Mero Baze: Mos e heroizoni kot Vangjush Dakon!

Nga Mero Baze

Arrestimi i një sërë zyrtarëve të urbanistikës dhe investitorëve të disa ndërtesave në Durrës, duhet të shërbejë si një proces që të provojë shkakun që prodhoi tragjedinë pas tërmetit. Ekspertiza e godinave të shembura dhe atyre ku humbën jetë njerëzish, duhet të provojë në mënyrë shkencore se çfarë ka shkuar keq në ato godina. Disa prej tyre kanë qenë godina të periudhës së fundi komunizmit, ndërtuar jashtë standarteve.

Por një pjesë e madhe janë godina të tranzicionit, të cilat, ose janë ndërtuar keq, ose ka pas ndërhyrje jashtë standarteve të ndërtimit. Verkimi i kësaj problematike, duhet të na çojë tek personat përgjegjës, dhe jo e kundërta. Nëse nisemi nga personat që duam të ndëshkojmë për betejë politike e pastaj të gjemë argumente për arrestimin e tyre, jo vetëm që rrezikojmë t’i bëjmë viktima të ndaluarit dhe të shpallen të pafajshëm, por të fshehim dhe shkaqet e vërteta të tragjedisë, që mund të na përsëritet.

Kam parë reagimin e PD, që në gjithë këtë histori, kërkon doemos arrestimin e Vangjush Dakos, si ish- kryetar Bashkie. Nuk është se kam parë ndonjë fakt që e lidh përgjegjesinë e ndonjë godine të shembur me Vangjush Dakon, por natyrisht që nuk e përjashtoj të ketë, nëse del gjatë hetimit. Por po të nisemi nga emrat e bashkiakëve, duhet të ndalojmë gjithë ish- kryetarët e Bashkisë së Durrësit, nga viti 1992, t’i mbajmë në paraburgim derisa të përfundojë gjyqi, pasi më së shumti kanë rënë godina që janë ndërtuar deri në vitin 2000, kur Durrësi ka qenë drejtuar nga PD.

Duhet të ndalojmë me këtë logjikë, Tomor Golemin, që ka drejtuar deri më ‘1996, Arqile Gorean, që ka drejtuar deri në vitin 2000, Miri Hotin, që ka drejtuar deri në vitin 2003, Lefter Kokën, që ka drejtuar deri në vitin 2007, dhe së fundmi Vangjush Dakon, pas vitit 2007. Biles dhe Muho Asllanin duhet ta ndalojmë, se kanë rënë disa godina të ndërtuara nga partia, me kontribut vullnetar. Por të nisesh nga kjo logjikë, është një mënyrë se si ti nxjerrësh të pafajshëm të gjithë, duke u marrë me të fundin, të cilit dyshoj se i ka rënë ndonjë pallat, nga ata që ka dhënë leje.

Kjo është mënyra më e keqe për të sabotuar procesin e hetimit dhe gjykimit të fajtorëve, dhe për ta lënë krimin pa emër në Durrës, Lezhë e Laç. Shikoni se çfarë ndodh me krimin tek Kavalishenca. Ndërhyrja e fundit zyrtare me tender është bërë në vitin 2008, kur ishte ministër Bujar Nishani. Aty humbi jetën një oficer policie. Sali Berisha, për ta mbuluar përgjegjësinë e tenderuesit të fundit që e ka në krye të PD, shpik që aty ka bërë orgji Saimir Tahiri, ndaj kanë rënë muret. Tani perversitete të tilla të një plaku të lig, që tenton të mbulojë krimet duke bërë politikë, nëse nuk hetohen si përpjekje për të fshehur krimin, mund të dëmtojnë procesin.

Në këtë rast PD nuk thotë të ndalohet Nishani, por të ndalohet Saimiri, se nga “orgjitë” janë tronditur muret. Hetimi duhet të jetë serioz dhe duhet të nisë nga rrënojat, për të shkuar në zyra, dhe jo nga zyrat për të shkuar tek rrënojat. Po e nisëm nga zyrat jemi duke bërë politikë dhe personazhet do mbrohen politikisht. Po e nisëm nga rrënojat, askush si mbron dot më. Mos e ribëni hero Vangjush Dakon, pa qenë nevoja, se do niseni te arrestoni Vangjushin e mund t’iu dalin tuajat me keq. Lërini prokurorët të merren me shkaqet për të gjetur fajtorët, dhe jo t’ua caktoni prokurorëve fajtorët dhe ata të gjejnë shkaqet. Kështu kanë pas vepruar kur donin të nxirrnin grupe armiqësore në komunizëm. Tani jemi duke kërkuar fajtorë, jo grupe armiqësore.

