjetër, shkuan dhe drejtuesit më të lartë të Policisë së Shtetit.

Ardi Veliu, kreu i përgjithshëm i Policisë së Shtetit dhe drejtori i departamentit të Policisë Kriminale Tonin Vocaj, shkuan në vendin e ngjarjes ku po kqyrin nga afër automjetin e prokurorit për të mbledhur provat.

Ndërkohë, Policia është vënë në ndjekje të autorëve të atentatit. Paraprakisht dyshohet se automjeti është qëlluar me tetë plumba, por ky është vetëm informacioni paraprak. Prokurori Arjan Ndoja dhe shtetasi Aleksandër Laho ndodhen jashtë rrezikut për jetën, ndërkohë që shoferi i tij Andi Maloku është transportuar në spitalin e traumës në Tiranë për mjekim të specializuar.

Marsida, dy herë në prokurori për dëshmi

Marsida Qatja, “molla e sherrit” që i kushtoi jetën një personi dhe një tjetër mbeti i plagosur në Kavajë, është thirrur përsëri në Prokurori. 30-vjeçarja dyshohet se ka deklaruar dëshmi të rreme në Prokurorinë e Kavajës, në lidhje me ngjarjen e të enjtes, ku mbeti i vdekur shtetasi Dritan Hoxholli dhe u plagos Bledar Toçi.

Në dëshminë e parë në Prokurori, Marsida Qatja deklaroi se ka pasur lidhje intime me viktimë Dritan Hoxholli, ndërsa në deklaratat dhënë për mediat ajo e mohoi një gjë të tillë. Gjithashtu, Prokuroria dyshon se Marsida Qatja ka gënjyer edhe për raportin me efektivin Bledar Toçi. Sipas gazetares Klodiana Lala të Neës 24, gjatë hetimeve janë zbuluar mesazhe në telefonin e Marsida Qatjas, që kompromentojnë raportin e saj me efektivin Bledar Toçi.

Ajo deklaroi në Prokurori dhe në media se me policin që qëlloi ndaj viktimës Dritan Hoxholli, ishte thjesht shok, por mesazhet e zbuluara në telefon tregojnë të kundërtën. Ajo është marrë në pyetje edhe për ngjarjen që ndodhi në banesën e saj, pasi dyshohet se ka dhënë versione të ndryshme mbi atë që ndodhi të enjten.

Suli çon në prokurori Mziun: Dha leje ndërtimi në zonën “Park Kombëtar”

Një javë pasi mori drejtimin e bashkisë së Kamzës, Rakip Suli ka deklaruar se do të dërgojë në prokurori paraardhësin e tij, Xhelal Mziu. Shkak, sipas Rakip Sulit, është fakti se Mziu ka dhënë leje ndërtimi në një zonë e cila është planifikuar të bëhet Park Kombëtar. Gjatë një dalje për mediat të enjten pasdite, nga bregu i lumit të Tiranës, Rakip Suli ka sqaruar, sipas tij, shkeljet ligjore që ka bërë Xhelal Mziu.

“Kamza tani ka një mori problemesh, por do ti rendisim sipas problematikave dhe nga ato më emergjentet. Ish-kryebashkiaku ka dhënë një leje ndërtimi me datë 29.07.2019. Në bazë të një vendimi të nxjerrë në vitin 2013, e gjithë kjo pjesë është planifikuar për Park Kombëtar. Është menduar që kjo zonë të ishte një Park Kombëtar. Dhe mendohet se edhe bulevardi kryesor i Tiranës do të vijë këtu ku jemi. Është dhënë kjo leje ndërtimi, brenda këtij territori duke shkelur të gjitha ligjet. Ky është një vendim kriminal i miratuar me datë 29.07. 2019. Qytetarëve nuk u bëhet legalizimi dhe nga ana tjetër këto japim leje. Madje kjo është një pjesë me ujë. Jemi duke dhënë leje ndërtimi në shtratin e liqenit. Brenda muajit është marrë leja e ndërtimit. Këtu mendohet do të bëhet një park për të gjithë qytetarët e Kamzës. Do të ngrihet padi për këtë çështje dhe për të gjithë personat përgjegjës”, tha Suli.

