U kap me drogë në kufi, pranga sarandjotit

36 kilogramë kanabis sativa u sekuestruan nga policia kufitare e Qafë Botës, e fshehur në një makinë që po tentonte ta transportonte atë drejt Greqisë. Automjeti tip ‘Peugeot’ me targë AA109ZD në pronësi të shtetasit me inicialet E.K. është kaluar për kontroll në vijën e dytë pasi kishte dyshime se brenda saj ishte fshehur lëndë narkotike.

Nga kontrolli rezultoi se në vendin e gomës rezervë ishte adoptuar një hapësirë ku u gjetën disa pako me lëndë narkotike me peshë 36 kg.

Në pranga ra drejtuesi i mjetit 36-vjeçari nga Saranda me iniciale E.K., ndërsa vijojnë hetimet për zbardhjen e personave të përfshirë në trafikimin e drogës.

Sarandë, makina del nga rruga, përfundon në dyqan

Një makinë humbi kontrollin dhe përfundoi brenda një dyqani rrobash në qytetin e Sarandës. Drejtuesi i mjetit ka devijuar nga rruga dhe në përpjekje për të frenuar përfundoi te vitrina e xhamit të një dyqani.

Nga aksidenti nuk ka të lënduar por vetëm dëme materiale. Ngjarja ka ndodhur mëngjesin e të hënës pranë shkollës “9 Tetori” , ndërsa policia ka shoqëruar drejtuesin e mjetit për sqarimin e rrethanave.

Maratona e notit në Sarandë, vdes garuesi

Maratona Kombëtare e Notit për grupmoshat 10-80 vjeç, që zhvillohet në qytetin e Sarandës është shoqëruar me një tragjedi këtë vit. Një 72 vjeçar, i cili ka marrë pjesë në maratonën e notit, ka humbur jetën.

Mark Ademi, 72 vjeç nga Lezha ka përfunduar garën e tij në 500 metra dhe sapo ka dalë në breg është ndier keq. Ai është transportuar menjëherë në spital, por nuk ka mundur dot të mbijetoj. Shkak i vdekjes ka qenë një atak kardiak i të moshuarit.

Drogë në Qafë-Botë, pranga për 3 persona. Celulari zbulon korrierin në Greqi

Tre persona janë arrestuar në Qafë Botë nga policia e Sarandës, pasi po tentonin të trafikonin lëndë narkotike për në Greqi. Në pranga kanë rënë shtetasit Nuri Shero, 21 vjeç, Alket Avdiu, 22 vjeç dhe Andrea Sadiku, 19 vjeç, banues në Konispol. Ato u kapën me një çantë shpine, në të cilën gjendej 3 kg kanabis, që pritet të kalonte në kufi në drejtim të Greqisë.

Pas arrestimit dhe hetimit të ngjarjes, policia kontrolloi edhe celularin e të arrestuarve ku u zbulua se në Igumenicë kishte një korrier, i cili po priste të merret ngarkesën me drogë nga 3 shqiptarët.

Menjëherë pas lajmërimit të policisë greke, u bë e mund edhe arrestimi i një shtetasi grek me iniciale G.M., 23 vjeç.

Korrieri grek po priste me makinë e tij Smart, përtej kufirit për të marrë drogën. Pas kontrollit të banesës së tij, policia greke sekuestroi edhe 1.5 kg të tjera kanabis.

Naftë kontrabandë me jaht, arrestohen 2 rusë në Sarandë dhe 5 hajdutë lokalesh

Policia e Vlorës ka zhvilluar një aksion të gjerë kundër paligjshmërisë dhe veprave të ndryshme penale, duke arrestuar të paktën 7 persona në kushtet e flagrancës. Nëpërmjet një komunikate për mediat, Policia e Vlorës ka njoftuar se ka arrestuar dy shtetas rusë, të cilët po mundoheshin të transportonin naftë kontrabandë në Sarandë. Sipas policisë, mësohet se dy shtetasit rusë, emrat e të cilëve jepen me inicialet M.SH., 47 vjeç dhe K.V., 43 vjeç, janë arrestuar të shtunën në jahtin e tyre.

