Çitaku: Me VV-në s’bëjmë qeveri, kemi shumë dallime

Nënkryetarja e PDK-së, Vlora Çitaku si dhe deputetja e zgjedhur e Kuvendit të Kosovës, ka shprehur qartë se partia që ajo përfaqëson dhe VV-ja janë shumë larg një mundësie bashkëqeverisjeje, duke theksuar dallimet e thella mes dy partive.

Në Rtv21, ajo theksoi se PDK-ja nuk hyn në qeveri për të marrë pozita, por për të udhëhequr projekte zhvillimore, dhe se është e pamundur për ta arritur një dakordim për një program të përbashkët zhvillimor.

Sipas Çitakut, nëse VV-ja nuk arrin të formojë qeverinë, atëherë mundësia do të kalojë te PDK-ja.

“Jemi shumë të largët. Ne vazhdimisht kemi qenë të kujdesshëm, nuk duam t’i fyejmë qytetarët që e kanë votuar VV-në, por kemi dallime shumë të thella dhe nuk e shohim asnjë mundësi të qeverisim së bashku. Nuk qeveriset për të marrë një pozitë, qeveriset për të udhëhequr një projekt, një platformë. Ne nuk hyjmë në qeveri as për ta bërë dikë kryeministër e as ministër, në qeverisje hyhet nëse beson në një projekt të përbashkët zhvillimor dhe është e pamundur që PDK të dakordohet me VV për një program zhvillimor, por le të vazhdojnë ata, i kanë mundësitë tjera. Nëse nuk e bëjnë qeverinë, për çka ne jemi të sigurt se në rrethanat që jemi nuk munden, dhe le të vijë radha te ne”, tha Çitaku./klankosova

Meta e cilësoi “rrezik rus”. E vërteta e “shpopullimit”

Ilir Meta shpërndau të martën një shkrim, (të revistës Monitor.al.) ku flitej për rrezikun e shpopullimit të Shqipërisë, ku sipas medias në fjalë, OKB kishte një projeksion se në Shqipëri do të mbeten vetëm 500 mijë shqiptarë në vitin 2100. Ndërkohë, në komentin e tij, Ilir Meta e quante “rrezik rus” këtë gjë. “Kambanat e alarmit po bien! Stop shpopullimit të Shqipërisë! Ky është “rreziku i vërtetë rus” që i kanoset vendit! Kjo është sfida më madhore që kërkon urgjent dialog, zgjidhje, dhe kthimin e shpresës për të gjithë shqiptarët! 9 kushtet e Bundestagut janë harta e rrugës së Shqipërisë europiane! Koha është tani! Nuk mund të ketë Shqipëri pa shqiptarë”, shkruante Meta.

Lidhur me këtë shkrim, reagoi zyrtarish Instituti Kombëtar i Statistikave. Së pari, INSTAT shpjegon se nuk mund të bëhen përllogaritje të numrave për migracionin, pasi është një fenomen dinamik. Kështu, INSTAT jep një shembull, duke marrë harkun kohor të vitit 2011-2018. Sipas INSTAT, numrat e emigrantëve (atyre që ikin) dhe imigrantëve (atyre që kthehen) gjatë këtyre viteve, nuk mund të mblidhen. Arsyeja lidhet me faktin se potenciali është që një imigrantë (që është kthyer në Shqipëri gjatë vitit 2011) të largohet përsëri gjatë kësaj periudhe. Pra thënë ndryshe, i njëjti person mund të numërohet disa herë.

“Duke qenë se migracioni është një fenomen dinamik, që do të thotë se të larguarit e një viti janë potencial për migracion kthimi gjatë një viti të mëpasshëm, sikundër mund të jenë imigrantët potencial për emigrim sërish në vitet në vijim. Në këtë mënyrë, nuk mund të mblidhen numrat e estimuar të emigrantëve / imigrantëve gjatë viteve, në këtë rast 2011-2018, pasi ky total numëron të njëjtin person disa herë”, thotë INSTAT.

