Ndryshojnë zëvendësimet në ndeshje, UEFA jep verdiktin final për këtë sezon, ja numri i lejuar

Qeveria e futbollit europian, UEFA, ka vendosur që deri në përfundimin e këtij sezoni të lejohen pesë zëvendësime në të gjithë kompeticionet e saj.

Kështu në ndeshjet e Ligës së Kombeve, kualifikueseve për Europianin dhe kualifikueseve për Europianin e femrave, trajnerët do të kenë mundësi të kryejnë pesë zëvendësime dhe jo më tre.

Gjithashtu edhe në ndeshjet e Champions League, Europa League dhe në ndeshjet e Champions League për femra do të jetë i njëjti rregull. Ndërsa klubet mund të grumbullojnë deri në 23 lojtarë, shkruan UEFA në njoftimin e saj.

Katar 2022, Shqipëria nuk shkon dot në botëror nga “Nations League”

UEFA prezantoi sistemin e ri për kombëtaret europiane që do të kualifikohen në Kupën e Botës, Katar 2022. Kontinenti i vjetër do të përfaqësohet në kompetcionin e ardhshëm të Botërorit me 13 ekipe.

Në total, janë 55 kombëtare nga Europa që do të synojnë të presin një biletë për në Kupën e Botës. Po si do të jetë rrugëtimi drejt Katarit, sipas formulës së re të UEFA-s? 55 kombëtaret nga Europa do të ndahen në 10 grupe.

Ekipet që do të renditen në vendin e parë në grup do të kualifikohen direkt. Ndërsa 10 ekipet që do të renditen në vendin e dytë në grup do të përballen në ndeshje “play-off”. Këtyre 10 ekipeve do t`i shtohen dhe dy ekipet e renditura më mirë në Nations League.

Por, nga ky kompeticion do të përzgjidhen vetëm dy ekipe nga nga Liga A dhe B. Në këtë mënyrë, Shqipëria që ndodhet në Ligën C, humb shansin për të qenë pjesë e “play-off”.

Ndaj, shansi i vetëm është që kombëtarja jonë të jetë në “play-off”, duhet të renditet e dyta në grupin përkatës. Ndërkohë, nga përballja e ekipeve të vendeve të dyta, do të dalin dhe tre skuadrat që do të plotësojnë 13-shen e kombëtareve europiane që do të shkojnë në Katar.

Presidenti i UEFA merr pjesë në hapjen zyrtare të “Arenës Kombëtare”

UEFA njoftoi të premten se Presidenti i saj, Aleksandër Ceferin do të marrë pjesë në ndeshjen e parë të Shqipërisë në Arenën Kombëtare ditën e diele. 17 Nëntori do të përfaqësojë një moment historik për futbollin shqiptar me Arenën Kombëtare në Tiranë, stadiumi i ri i caktuar për zhvillimin e ndeshjes së parë zyrtare, ndërkohë që pritësit mirëpresin me entuziazëm kampionët e Kupës së Botës, Francën.

Stadiumi, me një kapacitet prej 21.690 personash, do të jetë stadiumi më i madh në vend dhe do t’u japë tifozëve të futbollit, si të klubeve ashtu edhe të kombëtares, mundësinë për të parë ndeshjet në një mjedis modern. Përurimi zyrtar i stadiumit ka tejkaluar imagjinatën e mbështetësve të futbollit në të gjithë vendin, me biletat që u shitën me shpejtësi brenda pak ditëve.

Presidenti i UEFA-s, Aleksander Čeferin do të jetë një nga të ftuarit e nderit për ndeshjen e parë zyrtare të Arenës, dhe ai shprehet i lumtur që Tirana tashmë ka një stadium që publiku shqiptar e meriton vërtet.

“Në mënyrë që fubollit të mbetet popullor dhe të tërheqë sa me shumë të rinj në stadiume, është e domosdoshme që tifozët të kenë mundësinë që ti shikojnë ndeshjet në një ambjent të sigurtë dhe të rehatshëm. Stadiumi Air Albania është një xhevahir i vërtetë dhe do të doja t’i shprehja përgëzimet e mia Federatës Shqiptare të Futbollit dhe aktorëve të tjerë që janë përfshirë në mbikëqyrjen dhe përfundimin e kësaj arene të mrekullueshme” u shpreh Z. Čeferin.

