Rama: Zgjedhjet janë më 30 qershor dhe kjo nuk ndryshon

Gjatë seancës plenare, ka folur edhe Kryeministri Rama, i cili ka vënë edhe një herë theksin se zgjedhjet do të mbahen në ditën që ato janë përcaktuar me ligj, më 30 qershor.

Rama e cilësoi vendimin e opozitës për të dalë nga zgjedhjet si vetëshkatërruese dhe formë ekstreme në kundërshtim me çdo logjikë demokratike.

“Me përfundimin e afatit të regjistrimit të partive politike në zgjedhjet e 30 qershorit, opozita e rrugës ka vendosur të dalë edhe nga rruga e zgjedhjeve, pasi doli nga rruga e jetës parlamentare duke zgjedhur dy forma ekstreme në kundërshtim të plotë me vijën e logjikës demokratike. E para e panjohur dhe e padëgjuar, e dyta jo e panjohur, por e provuar si një rrugë e vetëshkatërrimit. Aty ku opozitat kanë zgjedhur të braktisin zgjedhjet, praktikisht kanë marrë prapësht një periudhë të gjatë rrënimi dhe vështirësish për rindërtim. Në vend që të luftojnë me program dhe ide ka zgjedhur të luftojë me kërcënime dhe kapsolla. Në vende t’i përfaqësojë zgjedhësit e vetë në këtë sallë dhe në zgjedhje ka vendosur ti nxjerrë edhe ata nga rruga e betejës demokratike. Në vend t’i udhëheqë në rrugën e betejës demokratike ka vendosur t’i përdorë si mish për top duke i përdorur. Kjo është e papranueshme nga askush.” – ka thënë Rama

Gjatë fjalës së tij, Rama tha nuk ishte faji i qeverisë për djegien e mandateve dhe përjashtimin e opozitës nga zgjedhjet lokale dhe u shpreh i vendosur se pavarësisht kërcënimeve të opozitës zgjedhjet do të mbahen.

“Ne nuk kemi ndonjë zgjedhje tjetër përveç të vijojmë rrugën tonë pa u ndaluar të merremi me ata. Dmth pa u devijuar nga rruga e zgjedhjeve të 30 qershorit, pavarësisht kërcënimit apo shantazheve. Unë i mirëkuptoj ata që ndryshe nga unë mendojnë se zgjedhjet pa opozitë janë anormale, por dua t’u them se kjo nuk është as zgjedhja jona, as faji ynë. Ne kemi bërë gjithçka që kjo mos ndodhë.”- tha Rama

Balla kërcënon Lulin dhe Monikën: 7 vjet burg po penguat zgjedhjet

Gjatë takimit me koordinatorët dhe strukturat e partisë në Elbasan, Taulant Balla ka bërë edhe një deklaratë kërcënuese për këdo që tenton të pengojë zhvillimin e zgjedhjeve më 30 qershor.

Gjatë prezantimit të kandidaturës së PS-së për Bashkinë Përrenjas, Balla tha se nëse Luli dhe Monika tentojnë të pengojnë qytetarët të votojnë do të dënohen me burg.

“Më 30 Qershor do të mbahen zgjedhjet vendore dhe ta harrojë Monika, Luli, Saliu që mund të pengojnë popullin e Përrenjasit të shkojnë të votojnë. Është vepër penale, dënohet me 7 vjet burg kushdo që pengon zgjedhësit të votojnë, kushdo që dhunon qoftë edhe derën e qendrës së votimit.” – shkruan Balla

Më në fund, më 30 Qershor, pas 4 vitesh kemi mundësinë të ndryshojmë fytyrën e Bashkisë së Prrenjasit. Kemi shansin t'u…
Publiée par Taulant Balla – Faqja Zyrtare sur Samedi 20 avril 2019

Zyrtarizohet kandidatura e PS për Bashkinë Përrenjas

Nuri Belba do të jetë kandidati që do të përfaqësojë Partinë Socialiste në Bashkinë e Përrenjasit. Ka qenë vetë kreu i grupit parlamentar të PS, Taulant Balla që ka zyrtarizuar kandidatin e PS për kryetar bashkie në këtë zonë.

Balla tha se Belba është një kandidat dhe njeri që njihet për ndershmërinë e tij dhe do të ndreq të gjitha gabimet e bëra nga bashkia gjatë 4 viteve të fundit. Aktualisht kryetare e Bashkisë së Përrenjasit është Miranda Rira, e cila është zgjedhur nën logon e LSI-së.

