Trafiku i Drogës, SHBA sjell në Tiranë kolonelin kolumbian

Një kolonel nga Kolumbia ishte në Tiranë me mbështetjen e Ambasadës së Shteteve të Bashkuara, ku tregoi para 50 oficerëve shqiptarë meteodologjinë e zbatimit të ligjit në luftën kundër trafikimit të lëndëve narkotike dhe krimit të organizuar.

Koloneli Gelber Cortes, “foli në tryezën e organizuar nga Policia e Shtetit, ku fokus ishte diskutimi i çështjeve të krimit ndërkombëtar ndërkohë që u zhvilluan marrëdhënie strategjike midis forcave shqiptare dhe kolumbiane. Drejtori i Përgjithshëm i Policisë së Shtetit Ardi Veliu dhe Drejtoresha e Byrosë për Çështjet Ndërkombëtare të Zbatimit të Ligjit dhe Luftës ndaj Drogës, Julie Craven mbajtën fjalën hapëse, duke nënvizuar të dy rëndësinë e policisë së drejtuar nga inteligjenca përmes partneriteteve të zbatimit të ligjit, ndërsa vendet tona luftojnë për të ndalur dhe shkatërruar krimin e organizuar dhe trafikun e lëndëve narkotike”, thuhet në një njoftim të ambsadës së SHBA.

Shtetet e Bashkuara të Amerikës janë angazhuar në trajnimin punonjësve të Policisë së Shtetit për luftën kundër krimit të organizuar dhe trafikut të Drogës. Ndërkohë, ekspertiza amerikane është shtrirë edhe në përgatitjen e burimeve njerëzore dhe infrastrukturës materiale për ngritjen e Byrosë Kombëtare të Hetimit, një organ i ngjashëm me FBI në SHBA, që do të hetojë krimin e organizuar dhe korrupsionin në nivele të larta së bashku me SPK.

Bloomberg sfidon Trump

Michael Bloomberg njoftoi sot se po kandidon për President të Shteteve të Bashkuara.

Ish kryetari i Bashkisë së Nju Jorkut, një nga njerëzit më të pasur në botë, u bashkua zyrtarisht në fushatën presidenciale demokrate të dielën. Ish republikani 77-vjeçar i njoftoi planet e tij në një faqe elektronike të fushatës.

Ai shkroi: ”Po kandidoj për president për të mposhtur Donald Trump dhe për të rindërtuar Amerikën’.’

Hyrja e Bloomberg-ut në garë, vetëm 10 javë para fillimit të zgjedhjeve paraprake, reflekton shqetësimin e tij se lista aktuale e kandidatëve nuk është e pozicionuar mirë për të mposhtur presidentin Trump.

Investimet masive të Bloombergut në çështjet me përparësi për demokratët si ndryshimet klimatike dhe kontrolli i armëve të mbështetura nga pasuria e tij personale, mund ta bëjnë atë një kandidat të fuqishëm. Ai tashmë ka rezervuar më shumë se 30 milion dollarë në reklama televizive nëpër disa shtete, megjithëse nuk do të marr pjesë në katër zgjedhjet e para paraprake./VOA/

Deklarata bombë e ambasadës së SHBA: Venecia ka precedentë pro Vorpsit

Debati dhe ngërçi i krijuar për ngritjen e Gjykatës Kushtetuese ka bërë që SHBA, si investuesi dhe aktori kryesor i zbatimit të Reformës në Drejtësi, të rekomandojë marrjen e opinionit të Venecias në lidhje me përplasjet ligjore e kushtetuese të krijuara në skenën e politikës shqiptare.

Duket se kjo është zgjidhja që SHBA i propozon politikës shqiptare duke gjetur një rrugë të mesme por që në thelb synon njohjen e Arta Vorpsit në Gjykatën Kushtetuese. Kjo nisur edhe nga precedentët e vendimeve të mëparshme të Komisionit të Venecias që ka njohur betimet e noterizuara të anëtarëve të Gjykatës Kushtetuese, pas qenë nevoja që anëtarët të betohen në presidencë, njëlloj siç bëri Vorpsi. Duket se pikërisht kjo është arsyeja që SHBA propozon që çështja të shkojë në Venecia dhe ky qëndrim i SHBA ka bërë që presidenti Meta të shpërthejë në sulme ndaj saj.