Ai ka folur edhe për ndryshimet në administratë, duke u shprehur se nuk do të ketë largime të profesionistëve nga puna. “Nuk më ka vajtur mendja për largim. Nga stafi im do të jenë njerëz profesionistë. Kjo nuk ka për të ndodhur, çdo person që ka qenë i përgjegjëshëm dhe ka arsimin përkatës do të vijojë rrugëtimin me Rakip Sulin”, deklaroi ai Rakip Suli mori detyrën rreth një javë më parë. Kjo Bashki drejtohet pas 12 vitesh nga socialistët, pasi në krye të saj ka qëndruar Xhelal Mziu.

Basha 90 minuta para prokurorëve belgë, asnjë detaj se kush e informoi për paratë në “Toyota Yaris”

Kryetari i PD-së, Lulzim Basha ka dhënë dëshminë e tij për rreth 90 minuta në Prokurorinë e Krimeve të Rënda ku është marrë në pyetje nga prokurorë belgë në lidhje me çështjen e 3.4 milionë eurove të drogës në “Toyota Yaris”.

Basha mbërriti në prokuri me 20 minuta vonesë dhe qëndroi mbi 1 e 30 minuta përpara prokurorëve. Por pasi doli nga prokuroria nuk dha asnjë detaj në lidhje me çështjen. Ai tha vetëm se ka dhënë informacion të bollshëm për prokurorët ndërsa deklaroi se Taulant Balla sot duhet të ishte në pranga për pastrim parash.

“Dhashë informacionet që kisha për këtë çështje. Edhe më shumë se kam bëre të njohura në publik. Sot në pranga duhet të ishte Taulant Balla. Pastrimi i parave të drogës dhe krimit është rreziku kryesor që i kanoset sot Shqipërisë. Është rrezik politik, ekonomik, shoqëror dhe për stabilitetin e vendit. Edi Rama dhe qeveria e tij janë vënë në shërbim të pastrimit të parave të pista të krimit. Të gjitha koncesionet dhe projektet e qeverisë janë pastrim parash të drogës dhe të krimit.

Ne do të ndalim. Ne do të ndjekim paratë dhe do gjurmojmë çdo qindarkë që Edi Rama dhe kriminelet po mundohen të futin në ekonomi.

Çdo koncesion, çdo ndërtim, çdo kontratë do të gjurmohet për çdo qindarke, si për ata që e kanë dhënë edhe ata që e kanë marrë. Lufta kundër pastrimit të parave do jetë prioritet kombëtar”, tha kreu i PD-së.

I pyetur nga gazetarët se kush ia dha informacionin Bashës për paratë në Toyota Yaris, kreu i PD-së nuk ktheu përgjigje.

Katër prokurorë belgë erdhën posaçërisht në Shqipëri për të marrë në pyetje kreun e PD-së dhe një ndër pyetjet që kërkonte përgjigje ishte se si u informua Basha i pari për sasinë prej 3,4 milionë Euro? Cilat ishin informacionet ekzakte? Kush ia dha zotit Basha këtë informacion?

Por kreu i PD-së, refuzoi ta ndajë këtë informacion me mediat.

Aksioni për bllokimin e 3.4 mln eurove u finalizua me 24 qershor të vitit të kaluar, ndërsa eurot me prerje të ndryshme ishin fshehur në “Toyota Yaris” pa targa. Për këtë ngjarje janë arrestuar 4 persona dhe janë shpallur në kërkim kushërinjtë, Alfred e Elvis Vladi, për të cilët dyshohej se ishin personat që kanë porositur makinat Toyota Yaris. Katër të arrestuarit në Shqipëri janë Edi Lika, Klevi Lika, Agim Ceka dhe Alban Mollaymeri.