Ndërkohë, INSTAT sqaron se definicioni bazë për llogaritjen e popullsisë banuese është ai i “Vendbanuesit të Zakonshëm”. “Vendbanuesit e zakonshëm janë të gjithë personat të cilët janë banues të zakonshëm në Shqipëri, pavarësisht shtetësisë së tyre”, thotë INSTAT. Më tej, Instituti i Statistikave jep dhe të dhënat e lëvizjes së popullsisë (emigrantët dhe imigrantët) për harkun kohor nga viti 2011 deri në vitin 2018. INSTAT thotë se gjatë vitit 2018 emigracioni ka pasur trend rënës, në krahasim me një vit më parë. Po në trend rënës ka qenë dhe imigracioni (të kthyerit në Shqipëri). Ndërkohë, migracioni neto (të ardhurit dhe të ikurit), në vitin 2015 ishte -20.600 persona, ndërsa në vitin 2018 kjo shifër ishte -15030 persona. Pra duke reflektuar një trend rënës nga viti 2015 deri në vitin 2018.

“Numri i Emigrantëve në vitin 2018 është 38.703 duke përsuar një rënie me 3 % krahasuar me një vit më parë. Po të shikojmë trendin gjatë periudhës 2011-2018 numri i emigrantëve ka pësuar rënie. Po të krahasojmë numrin e emigrantëve në vitetet 2011 viti i censusit të fundit të popullisë me vitin 2018, rezulton se ka një rënie të këtij numri me 30%. Nga ana tjetër, numri i imigrantëve (shqiptarë që kthehen ne vend) në vitin 2018 është 23.673 banorë, duke pësuar një rënie me 5,3 % krahasuar me një vit më parë. Gjatë periudhës 2011-2015, numri i imigrantëve ka pësuar rënie dhe në vitin 2015 kemi numrin më të ulët të imigrantëve. Në vitet 2016 dhe 2017 numri i imigrantëve ka pësuar rritje vjetore me 10,6% dhe 8,4%.

Në vitin 2015, migracioni neto (të ardhurit – të ikurit) ka qenë -20.600, ndërkohë në vitin 2018 kjo shifër ka rënë në -15.030, duke reflektuar një trend rënës gjatë gjithë këtyre viteve. INSTAT përdor metoda indirekte për llogaritjen e stokut të migracionit ndërsa për vlerësimin e flukseve vjetore përdoren module specifike në anketat pranë familjeve. Këto module janë të mirë konceptuar dhe ndërtohen bazuar në definicionin e Vendbanues i zakonshëm në mënyrë që të mund të vlerësohet numri i emigrantëve dhe imigrantëve në një vit të caktuar”, thuhet në njoftimin e INSTAT.

E VËRTETA E SHPOPULLIMI TONË. SI DO TË NDRYSHOJË POPULLSIA E SHQIPËRISË

Pak kohë më parë, Realstory.al, publikoi një shkrim të titullar “E vërteta e shpopullimit tonë. Si do të ndryshojë popullsia e Shqipërisë?”, ku citonte një studim dhe projeksion të bërë nga “Balkaninsight”, për trendin e shpopullimit në rajonin e Bllkanit dhe Europën Juglindore. Nga studimi rezultonte se Shqipëria ishte në pozita shumë herë më të mira, se sa shumë vende që aktualisht janë anëtare të Bashkimit Europian. Madje, shtete si; Bullgaria, Kroacia apo Rumania, do të kenë nga -22 përqind deri në afër 40 përqind më pak popullsi në vitin 2050 në krahasim me vitin 1989, kur këto vende ndosheshin nën regjimet komuniste. Ndërsa Shqipëria, po për të njëjtën periudhë, pra në vitin 2050, parashikohet të ketë më -18 përqind më pak popullsi në krahasim me vitin 1989, kur ndodhej ende në sistemin diktatorial dhe nuk kishte ndodhur eksodi masiv pas hapjes së kufijëve. /Realstory.al/

A është e rrezikuar Shqipëria nga Irani?

Marrja e presidencës së OSBE për vitin 2020 nga ana e Shqipërisë ndodh nën hijen e konfliktit SHBA-Iran dhe përfshirjes jo të drejtpërdrejtë të Shqipërisë në të. Siguria do të jetë shtylla e presidencës shqiptare.

