Drekoi me zyrtarin e DASH, Rudina Hajdari tregon detaje: Ja për çfarë u interesua

Gjatë vizitës që zhvilloi në Tiranë, Drejtori për Europën Juglindore në Departamentin Amerikan të Shtetit, David Kostelancik, pati dhe një drekë pune me deputetët e opozitës parlamentare në Kuvend. Rudina Hajdari, pjesë e këtij takimi, ka zbuluar detaje nga biseda e Kostelancik me deputetët e opozitës parlamentare. Sipas Hajdarit, zyrtari i DASH ishte shumë i interesuar për Reformën Zgjedhore. Bashkëkryetarja e komisionit për këtë reformë, deputetja e djathtë, u shpreh se shpreson që Reforma Zgjedhore të bëhet kusht ndërkombëtar ashtu si Reforma në Drejtësi.

“Ai erdhi në Tiranë për të parë situatën poltike. Ishte shumë i interesuar për reformën zgjedhore. Kostelancik shprehu dëshirën për t’u takuar dhe me anëtarë të tjerë të komisionit të Reformës Zgjedhore. Folëm dhe për kërkesat që grupi opozitar ka për sistemin zgjedhor. Nuk jemi thjesht për adresimin e kërkesave të OSBE-ODIHR, por për ndryshimin e sistemit zgjedhor. E kemi thënë që prej fillimit. Takimi me Kostelancik zgjati 90 minuta. E pranishme ishte zëvendës ambasadorja e SHBA-së. Ajo ishte shumë e hapur për reformën. Shpresoj që reforma zjgedhore të bëhet kusht ndërkombëtar si për Reformën në Drejtësi. Duhet që pas 30 vitesh të kemi zgjedhje jo të kontestuara’’, deklaroi Hajdari.

Kryetarja e Grupit Parlametar të deputetëve të djathtë në Kuvend, Rudina Hajdari gjatë fjalës në një studio televizive, ku është shprehur se ‘nuk është penduar’ që nuk dogji mandatin e deputetes. Gjatë fjalës së saj, Hajdari ka thënë se ‘lufta bëhet në Kuvend’ dhe jo jashtë tij. “Zgjodha rrugën e duhur, jo vetëm unë por i gjithë grupi parlamentar, për të thënë që është djep i demokracisë dhe përballë çdo lloj qeverie, i vetmi vend ku mund të përballemi është parlamenti, aty bëhen ligjet.” u shpreh Hajdari. E kritikuar vazhdimisht për lapsuset e saja gjuhësore, të cilat kanë ardhur shpesh për shkak të jetës për një kohë të gjatë në SHBA, Rudina Hajdari është shprehur se për të nuk përbën problem. Ajo thotë se kritikat ndaj saj, vetëm për shkak të lapsuseve, e bëjnë më të fortë, ndonëse tregon që i ndjek shumë pak rrjetet sociale.

“Të bësh gabime është njerëzore nuk jam njeri perfekt, kam gabimet e mia, nuk është problem për shqiptarët. impenjimi kryesor, të shpalos gjëra te reja e problematika që shqetësojnë shqiptarët sot dhe të mos tërheqin vëmendjen. Nuk është e lehtë të bësh deklarata të tilla, por është e nevojshme duhet një njeri që të thotë atë ç’ka po ndodh. Jam mësuar tashmë, kritikat më bëjnë më të fortë nuk më shqetësojnë, rrjetet sociale mundohem mos i ndjek shpesh është krijuar një rreth vicioz ndoshta edhe i koordinuar. “ u shpreh Hajdari.

Gjithashtu, Hajdari ka folur edhe për mundësinë e krijimit të një partie të re. Ajo është shprehur se nuk e përjashton këtë mundësi, por sipas saj, nuk është momenti i duhur për të diskutuar krijimin e një fraksioni të ri politik. “Qytetarëve u intereson fakti që të kenë përfaqësues sa më të mirë. Nuk është lehtë të krijosh parti. Kur drejton parti ke përgjegjësi të tjera. Nuk është një precedent i lehtë. Nuk e përjashtoj si opsion. Nuk kam frikë nga kjo gjë. Por nuk është momenti i duhur për ta diskutuar’’, u shpreh Rudina Hajdari.

ZYRTARI I DASH, DREKË ME OPOZITËN PARLAMENTARE

“Po e bën Ramën të pavdekshëm”, Hajdari sulmon Bashën: Jep dorëheqjen

Qëndrimi i pavendosur i Bashës në lidhje me aksionin opozitar dhe deklaratat e tij se PD do të vij me një “platformë kombëtare” për të nxjerr vendin nga kriza, në një kohë që ishte ai vet që e futi vendin në krizë dhe i la demokratët e pa përfaqësuar, ka bindur deputeten Rudina Hajdarin se ai duhet të jap përfundimisht dorëheqjen.

Përmes në statusi në Facebook, Hajdari ka deklaruar se marrëveshja e radhës Rama-Basha në lidhje me “paktin kombëtar” të propozuar nga ky i fundit, jo vetëm që nuk e shpëton dot më opozitën joparlamentare por do të jetë edhe firma e dorëheqjes së Bashës. Sipas Hajdarit, demokratët nuk do të lejojnë më forcimin e pozitave të Ramës përmes një marrëveshje tjetër, për shkak të paaftësisë së Bashës për të çuar demokratët në fitore. Ajo thekson rëndësinë e ndryshimit të sistemi, në mënyrë që asnjë nga krerët e partive politike të mos krijojnë më marrëveshje në interesa personale.

“Duhet një “shkollë politike” për kryetarët e partive kryesore mbi ndryshimin e sistemit në mënyrë që të bien me këmbë në tokë Marrëveshja nuk e shpëton dot këtë herë opozitën joparlamentare. Deri tani Kryetari i Partisë Demokratike duhet të kishte dhënë dorëheqjen 2 herë, dhe me këtë marrëveshjen tjetër që kërkon të bëjë me Ramën me anë të “Platformës Kombëtare” (pa realizuar asnjë objektivë deri tani) do jetë e treta e vërteta. Sepse demokratët nuk kanë ndërmend ta bëjnë Edi Ramën, të pavdekshëm.”- shkruan Hajdari, e cila është një nga zërat më të fortë që kërkon ndryshimin e sistemit dhe Reformës Zgjedhore.

Kryetarja e grupit parlamentar demokrat, Rudina Hajdari është shprehur disa herë se i trembet një marrëveshje Rama-Basha që mund të bëhet mbi interesat e qytetarëve dhe për të shmangur këtë duhet një reformë e thellë zgjedhore.

Shkodra përplas qeverinë me opozitën parlamentare, për dekriminalizimin

Me nisjen e sesionit të ri parlamentar të Kuvendit, kreu i grupit socialist Taulant Balla ka folur edhe për rastin e Shkodrës dhe ndryshimet që duhen bërë për dekriminalizimin. “Një kuadër ligjor me shumë mungesa” do e cilësonte Balla këtë ligj, duke shtuar se qeveria ka gati amendamentet për ndryshimin e dekriminalizimit dhe do i dorëzojë ato në komisionin e reformës zgjedhore, për të shmangur hyrjen në politikë të personave me precedentë penale. Balla tha se për raste të tilla nuk ka pse të mbajë përgjegjësi partia, por individi, pasi është një përgjegjësi individuale mashtrimi me plotësimin e formularit të dekriminalizimit.

“Rasti i Shkodrës na bën të vetëdijshëm që kuadri ligjor nuk është i plotë dhe në këtë këndvështrim kryeministri do të depozitojë si amendamente shtrëngimet e domosdoshme dhe më të ashpra në lidhje me çdo kandidat. Le të jetë komisioni i reformës zgjedhore që ti shqyrtojë” tha ai.

Por duket se për Rudina Hajdarin kjo nuk është aspak e vërtetë. Hajdari tha se fajin nuk e ka ligji, por kryetarët e partive që kanë marrë partitë në dorë dhe vendosin për gjithçka pa pasur demokraci të brendshme në parti. Ajo tha se për sa kohë kryetarët kanë partitë në dorë, njerëz të tillë do vijnë si nga PS, PD apo LSI.

“Nëse do të flisni për shkaqet e sistemit duhet të shikoni se çfarë ka ndodhur sot në Shqipëri. Pse mendoni se e ka fajin ligji, që duhet të bëhet më i fortë, por jo ju, që e zgjodhët. Jeni ju ata që i sillni ata njerëz këtu në parlament. Nëse kreu i PS-së, PD-së, apo LSI-së do të vijojnë që të kenë dorë në partitë e tyre, ju do të vijoni që të sillni njerëz të tillë” tha ajo.

Nisma për forcimin e ligjit të dekriminalizimit, vjen pas rastit të Shkodrës kur kryetari i sapozgjedhur i bashkisë, Valdrin Pjetri dha dorëheqjen, pasi PD i zbuloi disa dokumente ku rezultonte i dënuar në Itali. Pjetri e kishte fshehur këtë fakt në formularin e dekriminalizimit, ndërsa dha dorëheqjen pa u betuar si kryebashkiak i ri. Nga ky rast u distancua edhe PS, e cila deklaroi se përgjegjësia për këtë është personale dhe jo e partisë.

Hajdari: Marrëveshja Basha-Kryemadhi e bëri Ramën perandor

Fakti që PS ka të gjitha pushtetet në dorë është totalisht faji i Bashës dhe Kryemadhit. Kjo ishte deklarata që kryetarja e grupit demokrat në Kuvendin e Shqipërisë, Rudina Hajdari dha në nisje të këtij sesioni të ri. Hajdari u shpreh e bindur se marrëveshja e Bashës me Kryemadhin për të djegur mandatet ishte vetëm si pjesë e marrëveshjes PS-PD për ta bërë Edi Ramën perandor. Fakti që Rama ka të gjitha pushtetet tha Hajdari është faj i vetëm i opozitës që vendosi të digjte mandatet.

“Më lejoni të them se nuk ka asnjë dyshim se ne këtu kemi një nga korrupsionet më të larta. Jemi me një qeveri që nuk di të menaxhojë ekonominë e vendit. Nuk ka vullnet për të nxjerrë para përgjegjësi zyrtarët e lartë, apo për të hapur dosjet 339 apo 184, ato do të mbyllen dhe këta zyrtarë nuk kanë për të parë asnjë ndëshkim të dëshiruar nga shqiptarët apo ndërkombëtarët. Por kush është fajtor? Përpara 25 qershorit kishim një qeveri tranzitore dhe marrëveshje Rama-Basha. Kjo dështoi dhe dikush duhet të mbajë përgjegjësi. Kush e bëri Edi Ramën perandor? Kjo ishte një marrëveshje tjetër mes Bashës dhe Kryemadhit. Ata kërkuan djegien e mandateve dhe dhënien e të gjitha pushteteve” tha Hajdari, e cila shtoi se reforma zgjedhore është e vetmja që mund të parandalojë marrëveshje të tilla në dëm të demokracisë dhe qytetarëve. Hajdari tha se përmbyllja e reformës zgjedhore për të garantuar zgjedhje të lira dhe të ndershme është jetike për të luftuar futjen e të inkriminuarve në sistem dhe se do të luftojë fort për ringritjen e të djathtëve duke shkuar në çdo qytet dhe fshat për t’i dhënë zë çdo qytetari.

“Kuvendi arriti që të jetë produktiv pavarësisht djegies së mandateve nga opozita. Duhet të mbyllim reformën zgjedhore, që shqiptarët t’u japim zgjedhje të lira dhe të ndershme. Ne do të kemi mbështetje të gjerë në grupet e opozitës dhe do të shkojë përpara, të vizitojmë çdo qytet dhe fshat për t’i treguar platformën dhe alternativën e vërtetë demokrate. Rama është i mbrojtur nga Basha dhe Kryemadhi. Përballë kësaj qeverie, unë dhe grupi demokrat dhe kushdo tjetër për ringritjen e së djathtës shqiptare është i mirëpritur për të shkuar në qytet në qytet dhe fshat në fshat për t’i dhënë çdo qytetari një zë për të vendosur demokracinë në vend” tha Hajdari.

Hajdari ironizon PD: Ju ra goja për Bushatin si zë ndryshe në PS, vras mendjen mos e keni blerë

Rudina Hajdari, kryetarja e grupit parlamentar demokrat, përmes sarkazmës dhe ironisë nuk ka mundur dot të mos flasë për ish kolegët e saj demokrat për “vlerësimet hipokrite’ që PD ka bërë në lidhje me Ditmir Bushatin, si një zë ndryshe brenda PS-së.

Hajdari, e cila u përjashtua nga PD pikërisht për këtë zë ndryshe që kishte, i është drejtuar PD, nëse ato mos kishin blerë gjë Ditmir Bushatin që të kritikonte Ramën gjatë mbledhjes së kryesisë.

“Ata që nuk lanë gjë pa më sharë e akuzuar mua, kur vendosa të mos djeg mandatin, tani ju ra goja duke thënë se sa e vlerësojnë Bushatin, si një zë ndryshe brenda Partisë Socialiste. Vras mendjen mos e ka blerë gjë Partia Demokratike“, shkruan Hajdari.

Ndaj Rudina Hajdarit u hodhën të njëjta akuza nga PD se ajo ishte blerë nga kryeministri Rama kur kritikoi hapur vendimin e Bashës për të djegur mandatet dhe nuk pranoi të hiqte dorë nga i saji, gjë që i kushtoi përjashtimin nga selia blu.

Mbrëmjen e së mërkurës, Bushati ishte protagonist i debateve të forta në mbledhjen e Kryesisë së PS, teksa kërkoi të mbahej përgjegjësi për Valdrin Pjetrin dhe Tom Doshin, ndonëse muaj më parë, vetë i kishte vlerësuar maksimalisht.

Hajdari mbron Gjonaj: Po sulmohet një grua politikane

Pas reagimit të Myslim Murrizit, deputetit të djathtë, që doli në mbrojtje të Ministres së Drejtësisë, Etilda Gjonaj, për akuzat që lidhen me shpenzimet e tepruara në udhëtimet jashtë vendit, ka ardhur një tjetër mbrojtje e ministres nga radhët e opozitës parlamentare. Kryetarja e Grupit Parlamentar të deputetëve të djathtë, Rudina Hajdari, ka shkruar një Tëitter, ku e cilëson ‘jo normal’ sulmin që i bëhet Etilda Gjonajt.

“Ndonëse Etilda Gjonaj është pjesë e mazhorancës, nuk më duket normale të sulmohet një grua politikane mbi baza të rëndomta, që nuk kanë lidhje me profesionin e saj. Njerëz që kurdisin gjëra kaq banale nuk e kanë as tagrin të bëjnë moral, thjesht gjejnë alibi për të hedhur baltë”, shkruan Rudina Hajdari.

Ditët e fundit, Ministrja e Drejtësisë, Etilda Gjonaj, është vënë në qendër të akuzave, pas publikimit në media të disa faturave, ku pretendohet për shpenzime të larta të ministres gjatë udhëtimeve zyrtare jashtë vendit. Megjithatë, Gjonaj i hodhi poshtë këto akuza, duke bërë një reagim publik, ku shprehej se ‘shpenzimet përfshinin të gjithë stafin’ dhe jo vetëm të saj.

Rudina Hajdari nuk pret shtatorin, “mbledhje” me demokratët e parlamentit, mes tyre dhe i vëllai

Deputetja e Partisë Demokratike, Rudina Hajdari e cila i doli kundër Bashës dhe PD-së, për vendimin më të rëndësishëm që ishte djegia e mandateve të deputetëve dhe braktisja e Kuvendit, është kthyer në Tiranë dhe ka nisur lëvizjet e para. Ajo nuk ka pritur shtatorin për të nisur punën, por ka mbledhur grupin demokrat, ose opozitën e re parlamentare në një takim informal, ku sigurisht që nuk përjashtohen bisedimet politike.

Ajo që bie në sy në foton e shpërndarë në rrjet nga deputetja Hajdari është se pjesë e grupit demokrat është edhe i vëllai Kiri Hajdari.

Më herët Kiri Hajdari është parë në krah të Bashës në protestat e ndryshme të PD-së, edhe në kohën kur Rudina kishte nisur t’i dilte kundër vendimeve të kreut të PD-së.

Por siç duket edhe Kiri, ashtu si e motra është bindur se aksioni politik i PD-së së Bashës dështoi dhe tani është koha për një aksion të ri.

Dhe këtu roli i Rudinës si drejtuesja e opozitës së re në Kuvend, merr një rëndësi të madhe.

Ajo ishte ndër të parat që i doli kundër Bashës dhe të gjithë grupit demokrat për vendimin për të djegur mandatet e deputetëve. Hajdari gjithashtu ishte kundër vendimit për të bojkotuar zgjedhjet e 30 qershorit, si dhe kundër protestave të dhunshme të cilat sollën ftohjen e marrëdhënieve të PD-së me amerikanët. Rudina Hajdari njihet si një figurë politikë që gëzon mbështetje nga SHBA, falë edhe punës së saj të dikurshme atje. Në foton që ajo ka shpërndarë në rrjet duken deputetët Myslim Murrizi, Alban Zeneli dhe Halit Valteri, të cilët morën mandatet pas vendimit të opozitës për t’i djegur ato. Deri tani opozita e re parlamentare ka vendosur si kusht realizimin e reformës zgjedhore, dhe pritet që në shtator ky të jetë aksioni i parë i tyre politik./Realstory.al

Dorëheqja e Pjetrit, Hajdari: Sistem i kalbur, shqetësuese mungesa e alternativës

Vetëm pak pas njoftimit në Facebook të Valdrin Pjetrit, që njoftonte se jepte dorëheqjen nga marrja e detyrës si kryetar i Bashkisë Shkodër, ka reaguar kryetarja e grupit parlamentar të deputetëve të djathtë, Rudina Hajdari. Në një reagim në rrjetet sociale, Hajdari shprehet se “faji nuk është i individit, por i drejtuesve partiakë që i promovojnë në pozicione të larta drejtuese”. “Çështja e Valdrin Pjetrit vërteton për të disatën herë se sa i korruptuar dhe i dështuar është sistemi ynë politik. Një individ me të kaluar kriminale vendoset si përfaqësues i Partisë Socialiste për të marrë postin e Kryetarit të Bashkisë në qytetin e Shkodrës. Problemi nuk qëndron tek individi, sa tek liderat partiakë që promovojnë figura të pista në pozicione të larta drejtuese apo sistemi i kalbur politik që lejon pseudo-liderat partiakë të tallen me qytetarët shqiptarë”, shkruan Rudina Hajdari.

Sipas saj, problemi më shqetësues në vend është mungesa e alternativës për qytetarët, një figure politike që t`i besojnë, pasi sipas Rudina Hajdarit, qytetarët kanë krijuar mendimin se “të gjithë janë njësoj”. “Ajo që është akoma dhe më shqetësuese është se nuk ekziston një alternativë për qytetarët, një figurë politike që t’i besojnë, pasi fatkeqësisht u është mbushur mendja se të gjithë janë njësoj. Kanë humbur besimin tek kjo kastë politike që sheh vetëm interesin personal, duke e lënë në harresë interesin publik. Qytetarët shqiptarë janë të distancuar komplet dhe nuk reagojnë edhe kur ndodhin ngjarje të tilla absolutisht të papranueshme, për një vend që aspiron futjen në BE, pasi u ka vdekur shpresa”.

Në përfundim të komentit të saj, Rudina Hajdari shprehet se opozita parlamentare do të vijojë luftën kundër sistemit. Ajo thotë se opozita do të kërkojë Reformën Zgjedhore, në mënyrë që shqiptarët të kenë mundësi të përfaqëzohen nga individë me figurë të pastër. “E vetmja zgjidhje është ndryshimi i këtij sistemi politik e zgjedhor që po fundos Shqipërinë përditë e më shumë. Opozita Parlamentare do të vijojë luftën kundër këtij sistemi akoma dhe më e vendosur me Reformën Zgjedhore, në mënyrë që shqiptarëve t’u jepet mundësia të jenë të përfaqësuar nga individë me figurë të pastër, si nga ana ligjore ashtu edhe nga ana etike”, përfundon Rudina Hajdari.

Rudina Hajdari mban premtimin për shkollën që u dogj nga militantë të PD

Pas djegies nga militantë të PD të shkollës “Shejnaze Juka” e cila u përdor si KZAZ në Shkodër, deputetja Rudina Hajdari deklaroi se rrogën e saj do ta investonte në rregullimin e dëmeve materiale që shkaktoi zjarri. Me një status në Facebook, Hajdari tregon se këto investime ishin kryer nga bashkia dhe se rroga e saj do të përdoret për të blerë libra artistikë të integruar në kurrikulat mësimore, për nxënësin e shkollës.

“Me datë 05.07.2019 vizitova shkollën “Shejnaze Juka” me qëllimin për të investuar rrogën time në ambientet e shkollës pas ngjarjes së datës 18.6.2019. Pas vizitës time u konstatua se pas investimit të bërë nga Bashkia Shkodër, nuk ishte i nevojshëm një investim tjetër i këtij lloji.

Pas bisedimeve me drejtorin e shkollës, Z. Kolë Shiroka u pa e arsyeshme që shuma e parashikuar nga paga ime të shkojë për librat artistikë, të cilat janë të integruar në kurrikalat mësimore, të vlefshme për të tre vitet e gjimnazit, t’i shtohen bibliotekës së shkollës. Këto libra do të shërbejnë si për 500 nxënësit që janë aktualisht të regjistruar në shkollë, ashtu edhe për brezat e tjerë që do vijnë në vitet e ardhshme.

Duke qenë libra, të cilat janë të detyrueshëm të lexohen për gjatë 3 viteve shkollore, të gjithë nxënësit që nuk kanë mundësinë të pajisen me libra do të kenë akses falas në bibliotekë për të tërhequr librin që u nevojitet.” –shkruan Hajdari

Meta homazhe te busti Azemit, ‘provokon’ Rudina Hajdarin

Ilir Meta ishte të premten në vizitë për Tropojë ku mori pjesë në ceremoninë e vendosjes së emrit “Eliot Engel” rrugës Tropojë-Gjakovë. Pas kësaj ceremonie, Ilir Meta ka zhvilluar një vizitë në bustin e Azem Hajdarit, Heroit të Demokracisë, vizitë që në fakt e paralajmëroi Rudina Hajdari me një reagim në rrjetet sociale paraditen e së enjtes.

Deputetja e djathtë, i shkruante Metës që “kur të shkosh para bustit të tim eti, thuaji që fëmijët e tu nuk janë këtu sepse kështu urdhëroi partia”. Ndërkohë, pasditen e të premtes, Ilir Meta, ka bërë një postim postim pasditen e të premtes në facebook, ku shfaqet duke kryer homazhe të busti i Azem Hajdarit, njëkohësisht duke i dhënë dhe një përgjigje Rudina Hajdarit.

Në komentin e tij, Ilri Meta, shkruan se “Sa herë vij në Tropojë, nuk mund të mos ndaloj para shtatores së liderit të Lëvizjes Studentore dhe mikut tim të Dhjetorit ’90, Heroit të Demokracisë dhe Pluralizmit në Shqipëri, Azem Hajdari. Ky respekt i sotëm ishte i dyfishtë pasi nderimin e bëmë së bashku me mikun e madh të kombit shqiptar, Kryetarin e Komisionit të Politikës së Jashtme në Kongresin Amerikan, z.Eliot Engel”, përfundon mesazhi i Metës.

Gepostet von Ilir Meta am Freitag, 5. Juli 2019