Palmer: Për Dakon ka dëshmi të forta, s`mbajmë anën e askujt në Shqipëri

Shtetet e Bashkuara të Amerikës shprehen qartë, se “përsëritja e zgjedhjeve në Shqipëri, është vendim që i përket gjykatave në vend, dhe jo SHBA-së”. Zëvendësndihmës Sekretari i Shtetit për Çështjet e Evropës dhe Euroazisë, Mathew Palmer, ka dhënë një intervistë për Zërin e Amerikës, ku ka shprehur qëndrimin se nuk i takon SHBA të marrë vendimin nëse zgjedhjet duhet të përsëriten ose jo. “Kjo varet në të vërtetë nga institucionet shqiptare. Apo jo? Dhe pikërisht për këtë arsye ne do të donim që Gjykata e Lartë të ngrihej, e përbërë nga gjyqtarë që kanë kaluar procesin e duhur të verifikimit. Ajo gjykatë do të ishte pikërisht në gjendje t’i përgjigjej asaj pyetjes. Nuk u takon Shteteve të Bashkuara që ta gjykojnë atë çështje. I takon Gjykatës së Lartë të Shqipërisë ta marrë atë vendim”, është shprehur Palmer.

Ndërkohë, lidhur me vendimin e Departamanetit Amerikan të Shtetit, për ta shpallur “non grata” Vangjush Dakon dhe familjen e tij, Palmer tregon se SHBA ka pasur dëshmi të forta në lidhje me aktivitetet e korrupsionit të Vangjush Dakos. “Mendoj se çështja këtu për Shtetet e Bashkuara është se kemi pasur dëshmi të forta në lidhje me aktivitetet e korrupsionit nga ana e zotit Dako. Dhe ne kemi autoritetet që janë të nevojshme për të ndërmarrë veprime në përgjigje të kësaj. Do të shpresoja që ky veprim të demonstronte angazhimin e Shteteve të Bashkuara për të luftuar kundër korrupsionit dhe për të ndërmarrë veprime atje ku ka prova të forta dhe bindëse të praktikës korruptive. Ky është një autoritet që ne e kemi. Është një autoritet që ne me siguri nuk kemi frikë ta përdorim. Dhe është një autoritet që ne besojmë se mund të kontribuojë në procesin e luftimit të korrupsionit publik në Shqipëri dhe gjetkë”, shprehet Palmer.

Megjithatë, sipas Mathew Palmer, vendimi i DASH për t`i ndaluar Dakos hyrjen në SHBA nuk është çështje e qeverisjes së Kryeminisrtit Rama. “Nuk mendoj se e shohim këtë si çështje të qeverisjes së Kryeministrit. Ne e shohim këtë si një çështje se si Shtetet e Bashkuara reagojnë ndaj sfidës së praktikës korruptive nga ana e atyre që janë në pozitën e besimit publik”, ka thën zyrtari amerikan. Lidhur me krizën politike në Shqipëri, dhe opinionin që është krijuar se SHBA ka mbajtur anën e qeverisë, Matheë Palmer shprehet se SHBA nuk mbajnë anën e askujt në Shqipëri, kërkojnë vetëm sundimin e ligjit. “Ne nuk po mbështesim kryeministrin Rama. Shtetet e Bashkuara nuk po mbajnë anë në mosmarrëveshjet politike të Shqipërisë. Ajo që ne po mbështesim është sundimi i ligjit, mbështesim institucionet shqiptare. Dhe ne do të dëshironim që mosmarrëveshjet politike në Shqipëri të zgjidheshin përmes këtyre institucioneve e jo përmes ndërhyrjeve nga jashtë”.