Në deklaratën e tyre SHBA bën thirrje që palët kundërshtuese të respektojnë opinionin e Venecias, duke i dhënë një mesazh të qartë kreut të shtetit Ilir Meta, i cili ka krijuar një përplasje e re mes institucionit të KED dhe Presidencës, përplasje që përfundoi me një dekret antikushtetues për emërimin e Marsida Xhaferllarit dhe një padi penale ndaj kreut të KED, Ardian Dvorani.

“Reforma në drejtësi është një nga prioritetet më të larta të Shteteve të Bashkuara në Shqipëri. Përparimi i vazhdueshëm i reformave është thelbësor për çuarjen përpara të qëllimit tonë të përbashkët të anëtarësimit të Shqipërisë në Bashkimin Europian. Tashmë Shqipëria ndodhet në prag të ringritjes së Gjykatës së saj Kushtetuese, një hap madhor në procesin e reformës në drejtësi. Megjithatë ky përparim i nevojshëm ka ngecur për shkak të interpretimeve të ndryshme ligjore të procesit të emërimit, parashikuar nga kushtetuta shqiptare dhe ligjet për zbatimin e reformës në drejtësi.

Institucionet gjyqësore shqiptare, kushtetuta dhe ligjet për zbatimin e reformës në drejtësi, duhet të udhëheqin procesin e zgjidhjes së këtyre intepretimeve të debatuara.

Në mungesë të një institucioni të përshtatshëm ligjor, i cili mund të vendoste mbi intepretimet e kundërta, Shtetet e Bashkuara mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Gjithashtu, nxisim palët kundërshtuese që të respektojnë opinionin ligjor të Komisionit të Venecias. Ecja në këtë drejtim do të ishte tërësisht në përputhje me aspiratat europiane të vendit.

Teksa Shqipëria ndërmerr këto reforma thelbësore, Shtetet e Bashkuara do të vazhdojnë të qëndrojnë në krah të saj si një vend mik, partner dhe aleat” shkruhet në deklaratën e SHBA.

Më herët edhe Ambasadori italian Alberto Cutillo tha se Gjykata Kushtetuese duhet të ngrihet sa më parë, por mbi rregulla të qarta duke këshilluar që për ngërçin e krijuar palët t’i drejtohen për mendim Komisionit të Venecias.

SHBA: Guxoni dhe luftoni korrupsionin

Zëvendësambasadori amerikan në detyrë, Daniel Koski kërkoi nga brezi i ri i drejtësisë të fokusohet në luftimin e korrupsionit në mënyrë që të ndihmojë në krijimin e drejtësisë së re dhe një të ardhme të sigurt. Gjatë ceremonisë së diplomimit në Fakultetin Juridik të Tiranës, Koski u shprehu studentëve se kanë të gjithë mbështetjen e SHBA dhe inkurajon ata të bëhen faktorë ndryshimi për forcimin e integritetit të sistemit të drejtësisë në Shqipëri. Koski vlerëson të rinjtë si faktori që do demaskojë korrupsionin dhe nderojnë profesionin e tyre.

“Shpresoj ta ndërtoni të ardhmen duke patur në mendje këto tri aspirata: Së pari, shpresoj të jeni faktorë ndryshimi për forcimin e integritetit të sistemit të drejtësisë në Shqipëri. Por, dijeni, se puna juaj nuk do jetë e lehtë. Korrupsioni është gjithandej dhe fshihet në vendet më pak të dyshimta. Ju bëj thirrje që të bëheni pjesë e një brezi të ri që kundërshton korrupsionin kudo që ta shihni. Dhe, ju sfidoj që të bëheni të guximshëm. Demaskojeni korrupsionin dhe nxirreni atë në dritë që ta shohin të gjithë. Kthejeni veten në mbrojtës të një sistemi etik drejtësie dhe heronj të atyre që ai u shërben. Së dyti, shpresoj të përkushtoheni çdo ditë për të nderuar veten, profesionin tuaj dhe bashkëqytetarët tuaj, ndërsa ndihmoni në ndërtimin e një sistemi drejtësie më të mirë për vendin tuaj.

