Tjetër lëkundje 4.2 ballë. Epiqendra në Durrës, ndihet në Tiranë

Një tjetër lëkundje e fortë tërmeti u regjistruar paraditen e të hënës. Ajo ishte me magnitudë 4.2 ndërsa thellësia ishte rreth 2 km.

Pasgoditja ishte me epiqendër afër qytetit të Durrësit. Vala sizmike zgjati vetëm disa sekonda, ndërkohë që ishte një nga më të fortat të regjistruara në orët e fundit.

Ndërkohë, gjatë gjithë natës të së hënës janë regjistruar 13 pasgoditje më e madhja prej të cilave me magnitudë 3.2.

Sipas IGJEUM nga data 26 nëntor, kur tërmeti prej 6.4 ballë goditi vendin deri më sot, janë regjistruar në total 1371 pasgoditje.

Ato kanë qenë të shkallëve të ndryshme, disa prej të cilave kanë pasur magnitudë mbi 5.

Tërmeti i 26 nëntorit ishte shkatërrimtar për vendin. Ai la pas 51 viktima dhe qindar të plagosur, si dhe miliona euro dëme materiale.

Dëmtimet, Rama: Do t`i riparojnë ndërtuesit e tyre

Kryeministri Edi Rama kërkoi që të gjithë ndërtuesit e pallateve që kanë pësuar dëme nga tërmeti në Durrës, do t`i riparojnë ato vetë. Rama tha gjatë mbledhjes së jashtëzakonshme të Këshillit të Ministrave se ndërtuesit duhet të paraqiten brenda të hënës në Bashkinë e Durrësit dhe duhet të riparojnë dëmtimet vetë, nën supervizimin e rreptë të grupeve të inspektimit. “Sot brenda ditës të merret në bashkinë e Durrësit lista e ndërtuesve të pallateve të ndërtuara dhe të gjithë të njoftohen nëse nuk paraqiten që të marrin përsipër dhe të riparojnë të gjitha dëmet e shkaktuara nën supervizimin e rreptë të grupeve të inspektimit” tha Rama.

Më tej, Kryeministri u shpreh se këtë të hënë do të vendoset edhe për buxhetin. Ai u shpreh se do të jetë një barrë e jashtëzakonshme, duke bërë shumë ndryshime nga project-buxheti i parashikuar më herët. “Sot kemi një takim me ministrinë e Financave dhe Kryetarin e Komitetit të Rindërtimit për të parë si do të riorganizojmë buxhetin, pasi duhet të miratohet në parlament në datën 5 dhe duhet të ketë brenda edhe atë fokusin tek fatkeqët dhe rindërtimin. Buxheti ka një barrë të jashtëzakonshme për të mbajtur të gjitha nevojat, sepse jeta normale do të kthehet dhe dielli do të dalë prapë dhe asgjë nga ato që bëhen nuk mund t’u privohet njerëzve. Idetë janë të mira dhe skema që po formësohet është fituese, buxhet-donatorë dhe kontributet e njerëzve që janë të papërfillshme në raport me të tërën, por janë të nevojshme” tha Rama.

Ndwrkohw, shefi i Qeverisw foli edhe pwr strehin e tw prekurve nga twrmeti deri nw rindwrtimin e banesave. Rama tha se pas vitit tw ri, tw gjithw tw prekurit do tw strehohen nw hotele dhe apartamente me qira. “Kam një merak për ata që janë në zonat rurale për nevojën për t’u garantuar cilësi maksiamle. Duhet të fillojë identifikimi i apartamenteve që shteti do të marrë me qira, ku do të qëndrojnë deri kur të bëhet rindërtimi, që do të zgjasë, nuk bëhet sa hap dhe mbyll sytë. Pasi të kalojën Krishtlindjet edhe Vitin e ri në hotele si njerëz dhe në janar të kalojnë në apartamente që të ketë minumimin jetik, jo të shtrihen përtokë në çimento, por me pajisjet e nevojshme, me dyshekë. Mendoj që brenda 2020 duhet të jenë të gjithë të sistemuar, masa e madhe që i kanë banesat e dëmtuara që mund të riparohen, ndërkohë që ata që do të rindërtohen totalisht, do të jetojnë në kushte normale deri kur të kthehen në shtëpitë e tyre, ku do të bëhen të reja ose diku tjetër” tha ai.

Basha shkon në njësinë 6 në Tiranë, apel për ndihmë ndaj banorëve

Kryetari i Partisë Demokratike Lulzim Basha ishte në njësinë administrative 6 në Tiranë të dielën. Ai pa disa nga banesat që kanë pësuar dëmtime nga tërmeti i të martës në 26 nëntor. Basha shprehet se për këto familje nuk ka pasur ndihmë, ndaj apeloi për vëmendje të shtetit.

“Sot në njësinë administrative 6 në Tiranë, qindra banesa të shkatërruara dhe të pabanueshme. Mes vuajtjeve, stresit dhe tronditjes banorët kërkojnë vlerësim urgjent, strehim dhe ndihma ushqimore! Ata thonë se deri tani janë tërësisht jashtë vëmendjes dhe të braktisur në fatin e tyre”.

“Mirënjohje për kontributet dhe ndihmën e disa bizneseve që ndonëse në vështirësi kanë strehuar 40 familje. Ndërkohë u informova se ndihma të tjera të destinuara nga Kosova për këtë zonë janë ndalur në Kashar dhe nuk kanë arritur në destinacion. Gjithsesi vullnetarizmi nuk mjafton. Duhet menjëherë prania dhe ndihma e shtetit”, shkruan Basha.

“Ishte shkatërruar gjithçka”. Humbën 7 pjesëtar, të afërm të familjes Cakoni tregojnë dramën

Tërmeti i 26 nëntorit la pasoja të rënda për banorët e Durrësit, Tiranës, Thumanës, Lezhës, Laçit etj. Ngjarja më tragjike ishte padyshim humbja e 51 jetëve nga kjo fatkeqësi e rëndë shoqërore. Një nga më të prekurat është familja Cakoni në Thumanë, e cil humbi 7 anëtarë të familjes nga tërmeti. Të afërmit që i kanë mbijetuar tragjedisë në një prononcim për “Neës 24” thanë se kjo ishte një ngjarje shokuese për ta, kurse kanë përshkruar momentet dramatike.

Gjyshja e familjes u shpreh me lot në sy: “Kam ikur dhe kam gjetur rrëmujë vendin. Ishte shkatërruar gjithçka. Nuk e kam kuptuar më se ku jam. Nusja është në spital. Unë kam humbur vajzën e parë, djalin e gocës, goca e gocës, nusja e djalit, djali i gocës, kishte ditëlindjen, djali im 44 vjeç, goca e djalit 15 vjeçe. Kam gjallë nusen e djalit që i ka vdekur burri me dy fëmijë. Kam një djalë në Itali, e kam në burg. Ma mbajnë atje, duan lekë, lekë nuk kam. Ka 15 vjet që nuk e kam parë djalin”.

Vëllai i madh i familjes është shprehur se natën e tërmetit nuk ndodhej në shtëpi, ndërsa kur erdhi gjithçka ishte zhdukur. “Nuk mund ta besoj. Isha larg, pas 6 orësh kam ardhur. Një motër ma tha. Unë shikoja ku është hyrja, se nuk ishte më, ishte zhdukur fare, nuk di si ta përshkruaj atë moment të trishtë. Këto nga fukarallëku janë futur brenda. Unë se di sesi jam gjallë”.

Dëmet dhe situata pas tërmetit, Shahini tregon se kur do të fillojë shkolla

Me anë të një deklarate, Ministrja e Arsimit Besa Shahini bëri një bilanc të situatës së shkollave të prekura nga tërmeti. Shahi dha lajmin së pari se në Durrës nxënësit nuk do të bëjnë mësim deri në datën 9 dhjetor, ndërsa në Tiranë dhe Lezhë mësimi do të jetë i pezulluar deri në datën 5 dhjetor.

“Duke marrë parasysh gjendjen e shkollave u vendos që në Qarkun e Durrësit mësimi do të pezullohet deri më 9 dhjetor. Në qarkun e Tiranës dhe të Lezhës mësimi do të jetë i pezulluar deri më datë 5 dhjetor, ku do të fillojë mësimi. Nëse do të shtyhet do njoftohen më 4 dhjetor”, tha Shahini.