Lidhur me zgjedhjet e 30 qershorit, Palmer shprehet se procesi ishte transparent dhe votimet u zhvilluan në mënyrë të përgjegjshme, ndonëse pohon shqetësimin që “procesi i mohoi qytetarëve të Shqipërisë një alternativë kuptimplotë”. Por përgjigjet për këtë, shprehet Palmer, duhet të vijnë nga institucionet shqiptare. “Unë mund t’ju them se vëzhguesit tanë panë dhe ndoqën nga shumë afër atë që dëgjuam nga Misioni Monitorues i OSBE-ODIHR-it, pra që zgjedhjet dhe procesi aktual i votimit u zhvilluan kryesisht në mënyrë të përgjegjshme dhe transparente, por procesi i përgjithshëm i mohoi popullit të Shqipërisë një alternativë kuptimplote. Pra, ekzistojnë shqetësime dhe rezerva reale në lidhje me vetë zgjedhjet, siç artikulohen nga OSBE-ja. Përsa i përket se cilat janë përgjigjet e duhura ndaj kësaj, ne do dëshironim ta shihnim këtë të dilte nga institucionet shqiptare”.

Dako “non grata” në SHBA, Basha: Lajm i mirë (dhe i keq)

Kreu i Partisë Demokratike, Lulzim Basha ka reaguar pas vendimit të Departamentit Amerikan të Shtetit për përfshirjen e Vangjush Dakos dhe familjarëve të tij në listën e zezë, duke mos lejuar hyrjen e tyre në SHBA. Basha nuk tregohet shumë entuziast në lidhje me këtë vendim pasi sipas tij, pavarësisht vendimit pozitiv të SHBA, Dako nuk ka dalë ende parë drejtësisë shqiptare duke e cilësuar një lajm të keq.

“ Është lajm i mirë që Shtetet e Bashkuara të Amerikës kanë shpallur non grata Vangjush Dakon për “përfshirje në raste të mëdha korrupsioni.” Është lajm i keq që Vangjush Dako nuk ka dalë akoma para drejtësisë për asnjë rast korrupsioni. Vangjush Dako nuk është vetëm një politikan i korruptuar. Ai është pjesë e krimit te organizuar, në bashkëpunim me të cilin vodhi zgjedhjet për llogari të pushtetit të Edi Ramës. Si shpërblim, Vangjush Dako i dorëzoi krimit të organizuar kontrollin ekonomik dhe politik të Bashkisë së Durrësit.” – tha Basha

Sipas Bashës rasti i Dakos është një arsye e mjaftueshëm që Rama të largohet në mënyrë që të shkëputen lidhjen e politikës me krimin.”Prandaj, largimi i Edi Ramës është zgjidhja për të shkëputur lidhjet e politikës me krimin, për të vënë qeverinë në interes të qytetarëve, jo të krimit dhe të oligarkëve me të cilët vjedh çdo ditë shqiptarët.” – shkruan Basha.

DASH reagoi publikisht ditën e martë duke thënë se Vangjush Dakos së bashku me familjen e tij i është ndaluar hyrja në SHBA për shkak të “përfshirjes në raste madhore korrupsioni.”

Lista e zezë e DASH, veç Dakos dhe Llalla e Doshi

Departamenti Amerikan i Shtetit ka publikuar të martën pasdite vendimin e për t`i hequr të drejtën e përhershme Vangjush Dakos dhe anëtarëve të familjes së tij (bashkëshortes dhe dy fëmijëve), për të hyrë në territorin e Shteteve të Bashkuara të Amerikës. Në vendimin e DASH, thuhej se “Sekretari i Shtetit kur ka informacion të besueshëm se zyrtarët e huaj kanë qenë të përfshirë në korrupsion të konsiderueshëm ose shkelje të mëdha të të drejtave të njeriut, atij individi dhe familjarëve të afërt të tij, u ndalohet hyrja në Shtetet e Bashkuara të Amerikës. Por rasti i Dakos nuk është i vetmi.

Në harkun kohor të një viti, DASH u ka ndaluar hyrjen në SHBA tre zyrtarëve apo ish zyrtarëve të rëndësishëm të shtetit shqiptar, me të njëjtin motiv, përfshirjen në akte korrupsioni të rëndësishëm. Të parit që iu ndalua hyrja në SHBA ishte ish-Prokurori i Përgjithshëm Adriatik Llalla.

