Donald Trump e ka hedhur poshtë përgjigjen e Iranit ndaj propozimeve amerikane për t’i dhënë fund luftës duke e quajtur “krejtësisht të papranueshme”.
Agjencia gjysmëzyrtare e lajmeve Tasnim e Iranit tha se propozimi i Teheranit, i dërguar nëpërmjet Pakistanit, i cili ka shërbyer si ndërmjetës, përfshinte një përfundim të menjëhershëm të luftës në të gjitha frontet, një ndalim të bllokadës detare amerikane të porteve iraniane dhe garanci për mossulme të mëtejshme ndaj Iranit.
Sipas mediave shtetërore iraniane, propozimi i Teheranit përfshin një kërkesë për kompensim për dëmet e luftës dhe një theks në sovranitetin iranian mbi Ngushticën e Hormuzit. Trump tha në rrjetet sociale se e lexoi përgjigjen e të ashtuquajturit përfaqësues të Iranit dhe nuk e pëlqeu.
Media amerikane Axios raportoi se memorandumi njëfaqësh i SHBA me 14 pika përfshin dispozita të tilla si pezullimi i pasurimit bërthamor iranian, heqja e sanksioneve dhe rivendosja e tranzitit të lirë përmes Ngushticës së Hormuzit.
Shumë nga kushtet e përcaktuara në memorandum do të vareshin nga arritja e një marrëveshjeje përfundimtare.
Një armëpushim që synonte të lehtësonte bisedimet për t’i dhënë fund luftës së nisur nga SHBA dhe Izraeli në shkurt është respektuar kryesisht, pavarësisht shkëmbimeve të herëpashershme të sulmeve. Më parë Trump kishte përsëritur se lufta në Iran do të “mbarojë shpejt”, por gjithashtu kishte kërcënuar Teheranin me bombardime nëse nuk pranonte marrëveshje.
Kryeministri izraelit Benjamin Netanyahu nga ana tjetër tha për CBS News se rezervat e uraniumit të pasuruar të Iranit duhet të “hiqen” përpara se lufta kundër Iranit të konsiderohet e përfunduar.
Ndërkohë Irani ka vazhduar të bllokojë ngushticën strategjike të Hormuzit, duke shkaktuar një rritje të çmimeve botërore të naftës. SHBA, nga ana e tyre, kanë zbatuar një bllokadë të porteve iraniane për të ushtruar presion mbi Teheranin që të bjerë dakord me kushtet e tij – një veprim që e ka zemëruar Iranin.
Një zëdhënës ushtarak iranian tha se anijet që kalojnë nëpër Ngushticën e Hormuzit do të përballen me “pasoja të rënda” nëse nuk bashkëpunojnë më parë me Teheranin.