Së treti, shpresoj të merrni forcë dhe guxim nga profesionistët e nderuar dhe parimorë përreth jush që kanë nevojë për ju për t’u bashkuar me ta në këtë luftë për të ardhmen e vendit tuaj. Kërkoni partnerë të besuar në ligjzbatim dhe agjenci të tjera për të mbështetur përpjekjet tuaja fisnike. Ata janë atje, duke ju pritur. Dhe dijeni që Shtetet e Bashkuara gjithmonë do të qëndrojnë me ju për sa kohë ju përkrahni një sistem gjyqësor transparent dhe etik. Mbështetja jonë për atë kauzë dhe për ata që na bashkohen në çuarjen e saj përpara, nuk do të lëkundet kurrë dhe nuk do të dobësohet asnjëherë. “ tha Koski

Ku i gjeti Basha 500 mijë $ cash për Nick Muzin?

Prokuroria rrëzoi akuzat “Pastrimi i produkteve të veprës penale ose veprimtarisë kriminale” për kryedemokratin Lulzim Basha, në lidhje me lobimin rus në SHBA. Argumenti që dha prokuroria, nisur nga disa dokumente publikuar në Realstory.al, ishte se për këto hetime nevojitej dëshmia e personit kyç, Nicolas Muzin, që përfitoi plot 675 mijë dollarë për të lobuar në favor të Partisë Demokratike në SHBA.

Por, nga ana tjetër, prokurorët që kanë hetuar dosjen ndaj Lulzim Bashës, kanë arritur të zbulojnë se 500 000 mijë dollarë, nga 675 mijë të dhëna gjithsej për lobimin, janë dhënë “cash”, pra jo në rrugë bankare ashtu siç do duhej të ndodhte.

“Në rastin konkret kemi hedhje të dhënash jo të përputhura me realitetin në formularin përkatës, me qëllim për të fshehur lobimin e bërë nga një Kompani me administratorë të lidhur me aktivitet biznesi me shtetas rusë. Është fshehur shuma prej 500 000 dollarësh që është dhënë “cash” nga Subjekti Partia Demokratike te kompania e huaj private për të bërë lobim në SH.B.A. me qëllim zgjedhor në favor të këtij subjekti politik, duke qenë se zgjedhjet parlamentare do të zhvilloheshin pas disa kohësh në qershor të vitit 2017”, citohet nga dokumentat e Prokurorisë.

Nisur nga ky fakt ngrihen shumë dyshime. Si mund të paguhen këto para cash? Ku i gjeti Partia Demokratike 500 000 dollarë “cash”? Cila ishte forma e pagesës së parave cash ndaj lobistit amerikan Nicolas Muzin? Me valixhe? Shumë pikëpyetje ngrihen të cilat kërkojnë përgjigje, pasi shuma prej 500 000 dollarë nuk është një shumë që mund të fshihet.

Por, nisur nga ky fakt, duket me sens përplasjet e supozuara në Prokurorinë e Tiranës, mes dy prokurorëve që kanë firmosur mbylljen e hetimeve, dhe atij që ka qenë kundër së bashku me drejtuesen e Prokurorisë së Tiranës, Elisabeta Imeraj, që duket se ka bllokuar dërgimin e dosjes në gjykatë për gjykim. /Realstory.al/

Revolucioni 5G, SHBA apel shqiptarëve: Kujdes nga kinezët

Shtetet e Bashkuara të Amerikës shqetësohen të parat kur vjen puna të siguria kombëtare. Shqetësimin e tyre ato e kanë dhe për vendet partnere, një prej tyre dhe Shqipëria. Pak ditë pasi në Shqipëri u prezantua projekti për rrjetin e teknologjisë 5G, Ambasada e SHBA shpërndau një artikull informues për të gjithë qytetarët shqiptarë. Në artikull, SHBA kërkon të informojë dhe këshillojë qytetarët shqiptarë për pasojat që mund të ketë në sigurinë e të dhënave teknologjia 5G.

“Shitësi kinez i telekomit Huawei shpreson të prodhojë dhe shesë pajisjet e tij të rrjetit 5G në të gjithë botë. Rrjetet 5G do të ndryshojnë botën. Aplikacionet e ndërlidhura do të revolucionarizojnë bizneset, do të përmirësojnë infrastrukturën dhe do të transformojnë komunikimet personale. Këto aplikacione të reja do të jenë thelbësore për jetën tonë, kështu që mbajtja e të gjitha këtyre të dhënave është më e rëndësishme se kurrë”, shkruhet në artikullin e publikuar nga ambasada.

Kujt mund t`i besojmë?