Në 14 shkurt 2018, ditën e të dashuruarëve, Sekretari i Shtetit Rex Tillerson, publikoi vendimin për ndalimin e hyrjes të Adriatik Llallës dhe familjes së tij në SHBA. Shkaku ishte “informacioni i besueshëm për përfshirjen në korrupsion” të ish-kryeprokurorit Llalla, ndaj të cilit tashmë rëndojnë akuza në Shqipëri për “Pastrim parash”, çështje e cila është në dorë të prokurorëve të Krimeve të Rënda.

Dy muaj pasi DASH i komunikoi publikisht Adriatik Llallës ndalimin e hyrjes në SHBA, Departamenti i Shtetit bëri të njëjtën gjë për deputetin Tom Doshi. Edhe për deputetin Doshi, në vendimin e datës 16 prill 2018 të DASH, motivi ishte i njëjtë, “përfshirja në korrupsion”. për këtë arsye, atij dhe familjes së tij, i është ndaluar hyrja në territorin e Shteteve të Bashkuara të Amerikës.

Ky është akti më ekstrem, që DASH merr ndaj personave që ka informacion se janë të përfshirë në akte korrupsioni të rëndësishëm. Gjithsesi, DASH ka marrë dhe masa të tjera ndaj zyrtarëve shqiptarë, për të cilët ka pasur informacione se kanë probleme në vendin tonë. Një ndër to, është refuzimi i vizave për të udhëtuar drejt SHBA-së, mes të cilëve është aktualisht nënkryetari i LSI Petrit Vasili. /Realstory.al/

DAKO NË LISTË TË ZEZË, DASH: AKT SERIOZ KUNDËR KORRUPSIONIT

Dako në listë të zezë, DASH: akt serioz kundër korrupsionit

Pas publikimit të lajmit nga Zëri i Amerikës, se ish-kryebashkiakut të Durrësit Vangjush Dako dhe familjes së tij, i është ndaluar publikisht hyrja në SHBA për shkak të përfshirjes në ‘korrupsion të rëndë’, ka ardhur dhe njoftimi i plotë i Departamentit Amerikan të Shtetit.

Në reagimin e tij, DASH shkruan; “Emërtim publik për shkak të përfshirjes në korrupsion të rëndësishëm të Vangjush Dakos, kryetar i bashkisë së Durrësit në Shqipëri. Sekretari i Shtetit po e përcakton publikisht kryetarin e bashkisë së Durrësit në Shqipëri Vangjush Dako, sipas Seksionit 7031(c) të Departamentit të Shtetit FY 2019”.

“Seksioni 7031 (c) parashikon që, në rastet kur Sekretari i Shtetit ka informacion të besueshëm se zyrtarë të huaj kanë qenë të përfshirë në një korrupsion të konsiderueshëm ose një shkelje të madhe të të drejtave të njeriut, ata individë dhe anëtarët e tyre të ngushtë të familjes nuk kanë të drejtë për hyrje në Shtetet e Bashkuara”.

“Përveç përcaktimit të Z. Dako, Departamenti po ashtu përcakton publikisht bashkëshortin e Z. Dako, Alba Dako, djalin e tij, Xhulio Dako dhe vajzën e tij, Kejsi Dako. Aksioni i sotëm dërgon një sinjal të fortë që Shtetet e Bashkuara janë të përkushtuara për të luftuar korrupsionin në të gjithë botën”, shkruan Departamenti Amerikan i Shtetit për vendimin ndaj Vangjush Dakos dhe familjarëve të tij.

Në këtë deklaratë të DASH, nuk jepen detaje nëse vendimi është marrë pas publikimit të përgjimeve, ku ish-kreu i bashkisë në Durrës implikohej për votat me persona të lidhur me krimin, apo Amerikanët kanë informacione në lidhje me dosje të tjera korruptive ku është i përfshirë Vangjush Dako.

DASH I NDALON HYRJEN NË SHBA VANGJUSH DAKOS DHE FAMILJES: U PËRFSHI NË KORRUPSION

Rama: Basha, të njëjtën histori sa herë ka zgjedhje, por nuk dorëzohem

Nga Durrësi, kryeministri Rama tha se Lulzim Basha ka të njëjtën histori sa herë afrojnë zgjedhjet, ai do të largohet dhe kërkon që ta marrë fitore në tavolinë përmes marrëveshjeve, duke hedhur akuza se nuk ka zgjedhje të lira dhe të ndershme dhe prandaj nuk merr pjesë. “Edhe në 2017 të njëjtën gjë bëri, erdhi poshtë zyrës time, këndoi himnin, tha fjalimin dhe zhdukej më pas.’ tha Rama gjatë takimit elektoral në Durrës.

