Edhe pse fillimi i shtatorit u karakterizua nga temperatura të larta dhe me disa vranësira të lehta, duket se vjeshta ka trokitur duke sjell stuhi të forta ere dhe reshje shiu. Ditën e enjte i gjithë vendi u përfshi nga erërat e forta, vranësira dhe reshje shiu, ku në disa vende ka shkaktuar edhe dëme materiale.
Në qytetin e Fierit erërat e forta krijuan kaos duke shkaktuar edhe thyerjen e disa pemëve që fatmirësisht nuk kanë lënë të lënduar në njerëz. Ndërsa në qytetin Korçës, era ka këputur një kabull të shtyllës së tensionit të lartë duke rrezikuar jetën e një banori. Ngjarja ka ndodhur në fshatin Voskop, ku kabulli ka rënë mbi parakolpin e një makine që po kalonte. Fatmirësisht shoferi arrit të dilte i pa lënduar, ndërsa pjesa e përparme e makinës është dëmtuar.
Era e fortë ka qenë prezente edhe në Tiranë, por deri tani nuk raportohet të ketë shkaktuar dëme materiale.
Në Krujë, pavarësisht reshjeve të lehta, një zjarr i përmasave të mëdha ka rënë në Kodrat e Borizanës. Zjarri ka rënë në një sipërfaqe me pisha në vendin e quajtur Kodra e Putereve, ndërsa zjarri po përhapet me shpejtësi për shkak të erërave të forta. Zjarri ka djegur një sipërfaqe prej 2 hektarësh dhe ndodhet rreth 500 kilometra larg banesave.
Zjarrfikëset ndodhen në vendin e ngjarjes , por e kanë të pamundur të ndërhyjnë për shkak të terrenit të vështirë.