“Më në fund, më 30 Qershor, pas 4 vitesh kemi mundësinë të ndryshojmë fytyrën e Bashkisë së Përrenjasit. Kemi shansin t’u ofrojmë qytetarëve të Përrenjasit shërbimin e duhur, korrektësinë dhe mbi të gjitha ndershmërinë. Në një takim të ngushtë me drejtuesit e Partisë Socialiste Përrenjas ishim të gjithë në një mendje se kandidati ynë më i mirë është deputeti Nuri Belba, i cili për 4 vitet e ardhshme, në krye të bashkisë së Përrenjasit, do të punojë shumë, jo vetëm për t’u shërbyer qytetarëve, por edhe për të ndrequr gabimet e 4 viteve të kaluara. Nuri Belba është një kandidaturë shumë e mirë për Bashkinë e Përrenjasit. Kemi një shans të artë për të vendosur një njeri që gjithë jetën është karakterizuar nga ndershmëria. Por tashmë është koha gjithashtu të kërkojmë ndjesë përpara qytetarëve për atë gabim trashanik që e lamë Bashkinë e Përrenjasit në duart e LSI. Një drejtuese bashkie që zhgënjeu besimin e banorëve, po të kemi parasysh numrin e madh të fondeve që ka marrë bashkia dhe cilësinë tmerrësisht të dobët të punëve.” – shkruan Balla

Më në fund, më 30 Qershor, pas 4 vitesh kemi mundësinë të ndryshojmë fytyrën e Bashkisë së Prrenjasit. Kemi shansin t'u…
Publiée par Taulant Balla – Faqja Zyrtare sur Samedi 20 avril 2019

Zgjedhjet lokale, Balla: Edhe po të garonte i vetëm, Basha sërish do humbiste

Kreu i grupit parlamentar të PS, Taulant Balla ka zhvilluar një takim me koordinatorët dixhitalë të qarkut të Elbasanit, për organizimin e strukturave elektorale në zgjedhjet lokale të 30 qershorit.

Me një postim në Facebook, Balla tha se qytetarët tashmë dinë të bëjnë diferencën e qeverisje së bashkive nga PS dhe nga ato që qeverisen nga PD dhe LSI, duke e cilësuar 30 qershorin si ditën e çlirimit për bashkitë që drejtohen nga Luli e Monika.

“Më 30 Qershor zgjedhjet do të zhvillohen dhe në këtë datë çdo shqiptar ka të drejtën të votojë Kryetarin e Bashkisë. Shqiptarët dinë të bëjnë shumë mirë dallimin mes bashkive që drejtohen nga PS dhe bashkive që drejtohen nga Luli dhe Monika, e të cilat ka ardhur koha t’i çlirojmë nga kapja prej tyre. Zgjedhja është aq e thjeshtë sa ne jemi të sigurt se edhe po të garonte në zgjedhje i vetëm, Lulzim Basha sërish do të humbte, pasi shqiptarët e refuzojnë Bashën, partinë e tij pa ide dhe alternativën e tij të dhunës, politikën e tij të baltës dhe gënjeshtrës. Lulzim Basha mendon vetëm për veten e tij e për asgjë tjetër. 100% për Bashën, 0% për Shqipërinë.” – shkruan Balla

Gjatë takimit në Elbasan, Balla ka diskutuar për komunikimin dixhital, që krijon një marrëdhënie korrekte dhe të vazhdueshme me mediat gjatë fushatës zgjedhore. Balla njoftoi gjithashtu se në portalin e ri “Bashkitë që duam” do të publikohen axhendat e çdo kandidati duke i dhënë mundësinë mediave dhe shoqërisë civile të njihen më mirë.

Edhe 70 ditë na ndajnë nga zgjedhjet vendore të 30 Qershorit dhe për këtë qëllim kemi nisur tashmë organizimet e të…
Publiée par Taulant Balla – Faqja Zyrtare sur Samedi 20 avril 2019

Lokalet, Ambasada e SHBA: Parlamenti vazhdon të funksionojë

Ambasada Amerikane ka thënë për Zërin e Amerikës se në zgjedhjet lokale të 30 qershorit duhet të ketë një përfaqësim të gjerë politik. E ngarkuara me punë, Leyla Moses-Ones tha se nxisim këto që kërkon të regjistrohet në këto zgjedhje duke mbështetur kështu edhe opozitën e re në parlament. Gjithashtu ajo thotë se ky është rasti më i mirë i partive që janë larguar nga parlamenti për t’u riangazhuar sërish në procesin politik, ku shqiptarët të kenë një gamë të gjerë kandidatësh që do i përfaqësojnë.