‘U bënë të gjitha përpjekjet që Basha të futej në zgjedhje, iu lutëm jo vetëm unë por edhe ndërkombëtarët deri sa ju sos durimi. Ndërkombëtarët më thanë në 2017 futu vetëm në zgjedhje se me Bashën nuk mundemi dot, po unë nuk u ndala. Iu luta deri sa më në fund arritëm një marrëveshje dhe Luli mori jo pak por gjysmën më të rëndësishme të qeverisë. Mirëpo marrëveshja i bëri më keq, se sa më mirë. Sot në 2019 ai përsërit të njëjtin refren por këtë herë duke e çuar kërcënimin deri në djegie të mandateve.” – tha Rama

Rama cilësoi se zgjedhjet do të mbahen më 30 qershor dhe kjo gjë është e padiskutueshme. “ Këto zgjedhje do të vendosin kufirin ndarës se nuk do të ketë më politikanë mbi ligjin, që me proteste tyre mund të bëjnë çtë duan me zgjedhjet.’ Madje Rama shtoi me ironi se në këto zgjedhje, edhe pse nuk merr pjesë, Basha do të dal e do të thotë se ishte fitues, pasi do të numëroj demokratët që nuk morën pjesë në zgjedhje.

Rama nuk i ka kursyer akuzat as për presidentin Meta, duke e cilësuar si shkaktarin e thellimit të krizës politike në vend. Përmes ironisë, Rama tha se Meta u tremb as shumë sa anuloi zgjedhjet me arsyen se “në Shqipëri do bëhet nami”.

“Kemi një sistem drejtësie që nuk fshihesh më, sa i gjatë je, sa i vogël je… të gjithë të barabartë, problem i madh shumë se ke qenë apo je president, punë e madhe se je apo ke qenë kryeministër, drejtësia të merr dhe të çon aty ku e ke vendin. Këtë nuk kanë si ta pranojnë lehtësisht as Saliu as Meta. Prandaj duan ta marrin peng Shqipërinë. Dhe kjo është arsyeja pse dhunës në rrugë i shkon paralel dhuna që ushtron presidenti nga zyra. Dhe del presidenti e thotë anuloni zgjedhjet se do bëhet nami, po kujt i thua që do bëhet nami? Ata që bëjnë namin i ke në shtëpi. Kush do e bëjë namin Luli, po Lulit një fishkëllimë t’i bëjë Saliu, t’i thotë “Lul në shtëpi”, s’ka më Lul.” – tha Rama nga Durrësi

Rama nuk la pa përmendur edhe përgjimet duke i cilësuar si baltë të hedhur mbi kreun e Bashkisë Durrës, Vangjush Dakor. Kryeministri bëri një vlerësim për punën që Dako ka bërë në 12 vite në krye të qyteti duke e transformuar atë tërësisht. ‘Dako fitoi në një kohë kur në pushtet ishte Saliu me të gjithë skuadrën më të mirë që ka pasur PD-ja në historinë e saj dhe mekanizmat e saj që ju e dini si përdoreshin në kohën e tij. Kur Dako filloi mbi Olldashin dhe të tjerët mendoni se nuk do të mundte dot Grida Dumën me Salianjin.”

Takimi elektoral i kryeministrit Rama në Durrës u shoqërua me protestat e militantëve të opozitës, ashtu siç Basha kishte urdhëruar pas 21 qershorit. Në krye të protestës ishin ish-deputetët e PD-së për këtë qark dhe kryetari i degës së PD në Durrës, Ferdinand Xhaferri, por edhe përfaqësues të tjerë të opozitës si Agron Duka dhe të tjerë.

Duke marrë shkas nga kjo protestë, kryeministri Rama nuk i kurseu ironitë, duke i kujtuar kreut të degës së PD në Durrës, Xhaferrit premtimet që ka bërë kur konkurronte për Bashkinë e Durrësit përballë Dakos. “Do ishte kënaqësi e madhe që në Durrës të kishim një kandidat të PD-së që të na tregonte për Durrësin, përveç se të rrisin cilësinë e diellit, që ata e kanë në program dhe ne nuk e kemi” tha Rama për Xhaferrin.