Shqipëria mban presidencën e radhës së OSBE

Me një ceremoni solemne në Vjenë, në Këshillin e Përhershëm të OSBE-së, Shqipëria nisi zyrtarisht të enjten (9.01.2020) Presidencën e OSBE, 2020. Fillimi zyrtar i presidencës shqiptare të organizatës më të madhe në botë për siguri dhe bashkëpunim ndodh në kohëra jo të qeta. Konflikti mes SHBA dhe Iranit ka ngjallur shqetësim në 57 vendet anëtare të OSBE, siguria e të cilave është e ndërlidhur me situatën në Lindjen e Mesme.

Burime zyrtare nga Kryeministria në Tiranë bëjnë me dije se Kryeministri dhe Ministri për Europën dhe Punët e Jashtme, Edi Rama, njëherazi drejtues i Presidencës shqiptare të OSBE-së, në fjalën e tij, të enjten në Vienë ka sjellë në vëmendje mundësitë që ka OSBE për të forcuar sigurinë dhe bashkëpunimin, në situatat aktuale. Fjala kyҫ e Presidencës shqiptare të OSBE 2020 do të jetë dialogu, deklaroi Rama. “Shumë prej mundësive tona vijnë përtej shtrirjes së OSBE, na duhet të forcojmë platformat e dialogut me vendet aziatike për bashkëpunim. Situata aktuale në brigjet jugore është e ndërlidhur me sigurinë e vendeve tona” theksoi kryeministri Rama.

Shqipëria e përfshirë indirekt në konfliktin SHBA- Iran

Forcimi i sigurisë në vendet anëtare të OSBE përbën një nga shtyllat kryesore të programit të Presidencës Shqiptare OSBE, 2020. Vetë siguria e Shqipërisë shfaqet potencialisht jo e pacënueshme në kuadrin e konfliktit SHBA – Iran. Komuniteti i 3200 muxhahedinëve, të strehuar në periferi të Tiranës, armiq të betuar të qeverisë iraniane është një faktor potencial që e përfshin Shqipërinë jo drejtpërsëdrejti në këtë konflikt. Kjo u duk qartë kur vetë lideri suprem i Iranit, Ajatollah Khomeini në fjalën e mbajtur të mërkurën, (8.01.2020) pas lëshimit të raketave iraniane në bazat ushtarake amerikane në Irak e quajti Shqipërinë, “një vend shumë të vogël, por shumë të keq europian, ku amerikanët bashkëpunojnë me tradhtarët e Iranit kundër Republikës Islamike”.

Por strehimin e 3200 muxhahedinëve në Shqipëri kryeministri Rama e vlerësoi „një veprim që i bën nder Shqipërisë dhe është në vazhdën e traditës shqiptare.” „Kemi marrë përsipër një risk që të strehojmë 3 mijë muxhahedinë. Jam shumë krenar që ky risk është marrë në mënyrë bipartizane. Politika shqiptare ka bërë këtë hap me një bindje të unifikuar në funksion të një aleance strategjike të padiskutueshme me SHBA, Kjo nuk ekspozon në mënyrë të posaçme Shqipërinë” tha Rama në Vjenë.

Ai solli në vëmendje Artikullin 5 të NATOs, thelbi i të cilit është se sulmi ndaj një anëtari të NATOs është sulm ndaj gjithë Aleancës Atlantike. “Jemi në duar të sigurta. Shqipëria është anëtare e NATO-s dhe çdo sulm mbi vendin tonë është sulm mbi NATO-n” theksoi Rama.

Shqipëria – Vigjilencë ndaj sulmeve kibernetike iraniane

Tentiva e Iranit për të cënuar sigurinë kombëtare të Shqipërisë është e provuar tanimë. Në dhjetor 2018 qeveria Rama shpalli „persona non grata” ambasadorin e Iranit në Tiranë dhe e dëboi atë bashkë me një diplomat tjetër të ambasadës iraniane në Shqipëri për shkak „të tentimit të sulmeve terroriste në Shqipëri”, veprim që u përgëzua nga SHBA.

