“Parashikime Fake”, por Meta i besoi sizmologut grek

Presidenti Ilir Meta ka hedhur pas krahëve krizën politike dhe fërkimet me qeverinë duke marrë një rol krejtësisht të ri dhe të papritur për të gjithë: atë të sizmologut. Meta parashikon një “tërmet apokaliptik” për Shqipërinë dhe duket vërtet i shqetësuar nga ky fakt, aq sa i ka drejtuar një letër zyrtare dhe tepër “serioze” kryeministrit Rama, ministrit të Brendshëm, Sandër Lleshaj dhe ministres së Mbrojtjes, Olta Xhaçka duke i kërkuar informacion në lidhje me tërmetet që pritet të godasin Ballkanin dhe Shqipërinë.

Me një letër, sa të çuditshme aq edhe qesharake që në fakt të gjitha bazat e saj i ka në një deklaratë të një sizmologu grek, Akis Tselentis, i cili ka folur në një deklaratë për mediat duke thënë se gadishulli i Ballkanit do të preket nga një tërmet i fuqishëm shkatërrimtar nga momenti në moment.

Po kush është Akis Tselentis? Dhe më e rëndësishmja çfarë shkaktuan deklaratat e tij në Athinë?

Akis Tselentis, drejtori i Institutit Gjeodinamik grek, ka deklaruar në një intervistë televizive se një tërmet i madh pritet të godasë Greqinë. “Ne kemi një gjigant pranë nesh. Në një moment, ai do të shpërthejë dhe pastaj në rajon do të ketë mjerim. Duhet të jemi gati. Gjithashtu një tërmet më i lartë se 6 i shkallës Rihter do të prek vendin gjatë dy muajve të ardhshëm pranë zonës së Prevezës.” – ka thënë Akis Tselentis

Këto parashikime kanë shpërthyer një debat të ashpër midis sizmologëve grekë. Gerasimos Papadopoulos, një sizmolog dhe anëtar i Komitetit Special të Shkencës për Vlerësimin e Rrezikut Sizmik, ngriti dyshime mbi hartën e Tselentis për tërmet, duke thënë se parashikimi i tij mbulon gjysmën e Greqisë.

“ ‘Harta Tselentis’ është e paqartë, nuk mund të marrë masa për gjysmën e vendit,” shpjegoi Papadopoulos në një intervistë me Newsit.

Ndërsa presidenti i Organizatës për Planifikimin dhe Mbrojtjen e Tërmeteve, Efthymios Lekkas i cilësoi parashikimin e Tselentis për një tërmet apokaliptik si “papërgjegjshmëri kriminale”.

“Shteti është i gatshëm të merret me një tërmet të madh, por nuk e dimë kur do të ndodhë. Askush nuk mund t’i parashikoj ato. U bëj thirrje qytetarëve që të mos i kushtojnë vëmendje parashikime të papërgjegjshme.” – tha Lekkas.

Kur asnjë sizmolog tjetër në Greqi nuk i mbështeti deklaratat e Akis Tselentis, Meta pse i besoi deklaratat e tij për “tërmetin apokaliptik”? / RealStory.al

Tërmetet në Korçë, bëhet bilanci paraprak i dëmeve materiale

Pas qetësimit të gjendjes në Korçë nga lëkundjet e tërmeteve ka nisur edhe vlerësimi paraprak i dëmit material. Kryebashkiaku i Korçës, Sotiraq Filo tha se sipas vlerësimit paraprak dëmi material llogaritet të jetë 200-250 milionë lekë të reja, ndërsa dëmet më të mëdha paraqiten në fshatin Floq. Filo foli edhe për ndërtimin nga e para të 60 shtëpive, ndërsa 90 të tjera do të rikonstruktohen.

“Grupet e eksperteve kanë filluar prej 2-3 ditësh vlerësimin e dëmeve të shkaktuar për bashkinë e Korçës, ka pasur një përllogaritje fillestare të faturës të rikonstruksionit të shtëpive. Kemi bëre një vlerësim paraprak dhe kemi llogaritur një vlere të ndërtimit të rreth 60 shtëpive te cilat duhen ndërtuar nga e para, 90 banesa të cilave u duhet një rikonstruksion,që varion nga rikonstruksioni më i plote deri tek rikonstruksion i pjesshëm. Vlera paraprake i përllogaritur nga komisioni i eksperteve varion nga 200 deri në 250 milion leke të reja për demet e shkaktuara në bashkinë e Korçës ku përfshihet kryesisht në fshatin e Floqit, por edhe në fshatra të tjerë të Bashkisë Korçë” – tha Filo

Tërmetet, Ministria e Mbrojtjes bën bilancin: 307 banesa të dëmtuara

Ministria e Mbrojtjes ka bërë një bilanc zyrtar të dëmeve materiale të shkaktuar nga tërmeti në qytetin e Korës. Sipas ministrisë në total janë 307 banesa të dëmtuar, nga të cilat 95 janë shkatërruar tërësisht dhe 212 kanë dëmtime më të lehta.

Në fshatin Floq, ku situata është edhe më e rëndë, 65 banesa janë shkatërruar tërësisht, ndërsa 100 të tjera kanë pësuar plasaritje dhe dëmtime të lehta, ndërsa në fshatin Qafëzezë , raportohet për 18 banesa të shkatërruara tërësisht dhe 71 të tjera me dëmtime të lehta. Në fshatin Vidohovë janë 12 banesa të shkatërruara dhe 41 banesa me dëmtime të lehta.

Një pjesë e banorëve, kryesisht me fëmijë të vegjël, janë strehuar në shkollat e fshatit dhe qendrat sociale, ndërsa një pjesë tjetër në çadrat e ngritura, që janë të pajisura me krevate dhe ndriçim.

Prefekti i Korçës: Disa banorë nuk pranojnë të largohen nga çadra

Prefekt i Korçës Dhori Spirollari ka deklaruar të martën se po bëhet sistemimi i banorëve të prekur nga tërmetet në shkolla dhe në spitale, por një pjesë prej tyre nuk pranojnë të largohen nga çadrat.

Sipas tij, banorët thonë se s’mund të zhvendosen në banesa sociale për shkak se jeta e tyre është e lidhur me tokën, bujqësinë dhe kafshët.

“Një pjesë janë zhvendosur një pjesë nuk pranojnë, jemi në një zonë rurale, jeta e tyre është e lidhur me jetën e tokës, bujqësisë me kafshët. Pjesa tjetër, gratë fëmijët,janë strehuar në rezidenca private qendra sociale. Jemi në punë e sipër të zhvendosim të gjithë ata që pranojnë”, tha Spirollari për Report TV.

Ai gjithashtu tha se po bëhen vlerësimet nga komisionet e ngritura në mënyrë që qeveria të përcaktoje dëmshpërblimet për banorët.

“Komisionet gjatë ditës së djeshme kanë bërë një vlerësim paraprak, jemi në diskutim e sipër me qeverinë që banorët të shkojnë në shtëpitë e tyre, pra të dëmshpërblehen dhe t’u ndërtojmë shtëpitë.

Bashkitë janë të detyruara dhe kanë nxjerre urdhrat për komisionet e vlerësimit, që do përcaktojë në mënyrë individuale dhe do bëjë vlerësimin për çdo shtëpi”, tha prefekti i Korçës.

Tërmeti në Korçë, qeveria do të dëmshpërblejë të dëmtuarit

Shefi i Emergjencave Civile, Haki Çako ka premtuar dëmshpërblim për banorët e prekur nga tërmetet në qarkun e Korçës.

Në një lidhje direkte nga Korça, për Report Tv, Çako tha mëngjesin e së hënës se Emergjencat Civile janë në gatishmëri për të gjithë banorët në nevojë dhe kapacitetet janë të mjaftueshme për të përballuar strehimin e shumë familjeve, ndërsa tha se lëkundjet e tërmetit kanë dëmtuar 184 shtëpi, 95 prej të cilave janë dëmtuar tërësisht.

“Është e vërtetë që nuk po mbarojnë lëvizjet sizmike, para pak minutash ka pasur termet tjetër 2 ballë. Janë marrë masat për strehimin e banorëve. Tërmeti më i lartë është shënuar i shkallës 5.3 ballë. Në fshatin Flloq janë mbi 160 persona të strehuar, në Vidov 40 persona dhe në Qafëzezë janë strehuar 30 persona si dhe janë marrë të gjitha masat për banorët , në gatishmëri janë dhe Forcat e Armatosura, Kryqi i Kuq e Emergjencat Civile.

184 banesa janë të dëmtuara, 95 prej tyre janë të dëmtuara plotësisht që do duhet të marrin vlerësimin nga instancat përkatëse. Deri në momentin e stabilizimit sizmik, qeveria është duke bërë një vlerësim për akomodimin e një fondi për të gjitha masat e trajtimit financiar ose rindërtimin e banesave të tyre.

Sigurisht që jemi në dispozicion, të gjitha institucione. Apeli është të solidarizohemi të gjithë. Nuk mund të parashikohet, por banorët janë solidar me njëri tjetrin. Duhet të ftoja të gjithë biznesmenët që kanë mundësi le ta përqendrojnë vëmendjen tek këta banorët.

Qeveria është duke vlerësuar në maksimum për akordimin e një fondi për t’iu shpërndarë banorëve të kësaj zonë të cilët do të vlerësohen sipas nivelit të dëmit për rindërtimin e banesave të tyre”, tha Çako.