“Gjatë viteve të fundit, Shqipëria ka shënuar një progres të jashtëzakonshëm si brenda dhe jashtë fushës në drejtim të zhvillimit të futbollit. Tashmë të rinjtë në të gjithë vendin mund të ëndërrojnë që një ditë të përfaqësojnë Shqipërinë në këtë stadium të mrekullueshëm”, shton më tej Cerfin, citohet nga deklarata e UEFA.

Gjatë viteve të fundit, “Elbasan Arena” dhe “Loro Boriçi” në Shkodër janë rikonstruktuar plotësisht dhe kanë pritur ekipin kombëtar. Ndërkohë, stadiumi “Zeqir Ymeri” në Kukës është duke u rikonstruktuar, sipas projektit të financuar bashkërisht nga FSHF dhe UEFA, nën udhëheqjen e organit drejtues evropian të futbollit që mbulon pothuajse 50% të kostove totale që vijnë nga programi i ndihmës HatTrick i UEFA-s.

“Ndeshja e së dielës do të jetë një moment historik për futbollin në Shqipëri, pasi më në fund mbështetësit nga i gjithë vendi do të mund të ndjekin Kombëtaren tonë të luajë në një arenë fantastike dhe moderne. Do të dëshiroja të shprehja mirënjohjen time ndaj UEFA-s për mbështetjen financiare që ata kanë dhënë si edhe për mbikëqyrjen e projektit, duke na ofruar ekspertizë tejet të vlefshme”, tha presidenti i FSHF dhe njëkohësisht anëtar i Komitetit Ekzekutiv të UEFA-s, Armand Duka.

UEFA zyrtarizon “Air Albania Arena”

Ndeshja Shqipëri-Francë do të luhet në stadiumin e ri në kryeqytet “Air Albania Arena”, më 17 nëntor. UEFA ka zyrtarizuar dhe miratuar stadiumin më modern në Shqipëri prej 22 mijë ulësesh, si të denjë për zhvillimin e ndeshjeve të kampionateve botërore.

Zyrtarizimi i UEFA-s hodhi poshtë çdo dyshimin që kishte lindur në lidhje me certifikimin e stadiumit dhe plotësimin e kushteve për zhvillimin e ndeshjeve botërore.

UEFA zyrtarizoi në sajtin e saj se ndeshja Shqipëri-Francë e Grupit H kualifikuese në eliminatoret e Europianit do luhet në stadiumin më të ri “Air Albania Arena”.

Stadiumi “Air Albania Arena” u testua për herë të parë më 10 nëntor në ndeshjen për femrat Vllaznia-Apolonia, ndërsa më 17 nëntor do pres ndeshjen reale mes Shqipërisë dhe Francës, ku do bëhet dhe inaugurimi i saj.

Erdogan mbron “ushtarët” e kombëtares, dhe sulmon UEFA

UEFA vijon hetimet ndaj ekipit kombëtar të futbollit të Turqisë, për festën me përshëndetje ushtarake në ndeshjen ndaj Shqipërisë dhe Francës. Rreziku që qeveria evropiane e futbollit të ndëshkojë rëndë, deri në përjashtim të Turqisë nga garat evropiane, është evident. Duket se kjo gjë ka shqetësuar presidentin e Turqisë, Rexhep Tajip Erdogan, i cili sulmoi UEFA-n duke e quajtur “qëndrim diskriminues, të padrejtë dhe politik”, hetimin që UEFA po kryen për lojtarët e ekipit kombëtar turk.

“Ne hedhim poshtë qëndrimin diskriminues, të padrejtë dhe politik të UEFA-s kundër ekipit tonë dhe klubeve tona”, tha Erdogan, raporton e përditshmja spanjolle e futbollit AS. UEFA paralajmëroi më 15 tetor se nisi procedurat disiplinore kundër Turqisë, pasi disa futbollistë bënë përshëndetje të stilit ushtarak gjatë ndeshjeve kundër Francës dhe Shqipërisë. UEFA tha se përshëndetje të tilla shihen si “një sjellje e mundshme provokuese politike”.

Sidoqoftë, rezultatet e hetimit ende nuk janë njoftuar. “Të konsiderosh përkrahjen e lojtarëve ndaj ushtarëve si një sjellje provokuese politike është më shumë se një standard i dyfishtë, është paligjshmëri e hapur”, u shpreh Erdogan. Megjithatë, duket se shqetësimi i presidentit turk, bazohet mbi faktin se pasojat në rast dënimi ndaj kombëtares do të ishin të rënda, ku nuk përjashtohet as mundësia e përjashtimit nga ky kompeticion i kampionatit evropian.

Përshëndetjet ushtarake të lojtarëve turq erdhën në një moment kur qeveria e Turqisë sapo kishte nisur ofensivën ushtarake ndaj Kurdëve në Siri. Ndërkohë, në rast se UEFA ndëshkon kombëtaren turke duke e përjashtuar nga kompeticioni, Shqipërisë i krijohet një shans për tu kualifikuar në Euro 2020.

Foto/ “Arena Kombëtare” drejt fundit. Dy inspektorë të UEFA të dielën në Tiranë

Ditët e fundit është folur shumë nëse “Arena Kombëtare” do të liçensohet nga UEFA për të zhvilluar ndeshjen Shqipëri-Francë, e cila përmbyll turneun eleminator të Euro 2020. Realstory.al pyeti UEFA-n nëse ka marrë një vendim apo jo për të lejuar Shqipërinë të luajë në “Arena Kombëtare”. Në përgjigjen e saj, UEFA shprehet: “Ne po monitorojmë nga afër punën në stadium, i cili është në fazën e tij të fundit. Miratimi përfundimtar pritet në kohën e duhur”, tha qeveria europiane e futbollit. Në fakt, duket se për vendimin zyrtar do të duhet të presim edhe disa ditë.

Dy inspektorë të UEFA-s do të jenë të dielën në Tiranë, për të ndjekur ndeshjen testuese në stadiumin e ri kombëtar. Realstory.al mësoi ekskluzivisht se inspektorët e UEFA-s do të jenë ata që do të thonë fjalën e fundit nëse në “Arenën Kombëtare” do të luhet në 17 nëntor. Anëtari i Komitetit Ekzekutiv të FSHF-s, Arben Dervishaj, që është marrë drejtpërdrejt me mbikëqyrjen e punimeve për ndërtimin e stadiumit të ri kombëtar, i tha Realstory.al se nga pala shqiptare janë përmbushur të gjitha kërkesa e lëna nga UEFA. Ai konfirmoi se të dielën dy inspektorët do të ndjekin ndeshjen Apolonia-Vllaznia për femra, e cila do të shërbejë për testimin e stadiumit.

“Do vijnë dy inspektorë të UEFA-s të dielën në ndeshjen testuese. Ata do vijnë të shohin për veten e tyre. Ne e konsiderojmë të marrë sepse detyrat që ka lënë UEFA janë plotësuar. UEFA kishte: kamerat i kemi rregulluar, problemin e gazetarëve e kemi zgjidhur. Problemin e kalimit të kabullave e kemi zgjidhur. UEFA thoshte që nuk është gati dhoma e kontrollit, tashmë ajo është gati. Ne në këtë fazë jemi duke bërë mobiluar dhe pastrojmë stadiumin. Do zhvillojmë ndeshjen. Deri te kuzhina jemi marrë. Sheshi është duke përfunduar”, tha ai.

Më tej, Arben Dervishaj tregoi edhe një detaj, që sipas tij, UEFA parimisht ka konfirmuar se ndeshja do të luhet në “Arena Kombëtare”. “UEFA nuk ka thënë që nuk do luhet ndeshja. Ajo ka thënë që ndeshja do luhet në Tiranë. Por ato nuk e bëjnë publike që ne të jemi në presion për ta mbyllur sa më shpejt. Ne i kemi çuar foto, video. Kemi bërë testin e dritave, të zjarrit, të energjisë. Është 99.9% që do luhet”, tha Dervishaj.

Ai që duket se ishte një nga problemet kryesore për UEFA-n, pozicionimi i kamerave dhe krijimi i fushëpamjes për të kapur gjithçka nga ndeshja, sipas Arben Dervishajt është përmbushur. Ai shprehet se për këtë janë krijuar platforma të veçanta, ndërsa janë bërë dhe prova filmike të cilat i janë dërguar UEFA-s, dhe ajo i ka miratuar.

“Jemi në fazën e mbylljes të të gjitha gjërave që të zhvillohet ndeshja me Francën. Të dielën është ndeshja testuese, ndërsa të dielën tjetër ëshë ndeshja me Francën. Jemi duke diskutuar me UEFA. Ne kemi aprovuar nga UEFA pozicionin e kamerave, janë në L2. Ne bëmë provë me një nga kompanit që ka të drejtën e transmetimit në Shqipëri. Erdhi këtu solli kameran, filmoi ia dërguam UEFA-s dhe është aprovuar. Është mbyllur problemi i pozicionit të kamerave në L2. Janë bërë dhe platformat e kamerave. Jo vetëm kornen, por sheh gjithçka”, shtoi Arben Dervishaj për Realstory.al.

UEFA vlerëson Enea Jorgjin, i beson ndeshjen e Europa League

Arbitri shqiptar Enea Jorgji është përzgjedhur nga UEFA për të gjykuar një tjetër ndeshje të rëndësishme në arenën ndërkombëtare. Jorgji do të jetë arbitër kryesor në takimin e radhës të Europa League mes Alkmar dhe Astana.

Takimi fazës në grupe do të luhet të enjten në orën 18:55 në Hollandë, në stadiumin e Hagës. Enea Jorgji do të ketë tre ndihmësat e tij po shqiptarë. Ata janë asistentët Rejdi Avdo dhe Ridiger Çokaj, si dhe Kridens Meta, që do të jetë arbitër i katërt në këtë takim.

Kjo është ndeshja e dytë për Enea Jorgjin në kompeticionin e UEFA Europa League. Një vit më parë Jorgji gjykoi AEK Larnaca dhe Ludogoreds në fazën në grupe, raporton Realstory.al.

Arbitri i Superligës në Shqipëri, vitet e fundit gjykoi disa ndeshje të rëndësishme në arenën ndërkombëtare, përfshirë dhe takime në kompeticionin e Nations League por dhe kualifikueset e Euro 2020.

Në këtë kompeticion, Jorgji ishte arbitër kryesor i takimit Ishuj Faroe kundër Spanjës, luajtur në 7 qershor të këtij viti, ku iberikët fituan me rezultatin 1-4.

UEFA heton Bullgarinë dhe Anglinë. Pranga 6 tifozëve

Policia bullgare identifikoi 15 tifozë, të cilët dyshohet se shkaktuan koret raciste në takimin Bullgari-Angli të disa ditëve më parë, në eleminatoret e Euro 2020. Policia arrestoi 6 prej personave të identifikuar, ndërsa tre janë shpallur në kërkim. Ndeshja, që Anglia fitoi 6-0 ndaj Bullgarisë në Sofje, u ndal dy herë në pjesën e parë pas koreve raciste të tifozëve vendas.

“Ne nuk do tolerojmë një sjellje të tillë”, tha një përfaqësues i Ministrisë së Brendshme të Bullgarisë. Ndërkohë, ky skandal, u shoqërua me dorëheqjen e Presidentit të Federatës Bullgare të Futbollit Borislav Mikhailov. Koret raciste të tifozëve bullgarë nuk u pritën mirë as nga përfaqësues të futbollit në këtë vend. Ish-futbollisti Hristo Stoichkov, u bë emocionues kur u pyet në televizion se si mund të parandalohen akte të tilla të shëmtuara.

Ai u shpreh se “tifozët nuk duhet të lejohen në stadium, dhe të përballen me ndëshkime më të rënda”. Ndërkohë, UEFA lajmëroi se nisi hetimet ndaj Federatës Bullgare të Futbollit në disa drejtime; për koret raciste, hedhjen e sendeve të ndaluara në fushë dhe prishjen e himnit kombëtar. Nën hetim është vënë dhe Federata Angleze e Futbollit për prishje të himnit kombëtar të ekipit kundërshtar, ndërsa pritet që çështja të trajtohet nga Komisioni i Disiplinës.