Në një takim të zhvilluar ditët e fundit në Tiranë, të organizuar nga „Qendra për Sigurinë në Europën Jug-Lindore” gjenerali amerikan Michael Barbero, pjesëmarrës në këtë takim tha se „ҫdo aleat i SHBA mund të shikohet si një shënjestër nga Irani. Për këtë vigjilenca është mjaft e rëndësishme veçanërisht në fushën kibernetike, pasi Irani ka disa aftësi mjaft të sofistikuara për sulmet kibernetike. Shqipëria duhet të tregohet mjaft vigjilente në përpjekjet kundër terrorizmit dhe kundër sulmeve kibernetike. Aleanca do të reagojë ndaj çfarëdo lloj sulmi që do t’i bëhet ndonjë prej shteteve anëtare të saj”, theksoi gjenerali amerikan Barbero./DW/

Kur lufta për pushtet konvertohet në urrejtje për Shqipërinë

Nga Mero Baze

Ka dy ngjarje madhore që lidhen me 1 janarin e vitit 2020, që vënë në provë mungesën e energjive pozitive të shoqërisë sonë, edhe kur bëhet fjalë për ngjarje jo partiake, por kombëtare. Më 1 janar, lajmi më i rëndësishëm për vlerat e kombit shqiptar, ishte që shkrimtari Ismail Kadare u nderua nga Franca me titullin e lartë “Oficer i Madh i Legjionit te Nderit”.

Ky është një titull që e ka merituar një rreth i ngushtë personalitetesh dhe është niveli më i lartë i këtij çmimi, me të cilin Franca nderon personalitetet më me vlerë në botë. Ngjarja e dytë, që lidhet me 1 janarin, është kryesimi nga Shqipëria i Presidencës së OSBE, një ngjarje që mund të mos përsëritet më dhe që është një shans për promovimin ndërkombëtar të Shqipërisë.

E para, nderimi i Kadaresë, në thelb është një vlerësim i të vetmit institucion Perëndimor të pranuar nga bota që ne kemi prodhuar në historinë tonë. Kadare është pasaporta jonë krenare në Perëndim dhe në gjithë botën, por mbi të gjitha, njeriu që e tërheq gjithë elegancë, si një patriark hijerëndë, “karrocën” tonë të shkatërruar drejt Perëndimit. Është njeriu që na mban kokën nga Perëndimi.

Ajo që të bie në sy, është që opozita zyrtare duket sikur më shumë u inatos, se sa bëri sikur të gëzohej me këtë ngjarje. Kjo nuk do të thotë që opozita është doemos anti-Perëndimore, por përpjekja për të politizuar vlerat tona kombëtare dhe për t’i konsideruar ato, vetëm nëse i përdor politikisht, është një sëmundje që e zvogëlon shoqërinë tonë dhe e bën atë meskine, provinciale dhe pse jo, dhe linçuese ndaj çdo vlere, që ajo mendon se nuk e përdor dot politikisht. Kjo tregon shumë për standardin e një shoqërie.

E dyta, kryesimi i Presidencës së OSBE nga Shqipëria, është një ngjarje që nuk lidhet me Edi Ramën apo qeverinë, edhe pse ata kanë vite që luftojnë në kanale diplomatike për këtë gjë. Ajo është një mundësi e shkëlqyer që vendi ynë, të krijojë lidhje të reja me Europën dhe të ketë mundësi të promovojë vlerat e veta. Vreri me të cilën i janë turrur kryesimit të OSBE nga Shqipëria opozitarët tanë, tejkalon vrerin dhe rezervat e çdo vendi tjetër që mund ta konsiderojmë vend jo mik, që në fakt kanë munguar në këtë fillim viti.

Të vetmit që duket sikur protestojnë pse Shqipëria po kryeson OSBE, janë opozitarët tanë. Tani jam dakord që ta nisim vitin e ri me të shara për mjekrën e Edi Ramës, për gallatat me të prekurit nga tërmeti, për frikën se mund të mos realizohet projekti i rindërtimit, madje jam gati të qajmë dhe pse s’u bë Elvis Naçi “Njeriu i Vitit”, por nuk e kuptoj pse duhet të nxijmë, të heshtim, apo të përbaltim dy ngjarje me të cilat jemi të lirë të gëzohemi të gjithë, pa dallime politike, se mbi të gjitha, janë dy ngjarje që na identikojnë me Perëndimin, dhe na vënë në krye të vlerave të tij.