Por pyetja që ngrihet është se si mund të mbrohemi nga shkelja e privatësisë? Si mund të ruajmë të dhënat e biznesit tonë? Dhe kujt kompanie duhet t`i besojmë? Drejtues të sigurisë kibernetike në Departamentin Amerikan të Shtetit, sugjerojnë se kompanitë me seli në vendet perëndimore që do të ofrojnë shërbimet 5G, janë më të sigurta se ato në lindje, kryesisht në Kinë. Kjo, pasi në vendet perëndimore ka një zbatim të mirë të ligjit, dhe mbrojtja e privatësisë është e sanksionuar me ligj.

DASH sugjeron që përdoruesit e 5G duhet të kenë parasysh së pari vendodhjen e kompanisë që ofron këto shërbime, për të kuptuar nëse selia e kompanisë ndodhet në një vend ku zbatohet ligji dhe drejtësia është e pavarur. Kjo siguron prova nëse një kompani mund t’i rezistojë presionit për të kompromentuar rrjetin e saj.

A ka ndërmarrja një strukturë transparente të pronësisë? Kjo siguron që konsumatorët të dinë se kush është me të vërtetë duke marrë vendime, veçanërisht nëse një kompani është e kontrolluar pjesërisht ose tërësisht nga një fuqi e huaj. A ka ndërmarrja një histori të sjelljes etike? Performanca e kaluar është mënyra më e mirë për të përcaktuar nëse konsumatorët mund t’i besojnë pretendimeve të një kompanie që nuk do të kompromentojë rrjetet e saj.

A është Huawei i besueshëm?

Huawei shpreson të prodhojë dhe shesë pajisjet e saj të rrjetit 5G në të gjithë botën. Sidoqoftë, ka arsye të qarta që vendet dhe konsumatorët të veprojnë me kujdes. Huaëei është me seli në Kinë, një vend pa një gjyqësor të pavarur. Kina madje ka një ligj që kërkon që kompanitë të ndihmojnë qeverinë për të spiunuar. Kjo do të thotë se nuk ka asnjë mënyrë për të sfiduar qeverinë kineze nëse urdhëron një kompani të spiunojë ose të vjedhë të dhënat.

Për më tepër, Huawei gjithashtu ka një histori të shkeljeve etike, duke përfshirë vjedhjen e sekreteve nga konkurrentët e saj. “Ka një histori të gjatë vjedhjesh të pronës intelektuale nga Huawei dhe shkelje të ligjeve të korrupsionit në të gjithë botën,” tha Robert Strayer, një zyrtar i lartë në DASH për sigurinë në internet. Kur bëhet fjalë për 5G, Sh.B.A dhe aleatët e saj “duhet të sigurojnë që ne kemi vetëm furnitorë të besuar në rrjetet 5G”, shtoi ai. /Realstory.al/

Shqiptarja, kandidate për prokurore në SHBA

Gazeta ‘The Washington Post’, i ka kushtuar një artikull të veçantë shqiptares së suksesshme, Buta Biberaj e cila kandidon për postin e prokurores në Virginia, SHBA.

Sipas prestigjiozes amerikane, shqiptarja e cila ka më shumë se 25 vjet përvojë në fushën juridike, ka punuar rreth 11 vjet edhe si zëvendës/gjykatëse në këtë qark. Zgjedhjet për këtë post do të zhvillohen në 5 nëntor.

“Zonja Biberaj është një prokurore e aftë duke u shërbyer qytetarëve dhe këta të fundit do të përfitonin nga një qasje e re që pasqyron shqetësimet në lidhje me luftimin e krimit dhe pabarazive racore. Zonja Biberaj, e cila ka praktikuar ligjin në Loudoun për më shumë se 25 vjet dhe ka shërbyer si gjyqtare zëvendësuese në gjykatën e qarkut, prandaj e njeh mirë zonën”, shkruan The Washington Post.

Buta Biberaj në vitet 2014-2015 u zgjodh si presidente e ‘Shoqatës së Avokatëve’ në Loudoun. Ajo bashkë me një grup avokatësh vendas përpiloi programin ‘Street Law’, i cili synonte këshillimin e nxënësve për të drejtat e tyre dhe që ata të njihen më mirë me ligjin civil e penal të Amerikës.