Në qaraqet e tjera, që nuk janë prekur nga tërmeti mësimi do të vijojë normalisht. Ndërkohë, Besa Shahini bëri dhe një bilanc të situatës së dëmtimeve në shkolla.

“Në Durrës e Lezhë kanë dëmtime të thella 26 shkolla. Në Tiranë dëmtime mesatare dhe të lehta janë 23, përveç Prezës që do të zhvendosen nxënësit në një shkollë tjetër. Një pjesë e shkollave në Tiranë janë mbyllur por jo të gjitha. Mbrëmë kemi bërë zhvendosjen e planeve të nxënësve tek shkollat pritëse. Kemi bërë kalkulimin e kostove dhe jemi në proces të mjeteve të transportimit. Edhe për nxënësit që janë strehuar nëpër hotele. Duhet t’i çojmë në shkollat më të afërta”, shkruan Besa Shahini.

Ndërkohë, ministrja shprehet se mësuesit do të dalin në punë në datën 2 dhjetor, veç Durrësit. Ajo thotë se do të ketë një plan pune përgatitore për mësuesit që do të dalin në punë para se të vijnë nxënësit.

“Plani i punës për detyrat e shtëpisë, e kemi mbyllur për strehimet e përkohshme. Jo vetem në hotele por edhe tek çadrat. Plan pune përgatitore për mësuesit që do të dalin në punë para se të vijnë nxënësit. Mësuesit i presim në punë me 2 dhjetor. Përveç se në Durrës që do të jetë me tolerim. Kjo është e domosdoshëm që të bëhet për të përgatitur mësimin. Nuk është opsionale por do të monitorohet. Mosparaqitja nuk paraqiti problem por tani është momenti i përgatitjes së mësimit. Jemi në gjendje të jashtë zakonshme. Duhet të vihet në plan të dytë frika. Kemi përparësi mësimin”, thotë Shahini.

Nesër mblidhet Këshilli i Sigurisë Kombëtare

Situata e jashtëzakonshme nga tërmeti, ku u shënuan 51 viktima e qindra të plagosur, ka bërë që Presidenti Ilir Meta të mbledh të hënën Këshillin e Sigurisë kombëtare.

Në fakt ky vendim i Metës pritej prej ditësh. Megjithatë, Presidenti ka vendosur që të zhvillojë mbledhjen me Këshillin e Sigurisë Kombëtare të hënën, 6 ditë pas tërmetit të fuqishëm që goditi vendin.

“Në përgjigje të interesimit të vazhdueshëm të mediave në lidhje me një mbledhje të mundshme të Këshillit të Sigurisë Kombëtare, ju sqaroj se:

Presidenti i Republikës Ilir Meta ka vendosur të thërrasë nesër mbledhjen e Këshillit të Sigurisë Kombëtare, në orën më të përshtatshme, në varësi të situatës”, thotë zëdhënësi i Metës, Tedi Blushi.

Nis puna për shembjen e “Vila Verde” në Durrës

Pas përfundimit të operacionit të kërkim-shpëtimit të trupave të personave që mbetën nën rrënoja, IKMT është duke punuar për pastrimin e zonës për ndërtetas që janë shembur apo rrezikojnë të shemben në Durrës dhe zona të tjera të prekura nga tërmeti.

Të dielën do të bëhet shembja e kontrolluar e një godine katër katëshe në Durrës, e cila u dëmtua rëndë nga tërmeti i 26 nëntorit.

Bëhet fjalë për “Vila Verde”, një ndërtesë me katër kate, e cila është rrënuar e gjitha, ndërsa rrezikon banesa të tjera pranë saj. Për shkak të strukturës delikate shembja e kësaj ndërtese po bëhet në mënyrë të kontrolluar nga fadromat.

Gjithashtu, pritet që në Durrës, Thumanë dhe Tiranë të shemben dhe shumë ndërtesa të tjera të dëmtuara rëndë nga tërmeti.

Plasaritet pallati në Bulqizë, 45 familje e braktisin

Lëkundjet e tërmeti janë ndjerë dhe në qytetin e Bulqizës. Madje, sipas News 24, një pallat ku banojnë dhjetëra familje ka pasur dëmtime. Pallati në fjalë, raportohet se ka pasur vazhdimisht probleme, ndërsa nga tërmeti i 26 nëntorit ai është bërë i pasigurt për të jetuar.

Për këtë arsye 45 familje kanë braktisur apartamentet e tyre në këtë pallat. Ndërkohë disa familje vijojnë të qëndrojnë brenda në pallat. Sipas banorëve, bashkia iu ka thënë që të dalin nga banesat, por nuk iu ka ofruar atyre një vend strehimi, raporton Balkanweb. Sipas ekspertëve të gjeologjisë në Bulqizë, pallati në fjalë paraqet rrezikshmëri për të jetuar. Ata pohojnë se duhet të bëhet evakuimi i menjëhershëm i banorëve që ende jetojnë në atë pallat.

Psikologët nga Kosova do asistojnë të prekurit nga tërmeti

Kosova ishte nga vendet e para që u solidarizua dhe u gjend pranë Shqipërisë në momentin që ra tërmeti. Veç ndihmave me forca kërkim-shpëtimi, ushqime e veshmbathje apo ndihmat financiare, 50 psikologë, 4 psikiatër, 2 epidemiolog dhe mjek, janë nisur mëngjesin e të dielës drejt Shqipërisë.

Ata do të ofrojnë asistencë për familjet e prekura në nga tërmeti në Thumanë, Durrës dhe Tiranë. Ndërkohë, sipas News 24, të dielën Shqipërinë do ta vizitojnë edhe disa deputetë nga Kuvendi i Kosovës.

Ekspedita organizohet nga Shoqata e Psikologëve të Kosovës, ku në përbërje të saj do të ketë dhe nga Shoqata e Psikologëve të Shqipërisë, që të gjithë profesionist të shendetit mendor me përvojë dhjetra vjeçare.

Nga tërmeti i 26 nëntorit humbën jetën 51 persona, ndërsa mbi 900 të tjerë mbetën të plagosur. Megjithatë, mijëra familje në Tiranë, Durrës, Krujë, Lezhë dhe zona të tjera kanë mbetur pa shtëpi pasi u shembën nga tërmeti. Gjithashtu, lëkundjet e shpeshta sizmike kanë krijuar panik te qytetarët, ndaj ndihma e psikologëve është e nevojshme për të kaluar situatën e frikës.

“Kjo nuk është politikë”, Rama i dërgon përsëri ftesë Bashës

Kryeministri Edi Rama përsëriti ftesën për kreun e opozitës, Lulzim Basha, që të ulen së bashku në tryezë për t`u bashkuar në këtë situatë të vështirë që po kalon vendin. Një ditë pasi Basha u shpreh se “nuk është koha për propagandë dhe politikë”, kreu i Qeverisë tha se nuk e kupton dot refuzimin e opozitës për t`u përfshirë në këtë proces.

“Më mundon pak mungesa e një elementi. Skepticizmi i opozitës për t`u përfshirë në këtë proces dhe për të pasur përfaqësuesit e vet. Nuk e kuptoj dot refuzimin që forcat politike të ulen në një tryezë. Duhet të reflektohet për këtë. Kjo nuk është politikë. Sepse politika në fakt ka lindur që njerëzit të adresojnë sfida dhe të zgjidhin probleme që nuk zgjidhen kur janë vetëm. Politika duhet të bëjë mrekullira. Nuk e kuptoj dot që të ulet në tryezë përfaqësia e këtij vendi, qenka propagandë”, tha Rama.

Ndaj, kreu i Qeverisë i kujtoi Lulzim Bashës se tashmë është kohë për bashkim. “Nuk dua të bëj asnjë polemikë por edhe njëherë tjetër i bëj thirrje Lulzim Bashës dhe opozitës të mos ia kursejnë popullit shqiptar këtë nevojë. Është nevoja e njerëzve të shikojnë këtu bashkim, që në këto ditë të zeza ata që nuk e shohin dot njëri-tjetrin në sy të bëjnë një hap prej asaj që ka ndodhur. Unë e kam parë me kënaqësi dhe respekt një mesazh të tij që bënte thirrje për bashkim, sepse tingëllojnë si hipokrizi ku nuk ka vepra, po ky nuk është rasti sepse besoj se mesazhi ka qenë i ndjerë”, tha Rama.