Lexoni shkrimin e plotë të VOA-s/ Në Shqipëri, ambasada amerikane tha sot se ajo “nxit këdo që mendon të kandidojë që të regjistrohet në zgjedhjet vendore të 30 qershorit.” Në përgjigje të interesimit të Zërit të Amerikës për qëndrimin e ambasadës së Shteteve të Bashkuara ndaj zgjedhjeve vendore dhe pjesëmarrjes së partive të opozitës, ndërkohë që afati për regjistrimin pranë Komisionit Qëndror të Zgjedhjeve, po afron, e ngarkuara me punë Leyla Moses-Ones solli në vëmendje deklaratat e Zëvendës Ndihmës Sekretarit Matthew Palmer në Tiranë, i cili, si theksoi diplomatja amerikane “u bëri thirrje atyre partive që kanë braktisur institucionet e Shqipërisë që të riangazhohen në procesin politik. Pjesëmarrja në zgjedhjet vendore të qershorit është mundësia më e mirë për ta, që ta bëjnë këtë”.

E ngarkuara me punë u shpreh për Zërin e Amerikës, se ambasada “mirëpret konkurrimin demokratik të hapur dhe energjik në kutinë e votimit. Votuesit shqiptarë duhet të kenë mundësinë të zgjedhin mes një game të gjerë kandidatësh që do t’i përfaqësojnë vërtet ata. Nxisim këdo që mendon të kandidojë që të regjistrohet”, tha ajo

Diplomatja amerikane përshëndeti njëkohësisht “hapat konstruktivë të opozitës në parlament dje, të cilët formalizuan më tej praninë dhe pozicionet e tyre si deputetë. Formimi i grupeve parlamentare – shtoi ajo – do të forcojë më tej aftësinë e tyre për të përfaqësuar zgjedhësit e tyre si anëtarë aktivë të parlamentit. Parlamenti i Shqipërisë vazhdon të funksionojë. Ky vazhdim i proceseve parlamentare – përfshi hyrjen e deputetëve të rinj, zhvillimin e debateve dhe miratimin e ligjeve – është shenjë e vazhdimësisë dhe stabilitetit të këtij institucioni të rëndësishëm demokratik”, nënvizoi e ngarkuara me punë e ambasadës amerikane.

Një ditë më parë, Partia Demokratike dhe Lëvizja Socialiste për Integrim bënë të qartë se po shkojnë drejt bojkotimit të zgjedhjeve vendore. Kryesia e Partisë Demokratike dhe më pas Këshilli Kombëtar, miratuan një propozim të kryetarit Lulzim Basha sipas të cilit “PD të regjistrohet në zgjedhje vetëm pasi të jenë krijuar kushtet për zgjedhje të lira dhe të ndershme”. Sipas Partisë Demokratike “kriza e rëndë politike në vend, nuk mundëson standardet demokratike për zgjedhje të lira dhe të ndershme”.

Por përveç mospjesëmarrjes, PD-ja sipas propozimit të zotit Basha do të angazhohet dhe për të bllokuar zhvillimin e zgjedhjeve. “Partia Demokratike e Shqipërisë angazhohet në mbrojtje të demokracisë dhe të drejtës së votës së lirë të mos lejojë përveç zgjedhjeve të lira asnjë farsë elektorale”, thuhet në vendim ndërsa saktësohet se angazhohet gjithashtu dhe që “të pamundësojë përmes përshkallëzimit të aksionit opozitar dhe qytetar, mbajtjen e zgjedhjeve fasadë, të diktuara nga krimi i organizuar dhe paratë e pista që shkatërrojnë demokracinë dhe vullnetin e qytetarëve shqiptarë”.

Në të njëjtën linjë ishte dhe LSI-ja. “Aksioni politik i LSI-së i inkuadruar në tërësinë e veprimit politik dhe qytetar të opozitës, do të vazhdojë me vendosmëri për të mos lejuar që në këtë vend të ketë më zgjedhje farsë”, deklaroi nënkryetari Luan Rama.