Dy shtetasit rusë, mësohet se në bashkëpunim me njëri-tjetrin, me jahtin e tyre, jashtë pikës doganore të Sarandës, në vendin e quajtur “Berdenes”, kanë transportuar 1477 litra naftë, duke iu shmangur detyrimeve doganore dhe ligjore. Ndërkohë, policia e vlorës ka vënë në pranga tre persona. Konkretisht P.XH., 23 vjeç, K.Xh., 21 vjeç dhe D., 31 vjeç, të tre banues në Dhërmi. Këta shtetas janë arrestuar në flagrancë për “Vjedhje në bashkëpunim”. Të tre këta shtetas, janë kapur pasi kanë vjedhur 50 mijë lekë të rinj në lokalin e shtetases V.C., në Dhërmi.

Gjithashtu, për vjedhje me dhunë dhe shitje të lëndëve narkotike, në Ksamil është arrestuar një i ri 18-vjeç, me inicialet P.S. Ky shtetas, në bashkëpunim me shokun e tij, kanë kanosur me thikë shtetasin D.P., duke i marrë 2500 mijë lekë të rinj. Në momentin e arrestimit, 18-vjeçarit i është gjetur në trup një sasi lënde narkotike kabaisë, dhe një dorezë metalike prej hekuri. Po për akuzat e vjedhjes, në Sarandë është arrestuar një shtetas nga Tirana. Ai është 39-vjeçari me inicialet E.G., i cili dyshohet se në një supermarket në lagjen nr.4 Sarandë, ka vjedhur një kompresor ajri me vlerë 20.000 lekë të rinj.

Luftë informalitetit, Rama: Tolerancë zero ndaj abuzuesve, kontrollet do vijojnë

Lufta kundër informaliteti në biznes është përqendruar në disa drejtime. Një prej tyre është goditja e informlaitetit në hotele dhe shtëpi pushimi për turistët, kryesisht në bregdet. Gjatë pasdites të së shtunës, kryeministri Edi Rama ka publikuar në rrjetin e tij social në Facebook, disa foto ku tregon disa hotele dhe shtëpi pushimi, që janë bllokuar nga tatimet pasi janë gjetur në shkelje ligjore. Për rastet në fjalë, shefi i qeverisë shkruan se “se një numër jo i vogël abuzuesish përsërtës, u është bllokuar aktiviteti”.

“Përshkallëzohet goditja ndaj informalitetit në zonën e Sarandës, ku një numër i konsiderueshëm subjektesh janë regjistruar, duke paguar detyrimet përkatëse ndaj shtetit dhe një numëri jo të vogël abuzuesish përsëritës, u është bllokuar aktiviteti. Kontrollet vijojnë intensivisht me fokus mbi zonën bregdetare, sektorin e naftës dhe mallrat e tjera të akcizës me zero tolerancë ndaj abuzuesve”, shkruan Rama.

Me nisjen e sezonit të rregullt turistik të verës, qeveria ndërmori një aksion për goditjen e paligjshmërisë kryesisht në bizneset që ofrojnë shërbime për pushuesit. Deri më tani janë kontrolluar mijëra biznese shërbimi, si bare, restorante, shtëpi pushimi, hotele etj, ku dhjetra prej tyre janë bllokuar pasi janë gjetur në shkelje të ligjit.

Një tjetër aksion i madh ka qenë ai kundër lirmit të plazheve të zaptuara nga biznesi privat në mënyrë të paligjshme, dhe kthimin e tyre për qytetarët. Ky aksion kundër informalitetit, siç ka njoftuar më herët qeveria, do të vijojë edhe pas sezonit turistik, ndërsa së fundi goditjes së paligjshmërisë i është nënshtruar dhe sektori i karburanteve në vend.

Zjarri shkrumbon kampin e punëtorëve dhe zdrukthtarinë në Konispol

Flakët e zjarrit kanë shkrumbuar një zdrukthtari dhe dy godina të tjera në Konispol. Gjatë orëve të mbrëmjes të së enjtes, në fshatin Mursi të Konispolit, një magazinë zdrukthëtarie është përfshirë nga zjarri.

Dyshohet se shkak i rënies së zjarrit të ketë qenë një shkëndijë elektrike. I ndihmuar nga kushtetet atmosferike por dhe lënda drusore, zjarri është përhapur me shpejtësi duke djegurë tërësisht zdrukthtarinë.

Më pas, flakët kanë djegur dhe dy magazina të tjerëa, të cilat shërbenin si depo fjetjeje për punonjësit e një biznesi. Fatmirësisht nuk raportohet të ketë dëme në njerëz, vetëm materiale.

Në vendin e ngjarjes për shuarjen e flakëve kanë shkuar tre mjete zjarrfikëse, të cilat janë përballur me një situatë të vështirë. Kjo pasi zjarri rrezikonte edhe disa banesa të fshatit Mursi, që ndodheshin pranë vatrës së flakëve. Megjithatë, zjarrfikësit kanë bërë të mundur neutralizimin e flakëve dhe më pas shuarjen e tyre.

Vjen për pushime në Sarandë me anije të vjedhur në Turqi

Policia Kufitare e Sarandës ka bllokuar një anije turistike, ndërsa ka vënë në pranga kapitenin e saj. Policia dyshoi se mjeti mund të ishte vjedhur për shkak të dokumentacionit të dyshimtë dhe përbërjes së ekuipazhit. Pas hetimeve rezultoi se ky mjet lundrues ishte vjedhur në Turqi.

Gjatë shkëmbimit të informacionit nga Interpol Tiranë me homologët grek, malazezë dhe turk u arrit në përfundimin se anija turistike ishte vjedhur në Turqi.

Mjeti turistik “LIBERTAS” me 3 shtetas ne bord (1 turk dhe 2 rusë) vinte nga Korfuzi dhe kishte hyrë në territorin shqiptar nëpërmjet portit të Sarandës. Policia e Sarandës vuri në pranga kapitetin e anijes, shtetasin turk me iniciale D. U, 47 vjeç, i cili pritet të përballet me veprën penale të “trafikimit të mjeteve motorike”.

Sarandë, përplasen dy makina, 5 të plagosur

Një aksident i rëndë ka ndodhur në Sarandë duke lënë një bilanc prej 5 të plagosurish. Dy makina janë përplasur kokë më kokë dhe si rezultat njëra prej tyre ka dalë nga rruga. Një ‘Benz’-i dhe një ‘Land Rover’ kanë pasur një përplasje të fortë, ku ‘Jeep’ ka dalë 3 metra nga rruga duke përfunduar në ambientet e një biznesi.

Për pasojë kanë mbetur të plagosur 5 persona, që udhëtonin brenda këtyre dy mjeteve, fatmirësisht jashtë rreziku për jetën.

Nuk dihen shkaqet e aksidentit, ndërsa policia ka nisur hetimet në vendin e ngjarjes.

Sarandë, pushuesit zihen me thika, një i plagosur në gjendje të rëndë

Pushimet kthehen në makth për turistët në qytetin e Sarandës. Dy persona që kishin ardhur për të kaluar pushimet në Sarandë janë konfliktuar mes tyre dhe sherri ka degjeneruar deri në përdorimin e thikave.

Një person i paidentifikuar ka qëlluar 3 herë me thikë në krah dhe gjoks shtetasin Berti Tahiraj, 40-vjec nga Vlora.

40-vjeçari ndodhet në gjendje kritike për jetën spitalin e Sarandës. Ngjarja ka ndodhur në një plazh të qytetit i populluar nga turistët.

Policia po punon për kapjen e autorit, i cili është larguar menjëherë pas ngjarjes.