Ismail Kadare nuk ka nevojë për duartrokitjet tona. Madje, aq i famshëm sa është, nuk ka nevojë as për lëvdatat tona për librat e tij, se po e vlerësojnë më shumë nga Londra, deri në Kore të Jugut, se sa nga Shkodra deri në Sarandë. Por vlerësimi për të, si një nga personalitetet e mëdha të botës, që merr çmimin, “Oficer i Madh i Legjionit te Nderit”, është më shumë një nder për Shqipërinë, se sa për të. E njëjta gjë mund të thuhet dhe për kryesimin e radhës së OSBE. Ajo është një ngjarje politike që fitohet me konsensusin e gjithë vendeve të OSBE.

Dhe të gjitha këto vende e kanë dhënë këtë konsensus. Të vetmit që nuk e japin dhe hedhin vrer ndaj Shqipërisë për këtë ngjarje, janë PD dhe LSI në Tiranë. Kjo do të thotë, që në strategjinë e opozitës, negativizmi nuk është thjesht strategji kundër qeverisë, por mbi të gjitha, kundër Shqipërisë. Dhe nuk di se si mund ta bindësh një popull të të votojë, duke i sharë nënën. Vetëm këta tanët e kanë zbuluar këtë formulë.

Shqipëria e pesta në Europë për çmimet e lira në restorante

Shqipëria renditet ndër vendet më të lira të Europës për sa i përket çmimeve të lira në restorante. Sipas portalit më të madh mbi kostot dhe cilësinë e jetës, Numbeo, Shqipëria renditet e pesta në Europë si më e lira, duke përmirësuar kështu renditjen në raport me një vit më parë. Megjithatë duhet nënvizuar se pjesa më e madhe e vendeve të rajonit është më e lirë.

Një drekë për dy persona me tre pjata kushton mesatarisht 2500 lekë. Kosova vijon të mbetet më e lira në Europë për të konsumuar një vakt në një restorant mesatar, ku sipas Numebo.com, fatura për dy persona vjen mesatarisht 1850 lekë. Çmimet vijojnë të jenë më të lira edhe në vende të tjera të rajonit. Kështu në Maqedoninë e Veriut një drekë për dy persona kushton mesatarisht 1971 lekë, ndërsa në Serbi një drekë për dy persona shkon diku me pak se 2500 lekë, me një diferencë të vogël me Shqipërinë.

Edhe Ukraina renditet në listën e pesë vendeve më të lira të Europës, ku sipas të dhënave të raportuara nga individët në Numbeo, fatura për një vakt në restorant është 2230 lekë.

Bosnja dhe Mali i Zi janë më të shtrenjtat e rajonit. Bosnja ka një diferencë të ngushtë me Shqipërinë, ku një drekë atje kushton mesatarisht 2527 lekë. Ndërsa Mali i Zi, i 12-ti në renditje, vlerësohet të jetë më i shtrenjtë në Ballkanin Perëndimor, ku fatura shkon mesatarisht 3000 lekë, duke kaluar kështu edhe vende anëtarë të BE-së si Çekia apo Bullgaria.

Ku kushton më shtrenjtë

Duhet ta pyesni veten mirë nëse do të drekoni në një restorant në Zvicër apo në Islandë. Zvicra është vendi më i shtrenjtë i Europës ku sipas Numbeo një drekë atje kushton mesatarisht 11,188 lekë, ndjekur nga Islanda me 11,159 lekë.

Vendet nordike gjithashtu janë ndër më të shtrenjtat në Europë. Në Norvegji dreka kushton mesatarisht 96,000 lekë, pasuar nga Danimarka rreth 8,240 lekë.

Ata që do të udhëtojnë drejt vendeve fqinje si Italia apo Greqia, duhet të dinë se një drekë në restorant për dy persona kushton përkatësisht 6150 lekë dhe 4180 lekë.

Në Çeki, një tjetër destinacion popullor turistik për shqiptarët, dreka kushton jo më shumë se 2900 lekë, duke u renditur kështu krahas vendeve të lira./Monitor/

A është 2019 më keq se 1997? Vasjari në Real Story: Viti 2019, dramë e dramave

Bilanci politik i vitit 2019 dhe parashikimet për vitin 2020 ka qenë tema e emisionit të fundit për këtë vit në Real Story të Sokol Ballës në News 24, ku analistët Fatos Lubonja, Skënder Minxhozi, Arian Vasjari dhe Robert Rakipllari kanë dhënë këndvështrimin e tyre si për vitin që lamë pas, por edhe ato që po vjen, duke bërë edhe një krahasim nëse viti 2019 ishte më keq se viti 1997?

Për analistin Arian Vasjari, i ftuar në emisionin “Real Story” të Sokol Ballës në “News 24”, shqiptarët po përjetojnë dramën e dramave. Ai thotë se Shqipëria ka pësuar regres demokratik.

“Vetë përpjekja për të ndërtuar një paralele me 1997 tregon dekadencën e tmerrshme ku ne jemi. Bëhet fjalë për një ngjarje që ka ndodhur 22 vjet më parë dhe nëse ne do të pranojmë që jeta e racës njerëzore në tërësi por edhe jeta e një demokracie nuk është gjë tjetër, përpos se hapësira mes dy ngjarjeve e nëse ne ndërtojmë si referencë të parë vitin 1997 dhe si referencë të dytë 2019 atëherë 22 vjet që kanë kaluar, paskan kaluar kot në këtë vend. Mjafton vetëm kjo si analizë për të thënë se ne sot jemi në një regres demokratik edhe më të madh sesa viti 1997”, tha Vasjari.

Arian Vasjari theksoi se nëse në vitet e para të demokracisë kishte tmerre, por projektohej e ardhmja, sot më 2019 nuk mund të bësh dot plane për ardhmëri e nuk ka perspektivë. “Jemi në regres demokratik, sepse unë them që problemi ynë më i madh është se na është perfeksionuar antidemokracia në këtë periudhë. Atëherë ishim më të paditur, më pak të ditur në demokraci dhe iluzioni që ndoshta më 1997 u ndërtua ose projeksioni ynë në dekadat e ardhshme ishte se ne do të reflektojmë, por se askush nuk mendonte se demokracia jonë më 2019 do të ishte në këto standarde që është sot. Mua më bind se sot Shqipëria është sot në një moment antidemokracie edhe më të thellë. 2019 në fakt është si dramë demokracie, që nisi me djegien e mandateve dhe përfundoi si tragjedi civile. Vizioni im është se pas shkurtit 2019, ne na zuri poshtë demokracia dhe pas tërmetit të 26 nëntorit faktikisht na zu poshtë edhe natyra. Por është një datë për mua që heq çdo alibi se të këqijat tona vijnë nga jashtë ose vijnë nga natyra ose nga jashtë. Ne jemi vetë e keqja dhe këtu s’kam asnjë kriticizëm të sëmurë se është bërë modë kritika. Në rrugën tonë të demokracisë, ka pasur ngjarje të errëta, por diku ndërtonim një dritëz, diku mbanim shpresat, unë them se në këtë moment ne nuk ndërtojmë dot as shpresë. Kjo mendoj unë është një regres thelbësor, krahasuar edhe me vitin 1997. Viti 1997, me gjithë tragjizmin e saj, në fund të fundit, pasi sistemuam demokracinë, ndërtuam vizion e projekt për të ardhmen. Sot mendoj se as projekt për të ardhmen nuk ndërtojmë dot. Unë mendoj se shoqëria dhe politika ecin në një sistem binar, paralel. Kjo që ka ndodhur këtë vit ka pasoja që do i ndjejmë gjatë. Tregon se ne praktikisht kemi qenë një fake demokraci. Në këto gati 28 a 30 vjet. E keqja më e madhe është se sot unë personalisht e kam të vështirë që edhe vetë të ndërtoj një perspektivë ose të ardhme në këtë vend, imagjinoje si thonë ata 43 përqind e të rinjve që duan të ikin nga ky vend. Dhe kjo është drama e mbi dramave në këtë vend. Dhe çdo diskutim tjetër që në bëjmë mbi parlamentin, presidentin, zgjedhjet, standardet të gjitha etj nuk kanë asnjë lloj vlere. Shqiptarët janë një popull që nuk e duan Shqipërinë. Dhe nuk janë ata shkaku, ata janë pasoja e një demokracie, që për mua sot është absolutisht nën rrënoja”, u shpreh Vasjari.

“Populli, pasuria më e madhe që ka Shqipëria”. Gjonaj: Kemi influencë në vendet ku jetojmë

Një nga shqiptarët më të suksesshëm në diasporë, është Mark Gjonaj. I lindur në shtetet e Bashkuara të Amerikës, Gjonaj është sot anëtar i Këshillit Bashkiak të Neë York-ut. Gjonaj, gjithashtu, është një nga aktivistët më të rëndësishëm të diasporës shqiptare. Në “Real Story”, ai u shpreh se pasuria më e madhe që ka Shqipëria, është populli i vetë.

“Për të parën herë që u takum ishte dje. Pasuria e Shqipërisë është populli i vetë, shqiptari. Interesi i zhvillimi të vendit është të shfrytëzohet ky rast. Dashninë që e kemi për popullin tonë dhe për vendin tonë, të shpresojmë se çfarë mundet Këshilli Kordinues i Diasporës. Është hera e parë që qeveria na mbledh”, tha Gjonaj.

Mark Gjonaj u shpreh se diaspora duhet të ketë deputetët e vetë në Kuvend. Sipas tij, fjala e diasporës ka peshë në zhvillimin e vendit, pasi diaspora nuk ka interes por lufton për të mirën e Shqipërisë. “Kam lindur në Amerikë. E shoh popullim tim, familjen time duke vuajtur. E bëj pyetjen, nëse do isha unë atje, dhe ata në amerikë, çfarë do kërkoja prej tyre? duhet bërë sa ke mundësinë. Që të krijohet kjo ura që është shumë e rëndësishme”.

“Diaspora duhet me pas një deputet të vetin. Duhet zëri i diasporës, janë më shumë shqiptarë që jetojnë jashtë vendit se sa këtu. Një prej planeve është vota. Duhet forcuar lidhja dhe të krijohet besimi. Fjala e diasporës ka peshë sepse nuk e ka për interes e ka për të mirën e vendit. Nuk është shfrytëzuar ky rast i bashkimit të popullit tonë. Shqiptarët kanë influencë në shtetet ku jetojnë”, tha Gjonaj./Realstory.al/

Di Maio: Do bëjmë gjithçka për Shqipërinë

Pas vizitave që pati në disa nga zonat e prekura nga tërmeti dhe takimin me dyer të mbyllura me Kryeministrin Edi Rama, Ministri i Jashtëm i Italisë foli në një konferencë për mediat. Duke konfirmuar solidaritetin me Shqipërinë dhe mbështetjen për të kaluar situatën e vështirë krijuar nga tërmeti, Luigi Di Maio konfirmoi qëndrimin e Italisë për një vendim pozitiv nga BE për negociatat me Shqipërinë dhe Maqedoninë e Veriut.

“Për mua qe një kënaqësi e madhe që pata një bisedë të frytshme me km Rama. Arsyeja kryesore për të cilën ndodhem këtu jo vetëm për të çuar më tej miqësinë historike por edhe për të shprehur mbështetjen tonë pas situatës së tërmetit, mbështetjen dhe për rrugëtimin europian të Shqipërisë. Pata rastin të vizitoj dhe një kamp me çadra të ngritura nga emergjencat italiane në Vorë, mora pjesë në nënshkrimin e dhurimit të materialeve nga ana e mbrojtjes civile italiane. I theksova kryeministrit mbështetjen e palëkundur të Italisë në rrugën europiane të Shqipërisë dhe Maqedonisë së Veriut. Italia këmbëngul mbi nevojën e një vendimi pozitiv për të dyja vendet dhe për të përcaktuar dhe një datë për thirrjen e konferencës së parë mbarëqeveritare”.

Më tej, Di Maio i bëri thirrje klasës politike në vend, që të ul tensionet, duke krijuar një klimë që i shërben rrugëtimit europian të Shqipërisë. “I shpreha kryeministrit edhe urimin tonë dhe dëshirën tonë që të gjithë aktorët politikë të angazhohen në vendosjen e një klime që të mos kompromentojë rrugëtimin europian të Shqipërisë duke favorizuar uljen e tensioneve dhe çeljen e kanaleve të dialogut. Italia është partneri i parë me Shqipërinë dhe vendi i parë për sipërmarrjet”, deklaroi ministri italian.

Më tej, duke folur për tërmetin e 26 nëntorit dhe procesin e ringritjes, Di Maio u shpreh se Italia do të vijojë të mbështes Shqipërinë. Ministri i Jashtëm i Italisë u shpreh gjithashtu se Kryeministri Conte do të punojë që në Shqipëri të rikthehet normaliteti, duke kërkuar gjithashtu që konferenca e donatorëve të zhvillohet në Shqipëri.

“Ka qenë një bisedë mjaft e frytshme. I theksova kryeministrit afërsinë dhe praninë e Italisë me Shqipërinë jo vetëm për anëtarësimin por edhe sa i përket çështjes së goditjes së pësuar nga tërmeti. BE do të bëjë më shumë. Ato burime që u vunë në dispozicion përbëjnë vetëm hapin e parë. Populli shqiptar nuk do të lihet vetëm. Duhet të bindë dhe KE që t’i qëndrojë pranë popullit shqiptar. Do punojmë fuqishëm dhe në konferencën e donatorëve. Do vëmë në dispozicion teknikët tanë që të bëjmë një vlerësim paraprak të dëmeve që konferenca e donatorëve të ketë një kuadër të qarrtë të situatës”, deklaroi Luigi Di Maio.

Shqipëria merr sot Presidencën e OSBE

Kryeministri Edi Rama dhe Ministri i Jashtëm në detyrë Gent Cakaj do të udhëtojnë të premten drejt Bratislavës, për marrjen e Presidencës së OSBE. Lajmin e dha vetë kryeministri Rama gjatë mbledhjes së jashtëzakonshme të qeverisë për situatën pas tërmetit gjatë ditës së premte.

“Shqipëria merr Presidencën e OSBE dhe do të kem një ngarkesë plus për të drejtuar OSBE. Duhet të shkoj sot në Bratislavë për të marrë detyrën. Dhe direkt nesër do të shkoj në Stamboll në takimin që ka organizuar Presidenti me investitorë dhe biznesmenë. Besoj se do të kthehem me çadra me vete. Por duhet menaxhuar sa më mirë kjo logjistikë. Ka vlerë të madhe për të qenë pjesë e gjithë logjistikës sonë në vijim”, tha Rama gjatë mbledhjes së qeverisë.

Shqipëria u bë anëtare e OSBE në verën e vitit 1991 dhe në 2020 merr për herë të parë drejtimin dhe presidencën e saj.

OSBE mbetet organizata më e madhe në botë, e orientuar nga siguria. Ajo u krijua në vitin 1975, në kohën e Luftës së Ftohtë, si një forum Lindje-Perëndim. Mandati i OSBE-së përfshin edhe kontrollin e armëve, promovimin e të drejtave njerëzore, lirinë e shtypit dhe zgjedhjet e ndershme. OSBE angazhohet gjithashtu në parandalimin e konflikteve dhe menaxhimin e krizave. Aktualisht 57 shtetet e saj anëtare shtrihen në Europë, Azi dhe Amerikën Veriore.

Katar 2022, Shqipëria nuk shkon dot në botëror nga “Nations League”

UEFA prezantoi sistemin e ri për kombëtaret europiane që do të kualifikohen në Kupën e Botës, Katar 2022. Kontinenti i vjetër do të përfaqësohet në kompetcionin e ardhshëm të Botërorit me 13 ekipe.

Në total, janë 55 kombëtare nga Europa që do të synojnë të presin një biletë për në Kupën e Botës. Po si do të jetë rrugëtimi drejt Katarit, sipas formulës së re të UEFA-s? 55 kombëtaret nga Europa do të ndahen në 10 grupe.

Ekipet që do të renditen në vendin e parë në grup do të kualifikohen direkt. Ndërsa 10 ekipet që do të renditen në vendin e dytë në grup do të përballen në ndeshje “play-off”. Këtyre 10 ekipeve do t`i shtohen dhe dy ekipet e renditura më mirë në Nations League.

Por, nga ky kompeticion do të përzgjidhen vetëm dy ekipe nga nga Liga A dhe B. Në këtë mënyrë, Shqipëria që ndodhet në Ligën C, humb shansin për të qenë pjesë e “play-off”.

Ndaj, shansi i vetëm është që kombëtarja jonë të jetë në “play-off”, duhet të renditet e dyta në grupin përkatës. Ndërkohë, nga përballja e ekipeve të vendeve të dyta, do të dalin dhe tre skuadrat që do të plotësojnë 13-shen e kombëtareve europiane që do të shkojnë në Katar.