Lulzim Basha ishte personi i parë që e denoncoi këtë ngjarje në sallën e Kuvendit të Shqipërisë. Më herët Basha ka akuzuar se të përfshirë në pastrim parash janë Ulsi Manja dhe Jurgis Çyrbja. “Prokuroria ka kërkuar dëshminë time për hetimet që ka hapur lidhur me nxjerrjen e sekretit shtetëror sa i takon veprës kriminale të futjes së parave të krimit me Toyota Yaris. Ky veprim dëshmon se denoncimet e mia publike për përfshirjen e Taulant Ballës janë të vërteta. Në këtë aferë janë përfshirë dhe Ulsi Manja dhe Jurgis Çyrbja”, tha Basha pasi doli nga prokuroria në tetor të 2018.

Apeli konfirmon KPK, mbetet jashtë drejtësisë prokurori Dritan Rreshka

Ish-drejtuesi i Prokurorisë së Tiranës, Dritan Rreshka mbetet përfundimisht jashtë sistemit të drejtësisë duke mos mundur të kalojë dot vettingun. Kolegji i Posaçëm i Apelimit ka lënë në fuqi vendimin e mëparshëm të Komisionit të Pavarur të Kualifikimit për shkarkimin përfundimtar të Dritan Rreshka.

Prokurori Rreshka nuk ka mundur dot të justifikojë pasurinë e tij dhe KPK ka kërkuar përjashtimin e tij. Ky vendim nuk është pranuar nga Dritan Rreshka, i cili e ka apeluar atë në KPA.

Sipas njoftimit të KPA, në mbledhjen e mbajtur ditën e mërkurë, ka njoftuar se deklarimi i prokurori të Tiranës në lidhje me pasurinë është i pamjaftueshëm duke lënë në fuqi vendimin KPK.

Trupi gjykues i Kolegjit të Posaçëm të Apelimit, i përbërë nga Albana Shtylla kryesuese, Ina Rama relatore, Ardian Hajdari, Rezarta Schuetz, Sokol Çomo, anëtarë, arriti në përfundimin se subjekti i rivlerësimit Dritan Rreshka ka kryer deklarim të pamjaftueshëm për kriterin e pasurisë ndaj në mënyrë unanime anëtarët kanë vendosur:

1- Lënien në fuqi të vendimit nr 55, datë 31.07.2018 të Komisionit të Pavarur të Kualifikimit që i përket subjektit të rivlerësimit Dritan Rreshka

2- Ky vendim është përfundimtar dhe ka efekt të menjëhershëm

Prokurori Dritan Rreshka u shkarkua në tetor të 2018 për shkak se nuk ka pasur burime financiare të mjaftueshme dhe ka kryer veprime të fshehjes së pasurisë, ndërkohë që edhe personat e lidhur me të kanë rezultuar me pasuri të pajustifikuara.

Kalon vettingun prokurori i dosjes “Shullazi” dhe “Balili”

Komisioni i Pavarur i Kualifikimit ka konfirmuar në detyrë prokurorin e Krimeve të Rënda Ened Nakuçi, i cili njihet edhe si prokurori i dy dosjeve “Shullazi” dhe “Balili”

KPK zhvilloi seancën dëgjimore më datë 06.06.2019, ndërsa ditën e premte vendosi konfirmimin e tij si prokuror në Prokurorinë pranë Krimeve të Rënda, i cili është edhe kandidat për SPAK.

Gjatë seancës së tij dëgjimore ka pasur shqetësime në lidhje me justifikimin e pasurisë dhe largimi pa njoftuar nga dosja “Shullazi”.

Vendimi për konfirmimin e tij në detyrë u mor nga trupa gjykuese e kryesuar nga Xhensila Pine, Roland Ilia dhe Valbona Sanxhaktari. Më herët kaloi vettingun edhe prokurori Edvin Kondili.