Dako: Përgjimet janë manipuluar, nuk jam duke folur me Astrit Avdylaj

Kryetari i Bashkisë Durrësit, Vangjush Dako ka folur për përgjimet e publikuara nga “Bild”, duke i cilësuara to si manipuluese dhe që nuk ka asgjë të vërtetë. Unë nuk kam qenë fare duke folur me Astrit Avdylajn por me dikë tjetër ka thënë Dako në “Opinion”.

“Në përgjimin numër pesë unë nuk jam duke folur me Astrit Avdylin tani. Gjejeni ju me kë jam duke folur. Këtë ta sfidoj këtu. Nëse është e vërtetë që po flas me Astrit Avdylajn… Një mëndje e hollë e ka manipuluar për të krijuar një lidhje me 5 telefonatat e tjera. Në përgjimin pesë unë nuk jam duke folur me Avdylajn. Në prokurori kam dhënë dëshminë time dhe më kanë pyetur dhëmbë e dhëmballë për çdo gjë. Kanë sekuestruar të gjitha dosjet e Bashkisë në raport me këta. Unë këto i kam dëgjuar nga ju nga mediat nëpërmjet gazetës gjermane. Unë të them nuk jam duke folur me të, të bëj sfidë të hapur. Mund të jetë gabuar prokuroria.”- tha Dako

Përgjimet, Rama tregon pse nuk kandidoi më Dako në Durrës

I pyetur nga gazetari Sokol Balla nëse përgjimet ishin shkaku që Vangjush Dakon nuk kandidoi më në Bashkinë Durrës, Rama tha në Real Story se ishin një sërë faktorësh që bënë që Dako hiqte dorë nga kandidimi.

“Kemi bërë një vlerësim të të gjitha gjërave dhe vetë Dako erdhi dhe tha që nuk dua të kandidojë më pasi ishte i lodhur nga baltosja politike dhe kishte 3 mandate në krye të Durrësit. Në videot e përgjimeve nuk ka asnjë provë që vërtetojnë shitblerjen e votave dhe këto grupe kriminale që sot ndodhen pas hekurave nuk kanë marrë kurrë asnjë favor nga Bashkia e Durrësit. Për aq kohë sa nuk ka asnjë provë për shitblerjen e votave, çdo muhabet tjetër është i kotë. Kjo është një lojë politike e ndyrë që nga një anë synon goditjen e qeverisë dhe nga ana tjetër synon dëmtimin e imazhit të vendit ne procesin e integrimit. “

Përgjimet, Edi Rama: Kam neveri, janë mbajtur në sirtar për shantazh politik

Kryeministri Edi Rama ka folur për herë të parë në emisionin “Real Story” në Vizion Plus të gazetarit Sokol Balla në lidhje me publikimin e gjashtë përgjimeve të dosjes “Nr.339”. Rama e nisi fjalën e tij duke e quajtur urdhër absurd atë të Prokurorisë së Krimeve të Rënda, për të ndaluar publikimin në media të këtyre përgjimeve.

“Së pari dua të them diçka që më duket e rëndësishme, se s`më është dhënë mundësia ta them më parë. Është një urdhër absurd ai i prokurorisë për të ndaluar mediat për të publikuar këtë. Mediat për atë punë janë të nxjerrin çdo gjë, nuk ka asnjë kufizim për këtë. Mediat janë lajmsi që në këtë rast nuk ka asnjë faj”, tha fillimisht Rama.

Më tej, ai ka folur për audiopërgjimet, duke u shprehur se ndien neveri për përgjimet, pasi, sipas tij, ato janë të rrezikshme në aspektin e devijimit nga e vërteta. Megjithatë, Rama tha se Vangjush Dako tashmë nuk është më kandidat për bashkinë e Durrësit, ndaj është i lirë të përgjigjet për të vërtetën.