Licensimi, FSHF trajnon presidentët e klubeve

Federata Shqiptare e Futbollit u ka ardhur në ndihmë klubeve të futbollit në vend. Nisur nga konfuzioni i krijuar në verë, ku disa klube rrezikonin të mos liçensoheshin për të luajtur në Superligë, FSHF nisi një seri trajnimesh me presidentët dhe juristët e klubeve, për ti informuar rreth procedurave të licensimit, sipas kërkesave të UEFA-s.

Të enjten në zyrat e federatës presidentët e 10 klubeve të Superligës dhe kreu i FSHF-së, Armand Duka, diskutuan rreth hapave që klubet do të ndjekin, për të përmbushur kriteret e licensimit. Pas mbledhjes, Presidenti i Tiranës Refik Halili, u shpreh se mbledhja ishte pozitive, ndërsa u shpreh se për të ardhmen duhet bërë gjëja më e mirë për licensimin.

“Mbledhja ishte e vlefshme se asistenca ligjore a financiare që të ketë mbështetje nga specialistët, si nga klubet e federata, është shumë e mirë. Shpresojmë të dëgjojmë çfarë të metash kemi, specialistët të flasin dhe të bëjmë për të ardhmen gjënë më të mirë për çështjen e licensimit”, tha Halili. Ndërkohë, FSHF ka miratuar një kalendar me trajnime me juristët dhe presidentët e klubeve deri në fundin e vitit 2019, të cilët do të informohen për çdo gjë në lidhje me klubet për sezonin e ri 2020-2021. Me nisjen e vitit 2020, në janar, do të ngrihet grupi i punës për licensimin.

Klubet, gjatë kësaj periudhe do të paraqesin draftet e dokumentacionit paraprak për licensim, deri në datën 28 shkurt kur do të jetë dhe afati përfundimtar për dorëzimin e gjithë dokumentacionit nga ana e klubeve. Në datën 31 mars të vitit të ardhshëm, klubet do të dorëzojnë dokumentet për kiriterin financiar, ndërsa një muaj më pas, FSHF do të njoftojë klubet për rezultatet e liçensimit.

Në këtë mënyrë, do të shmanget kaosi me licensat për ekipet që do të garojnë në Superlgië, por edhe ato që do të garojnë në kupat e europës. UEFA ka vendosur kriterere strikte për klubet, më i rëndësishmi mbetet kriteri financiar. Në këtë pikë, disa nga klubet shiptare kanë pasur probleme, me borxhe të mbartura ndër vite.

Video: Fintja e Manajt ‘çmend’ rrjetin, UEFA e publikon në faqen zyrtare

Shqipëria mundi Islandën të martën në ndeshjen e raundit të 6-të kualifikues të Euro 2020, me rezultatin 4-2. Ky ishte një rezultat historik për kombëtaren tonë, pasi për herë të parë shënuam katër gola në një takim zyrtar.

Gjithashtu, për herë të parë në karrierën e tij si futbollist i kombëtares, kapiteni kuqezi, Elseid Hysaj, pas 50 takimesh, shënoi golin e parë për Shqipërinë. Ishte minuta e 52` e takimit, kur Hysaj gjeti rrjetën pas një asisti të dhuruar nga Manaj.

Por, asisti i Manajt, më shumë se goli i Hysajt, ishte më spektakolar pasi sulmuesi i Albacete në Spanjë bëri një finte të bukur. Ishte Elseid Hysaj që i dhuroi topin Mamanajt jashtë zone, teksa sulmuesi lëvizi bukur mes mbrojtjes kundërshtare dhe më pas i kaloi topin dy islandezëve duke e nxjerrë për Hysajn me finte.

Pikërisht, kjo lëvizje taktike e Manajt, është përzgjedhur nga UEFA si “Skill of the day”, apo “Aftësia e ditës”. Qeveria evropiane e futbollit e ka publikuar në faqen zyrtare momentin e fines së Manajt duke e shpërndarë edhe në rrjetet sociale, ndërsa video e sulmuesit kuqezi ka marrë shumë pëlqime.

Skill of the Day: Rei Manaj
🇦🇱 Rei Manaj wins Skill of the Day with this brilliant back-heel assist 🔥#EURO2020 #HisenseSkills
Gepostet von UEFA EURO 2020 am Mittwoch, 11. September 2019