Sulm gjatë festës së “Halloween”, 3 të vdekur dhe 9 të plagosur

Një sulm me armë ka ndodhur në një shtëpi, ku me dhjetëra njerëz ishin mbledhur për të festuar “Halloween”. Disa persona hynë të armatosur në një shtëpi në Long Beach në Kaliforni ku zhvillohej festa dhe hapën zjarr ndaj të pranishmëve. Nga sulmi 3 persona humbën jetën në vendin e ngjarjes dhe 9 të tjerë mbetëm të plagosur.

Njerëzit ishin mbledhur për të festuar “Halloween”, por duket se nata u kthye në tragjedi. Autorët janë larguar, ndërsa policia nuk jep detaje për shkaqet e sulmit apo pistat e hetimit që po ndjek.

Ngjela: SHBA na mbron. SPAK do eleminojë politikanët e korruptuar

Në studion e “Real Story”, avokat Ngjela u shpreh se mos hapja e negociatave me Bashkimin Europian, tregoi se Shqipëria është një vend i rëndëisshëm. Ai e argumentoi këtë me faktin se vetëm tre orë pas mos pasjes së vendimit nga Këshilli Europian, reaguan Shtetet e Bashkuara të Amerikës, ndërsa pak ditë më pas, doli përpara Senatit kandidatja për ambasadore e SHBA në Tiranë, Yuri Kim.

“Ngjarja po tregon që po ecën në këtë prizëm. A ka një inters të kundërshtarëve perëndimor. Po ka. Ajo që i dha impuls profilit shqiptar, është se SHBA foli pas tre orësh dhe priste hapjen e negociatave. E gjitha kjo që ndodhi është në favorin tonë. Së pari, e kuptuam që jemi një vend i rëndësishëm. Menjëherë pas kësaj doli ambasadorja që vjen e SHBA dhe foli për investime amerikane në Shqipëri. Të gjitha këto, u kanë dhënë shpresë shqiptarëve. Kriza jonë, është krizë intelekti”, tha Ngjela.

Gjatë fjalës së tij, Spartak Ngjela shtoi se Reforma në Drejtësi, do të largojë klasën e korruptuar politike në vend. “Nuk më duhet fare mua të analizojë se sa vlerë kanë lidershipët shqiptarë. Këtu gjithçka është arritur me forcë. Kemi një shpresë që kemi reformën në drejtësi. Sipas kushtetutës shqiptare, reforma në drejtësi është eliminimi i klasës së korruptuar politike. Ne po presim SPAK dhe Gjykatën Speciale dhe aty do shohim”.

Spartak Ngjela beson se Shqipëria është nën mbrojtjen e fortë të boshtit Uanshginton-Berlin-Bruksel. “Ka një trinitet që është SHBA-Berlini dhe Brukseli. Të treja këto mua më japin forcën e arsyes që ne jemi në Evropë. Kundërshtarët që janë këtu në zonë, mendojnë që me një veto kundër të krijojnë… Po të hapeshin negociatat, do fliste Rusia? Shqipëria është e pambrojtur brenda, por ka tre mbrotje të mëdha”, tha Ngjela. /Realstory.al/

Vrasja e Abu Bakr, SHBA shton masat e sigurisë

Departamenti amerikan i Sigurisë Kombëtare tha se ka rritur vigjilencën pas vdekjes së udhëheqësit të Shtetit Islamik Abu Bakr al-Bagdadi, por nuk ka plane për të ngritur nivelin e alarmit.

Kjo do të bëhej vetëm nëse ekzistojnë informacione mbi kërcënime konkrete dhe të besueshme, që mund të ndaheshin me publikun, thanë zyrtarët.

“Masat tona të sigurisë do të vazhdojnë të jenë të shkathëta, ne do të vazhdojmë të përgjigjemi në çdo moment që mund të ketë kërcënime,” thanë ata.

Deklarata e Departamentit të Sigurisë Kombëtare vjen pas njoftimit të Presidentit Donald Trump për operacionin e forcave speciale amerikane në veriperëndim të Sirisë që vuri në shënjestër me sukses dhe eliminoi me dhunë Al Bagdadin.

Shtetet e Bashkuara kishin ofruar një shpërblim prej deri në 25 milion dollarësh për informacione që do të çonin në kapjen e Al Bagdadit dhe nxjerrjen e tij para drejtësisë. Deri tani ekziston vetëm një person tjetër, udhëheqësi i al-Kaidës Ayman al-Zawahiri, për kapjen e të cilit është vënë një shpërblim i lartë./VOA/