“Çështja ka disa aspekte, së pari e kam thënë, unë kam nerveri nga përgjimet dhe përdorimi i përgjimeve. Janë shumë të rrezikshme në aspektin e devijimit nga e vërteta. Thënë kjo ka një aspekt moral, jemi në kushtet kur kryetari i Bashkisë së Durrësit nuk është më kandidat i bashkisë, por është një njeri i lirë, që duhet të përgjigjet deri në fund lidhur me të vërtetën. Përgjimet nuk janë prova, por indicie që duhet hetuar”, tha Kryeministri Edi Rama.

Më tej, Kryeministri u shpreh se kemi të bëjmë me një katastrofë nga pikëpamja e gjithë këtij procesi, pasi sipas tij, prokurorët kanë përgjegjësi të ruajnë sekretin hetimor dhe të hetojnë. “Shikoj që ka një shëmti kur dëgjon biseda të caktuara, por se sa këto janë muhabete të materializuara në fakte, apo se sa këto janë muhabete njerëzisht që kontrollojnë planetin në telefon. Thënë kjo ka një aspekt ligjor, këtu kemi të bëjmë me një katastrofë nga pikëpamja e gjithë këtij procesi. Është përgjegjësi e prokurorëve të hetojnë, të ruajnë sekretin hetimor dhe të përputhim gjithçka. Zanafilla është te Policia e Shtetit, që ka filluar në ndjekjen e një bërthame”, u shpreh Rama.

Në fund, Edi Rama tha se e gjithë kjo nuk është gjë tjetër veç se për shantazh politik. Kryeministri u shpreh se përgjimet janë mbajtur në sirtar vetëm për shantazh politik. “Për sa i përket aspektit politik, këtu ka dicka që se ka thënë askush. Por që është aspekti më problematik, unë besoj se kjo është një dosje që është mbajtur në sirtar për shantazh politik. Kjo është një dosje që lidhet me atë që unë e kam thënë “tërmeti që do krijojë Reforma në Drejtësi në këtë proces”, tha Rama.

Në fund, Rama tha se publikimi i dy audiopërgjimeve në një gazetë gjermane ka dhe dy aspekte, sugjestionimin e shqiptarëve, ndërsa aspekti i dytë lidhet me kohën e publikimit, që përkon me momentin kur Shqipëria pret dritën jeshile nga Gjermania për çeljen e negociatave. Këtë, Rama e quajti ushqim që helmon duke u dhënë argumenta atyre që duan të kapen.

“Një material i tillë nuk është përdorur as për të hetuar, as për të kapur në flagrancë, por është përdorur për t`u mbajtur dhe për t`u nxjerrë nga politika për qëllime politike. Këto copa materiali dhe merren dhe nxirren që të ekspozohen në një gazetë me shumë tirazh shumë të gjatë në Gjermani, që synon dy gjëra: për të sugjestionuar shqiptarët këtu nga që e nxori Gjermania, dhe nga ana tjetër kjo ekspozohet në momentin kur ne presim nga gjermania të marrim një dritë jeshile për negociatat. Ky është ushqim që helmon duke u dhënë argumenta atyre që duan të kapen”, u shpreh Edi Rama.

Prokuroria e Tiranës nis hetimin për përgjimet e publikuara nga “Bild”

Pak orë pas publikimit të pesë audio-përgjimeve nga gazeta Gjermane “Bild”, Prokuroria e Tiranës ka nisur hetimin në lidhje me të dhënat e publikuara në media për çështje të hetuara nga Prokuroria pranë Gjykatës së Shkallës së Parë për Krimet e Rënda.

Sipas njoftimit zyrtar të Prokurorisë, hetimet synojnë të nxjerrin në pah arsyet e publikimit në mënyrë të paligjshme të këtyre përgjimeve që i përkasin çështjes nr 399.

“Prokuroria pranë Gjykatës së Shkallës së Parë Tiranë ka nisur hetimet në lidhje me të dhënat e publikuara në media për çështje të hetuara nga Prokuroria pranë Gjykatës së Shkallës së Parë për Krimet e Rënda”.

“Hetimet e filluara kryesisht, synojnë të nxjerrin në pah arsyet e publikimit në mënyrë të paligjshme të këtyre përgjimeve që i përkasin çështjes 339. Prokuroria do ndjekë me vëmendje rastin duke kryer veprime konkrete për zbardhjen e çështjes”, thuhet në komunikatën e Prokurorisë së Tiranës.

Përgjimet e fundit Dako-Avdylaj: